1. Mahte 28:18-20 hku nga yang Yesu gaw gara hkang da ai lam jaw wa ai kun?

YESU hkrung rawt wa ai hpang, Galile hta hpawng chyawm nga ai sape ni a shawng hta dan pru wa ai. Grai ahkyak ai lama ma tsun na matu shi hta nga ai. Hpa rai kun? Dai ga hpe Mahte 28:18-20 (Hti u) hta mu lu ai.

2. Gara ga san ni hpe bawngban mat na kun?

² Sape shatai mu ngu ai Yesu a hkang da ai ga gaw ya aten na Karai a mayam yawng hte mung seng ai. Yesu jaw da ai lit hte seng ai ga san 3 hpe myit yu ga. Langai, sape nnan ni hpe Karai Kasang hpyi shawn da ai lam ni hpe sharin ya ai sha n-ga, hpa naw galaw lu na kun? Lahkawng, nawku hpung hta nga ai hkaw tsun masha yawng gaw, Chyum ga sharin ni wenyi lam hta rawt jat wa na matu, gara hku karum ya mai ai kun? Masum, katsi mat ai hpunau nauna ni mung sape shatai ai bungli hta bai shang lawm wa na matu, gara hku karum ya mai ai kun?

3. Yesu a hkang da ai lam hta tup hkrak re ai gara lam matsun lawm ai kun?

³ Yesu a lam matsun ni gaw asan sha re. Masha ni hpe shi a hkang da ai lam ni hpe sharin ya ra ai. Raitim, ahkyak ai lam ni hpe n malap ging ai. Yesu gaw ‘ngai nanhte hpe hkang da mada yawng hte hpe shanhte hpe sharin ya u’ ngu nna n tsun wa ai. De a malai, “ngai nanhte hpe hkang da mada yawng hte hpe hkan shadik lu mu ga, shanhte hpe sharin shaga ya mu” ngu nna tsun da ai. Dai tup hkrak re ai lam matsun hpe hkan sa lu hkra sharin ya ai sha n-ga, hkan sa lu ai lam hpe mung tsun dan ra ai. (Kas 8:31) Hpa majaw kun?

4. Hkang da ai ga hpe hkan shadik ngu ai gaw hpa rai kun? Ga shadawn tsun dan u.

 ⁴ Hkang da ai ga hpe “hkan shadik” ngu ai gaw hkan sa ai hpe tsun ai re. Hkristu a hkang da ai ga ni hpe hkan sa lu hkra sharin ya lu ai lam hte seng ai ga shadawn hpe yu yu ga. Mawdaw gau sharin ai sara gaw, jawng ma ni hpe mawdaw lam hte seng ai tara hpe hkan shadik lu hkra gara hku sharin ya ai kun? Dai tara ni hpe sharin gawk hta shawng sharin ya na re. Raitim, dai tara ni hpe gara hku hkan sa lu ai lam sharin ya na matu, lam langai hpe naw galaw ra ai. Shanhte lam ntsa kaw gau shaman nga ai shaloi, arau hkan nang nna naw sharin ya ra ai. Dai ga shadawn kaw nna hpa sharin la lu ai kun?

5. (a) Yawhan 14:15 hte 1 Yawhan 2:3 hku nga yang Chyum ga sharin ni hpe hpa galaw na matu sharin ya ra ai kun? (b) Chyum ga sharin ni hpe gara lam ni tsun dan mai ai kun?

⁵ Kaga ni hpe Chyum Laika sharin ya ai shaloi, Karai Kasang hpyi shawn da ai lam ni hpe sharin ya ai. Raitim, dai hta grau nna galaw ra ai. Shanhte chye wa ai lam ni hpe shani shagu na prat hkrun lam hta hkan sa lu na matu sharin ya ra ai. (Yawhan 14:15; 1 Yawhan 2:3 hpe hti u.) Chyum Laika npawt tara ni hpe jawng hta, bungli hta, ban sa ai aten ni hta gara hku hkan sa mai ai lam anhte a kasi ningli hte sharin ya mai ai. Anhte a prat hta Chyum Laika lam matsun ni hpe hkan sa ai majaw, shoihpa hkrum ai lam kaw nna makawp maga hkrum ai, hpaji rawng ai dawdan lam ni jahkrat lu hkra karum ya wa ai lam tsun dan mai ai. Hkaja nga ai shaloi, chyoi pra ai wenyi shanhte hpe lam matsun ya na matu, Yehowa kaw hpyi shawn mai ai.​—Yhn 16:13.

