1. Yehowa gaw shi hpe nawku ai ni hpe hpa galaw na matu saw shaga ai kun? (Sumla hpe mung yu u.)

 SHALAN shabran lam hte lam matsun hpe kadai kaw hpyi lu ai kun? Mahtai hpe anhte chye ai. Yehowa kaw akyu hpyi ai hku nna re. Dai zawn galaw na matu Yehowa anhte hpe saw shaga da ai. Chyahkring hkring “n sim n sa akyu hpyi” shangun mayu ai. (1 Ht 5:17) Prat hkrun lam shagu hta Shi a lam matsun lu na matu, wanglu wanglang shi kaw akyu hpyi mai ai. (Gsh 3:5, 6) Yehowa gaw n hpaw n-ya jaw ya ai Karai Kasang re ai majaw, Shi kaw galoi raitim akyu hpyi mai ai.

2. Ndai sumhpa hta hpa lam hkaja na kun?

² Akyu hpyi lu ai ahkang hpe anhte manu shadan ai. Raitim, aten la nna akyu hpyi na matu yak chye ai. Akyu hpyi ai atsam rawt jat ra ai ngu nna mung hkamsha chye ai. Kabu hpa gaw, Chyum Laika hta lam matsun hte n-gun jaw ga law law lawm ai. Ndai sumhpa hta, Yesu hpe kasi la nna akyu hpyi na matu aten nga hkra gara hku galaw lu ai lam hkaja na re. Akyu hpyi ai atsam rawt jat hkra karum ya ai, ahkyak ai lam 5 hpe mung hkaja mat ga.

3. Akyu hpyi ai hte seng nna Yesu hpa hpe chye da ai kun?

³ Yesu gaw, akyu hpyi ga hpe Yehowa manu shadan ai lam chye ai. Mungkan ga de n sa shi ai shaning law law kaw nna, sadi dung ai num, la ni a akyu hpyi ga ni hpe Kawa mahtai jaw ya ai hpe shi mu wa ai. Ga shadawn, Hana, Dawi, Elia hte kaga sadi dung ai masha law law a myit masin mahkra hte hpyi ai akyu hpyi ga ni hpe Kawa htai ya ai shaloi, makau  hta Yesu nga taw ai. (1 Sa 1:10, 11, 20; 1 Hk 19:4-6; Shk 32:5) Dai majaw, kam ai myit hte ayan akyu hpyi na matu sape ni hpe Yesu sharin ya ai.—Mat 7:7-11.

4. Yesu a akyu hpyi ga kaw na hpa sharin la lu ai kun?

⁴ Yesu gaw Yehowa kaw akyu hpyi nna sape ni hpe kasi madun wa ai. Magam gun ai aten ni hta Yesu chyahkring hkring akyu hpyi ai. Shi gaw bungli grai law ai, makau hta masha ni grai nga ai majaw, akyu hpyi na aten nga hkra galaw ra ai. (Mrk 6:31, 45, 46) Tinang hkrai san san akyu hpyi na matu jahpawt jau jau rawt ai. (Mrk 1:35) Kalang mi hta, ahkyak ai dawdan lam garai n jahkrat shi yang, shana tup akyu hpyi ai. (Luk 6:12, 13) N si shi ai shana hta, mungkan ga na shi a ahkyak htum magam lit hpe ngut kre lu hkra, chyahkring hkring akyu hpyi ai.—Mat 26:39, 42, 44.

5. Akyu hpyi ai lam hta Yesu hpe gara hku kasi la lu ai kun?

⁵ Bungli kade law ai raitim, akyu hpyi na matu aten la ra ai lam Yesu a kasi ningli gaw sharin ya ai. Anhte mung Yesu zawn, jahpawt jau jau (sh) shana maga de akyu hpyi na matu galaw da mai ai. Dai hku galaw ai gaw, Yehowa jaw ai ndai laklai ai kumhpa hpe manu shadan ai lam madun ai re. Akyu hpyi lu ai ahkaw ahkang a lam shawng nnan sharin la lu ai aten hta, grai chyeju dum wa ai hpe naw matsing ai ngu nauna Lin tsun dan ai. “Yehowa kaw aten shagu akyu hpyi mai ai lam ngai chye wa ai shaloi, Shi hpe hku hkau ai manang hku nna mu na matu, akyu hpyi ai atsam rawt jat mayu wa na matu ngai hpe karum ya ai” ngu shi tsun ai. Anhte law malawng dai hku sha hkamsha na re. Anhte akyu hpyi shalawm mai ai ahkyak ai lam 5 hpe hkaja yu ga.

