1-2. Akyu hpyi ga ni hte seng nna anhte gara hku hkamsha chye ai kun?

 AKYU hpyi ga hpe Yehowa mahtai jaw na, n jaw na hte seng nna nang chye mayu ai aten ni nga ai kun? Rai yang, nang langai sha n re. Hpunau nauna law law mung chye mayu ma ai. Grau nna gaw yakhkak ai aten ni hta re. Anhte yakhkak jamjau yang, akyu hpyi ga hpe Yehowa gara hku mahtai jaw ai hpe ginhka yak chye ai.

² Yehowa gaw shi hpe nawku ai ni a akyu hpyi ga hpe mahtai jaw na ngu ai hpe hpa majaw kam mai ai hpe yu yu ga. (1 Yh 5:15) Ndai ga san ni hpe mung anhte bawngban na re: Kalang lang, Yehowa gaw anhte a akyu hpyi ga hpe hpa majaw mahtai n jaw ai zawn rai taw ai kun? Dai ni aten, akyu hpyi ga hpe Yehowa gara hku mahtai jaw ai kun?

3. Yehowa gaw hpa majaw shi kaw akyu hpyi shangun mayu ai kun?

³ Yehowa gaw anhte hpe grai tsawra ai lam, manu shadan ai lam Chyum Laika hta tsun da ai. (Hag 2:7; 1 Yh 4:10) Dai majaw, akyu hpyi nna Shi kaw karum hpyi na matu saw shaga da ai. (1 Pe 5:6, 7) Shi hte hku hkau na matu, mayak mahkak ni hpe tawt lai lu na matu, anhte hpe karum ya mayu ai.

4. Yehowa gaw Shi hpe nawku ai ni a akyu hpyi ga hpe mahtai jaw ai lam gara hku chye lu ai kun? (Sumla hpe mung yu u.)

⁴ Chyum Laika hta, Yehowa gaw Shi hpe nawku ai ni a akyu hpyi ga hpe mahtai jaw ai lam chyahkring hkring hti lu ai. Ga shadawn, Hkawhkam Dawi gaw shi a prat hta hpyen law law hte hkrum wa nna, karum shingtau ya na matu Yehowa kaw chyahkring hkring akyu hpyi wa ai. Kalang mi hta, “Yehowa e, ngai akyu hpyi ai ga na la ya e; Ngai tawngban ai ga madat ya  e; Na a sadi sahka hte ding man ai hte maren ngai hpe htan ya e” ngu nna akyu hpyi wa ai. (Shk 143:1) Lawt lu na matu Dawi hpyi ai akyu hpyi ga hpe Yehowa mahtai jaw wa ai. (1 Sa 19:10, 18-20; 2 Sa 5:17-25) “Yehowa gaw shi hpe shaga ai ni nlang hte hte . . . ni nga ai” ngu kam ai myit hte Dawi lu tsun wa ai. Anhte mung dai hpe kam mai ai.—Shk 145:18.

5. Moi prat na Yehowa hpe nawku ai ni gaw, shanhte myit mada da ai hku ayan na mahtai lu wa ai kun? Ga shadawn tsun dan u. (Sumla hpe mung yu u.)

⁵ Anhte myit mada da ai hku Yehowa mahtai n jaw ai byin mai ai. Kasa Pawlu gaw “hkum shan hta ju ai aju” hpe yen kau ya na matu Karai Kasang kaw akyu hpyi wa ai. Dai mayak mahkak hte seng nna laksan 3 lang akyu hpyi ai. Dai akyu hpyi ga hpe Yehowa mahtai jaw ai kun? Jaw ai. Raitim, Pawlu myit mada da ai hku gaw n re. Manghkang hpe la kau ya na malai, Shi hpe sadi dung let matut nawku lu hkra, ra ai n-gun atsam ni hpe Yehowa jaw ai.—2 Ko 12:7-10.

6. Kalang lang, anhte a akyu hpyi ga hpe Yehowa mahtai n jaw ai zawn hpa majaw byin nga ai kun?

⁶ Kalang lang, anhte mung n myit mada da ai hku mahtai lu wa chye ai. Anhte hpe gara hku karum ya yang kaja htum re ai hpe Yehowa tsep kawp chye ai. Shi gaw “anhte hpyi mahpyi hte myit mang lu ai mahkra hta grau nna shabyin lu ai.” (Ehp 3:20) Dai majaw, anhte a akyu hpyi ga hpe aten hkrak (sh) n myit mada da ai hku Shi mahtai jaw chye ai.