6. Yesu a hkang da ai ga ni hpe hkan shadik lu hkra sharin ya ai hta hpa lawm ai kun?

⁶ Yesu a hkang da ai ga ni hpe hkan shadik lu hkra sharin ya ai hta hpa lawm ai kun? Sape shatai ai bungli hta shang lawm mayu wa hkra, Chyum ga sharin ni hpe karum ya ra ai. Chyum ga sharin nkau gaw hkaw tsun na matu hkrit chye ai. Chyum Laika lam matsun ni hpe sharin ya ai shaloi myit galu ra ai. Rai yang, shanhte a machye machyang angwi ngwi rawt jat wa nna, myit masin hta jung wa yang, dai hpe tatut galaw na matu shadut ya lu na re. Kaga ni hpe kabu gara shiga hkaw tsun mayu ai myit nga wa hkra gara hku karum ya mai ai kun?

7. Kabu gara shiga hkaw tsun mayu ai myit grau rawt jat wa hkra Chyum ga sharin hpe gara hku karum ya mai ai kun?

⁷ Chyum ga sharin ni hpe ndai zawn ga san ni hpe san mai ai: “Chyum Laika sharin ya ai lam ni hpe nang hkan sa ai majaw, na a prat gara hku rawt jat wa ai kun? Dai shiga hpe kaga ni na la ra ai ngu nang shadu ai kun? Shanhte hpe karum ya na matu hpa galaw mai ai kun?” (Gsh 3:27; Mat 9:37, 38) Sharin achyin hkingrai hta lawm ai garan laika ni hpe madun nna shi a jinghku ni, manang ni, bungli manang ni hte gara mahtang gaw grau htap htuk ai hpe lata shangun u. Dai garan laika law law jaw da u. Hpaji rawng let gara hku garan mai ai lam shaman ya u. Hkalup n hkam shi ai hkaw tsun masha byin wa ai shaloi, karum ya na matu shi hte arau hkaw tsun u.​—Hpj 4:9, 10; Luk 6:40.

8. Chyum ga sharin ni gaw Karai Kasang hte htingbu ni hpe tsawra ai myit rawt jat wa na matu hpa majaw ahkyak ai kun? (“ Chyum Ga Sharin Ni Karai Hpe Tsawra Ai Myit Rawt Jat Hkra Galaw Mai Ai Lam” ngu ai lawk hpe yu u.)

⁸ ‘Hkang da mada yawng hte hpe kaga ni hkan shadik lu’ hkra sharin ya u ngu nna anhte hpe Yesu htet da ai. Dai hta, Karai Kasang hte htingbu ni hpe tsawra u ngu ai grau htum ai hkang da ai lam lahkawng lawm ai.  Dai gaw hkaw tsun ai hte sape shatai ai bungli hte matut mahkai nga ai. (Mat 22:37-39) Gara hku nna kun? Karai Kasang hte htingbu wa hpe tsawra ai myit rawt jat wa yang hkaw tsun mayu wa na re. Chyum ga sharin nkau gaw hkaw tsun bungli hta shang lawm na matu hkrit tsang chye ai. Yehowa a karum shingtau lam hte hkrit ai myit hpe tawt lai lu ai lam n-gun jaw mai ai. (Shk 18:1-3; Gsh 29:25) Ndai sumhpa hta lawm ai lawk hta, Karai Kasang hpe tsawra ai myit rawt jat wa hkra karum ya lu ai lam ni lawm ai. Tsawra ai myit grau madun chye hkra nawku hpung gaw shanhte hpe gara hku karum ya mai ai kun?

