Hkaja Na Sumhpa 45
Hkaw Tsun Magam Awng Dang Hkra Yehowa Karum Ya Ai Lam
“Tinang hta myihtoi nga nga ai hpe, shanhte chye lu na ma ra ai.”—EZE 2:5.
Mahkawn 67 Mungga Hpe Hkaw Tsun U
Sumhpa Hta Lawm Ai Lam a
1. Hpa hpe myit mada da ai kun? Hpa hpe kam ai kun?
HKAW tsun bungli galaw ai shaloi, ninghkap ai lam ni hkrum na hpe anhte myit mada da ai. Htawm hpang hta, grau pyi sawng wa chye ai. (Dan 11:44; 2 Tm 3:12; Shr 16:21) Raitim, ra nga ai karum shingtau lam hpe Yehowa jaw na hpe kam mai ai. Hpa majaw kun? Kade daram yak ai lit raitim, ngut kre lu hkra, shi a mayam ni hpe Yehowa galoi mung karum ya wa ai majaw re. Ga shadawn, Babelon de woi la hkrum ai Yuda masha ni hpe hkaw tsun wa ai myihtoi Ezekela a mabyin nkau mi hpe hkaja yu ga.
2. Ezekela a hkaw tsun lawk na masha ni hte seng nna Yehowa gara hku tsun ai kun? Ndai sumhpa hta hpa lam hkaja na kun? (Ezekela 2:3-6)
2 Ezekela a hkaw tsun lawk hta gara zawn masha ni nga ai kun? Shanhte hpe Yehowa gaw, “n kaw n law” di ai ni, “myit ja ai ni,” “gumlau ai” ni ngu shaga da ai. Shanhte gaw, ju hpun zawn hkra machyi shangun ai, n-gawgawk zawn shoihpa nga ai ni re. Dai majaw, “hkum hkrit” ngu Ezekela hpe Yehowa chyahkring hkring tsun ai gaw mauhpa n re. (Ezekela 2:3-6 hpe hti u.) Hkaw tsun magam ngut kre hkra Ezekela gun hpai lu wa ai gaw, shi hpe (1) Yehowa shangun ai majaw, (2) Karai a wenyi n-gun jaw ai majaw, (3) Karai a Mungga shangang shakang ya ai majaw re. Dai lam 3 gaw Ezekela hpe gara hku karum ya wa ai kun? Dai ni aten anhte hpe mung gara hku karum ya wa ai kun?
Ezekela Hpe Yehowa Shangun
3. Gara ga ni a majaw Ezekela n-gun lu mat ai kun? Yehowa gaw shi madi shadaw ya na ngu ai hpe kam hkra gara hku galaw wa ai kun?
3 Yehowa gaw, “ngai nang hpe shangun dat na” ngu Ezekela hpe tsun ai. (Eze 2:3, 4) Shi grai n-gun lu mat na re. Hpa majaw kun? Yehowa gaw Mawshe hte Esaia hpe Shi a myihtoi ni hku nna lata ai shaloi, dai zawn ga ni tsun wa ai hpe shi bai dum na re. (Pru 3:10; Esa 6:8) Mayak mahkak ni tawt lai lu hkra, dai myihtoi yan hpe Yehowa karum ya wa ai hpe mung shi chye ai. “Ngai nang hpe shangun dat na” ngu Ezekela hpe Yehowa lahkawng lang tsun ai shaloi, Yehowa a karum shingtau lam hpe hkrak kam wa na re. Dai majaw, “Yehowa a mungga ngai kaw du” ai ngu ai ga yan ni hpe Ezekela laika hta chyahkring hkring mu lu ai. (Eze 3:16; 6:1) Yehowa shi hpe shangun dat ai hpe teng sha kam wa na re. Dai sha n-ga, Yehowa gaw Shi a myihtoi ni hpe gara hku karum ya wa ai labau hpe hkinjawng re ai kawa gaw Ezekela hpe sharin ya wa na re. Ga shadawn, Isak, Yaku hte Yeremia ni hpe “ngai nang hte rau rai nga nngai” ngu ai ga hpe Yehowa tsun ai.—Nin 26:24; 28:15; Yer 1:8.