7. Akyu hpyi ga hpe hpa majaw galai shai ra chye ai kun? Ga shadawn tsun dan u.

⁷ Akyu hpyi ga hpe Yehowa a myit ra ai hte maren byin mayu yang, anhte a akyu hpyi ga hpe galai shai ra chye ai. Hpunau Matin Pozin-ga a lam hpe yu yu ga. Hkrungran ngut nna kade n na yang, hpunau gaw grai zingri ai Nazi htawng hta htawng jahkrat hkrum ai. Shawng nnan hta, htawng kaw na shalawt ya na matu Yehowa kaw akyu hpyi ai. Rai yang she, madu jan hpe lanu lahku lu na, hkaw tsun bungli hpe bai galaw lu na re. Bat lahkawng na wa tim, Yehowa gaw lawt lu hkra galaw ya na masa n nga ai hpe chye wa ai. Dai majaw, “Yehowa, ngai hpe hpa galaw shangun mayu ai lam madun ya rit” ngu nna akyu bai hpyi ai. Htawng kaw na kaga hpunau ni gara hku matut hkamjan nga ai hpe shi myit ai. Shanhte law law gaw, madu jan hte ma ni hpe grai myit tsang nga ai. Hpunau Pozin-ga ndai hku akyu hpyi ai: “Yehowa, lit nnan a matu grai chyeju dum ai. Nye a hpunau ni hpe shangang shakang ya lu na matu,  n-gun jaw lu na matu karum ya rit.” 9 ning du hkra htawng hta shi dai hte maren galaw wa ai!

8. Akyu hpyi ai shaloi gara ahkyak ai lam hpe dum ra ai kun?

⁸ Yehowa hta yaw shada lam nga nna, Shi masat da ai aten hta dai hpe jahpring shatsup ya na hpe dum ra ai. Dai yaw shada lam hta, dai ni aten hta grai hkra machyi shangun ai shingra tara tsin-yam, machyi makaw hte si hkrung si htan zawn re ai manghkang yawng hpe tsep kawp yeng seng kau ya na lam lawm ai. Yehowa gaw Shi a Mungdan hku nna, Shi a yaw shada lam hpring tsup wa hkra galaw na re. (Dan 2:44; Shr 21:3, 4) Raitim, dai aten n du shi ai laman, ndai mungkan hpe uphkang na ahkang Satan hpe jaw da ai. b (Yhn 12:31; Shr 12:9) Ya aten manghkang ni hpe hparan kau ya yang, Satan a uphkang lam gaw awng dang ai zawn rai mat na re. Dai majaw, Yehowa a ga sadi hpring tsup na aten hpe la nga ai laman, Shi anhte hpe karum shingtau n jaw ai sha kabai da ai lachyum n re. Yehowa karum ya ai lam nkau hpe hkaja yu ga.

9. Dawdan lam ni jahkrat ra ai shaloi Yehowa anhte hpe gara hku karum ya ai kun? Ga shadawn tsun dan u.

⁹ Anhte hpe nyan hpaji jaw ai. Kaja ai dawdan lam ni jahkrat lu hkra, anhte ra ai nyan hpaji jaw na ngu Yehowa ga sadi jaw da ai. Dinghku shang na (sh) n shang na zawn re ai prat hte seng ai dawdan lam ni hpe jahkrat ai shaloi, laksan hku nna Karai a nyan hpaji ra ai. (Yak 1:5) Dinghku n nga ai nauna Mariya a lam hpe myit yu ga. c Aten galu ningshawng galaw nga ai shaloi, hpunau langai hte hkrum ai. Shi ndai hku tsun ai: “Shada da grau hku hkau wa ai hte maren, shada da mung grau myit lawm wa ai. Dawdan lam jahkrat ra sai hpe ngai chye ai. Dai lam hte seng nna atsawm akyu hpyi ai. Yehowa a lam matsun hpe ngai ra ai. Raitim, nye a malai Yehowa dawdan ya na n re ai hpe mung chye ai.” Nyan hpaji a matu hpyi ai hpe Yehowa mahtai jaw ai ngu shi hkamsha ai. Gara hku nna kun? Anhte a laili laika ni hta shi tam sawk sagawn ai shaloi, san mayu ai ga san ni a mahtai ni hpe mu hkra karum ya ai, laksan sumhpa ni hpe tam mu wa ai. Sadi dung ai kanu a hpaji jaw ga hpe mung madat ai. Dai hpaji jaw ga gaw, shi a hkamsha lam hpe chye hkra karum ya ai. Dai majaw, hpaji rawng ai dawdan lam hpe jahkrat lu wa ai.

10. Hpilipi 4:13 hku nga yang, Yehowa gaw shi hpe nawku ai ni hpe karum na matu hpa galaw ya na kun? Ga shadawn jaw u. (Sumla hpe mung yu u.)