9. Mawdaw gau sharin ai ga shadawn hta jawng ma gaw gara ahkyak ai lam ni hpe chye wa ai kun?

⁹ Mawdaw gau sharin ai ga shadawn hpe bai myit yu u. Sara hte arau shi nan mawdaw gau nga ai shaloi, gara lam ni hpe naw sharin la ra ai kun? Sara a ga hpe mung madat nna, atsawm sha gau nga ai kaga mawdaw la ni hpe mung hkan yu ra ai. Ga shadawn, sara gaw kaga mawdaw la hpe lam yen ya nga ai mawdaw la hpe madun na re. Shing nrai, kaga mawdaw la ni a myi n mak mat hkra, mawdaw wan nhtoi hpe shayawm kau ya ai mawdaw la hpe madun nna sharin ya mai ai. Dai zawn ga shadawn ni gaw, mawdaw gau nga ai shaloi, tatut hkan sa lu ai lam ni hpe sharin ya ai.

10. Wenyi lam hta rawt jat hkra Chyum ga sharin hpe hpa gaw karum ya lu ai kun?

¹⁰ Dai hte maren, Yehowa hpe nawku hpang wa ai Chyum ga sharin gaw, sara kaw na sharin la ai sha n-ga, kasi kaja ai Yehowa a kaga mayam ni kaw nna mung sharin la ai. Wenyi lam hta rawt jat wa hkra gara lam ni gaw shanhte hpe karum ya lu na kun? Hkristan zuphpawng ni lung ai hku nna re. Hpa majaw kun? Zuphpawng hta na lu ai Chyum Laika lam matsun ni gaw, machye machyang, makam masham hte Karai hpe tsawra ai myit rawt jat hkra karum ya lu ai. (Kas 15:30-32) Zuphpawng hta, Chyum ga sharin hpe shi hte masa bung ai hpunau nauna ni hte shachyen ya mai ai. Nawku hpung hta, tsawra myit madun nga ai hpunau nauna ni a kaja ai atsam ningja ni hpe shi mu wa na re. Masa nkau mi hpe yu yu ga.

11. Nawku hpung hta Chyum ga sharin gaw hpa ni hpe sadi hkrup lu na kun? Shi hpe gara hku akyu shabyin ya lu ai kun?

¹¹ Ningrum ningtau n nga ai ma kanu re ai Chyum ga sharin gaw, shi hte masa bung ai Hkristan nauna hpe sadi hkrup ai. Shi a ma kaji hte arau shakut shaja let Nawku Htingnu de sa ai hpe mu ai shaloi myit masin hkra mat ai. Hkayawm dawm kau na matu shakut nga ai Chyum ga sharin gaw hkayawm dawm kau lu ai hpunau hte chye wa ai. Dai hpunau gaw Yehowa hpe tsawra ai myit grau law htam wa ai majaw, Karai a hkang da ai ga ni hpe hkan sa na matu shadut ya ai lam shi hpe tsun dan ai. (2 Ko 7:1; Hpl 4:13) Hpunau gaw mahkrum madup hpe tsun ngut ai hpang, “nang mung dawm kau lu na re” ngu tsun ai shaloi, Chyum ga sharin n-gun lu la ai. Chyum ga sharin nga ai numsha gaw, ngwi pyaw nga ai ramma nauna hpe sadi hkrup ai. Dai hpe mu ai shaloi, shi hpa majaw pyaw nga ai hpe grau nna chye mayu wa ai.