6. Shingran 4:10, 11 hku nga yang, Yehowa gaw hpa hpe lu ging ai kun?

⁶ Yehowa hpe shakawn u. Laklai ai shingran langai hta, sumsing lamu kaw Yehowa hpe nawku nga ai salang 24 hpe kasa Yawhan mu wa ai. Dai salang ni gaw, Karai Kasang hpe shakawn nna, Shi gaw “hpung shingkang, arawng sadang hte hpung dagu lu la” ging ai ngu tsun ai. (Shingran 4:10, 11 hpe hti u.) Sadi dung ai lamu kasa ni mung Yehowa hpe shakawn shagrau na lam law law nga ai. Shanhte  gaw sumsing lamu hta shi hte rau nga nna, shi a lam atsawm chye lu ai. Shi galaw ai lam ni kaw na shi a atsam ningja ni hpe mu lu ma ai. Yehowa galaw ai lam ni hpe mu ai shaloi, shi hpe shakawn mayu wa ai.—Yob 38:4-7.

7. Hpa lam a matu Yehowa hpe shakawn mai ai kun?

⁷ Anhte mung akyu hpyi ai ga ni hta Yehowa hpe chyeju dum ai lam, tsawra ai lam tsun nna shakawn mayu ai. Chyum Laika hti ai, hkaja ai shaloi, laksan hku nna nang ra sharawng ai Yehowa a atsam ningja ni hpe chye hkra shakut u. (Yob 37:23; Rom 11:33) Dai atsam ningja ni hte seng nna gara hku hkamsha ai lam Yehowa hpe tsun dan u. Tinang hte hpunau nauna yawng hpe karum ya ai majaw mung, Yehowa hpe shakawn mai ai. Shi anhte hpe galoi mung lanu lahku ya ai, makawp magam ya ai.—1 Sa 1:27; 2:1, 2. 

8. Yehowa hpe chyeju dum ra ai lam nkau gaw hpa ni kun? (1 Hkawhkam Labau 16:34)

⁸ Yehowa hpe chyeju dum u. Akyu hpyi ai shaloi Yehowa hpe chyeju dum ai lam law law tsun dan mai ai. (1 Hkawhkam Labau 16:34 hpe hti u.) Anhte lu da ai mai kaja ai kumhpa yawng gaw, Yehowa jaw da ai majaw chyeju dum mai ai. (Yak 1:17) Ga shadawn, mauhpa hpan da lam ni hte tsawm htap ai mungkan ga a matu chyeju dum mai ai. Anhte lu da ai asak, myit mada lam, manang ni, nta masha ni a matu chyeju dum mai ai. Yehowa hte jinghku hku lu ai laksan ahkawng ahkang a matu mung chyeju dum mai ai.

9. Yehowa hpe chyeju dum ai myit hpa majaw shalat la ra ai kun?

⁹ Yehowa hpe anhte nan chyeju dum ra ai lam ni hpe myit na matu grai shakut ra chye ai. Chyeju n chye dum ai mungkan hta anhte asak hkrung nga ai. Mungkan masha ni gaw shanhte lu da ai lam ni a matu chyeju n dum ma ai. Shanhte lu mayu ai hpe sha grau myit maju jung ai. Dai zawn myit jasat nga wa yang, tinang lu mayu ai hpe sha akyu hpyi nga na re. Dai hku n byin hkra, Yehowa galaw ya ai lam yawng hpe chyeju dum ai myit matut madun ra ai. Chyeju dum ai myit hpe shalat la ra ai.—Luk 6:45.

10. Chyeju dum ai myit gaw hkamjan lu hkra naunau langai hpe gara hku karum ya ai kun? (Sumla hpe mung yu u.)

¹⁰ Chyeju dum ai myit gaw, mayak mahkak ni hpe hkamjan lu hkra karum ya ai. 2015, January 15 Sin Langchyi hta lawm ai nauna Hkyun-suk a lam hpe yu yu ga. Shi hta sinwawp mawng ana byin nga ai hpe chye dat ai. Shi ndai hku tsun ai: “Ngai grai myit daw mat ai. Yawng sum mat sai ngu hkamsha nna grai hkrit wa ai.” Hkamjan lu hkra shi hpe hpa gaw karum ya ai kun? Shana shagu, n yup shi yang nta magaw shinggan daw de sa nna, lani mi laman a matu chyeju dum mayu ai lam 5 hpe akyu hpyi tsun dan ai. Dai hku galaw ai gaw myit tsang lam hpe shayawm ya nna, Yehowa hpe tsawra ai lam madun na matu shadut ya ai. Yehowa gaw, sadi dung ai  mayam ni yakhkak hkrum ai shaloi, karum ya ai ngu shi hkamsha wa ai. Mayak mahkak ni hta na kaja ai lam ni grau law ai hpe shi chye wa ai. Hkyun-suk zawn, anhte mayak mahkak ni hkrum nga tim, Yehowa hpe chyeju dum mai ai lam law law nga ai. Akyu hpyi nna chyeju dum ai lam madun ai gaw, matut myit simsa nna hkamjan lu hkra karum ya lu ai.