4. Hpa gaw Ezekela hpe n-gun lu shangun ai kun?
4 Ezekela hkaw tsun ai hpe Israela law malawng gara hku bai htang ai kun? Yehowa ndai hku tsun ai: “Israela amyu chyawm gaw, na a ga hpe madat na n rai; nye a ga hpe pyi n madat ma ai.” (Eze 3:7) Ezekela hpe nyet kau ai gaw Yehowa hpe nyet kau ai re. Dai hku nyet kau ai gaw, myihtoi magam hpe atsawm n lu gun ai ngu ai lachyum n re ai hpe shi chye mat na re. Ezekela ndau shana ai tara jeyang ai shiga teng sha byin wa ai shaloi, “tinang hta myihtoi nga nga ai hpe, shanhte chye” wa na ngu Yehowa tsun da ai. (Eze 2:5; 33:33) Hkaw tsun magam ngut kre hkra galaw na matu, Ezekela n-gun lu mat na re.
Dai Ni Aten Anhte Hpe Yehowa Shangun
Ezekela zawn ninghkap ai lam, n gawn n sawn galaw ai lam ni hkrum chye tim, anhte hte rau Yehowa nga ai lam chye da (Laika pang 5-6 hpe yu u)
5. Esaia 44:8 hku nga yang, anhte hpe hpa gaw n-gun lu shangun ai kun?
5 Anhte hpe mung Yehowa shangun ai ngu ai lam kaw na n-gun la mai ai. Karai Kasang gaw, Shi a “sakse ni” ngu shaga nna anhte hpe shagrau ai. (Esa 43:10) Ahkaw ahkang kaba re. Shanhte hpe “hkum hkrit myit” ngu Yehowa n-gun jaw ai zawn, anhte hpe mung “hkum tsang myit” ngu n-gun jaw nga ai. Ninghkap ai ni hpe hpa majaw n hkrit ging ai kun? Ezekela zawn sha, anhte hpe Yehowa shangun ai majaw, Karai a madi shadaw ai lam lu da ai majaw re.—Esaia 44:8 hpe hti u.
6. (a) Anhte hpe madi shadaw ya na ngu ai hpe Yehowa gara hku tsun da ai kun? (b) Hpa gaw n-gun lu shangun ai kun?
6 Anhte hpe madi shadaw ya na ngu Yehowa tsun ai. Ga shadawn, “nanhte nye a sakse ni” re ngu n tsun shi yang, “nang hka rap wa yang, ngai nang hte rau rai nga nngai; hka nu hka shi ni hpe rap wa yang, lim wa na n rai; wan hpe kabye yang, hkru na n rai, wan shinglet mung galip na n rai” ngu tsun ai. (Esa 43:2) Hkaw tsun magam galaw ai shaloi, kalang lang hka nu zawn, wan zawn ninghkap ai lam ni anhte hkrum chye ai. Raitim, Yehowa a karum shingtau lam hte matut hkaw tsun nga ai. (Esa 41:13) Ezekela prat zawn sha, dai ni aten, masha law law mung shiga hpe nyet kau ma ai. Raitim, shanhte nyet kau ai hte sha, Karai a Sakse ni hku nna anhte a lit n awng dang ai ngu ai lachyum n re. Sadi dung let matut hkaw tsun yang, Yehowa ra sharawng na hpe chye da ai majaw anhte n-gun lu ai. “Tinang a shakut sharang ai hte maren, langai hte langai gaw tinang a shabrai lu la na” ngu kasa Pawlu tsun ai. (1 Ko 3:8; 4:1, 2) Aten na na ningshawng galaw wa ai nauna langai ndai hku tsun ai: “Tinang a shakut shaja ai lam hpe Yehowa kumhpa jaw ai lam chye ai majaw pyaw ai.”