12. Nawku hpung na marai langai hpra gaw Chyum ga sharin ni hpe karum ya lu ai ngu hpa majaw lu tsun ai kun?

¹² Karai Kasang hte htingbu ni hpe tsawra u ngu ai Hkristu a tara hpe hkan sa ai gaw hpa hpe tsun mayu ai lam, sadi dung ai hkaw tsun masha ni a kasi ningli kaw nna Chyum ga sharin ni chye wa na re. (Yhn 13:35; 1 Tm 4:12) Dai sha n-ga, Chyum ga sharin gaw, shi hte masa bung ai hkaw tsun masha ni kaw nna mung sharin la lu ai. Hkristu a sape byin wa na  matu galai shai ai lam ni galaw lu ai lam dai kasi ningli ni kaw nna chye wa na re. (Trj 30:11) Nawku hpung na marai langai hpra gaw, Chyum ga sharin ni wenyi lam hta rawt jat wa hkra, lam amyu myu hku nna karum ya lu ai. (Mat 5:16) Zuphpawng sa lung ai Chyum ga sharin ni hpe n-gun jaw na matu nang gara hku shakut na kun?

13-14. Yesu gaw myit daw nga ai kasa ni hpe gara hku kanawn mazum wa ai kun?

¹³ Sape shatai mu ngu ai Hkristu a hkang da ai ga hpe bai hkan shadik lu hkra katsi mat ai hpunau nauna ni hpe anhte karum ya mayu ai. Myit daw nga ai kasa ni hpe Yesu kanawn mazum wa ai lam kaw nna sharin la lu ai.

¹⁴ Yesu garai n si shi ai aten hta kasa ni gaw, ‘shi hpe kau da nna, hprawng mat wa ai.’ (Mrk 14:50; Yhn 16:32) Kasa ni gawngkya mat ai aten hta, Yesu gara hku kanawn mazum wa ai kun? Shi hkrung rawt wa ai hte kalang ta, shi hpang hkan ai ni hpe ndai hku tsun ai: “Hkum hkrit myit; [ngai hkrung rawt wa ai lam,] nye a hpu nau ni hpe sa tsun dan mu.” (Mat 28:10) Yesu gaw kasa ni hpe asum n jaw ai. Shanhte kau da mat tim, “nye a hpu nau ni” ngu nna matut shaga ai. Yehowa zawn, Yesu mung matsan dum myit nga nna mara raw ya ai.​—2 Hk 13:23.

15. Hkaw tsun bungli hta n shang lawm mat sai hpunau nauna ni hte seng nna gara hku hkamsha ai kun?

¹⁵ Hkaw tsun bungli hta n shang lawm mat sai hpunau nauna ni hpe anhte myit tsang ai. Shanhte gaw hpunau nauna ni naw rai nna, shanhte hpe tsawra ai. Yehowa a matu shakut shaja let bungli galaw wa ai lam hpe anhte naw dum ai. Nkau mi nga yang, shaning law law galaw wa ai. (Heb 6:10) Anhte teng sha dum ai. (Luk 15:4-7) Yesu hpe kasi la nna, shanhte hpe myit tsang ai lam gara hku madun na kun?

16. Katsi mat ai hpunau nauna ni hpe myit tsang ai lam gara hku madun mai na kun?

¹⁶ Zuphpawng sa lung na matu saw shaga u. Myit daw nga ai kasa ni hpe Yesu n-gun jaw wa ai lam langai gaw, zuphpawng lung na matu saw shaga ai hku nna re. (Mat 28:10; 1 Ko 15:6) Ya aten hta mung, katsi mat ai ni hpe zuphpawng sa lung na matu n-gun jaw mai ai. Chyahkring hkring saw shaga ra chye ai. Yesu gaw shi a saw shaga ai lam hpe sape ni hkap la ai shaloi grai kabu na re.​—Mat 28:16 hte Luka 15:6 hte mung shingdaw yu u.

17. Katsi mat ai marai langai zuphpawng sa lung ai shaloi gara hku galaw ging ai kun?

¹⁷ Tsawra myit hte hkap tau la u. Yesu gaw sape ni hte hkrum ai shaloi, tsawra myit hte hkap tau la nna, shi maga hku nna ga shaga hpang ai. (Mat 28:18) Katsi mat ai marai langai Nawku Htingnu de sa wa ai shaloi gara hku galaw ging ai kun? Anhte maga hku nna tsawra myit hte shawng hkap tau la ging ai. Hpa tsun ra na hpe n chye ai majaw, myit tsang chye ai. Shi hpe kaya jahkrum ai baw n galaw ai sha, hkrum lu ai majaw grai kabu ai lam tsun mai ai.