¹⁰ Hkamjan lu na atsam jaw ai. Kasa Pawlu hpe karum ya ai zawn, anhte hpe mung mayak mahkak ni hpe hkamjan lu na atsam Yehowa  jaw na re. (Hpilipi 4:13 hpe hti u.) Yakhkak ai masa lam ni hpe hkamjan lu na matu, hpunau Benjamin hpe Yehowa gara hku karum ya wa ai hpe yu yu ga. Benjamin gaw, kaji ai aten kaw nna, Ahprika na hpyen yen dabang hta nta masha ni hte rau nga wa ai. Shi ndai hku tsun ai: “Yehowa ra sharawng ai lam hpe galaw lu na atsam jaw na matu, ayan na akyu hpyi ai. Myit simsa lam, matut hkaw tsun lu ai nden marai, makam masham shangang shakang ya ai laili laika ni jaw ai hku nna, nye a akyu hpyi ga ni hpe Yehowa mahtai jaw ya ai.” Shi ndai hku mung tsun ai: “Hpunau nauna ni a mahkrum madup ni hpe hti ai shaloi, shanhte hkamjan lu hkra Yehowa karum ya ai lam ni hpe chye wa ai. Dai gaw, matut sadi dung na ngu ai nye a dawdan lam hpe shangang shakang ya ai.”

11-12. Anhte a akyu hpyi ga hpe htai ya na matu, hpunau nauna ni hpe Yehowa gara hku akyu jashawn ai kun? (Sumla hpe mung yu u.)

¹¹ Hpunau nauna ni hpe akyu jashawn ai. Shi a asak hpe n sak jaw shi ai shana hta, Yesu akroi anoi akyu hpyi wa ai. Karai Kasang hpe jahpoi asawng ai wa ngu masha ni sawn la nna, ari n jaw na matu Yehowa kaw hpyi shawn ai. Dai hku galaw ya na malai, Yehowa gaw shi hpe shangang shakang ya na matu, lamu kasa langai hpe shangun dat nna Yesu hpe karum ya ai. (Luk 22:42, 43) Anhte hpe mung, n-gun jaw na matu hpunau nauna langai ngai sa chyai ai (sh) phone shaga ai hku nna Yehowa karum ya lu ai. Anhte yawng gaw, hpunau nauna ni hpe “ngwi pyaw ai ga” tsun na matu ahkaw ahkang tam mai ai.—Gsh 12:25.

¹² Nauna Miriam a lam hpe yu yu ga. Madu wa si nna bat loi na ai hpang, Miriam gaw nta hta shi hkrai rai mat nna, myit mada lam n nga ai, myit daw ai ngu hkamsha ai. Shi hkrap chyu hkrap nna, marai langai ngai hpe ga shaga mayu ai. Shi ndai hku tsun ai: “Kadai hte mung phone shaga na n-gun n nga ai. Dai majaw, Yehowa kaw ngai akyu hpyi ai. Hkrap let akyu hpyi nga ai shaloi, phone shang wa ai. Grai hkau ai myitsu salang langai shaga wa ai re.” Dai myitsu salang hte shi a madu jan kaw na shalan shabran lam lu wa ai. Phone shaga na matu dai hpunau hpe Yehowa shadut ya ai ngu shi kam ai.

13. Anhte a akyu hpyi ga hpe mahtai jaw na matu, Shi hpe n nawku ai masha ni hpe Yehowa gara hku akyu jashawn ai lam, ga shadawn tsun dan u.

 ¹³ Shi hpe n nawku ai ni hpe Yehowa akyu jashawn lu ai. (Gsh 21:1) Kalang marang, Yehowa gaw shi a masha ni a akyu hpyi ga hpe htai ya na matu, Shi hpe n nawku ni hpe akyu jashawn chye ai. Ga shadawn, Yerusalem de wa na matu Nehemia hpyi shawn shaloi ahkang jaw hkra, Hkawhkam Artahkere hpe Yehowa shadut ya ai. Rai yang she, mare bai gawgap ai hta shi karum ya lu na re. (Neh 2:3-6) Dai ni aten hta mung, anhte hpe karum ya na matu, Shi hpe n nawku ai masha ni hpe pyi Yehowa shadut ya lu ai.

