1. Gara mayak mahkak hpe anhte law malawng hkrum ai kun?

 WENYI bandung langai jahkrat da tim, du dep na yak nga ai kun? b Nang chyu sha n re. Ga shadawn, hpunau Hpilip gaw shi a akyu hpyi ga rawt jat na matu, chyahkring hkring akyu hpyi na matu shakut mayu ai. Raitim, akyu hpyi ai aten lu hkra galaw na matu yak nga ai. Nauna Ereka a bandung gaw, magam hkrum zup hpawng de aten dep du na matu re. Raitim, naw hpang hkrat nga ai. Hpunau Tomat gaw, Chyum Laika buk ting hpe hti na matu chyahkring hkring shakut ai. Shi ndai hku tsun ai: “Gaja nga yang, ngai gaw Chyum Laika hti ai hpe ra sharawng ai wa gaw n re. Ngai masum lang shakut wa ai. Raitim, Jaw Jau Laika kaw sha du ai.”

2. N lu dep shi ai wenyi bandung ni nga yang, hpa majaw myit n daw ging ai kun?

² Ya aten hta, n lu dep shi ai wenyi bandung ni nga yang myit hkum daw. Loi ai bandung ni pyi, aten hte shakut shaja lam ra ai. Bandung de du dep mayu ai myit gaw, Yehowa hte na a hku hkau lam hpe manu shadan ai, Shi hpe kaja htum sak jaw mayu ai hpe madun nga ai re. Na a shakut shaja lam hpe Yehowa manu shadan ai. Nang jaw lu ai hta jan nna Shi n myit mada ai. (Shk 103:14; Mik 6:8) Dai majaw, na a bandung gaw masa lam hta hkan nna du dep lu ai bandung rai ging ai. Jahkrat da ai bandung hpe du dep hkra hpa galaw lu ai kun? Hpaji jaw ga nkau hpe bawngban yu ga.

3. Myit rawt ai lam gaw hpa majaw ahkyak ai kun?

³ Myit rawt ai lam gaw, wenyi bandung du dep lu na matu grai ahkyak ai lam re. Myit rawt ai wa gaw, bandung de du dep lu hkra shakut ai. Myit rawt ai lam gaw, sumpan li hpe du mayu ai shara de du lu hkra kanawng ya ai nbung hte bung ai. Nbung matut bung ya yang, sumpan li hkang ai wa gaw shi sa mayu ai shara de du lu na re. Nbung ja ja bung yang, alawan pyi du mat chye ai. Dai zawn sha, anhte myit rawt magang, anhte a bandung de lawan du magang re. E Sabedaw mungdan na hpunau Debit ndai hku tsun ai: “Myit lawm ai bungli hpe anhte grau shakut galaw chye ai. Bandung de n du shangun ai hpa lam hpe mung ahkang jaw na n re.” Dai majaw, grau myit rawt hkra hpa galaw mai ai kun?

4. Hpa a matu akyu hpyi mai ai kun? (Hpilipi 2:13) (Sumla hpe mung yu u.)

⁴ Grau myit rawt hkra akyu hpyi u. Na a bandung de du dep hkra shakut mayu ai myit nga na matu, chyoi pra ai wenyi hte Yehowa shadut ya lu ai. (Hpilipi 2:13 hpe hti u.) Kalang marang, anhte bandung jahkrat ai gaw, dai hpe galaw ging ai majaw, kaja ai lam re ai hpe chye ai majaw sha rai chye ai. Dai majaw, du dep hkra galaw mayu ai myit n nga ai baw byin chye ai. Yuganda mungdan na, nauna Norina dai hku byin wa ai. Chyum ga sharin galaw na matu bandung tawn da tim, sharin ya na atsam n nga ai ngu hkamsha ai majaw, myit rawt ai lam n nga taw ai. Shi hpe hpa gaw karum ya wa ai kun? Shi ndai hku tsun ai: “Chyum ga sharin galaw mayu ai myit grau nga wa hkra karum ya rit ngu, Yehowa kaw shani shagu akyu hpyi ai. Akyu hpyi ga hte maren, sharin achyin ai atsam rawt jat hkra ngai galaw ai. Shata loi mi na ai hpang, grau myit rawt wa ai hpe sadi hkrup ai. Dai shaning hta sha, Chyum ga sharin 2 galaw hpang lu wa ai.”

