Chyum Laika prat kaw na kunhting wa gaw kaga ni a kun dinghku (sh) kaga masha madu ai arai ni hpe yu lajang ra ai. Hebre hte Greek ga hku “kunhting” ngu nna ga gale da ai ga si gaw, kalang lang woi awn ai masha, nta hpe yu ya ai wa hpe mung tsun mayu ai.

Yaku a kasha Yosep gaw, Egutu mung hta mayam byin nga ai shaloi, shi madu a nta hpe woi awn ya ai kunhting byin wa ai. Dai majaw, shi a madu Egutu masha wa gaw, ‘shi lu malu mahkra Yosep a lata hta ap da nu ai.’ (Nin 39:2-6) Hpang e, Egutu mung hta Yosep gaw ahkang aya nga wa ai shaloi, shi a nta hpe yu lajang ya na matu kunhting langai hpe san da ai.​—Nin 44:4.

Yesu aten hta, lamu ga madu ni gaw shanhte a hkai sun hte tsan ai mare ni hta nga chye ai. Dai majaw, lamu ga madu ni gaw hkai sun amu hpe yu lajang ya na matu kunhting ni hpe san da ai.

Kunhting galaw na matu kadai gaw atsam hpring ai kun? “Atsam ningja nga n nga jep yu ngut sai mayam langai” hpe kunhting (sh) woi awn ai wa hku nna san da ai ngu tsa ban langai na Roma laika ka sara Kolummela tsun ai. “Dai mayam wa gaw ahkang aya hpe tara n ja ai hku, n mazut ai hku akyu jashawn chye ai atsam ningja nga ai” wa rai ra ai. Shi ndai hku mung bai tsun ai: “Mayam wa gaw shi n chye ai hpa mung n nga ai ngu n myit ging ai. Sharin la na matu jin jin rai ra ai ngu ai lam ni gaw lahta na lam ni hta na grau ahkyak ai lam ni re.”

Hkristan nawku hpung hta galaw ra na lam nkau hpe kunhting wa a amu bungli hte Chyum Laika hta shingdaw da ai. Ga shadawn, “Karai Kasang a chyeju kumhpa hpe kaja ai kunhting wa zawn shada da hpe karum shingtau lu hkra” Karai Kasang jaw ai atsam ningja ni hpe akyu jashawn na matu, Hkristan ni hpe kasa Petru n-gun jaw wa ai.​—1 Pe 4:10, NW.

Kunhting langai a ga shadawn hpe Yesu nan akyu jashawn wa ai lam Luka 16:1-8 hta mu lu ai. Dai sha n-ga, Hkawhkam langai hku nna shi bai du sa ai kumla hte seng ai myihtoi ga hta, “sadi ai hte myit su ai mayam” (sh) “kangka re ai hte myit su ai kunhting wa” hpe san da na lam shi hpang hkan ai ni hpe Yesu tsun wa ai. Dai kunhting wa a madung lit gaw, hpang jahtum aten hta Hkristu hpang hkan ai ni hpe wenyi malu masha lajang ya na matu re. (Mat 24:45-47; Luk 12:42) Sadi dung ai kunhting wa gaw laili laika ni hpe mungkan ting lu la hkra lajang ya nga ai. Dai hpe anhte mung lu la nga ai majaw grai chyeju dum ga ai.