18. Katsi mat ai hkaw tsun masha ni hpe gara hku n-gun jaw na kun?

¹⁸ Shanhte hpe n-gun jaw u. Yesu a sape ni gaw mungkan ting hta hkaw tsun u ngu ai hkang da ai ga a majaw, myit tsang chye ai. “Ngai nanhte hte rau dinggrin a nga nga na” ngu Yesu n-gun jaw ai. (Mat 28:20) Dai hku n-gun jaw ai gaw akyu nga ai kun? Nga ai. Kade n na yang, shanhte gaw “kabu gara shiga hpe matut hkaw tsun sharin nga” ai hta amu law nga ma ai. (Kas 5:42, JCLB) Katsi mat ai hkaw tsun masha ni mung n-gun jaw lam ra ai. Hkaw tsun bungli hta bai shang lawm na matu shanhte myit tsang nga chye ai. Marai langai sha hkaw tsun ra na n re ngu n-gun jaw mai ai. Shanhte sa mayu ai nga yang, arau mai  sa ai. Kabu gara shiga hkaw tsun ai hta bai shang lawm wa ai shaloi, anhte madi shadaw ya ai hpe chyeju dum na re. Katsi mat ai ni hpe hpunau nauna ni hku nna mu mada yang, nawku hpung ting ngwi pyaw wa na re.

19. Anhte gaw hpa hpe sharawng awng let galaw mayu ai kun? Hpa majaw kun?

¹⁹ Hkaw tsun ai hte sape shatai ai bungli hpe gara aten du hkra galaw ra na kun? Lamu ga aprat htum hkra galaw ra na re. (Mat 28:20) Dai bungli hpe dai aten du hkra anhte galaw lu na kun? Galaw lu hkra dawdan da ga. Anhte gaw “htani htana asak lu na matu, myit madung hte shakut nga ai ni” hpe hkan tam ai shaloi, aten, n-gun atsam hte ja gumhpraw ni hpe sharawng awng let anhte jaw mayu ga ai. (Kas 13:48, NW) Dai gaw Yesu a kasi ningli hpe hkan sa nga ai re. Shi ndai hku tsun ai: “Ngai e shangun dat ai wa a myit hku hkan galaw na hte, shi a magam bungli shangut lu na gaw, nye a shahpa rai nga li ai.” (Yhn 4:34; 17:4) Anhte mung dai zawn hkamsha ai. Anhte hpe ap da ai dai bungli hpe ngut kre hkra galaw mayu ga ai. (Yhn 20:21) Katsi mat ai ni hte hpawn, kaga ni hpe dai bungli hta anhte hte arau shang lawm shangun mayu ai.​—Mat 24:13.

20. Hpilipi 4:13 hku nga yang Yesu hkang da ai bungli hpe hpa majaw ngut kre hkra galaw lu ai kun?

²⁰ Yesu a hkang da ai ga hpe ngut kre hkra galaw na matu n loi ai. Raitim, dai bungli hpe anhte hkrai sha galaw nga ai n re. Anhte hte arau nga na ngu Yesu ga sadi jaw da ai. “Karai Kasang a shingdep shingtau ni” hku nna, “Hkristu a shangun ma ni” hku nna galaw ra na re. (1 Ko 3:9; 2 Ko 2:17, JCLB) Dai majaw, dai bungli hpe ngut kre hkra galaw lu ai. Dai lit hpe gun hpai nna kaga ni hpe mung dai hte maren galaw lu hkra karum ya lu ai gaw ahkaw ahkang kaba rai nna, ngwi pyaw lam lu shangun ai.​—Hpilipi 4:13 hpe hti u.