5. Grau myit rawt wa hkra hpa hpe myit sawn sumru mai ai kun?

⁵ Yehowa galaw ya wa ai lam ni hpe myit sawn sumru u. (Shk 143:5) Kasa Pawlu gaw, Yehowa madun ai chyeju hpe myit sawn sumru ai. Dai majaw, Yehowa a matu grau shakut shaja mayu wa ai. (1 Ko 15:9, 10; 1 Tm 1:12-14) Dai zawn sha, nang hpe Yehowa galaw ya wa ai lam ni hpe myit sawn sumru yang, na a bandung de du mayu ai myit grau nga wa na re. (Shk 116:12) Aten galu ningshawng galaw na bandung de du dep hkra, Hundurat mungdan kaw na nauna langai hpe hpa gaw karum ya wa ai hpe yu yu ga. Shi ndai hku tsun ai: “Ngai hpe Yehowa kade daram tsawra ai hpe myit ai. Shi a amyu masha ni hpang de ngai hpe lau la ai. Shi ngai hpe lanu lahku ai, makawp maga ya ai. Dai ni hpe myit sawn sumru ai gaw, Shi hpe grau tsawra wa shangun ai, grau myit rawt wa shangun ai.”

6. Myit rawt ai lam grau nga wa hkra kaga hpa naw karum ya lu ai kun?

⁶ Bandung du dep lu ai a akyu hpe myit maju jung u. Aten dep du hkra shakut mayu ai bandung tawn da ai, nauna Ereka hpe hpa gaw  karum ya wa ai kun? Shi ndai hku tsun ai: “Hkrum zup hpawng sa ai aten grai hpang hkrat yang, lam matsun law law hpe n chye kau dat ai hpe ngai sadi hkrup ai. Raitim, jau jau du ai shaloi, hpunau nauna ni hte shakram lu ai, shanhte hte kanawn mazum lu ai. Hkaw tsun bungli hta rawt jat hkra, pyaw hkra karum ya ai tatut re ai hpaji jaw ga hpe na lu ai.” Aten dep du ai a akyu hpe myit maju jung ai majaw, Ereka gaw shi a bandung de du dep wa ai. Gara shaman chyeju hpe nang myit maju jung lu ai kun? Chyum Laika hti na matu (sh) akyu hpyi na matu bandung tawn da ai ngu saga. Dai bandung de du yang, Yehowa hte na a hku hkau lam gara hku grau ngangkang wa ai hpe myit yu mai ai. (Shk 145:18, 19) Hkristan atsam ningja ni shalat na matu bandung jahkrat da yang, dai atsam ningja ni gaw kaga ni hte hku hkau lam rawt jat wa hkra gara hku karum ya ai hpe myit maju jung u. (Kol 3:14) Nang jahkrat da ai bandung de hpa majaw du mayu ai lam jahpan galaw da mai ai. Dai hpe ayan bai yu u. Shawng hta tsun wa ai hpunau Tomat ndai hku tsun ai: “Bandung de hpa majaw du mayu ai lam hpe grau myit magang, bandung de du hkra grau shakut magang re.”

7. Hpunau Juliyo hte shi a madu jan hpe shanhte a bandung du hkra hpa gaw karum ya wa ai kun?

⁷ Myit rawt shangun ai ni hte kanawn mazum u. (Gsh 13:20) Hkaw tsun magam hpe maden jat galaw na ngu ai bandung du hkra hpunau Juliyo hte shi a madu jan hpe hpa gaw karum ya wa ai hpe yu yu u. Shi ndai hku tsun ai: “An a bandung hte seng nna n-gun jaw ai manang ni hte kanawn ai. Shanhte hte bawngban ai. Shanhte law malawng gaw dai zawn bandung ni du ngut sai. Dai majaw, an hpe kaja ai hpaji jaw ga ni jaw lu ai. An a bandung gara madang du nga sai hpe mung shanhte san ai. Ra ai aten hta n-gun jaw ai.”