Ezekela Hpe Karai A Wenyi N-gun Jaw
Yehowa a sumsing lamu wanleng shingran hpe Ezekela mu lu. Magam bungli ngut kre hkra Yehowa karum ya na hpe Ezekela grau kam wa (Laika pang 7 hpe yu u)
7. Mu wa ai shingran hpe bai myit shagu Ezekela gara hku hkamsha na kun? (Makawp sumla hpe yu u.)
7 Karai a wenyi kade daram atsam kaba ai hpe Ezekela mu ai. Shingran langai hta, n-gun kaba ai lamu kasa ni hpe chyoi pra ai wenyi karum ya ai lam, sumsing lamu wanleng a grai kaba ai dingsen ni shamu hkra karum ya ai lam hpe shi mu ai. (Eze 1:20, 21) Hpa byin mat ai kun? Grai mau mat ai majaw, “dai shingran hpe mu yang, ngai gum dagup” dat ai ngu tsun ai. (Eze 1:28) Hpang de, dai shingran hpe bai myit shagu, hkaw tsun magam ngut kre hkra, Karai a wenyi karum ya na ngu ai hpe kam nna n-gun lu wa na re.
8-9. (a) “Jan rai tsap u” ngu Yehowa tsun ai shaloi, Ezekela hpa byin wa ai kun? (b) Yak ai lit a matu Ezekela hpe Yehowa gara hku bai n-gun lu shangun ai kun?
8 Ezekela hpe Yehowa ndai hku tsun ai: “Masha kasha e, jan rai tsap u; ngai nang hpe ga tsun na de ai.” Karai a wenyi lawm ai dai ga gaw, rawt tsap lu hkra Ezekela hpe n-gun jaw wa ai. “Wenyi ngai hta shang nna, shi ngai hpe tsap shangun” ai ngu tsun ai. (Eze 2:1, 2) Hpang de, hkaw tsun magam galaw ai aten ni hta, Ezekela hpe Karai a “lata,” lam mi hku tsun yang, chyoi pra ai wenyi lam matsun ya ai. (Eze 3:22; 8:1; 33:22; 37:1; 40:1) “Baw ja ai hte myit ja ai” ai ni hpe hkaw tsun ra na lit a matu n-gun lu shangun ai. (Eze 3:7, NWT) “Shanhte a myi man htat ai majaw, na a myi man hpe ngai htat shangun nngai, shanhte a lahtan ja ai majaw, na a lahtan hpe ngai shaja ni ai. Ngai na a lahtan hpe nhpai lung hta grau nna shaja ni ai: . . . shanhte hpe hkum hkrit, shanhte n yawt ai myi man majaw hkum mak mat” ngu Yehowa tsun ai. (Eze 3:8, 9) ‘Masha ni baw ja ai majaw, hkum myit htum. Nang hpe ngai n-gun shaja ya na’ ngu tsun nga ai re.
9 Hkaw tsun ra na shara de, Ezekela hpe Karai a wenyi shaga mat ai. “Yehowa a lata gaw nye a ntsa n-gun kaba nga ai” ngu shi tsun ai. Hkaw tsun ra na shiga hpe atsawm chye na na matu bat mi na ai. (Eze 3:14, 15, NWT) Dai hpang, pa layang de Yehowa sa shangun ai. Dai hta, Ezekela ntsa “wenyi” shang wa ai. (Eze 3:23, 24) Hkaw tsun magam hpang na matu jin jin rai nga sai.
Dai Ni Aten Anhte Hpe Karai A Wenyi N-gun Jaw
Ezekela a mabyin zawn dai ni aten hta mung, hkaw tsun bungli ngut kre na matu hpa gaw karum ya ai kun? (Laika pang 10 hpe yu u)