11. Sumsing lamu de Yesu lung mat wa ai hpang, sape ni hpa majaw nden marai ra wa ai kun?

¹¹ Hkaw tsun gwi ai nden marai jaw na matu Yehowa kaw hpyi u. Sumsing lamu de Yesu garai n lung shi ai shaloi, sape ni hpe “Yerusalem mare hte Yuda mung ting, Samari mung hte lamu ga htum hkra” shi a lam sakse hkam ai lit hte seng nna bai shadum ya ai. (Kas 1:8; Luk 24:46-48) Aten loi na ai hpang, Yuda ningbaw ni gaw kasa Petru hte Yawhan hpe rim la nna, Yuda Tara Rung Daju de sa kau ai. Shanhte hpe matut n hkaw tsun na matu tsun ai sha n-ga, jahkrit shama ai lam ni pyi galaw ai. (Kas 4:18, 21) Petru hte Yawhan gara hku bai htang ai kun?

12. Kasa 4:29-31 hku nga yang, sape ni hpa galaw wa ai kun?

¹² Jahkrit shama ai Yuda nawku htung ningbaw ni hpe Petru yan Yawhan ndai hku tsun ai: “Karai Kasang a ga madat na hta, nanhte a ga mahtang madat yang, Karai Kasang a man e mai n mai gaw, nanhte she daw dan yu mu. An chyawm gaw, mu la, na la sai lam ni hpe n tsun ai, n nga lu ga ai.” (Kas 4:19, 20) Shan lawt wa ai hpang, sape ni gaw Yehowa a myit ra ai lam hpe myit maju jung na matu nsen shaja let ndai hku akyu hpyi ai: “Na a mayam ni, na a mung ga hpe nden ja ai myit hte tsun dan nga lu hkra, karum ya mi.” Shanhte a akyu hpyi ga hpe Yehowa htai ya ai.—Kasa 4:29-31 hpe hti u.

13. Hpunau Jin-hyuk kaw na hpa sharin la lu ai kun?

¹³ Ahkang aya nga ai ni gaw anhte hpe n hkaw na matu tsun tim pyi, matut hkaw tsun ai hku nna sape ni hpe kasi la mai ai. Lapran nga ai majaw htawng jahkrat hkrum ai hpunau Jin-hyuk a lam hpe yu yu ga. Langai hkrai sharen da hkrum ai htawng masha nkau mi hpe yu lajang na lit lu ai. Raitim, Chyum Laika lam ni, shi a lit hte n seng ai kaga lam ni hpe n mai tsun ai. Ahkaw ahkang lu shagu, tengman lam hpe hpaji hte hkaw tsun gwi na matu akyu hpyi ai. (Kas 5:29) Shi ndai hku tsun ai: “Chyinghka kaw minit 5 galaw ai chyum ga sharin law law hpe hpang lu hkra, nyan hpaji hte nden marai jaw ai hku nna, nye a akyu hpyi ga hpe Yehowa htai ya ai. Shana hta, htawng manang ni hpe hpang shani jaw na matu laika ni ka ai.” Hkaw tsun bungli ngut kre hkra Yehowa karum ya na hpe anhte mung kam mai ai. Jin-hyuk zawn sha, nyan hpaji hte nden marai jaw na matu hpyi shawn mai ai.

14. Anhte manghkang ni hkrum ai shaloi hpa gaw karum ya lu ai kun? (Shakawn 37:3, 5)

¹⁴ Manghkang ni hkrum ai shaloi Yehowa kaw karum hpyi u. Anhte law malawng gaw hkamja lam (sh) myit hkamsha lam, tsawra ai marai langai si mat ai, dinghku mayak mahkak, zingri zingrat lam (sh) kaga manghkang ni hkrum nga ai. Kap bra ana ni hte majan ni gaw, dai manghkang ni hpe hkamjan na matu grau yak shangun ai. Yehowa kaw myit masin mahkra hte akyu hpyi u. Shi hpe hku hkau ai manang langai zawn, na a masa lam ni tsun dan u. Yehowa gaw na akyu a matu “shabyin ya na” hpe kam u.—Shakawn 37:3, 5 hpe hti u.