8. Myit rawt ai lam langai hte sha, bandung de du dep hkra galaw taw yang hpa byin chye ai kun? (Sumla hpe mung yu u.)

⁸ Anhte yawng hta, myit rawt ai lam mat mat ai aten ni nga chye ai. Dai gaw, bandung de n du lu sai ngu ai lachyum kun? N re. Ga shadawn, sumpan li hpe du mayu ai shara de du hkra, nbung gaw aja awa kanawng ya lu ai. Raitim, nbung n-gun galai shai mat chye ai. Nbung tsep kawp n bung ai aten ni nga chye ai. Rai yang, sumpan li hkang ai wa gaw li hpe tsep kawp n lu shamu mat sai kun? N re. Ga shadawn, sumpan li nkau hta jak lawm ai zawn, nkau hta gaw li shap lawm ai. Sumpan li hkang ai wa gaw, dai ni hpe akyu jashawn nna, du mayu ai shara de du hkra sa lu ai. Anhte a myit rawt ai lam gaw nbung hte bung nna, kalang lang grai myit rawt chye ai. Kalang lang, galaw mayu ai myit n nga ai baw byin chye ai. Dai majaw, myit rawt ai lam hte sha galaw na nga yang, bandung de galoi mung du na n re. Raitim, du mayu ai shara de du hkra kaga ladat ni hpe tam ai li hkang zawn, myit rawt ai lam n nga yang pyi, bandung de du hkra anhte  galaw lu ai. N loi ai raitim, bandung de du ai shaloi nang grai pyaw mat na re. Anhte hpa galaw lu ai hpe n bawngban shi yang, ga san langai hpe bawngban yu ga.

9. Bandung de du hkra shakut mayu ai myit n nga tim pyi, matut shakut ging ai kun? Sanglang dan u.

⁹ Yehowa gaw shi hpe ngwi pyaw let, sharawng awng let nawku shangun mayu ai. (Shk 100:2; 2 Ko 9:7) Dai majaw, wenyi bandung de du dep hkra galaw mayu ai myit n nga yang, matut galaw ging ai kun? Kasa Pawlu a kasi hpe myit yu ga. Shi ndai hku tsun ai: “Nye a hkum hpe ngai htwi kau nna, dai hpe shagrit da we ai.” (1 Ko 9:25-27) Pawlu gaw, Yehowa galaw shangun mayu ai hpe galaw mayu ai myit n nga tim pyi, shi hkum shi shadut nna galaw ai. Pawlu dai hku galaw ai hpe Yehowa ra ai kun? Ra ai. Shi a shakut shaja ai lam hpe Yehowa shaman chyeju jaw wa ai.—2 Tm 4:7, 8.

10. Myit rawt ai lam n nga tim pyi, bandung de du dep hkra galaw ai a akyu gaw hpa ni rai kun?

¹⁰ Anhte a bandung de du dep hkra galaw mayu ai myit n nga tim pyi, du dep hkra shakut nga ai hpe Yehowa mu ai shaloi Shi pyaw ai. Dai bandung hpe ra nna galaw ai n raitim, Shi hpe tsawra nna galaw ai majaw re. Pawlu hpe shaman chyeju jaw ai zawn, anhte hpe mung jaw na re. (Shk 126:5) Yehowa a shaman chyeju hpe anhte hkamsha lu ai shaloi, myit rawt wa chye ai. Polan mungdan kaw na nauna Lusina ndai hku tsun ai: “Kalang marang, pu ba ai aten ni hta hkaw tsun bungli n kam sa ai. Raitim, hkaw tsun bungli sa nna bai wa ai shaloi grai pyaw ai ngu hkamsha lu ai gaw mauhpa kumhpa re.” Dai majaw, myit rawt ai lam n nga mat ai shaloi, hpa galaw lu ai lam yu yu ga.