14. Nauna Su Hing a mahkrum madup gaw nang hpe gara hku n-gun lu shangun ai kun? (Sumla hpe mung yu u.)

¹⁴ Nauna Su Hing gaw, shi hpe karum ya na matu sarawun hpe Yehowa akyu jashawn ai ngu hkamsha wa ai. Kasha gaw myit hkamja lam manghkang chyahkring hkring byin ai. Grai sawng ai ang katut mabyin langai mung hkrum ai majaw, kasha hpe yu na matu shi hte madu wa gaw bungli kaw na pru ra mat ai. Dai majaw, ja gumhpraw mayak mahkak nga wa ai. Gara dip n-gun hpe mung n lu hkamjan sai ngu hkamsha ai lam Su Hing tsun ai. Yehowa kaw myit masin mahkra hte akyu hpyi ai. Dai shaloi, shanhte a sarawun gaw, shanhte hkrum nga ai manghkang hpe hparan lu na lam ni hpe tam na matu dawdan wa ai. Dai majaw, asuya a karum shingtau lam hte nga shara lu wa ai. Su Hing ndai hku tsun ai: “Ndai mabyin hta Yehowa karum ya ai hpe anhte mu wa ai. Shi gaw teng sha ‘akyu hpyi ai ga madat mara ai wa’ re.”—Shk 65:2.

15. Akyu hpyi ga a mahtai lu sai hpe chye hkra, nauna langai hpe hpa gaw karum ya ai kun?

¹⁵ Anhte a akyu hpyi ga hpe mauhpa lam hku ayan htai ya na n re. Raitim, anhte lu ai mahtai gaw Sumsing Kawa hpe matut sadi dung lu na matu sha re. Dai majaw, na akyu hpyi ga hpe Yehowa gara hku mahtai jaw ai hpe sadi yu u. Nauna Yoko gaw shi a akyu hpyi ga ni hpe Yehowa n htai ya ai ngu hkamsha ai. Raitim, Yehowa kaw shi hpyi ai lam ni hpe ka matsing da ai. Aten loi na ai hpang, shi ka matsing da ai ni hpe bai yu ai shaloi, shi akyu hpyi ga law malawng hpe Yehowa mahtai jaw ai, shi malap kau sai lam nkau pyi lawm ai hpe chye wa ai. Anhte a akyu hpyi  ga ni hpe Yehowa gara hku mahtai jaw ai lam, galoi mung bai myit yu ra ai.—Shk 66:19, 20.

16. Anhte a akyu hpyi ga ni hte seng nna makam masham gara hku madun mai ai kun? (Hebre 11:6)

¹⁶ Yehowa kaw akyu hpyi ai sha n-ga, lu wa ai mahtai gaw gara hku mi raitim, hkap la nna makam masham hpe madun mai ai. (Hebre 11:6 hpe hti u.) Hpunau Maik hte madu jan Hkritsi a lam yu yu ga. Behtela hta magam gun na matu shan bandung tawn da ai. “Shaning law law, an lahkawng shawk shawn laika mara ai. Dai bandung hte seng nna chyahkring hkring akyu hpyi ai. Raitim, saw shaga n hkrum ai” ngu Maik tsun ai. Yehowa gaw Shi a magam hta, shan hpe kaja htum gara hku akyu jashawn ra na hpe chye ai lam matut nna kam ai. Shan galaw lu ai lam yawng hpe matut galaw ai, grau ra ai shara hta aten galu ningshawng galaw ai, gawgap bungli hta karum ya ai. Ya gaw hpung kawan magam hta shang lawm nga ai. Maik ndai hku tsun ai: “Yehowa gaw an a akyu hpyi ga hpe an myit mada da ai hku ayan gaw mahtai n jaw ai. Raitim, an myit da ai hta grau kaja ai lam hku nna Shi mahtai jaw ai.”

17-18. Shakawn 86:6, 7 hku nga yang, hpa hpe kam mai ai kun?

¹⁷ Shakawn 86:6, 7 hpe hti u. Shakawn kungdawn sara Dawi gaw, shi a akyu hpyi ga hpe Yehowa madat ya nna mahtai jaw na hpe kam ai. Anhte mung kam mai ai. Ndai sumhpa hta anhte hkaja wa ai ga shadawn ni gaw, hkamjan na matu anhte ra ai n-gun atsam hte nyan hpaji hpe Yehowa jaw lu ai lam kam shangun ai. Hpunau nauna ni (sh) Shi hpe n nawku ai ni hpe pyi akyu jashawn nna, anhte hpe karum ya lu ai.

¹⁸ Anhte myit mada da ai lam hte akyu hpyi ga hpe ayan na mahtai n jaw tim, mahtai jaw ya na ngu ai hpe gaw kam mai ai. Anhte ra ai aten hta ra ai lam hpe madi shadaw ya na re. Ya aten hta Yehowa nang hpe lanu lahku ya na, du wa na mungkan nnan hta, “hkrung mahkrung ni hpe kaja ai hte shakat da” na ngu ai hpe kam ai myit hte matut akyu hpyi nga u.—Shk 145:16.