15. Akyu hpyi ai gaw “ru yak jam jau hkrum ai shaloi hkamjan” lu hkra gara hku karum ya ai kun? Ga shadawn jaw u. 

 ¹⁵ “Ru yak jam jau hkrum ai shaloi hkamjan” lu hkra karum ya na matu, n sim n sa akyu hpyi u. (Rom 12:12, NWT) Yehowa gaw shi hpe nawku ai ni hkamjan nga ai hpe chye nna ‘shanhte jahtau ai hpe shi na ai.’ (Shk 145:18, 19) Dai lam jaw ai hpe asak 29 ning re ai ningshawng nauna Hkriste chye wa ai. Shi gaw n myit mada ai sha grai sawng ai hkamja lam manghkang byin wa ai. Shi grai myit daw wa ai. Hpang de, shi kanu mung grai machyi sawng nga ai hpe chye dat ai. Shi ndai hku tsun ai: “Shani shagu ra ai n-gun atsam jaw rit ngu Yehowa kaw n sim n sa akyu hpyi ai. Tinang hkrai hkaja ai lam hte zuphpawng ni lung ai hku nna, kaja ai wenyi arawn alai nga hkra shakut ai. Akyu hpyi ai gaw yakhkak ai aten ni hpe hkamjan lu hkra karum ya ai. Yehowa gaw ngai hte galoi mung nga ya ai hpe chye ai, dai gaw shalan shabran lam grau nna lu la shangun ai. Ya aten, ngai tsep kawp mai mat na n raitim, myit simsa lam jaw ai hku nna nye a akyu hpyi ga hpe Yehowa mahtai jaw ai.” Yehowa gaw “tara hkungga ai ni hpe agung alau kata na mawai la na” hpe anhte galoi n malap ga.—2 Pe 2:9.

16. Gunglau ai lam ni hpe ninghkap lu hkra Yehowa a karum shingtau lam hpa majaw ra ai kun?

¹⁶ Gunglau ai lam ni hpe ninghkap lu hkra Yehowa kaw karum hpyi u. Anhte n hkum tsup ai majaw, shut ai lam ni galaw na matu gunglau hkrum ai shaloi, ayan na ninghkap ra ai. Raitim, ninghkap na matu grau yak hkra, Satan gaw galaw lu ai lam yawng hpe galaw nga ai. Anhte a myit mang ai lam hten za mat hkra shi galaw ai lam langai gaw, n san seng ai shangwi shapyaw lam hte re. Dai shangwi shapyaw lam ni gaw, n san seng ai myit mang lam ni shang wa shangun ai. Yehowa a man hta n san seng ai masha byin shangun nna, mara kaba galaw hkrup shangun ai.—Mrk 7:21-23; Yak 1:14, 15.

17. Gunglau ai lam ni hpe koi lu hkra karum ya rit ngu hpyi ai hte maren gara hku galaw mai ai kun? (Sumla hpe mung yu u.)

 ¹⁷ Shut ai lam ni galaw na matu gunglau hkrum ai shaloi, tawt lai lu hkra Yehowa a karum shingtau ra ai. Yesu ndai hku akyu hpyi wa ai: “Agung alau nga ai de, anhte hpe n sa shangun ai sha, N kaja ai lam hta na, shaw la mi law.” (Mat 6:13) Yehowa gaw anhte hpe karum ya mayu ai. Raitim, anhte nan mung shi hpe karum hpyi ra ai. Akyu hpyi ga ni hte maren asak hkrung hkawm sa ra ai. Satan mungkan a gumhkawng ai shut shai ai myit mang ai lam, sumru ai lam ni hpe hti ai, madat ai hpe koi ra ai. (Shk 97:10) Chyum Laika hti ai, hkaja ai hku nna san seng ai myit mang lam hpe jahpring da ra ai. Zuphpawng lung ai hte hkaw tsun bungli hta shang lawm ai mung anhte a myit mang lam hpe makawp maga ya ai. Anhte n hkamjan lu ai chyam dinglik lam hpe n hkrum shangun ai ngu Yehowa ga sadi jaw da ai.—1 Ko 10:12, 13.

18. Akyu hpyi ai hte seng nna anhte yawng hpa galaw ra ai kun?

¹⁸ Ndai yak la ai jahtum nhtoi ni hta, Yehowa hpe matut sadi dung nga lu hkra, shawoi na hta grau nna akyu hpyi ra ai. Myit masin mahkra hte shani shagu akyu hpyi lu hkra aten masat da u. Yehowa gaw, akyu hpyi ai shaloi, ‘anhte a myit shi a man e hpaw dan’ shangun mayu ai. (Shk 62:8) Yehowa galaw ya ai lam yawng a matu, chyeju dum shakawn u. Nden marai hte hkaw tsun lu hkra karum ya na matu hpyi u. Hkrum chye ai gunglau lam yawng hpe ninghkap lu hkra, mayak mahkak ni hpe hkamjan lu hkra karum ya na matu hpyi u. Yehowa hpe ayan akyu hpyi ai kaw na hkring mat hkra, gara lam hpe mung, kadai hpe mung ahkang hkum jaw. Akyu hpyi ga ni hpe Yehowa gara hku htai ya ai kun? Ahkyak ai dai ga san hpe hpang na sumhpa hta hkaja na re.