11. Tinang hkum tinang hkang lu ai atsam rawt jat hkra Yehowa anhte hpe gara hku karum ya lu ai kun?

¹¹ Tinang hkum tinang hkang lu ai atsam nga hkra shakut u. Tinang hkum tinang hkang lu ai atsam ngu ai gaw, hkamsha lam ni, galaw ai lam ni hpe hkang lu ai atsam re. N kaja ai hpe n galaw hkrup na matu sha tinang hkum tinang hkang ra ai n re. Kaja ai hpe galaw lu hkra mung hkang ra ai. Grau nna gaw, yak ai bungli ni galaw ai shaloi (sh) myit rawt ai lam n nga ai shaloi hta re. Tinang hkum tinang hkang lu ai atsam gaw, wenyi asi hta lawm ai hpe dum u. Dai majaw, dai ahkyak ai atsam ningja hpe shalat lu hkra Yehowa kaw chyoi pra ai wenyi hpyi u. (Luk 11:13; Gal 5:22, 23) Shawng hta tsun wa ai hpunau Debit gaw, tinang hkrai hkaja ai lamang hpe ayan galaw mayu ai. Dai hku galaw lu hkra akyu hpyi ai gaw, shi hpe gara hku karum ya wa ai lam ndai hku tsun dan ai: “Tinang hkum tinang hkang lu ai atsam shalat lu hkra karum ya na matu Yehowa kaw akyu hpyi ai. Shi a karum shingtau lam hte, kaja ai hkaja lamang chyarang galaw lu wa nna, dai hte maren mung hkan sa lu wa ai.”

12. Wenyi bandung ni du dep lu hkra, Hpaji 11:4 gaw gara hku karum ya ai kun?

¹² Kaja htum masa hpe hkum la nga. Ndai mungkan hta, kaja htum masa ngu ai gaw galoi mung nga wa na n re. Dai aten hpe la nga yang, anhte a bandung galoi du sana n re. (Hpaji 11:4 hpe hti u.) Hpunau Daniye ndai hku tsun ai: “Kaja htum masa ngu ai gaw n nga ai. Dai majaw, aten hpe n la ai sha galaw hpang ging ai.” Yuganda mungdan kaw na hpunau Paw gaw, hpa majaw aten n garawt ging ai lam ndai hku tsun wa ai: “Yakhkak ai masa ni nga tim, anhte galaw hpang yang she, Yehowa karum ya lu na re.”—Mal 3:10.

13. Loi ai bandung ni hpe galaw hpang ai gaw hpa majaw kaja ai kun?

¹³ Loi ai bandung ni hpe galaw hpang u. Anhte a bandung gaw grai yak ai zawn byin nga yang, myit rawt ai lam yawm wa chye ai. Nang dai zawn byin nga yang, loi ai bandung ni hte galaw lu na kun? Atsam ningja langai hpe shalat na bandung rai yang, kaji kajaw lam ni hta  dai atsam ningja hpe shawng madun mai na kun? Chyum Laika buk ting hpe hti na matu bandung tawn da yang, aten kachyi chyi hti na matu masat nna hti hpang mai na kun? Shawng hta tsun wa ai hpunau Tomat gaw, laning mi laman Chyum Laika hpe ngut hkra hti na ngu ai bandung hpe shakut galaw wa ai. Shi ndai hku tsun ai: “Dai hku galaw ai gaw nye a matu grai lawan taw ai hpe sadi hkrup ai. Dai majaw, kalang bai shakut yu ai. Raitim, ndai kalang gaw shani shagu daw kaji loi mi hpe sha hti nna, dai hpe myit sawn sumru ai. Dai majaw, Chyum Laika hti ai shaloi grau pyaw wa ai.” Shi grau pyaw wa ai hte maren, hti ai aten mung grau na wa ai. Hpang jahtum hta, Chyum Laika buk ting hti ngut mat ai. c

14. Bandung n du hkraw yang hpa byin chye ai kun?

¹⁴ Grai myit rawt nna tinang hkum tinang hkang lu tim, bandung n du hkraw ai lam ni nga wa chye ai. Ga shadawn, “n myit mada da ai mabyin ni” gaw, bandung du na matu aten na mat shangun chye ai. (Hpj 9:11, NWT) Myit daw ai, n-gun yawm ai ngu hkamsha shangun ai mayak mahkak ni anhte hkrum chye ai. (Gsh 24:10) N hkum tsup ai ni re ai majaw, bandung hte tsan mat shangun ai mara ni galaw hkrup chye ai. (Rom 7:23) Shing nrai, myit pu ba nga chye ai. (Mat 26:43) Bandung n du hkraw ai lam ni hpe tawt lai lu hkra hpa gaw karum ya na kun?

15. Bandung n du hkraw ai gaw, hkrat sum mat sai ngu tsun mayu ai kun? Sanglang dan u. (Shakawn 145:14)

¹⁵ Bandung n du hkraw ai gaw hkrat sum mat sai ngu tsun mayu ai n re ai hpe dum u. Mayak mahkak ni, manghkang ni chyahkring hkring hkrum na ngu Chyum Laika ka tsun da ai. Raitim, dai ni hpe hkrum ai shaloi, Yehowa a karum shingtau hte tawt lai lu ai lam mung tsun da ai. (Shakawn 145:14 hpe hti u.) Shawng hta tsun wa sai hpunau Hpilip ndai hku tsun ai: “Kade lang kataw ai ngu ai hpe ngai myit maju n jung ai. Kade lang bai rawt ai hpe sha  myit maju jung ai. Dai gaw awng dang ai lam re.” Shawng hta tsun wa ai hpunau Debit ndai hku tsun ai: “Bandung n du hkraw hkra byin shangun ai lam ni hpe, dingbai dingna jaw ai lam ni re ngu n myit la ai. Yehowa hpe ngai kade daram tsawra ai lam madun lu ai ahkaw ahkang hku nna myit la ai.” Bandung n du hkraw ai lam ni nga tim, matut shakut ai gaw, Yehowa a myit ra ai lam lu mayu ai hpe madun ai re. Bandung du hkra matut shakut nga ai hpe Yehowa mu yang grai pyaw na re.

16. Bandung n du hkraw ai lam ni gaw anhte hpe hpa sharin ya ai kun?

¹⁶ Bandung n du hkraw hkra byin shangun ai lam ni hpe, sharin la lu ai mahkrum madup ni hku nna mu u. Hkrum wa ai ni hpe bai myit nna tinang hkum tinang ndai hku san u: ‘Hpang kalang ndai zawn n byin hkra ngai hpa galaw lu ai kun?’ (Gsh 27:12) Kalang lang rai yang, kade shakut tim bandung n du hkraw ai aten hta she, dai gaw tinang hte n htap htuk nga ai hpe chye wa ai. Nang mung dai zawn hkamsha yang, tinang a bandung gaw tinang hte htap htuk nga ai kun ngu maram yu u. d Bandung gaw, nang hte n htap htuk nna n dep lu ai hpe, hkrat sum ai re ngu Yehowa n myit la ai.—2 Ko 8:12.

17. Tinang du dep wa ai bandung ni hpe hpa majaw dum ging ai kun?

¹⁷ Tinang du dep wa ai bandung ni hpe dum nga u. “Magam bungli gun hpai . . . ai lam hpe, malap kau ya na gaw, shi [Karai Kasang] n ding n hpring nga ai, n rai” ngu, Chyum Laika hta tsun da ai. (Heb 6:10) Nang mung dai hpe n malap ging ai. Yehowa hte kaja ai hku hkau lam nga ai, kaga ni hpe hkaw tsun ai, hkalup hkam ai lam ni zawn nang du dep wa ai bandung ni hpe bai myit yu u. Lai wa sai aten hta wenyi bandung ni hpe nang du dep wa ai zawn, ya aten na bandung ni hpe mung nang dep lu ai.—Hpl 3:16.

18. Bandung de du hkra shakut ai shaloi hpa hpe dum ging ai kun? (Sumla hpe mung yu u.)

¹⁸ Du mayu ai shara de du mat ai sumpan li hkang ai wa zawn, Yehowa a karum shingtau hte bandung de du lu ai. Sumpan li hkang ai ni law law gaw, hkrun lam hta pyaw ai. Nang mung wenyi bandung ni dep na matu, Yehowa gara hku karum ya wa ai hpe myit yu u. Rai yang, bandung du na matu shakut nga ai shaloi pyaw lu na re. (2 Ko 4:7) Nang asum n jaw yang, grau kaba ai shaman chyeju ni pyi lu la na re.—Gal 6:9.