10. Hkaw tsun magam galaw na matu, gara karum shingtau lam ra ai kun? Hpa majaw kun?
10 Hkaw tsun magam galaw na matu, karum shingtau lam anhte lu da ai kun? Ezekela a lam hpe bai myit yu u. Hkaw tsun bungli garai n hpang shi yang, Ezekela ra nga ai n-gun atsam hpe Karai a wenyi jaw ai. Ezekela zawn sha, dai ni mung chyoi pra ai wenyi karum ya ai majaw sha, anhte matut hkaw tsun lu ai re. Bungli hkring mat hkra Satan gasat nga ai majaw re. (Shr 12:17) Masha ningmu hku yu yang, Satan hpe anhte tsep kawp n lu shing daw ai. Raitim, hkaw tsun bungli hku nna, Satan hpe awng dang nga ai. (Shr 12:9-11) Gara lam hku nna kun? Hkaw tsun nga ai gaw, Satan jahkrit shama ai lam ni hpe n hkrit ai ngu madun nga ai re. Anhte kalang hkaw tsun magang, Satan kalang sum magang re. Rai yang, ninghkap ai lapran matut hkaw tsun lu ai gaw, hpa hpe madun ai kun? Anhte hpe chyoi pra ai wenyi n-gun jaw nga ai lam, Yehowa a myiman lu da ai lam madun ai re.—Mat 5:10-12; 1 Pe 4:14.
11. Karai a wenyi gaw hpa galaw ya na kun? Dai wenyi matut lu hkra hpa galaw ra ai kun?
11 Ezekela a myiman hte lahtan hpe Yehowa gaw ga shadawn hku nna ja shangun ai kaw nna hpa naw chye lu ai kun? Hkaw tsun bungli hta hkrum chye ai mayak mahkak hte anhte a n-gun atsam bung hkra Karai a wenyi karum ya lu ai. Tsun mayu ai gaw, gara mayak mahkak hpe raitim, tawt lai na matu n-gun jaw lu ai. (2 Ko 4:7-9) Rai yang, Karai a wenyi matut lu hkra hpa galaw ra ai kun? Akyu hpyi ga ni hpe Yehowa madat ya na ngu ai hpe kam ai myit hte, chyahkring hkring hpyi ra ai. Matut “hpyi mu, . . . tam mu, . . . akawk mu,” ngu sape ni hpe Yesu sharin ya ai. “Hpyi ai ni hpe” Yehowa gaw “chyoi pra ai Wenyi jaw na” re.—Luk 11:9, 13; Kas 1:14; 2:4.
Ezekela Hpe Karai A Mungga Shangang Shakang Ya
12. Ezekela 2:9–3:3 hku nga yang, laika katsu gara kaw na sa wa ai kun? Hpa ni lawm ai kun?
12 Ezekela hpe Karai a wenyi sha n-ga, Karai a mungga mung n-gun jaw ya ai. Shingran langai hta, laika katsu lang da ai lata maga mi hpe Ezekela mu ai. (Ezekela 2:9–3:3 hpe hti u.) Laika katsu gara kaw na sa wa ai kun? Hpa ni lawm ai kun? Ezekela hpe gara hku n-gun lu shangun ai kun? Yu yu ga. Laika katsu gaw Karai a tingnyang kaw na sa ai re. Laika katsu jaw na matu, Ezekela nnan hta mu wa ai lamu kasa mali kaw na langai hpe, Yehowa akyu jashawn wa na masa nga ai. (Eze 1:8; 10:7, 20) Laika katsu hta Karai a ga ni lawm ai. Gumlau ai bawng masha ni hpe bai tsun na matu, tara jeyang ai shiga re. (Eze 2:7) Laika katsu a laika man lahkawng yan hta, laika ni ka da ai.
13. Laika katsu hpe hpa galaw na matu, Ezekela hpe Yehowa tsun ai kun? Laika katsu hpa majaw dwi ai kun?
13 Laika katsu hpe sha nna, “kan hpe jahpring” na matu Ezekela hpe Yehowa tsun ai. Ezekela mung yawng sha kau ai. Hpa lachyum kun? Ndau shana ra na shiga hpe hpring tup chye na hkra shi galaw ra ai. Dai shiga hpe kam ra ai. Rai yang she, hkaw tsun na matu shi hpe shadut ya na re. Laika katsu hpe sha dat ai shaloi, laklai ai lam langai byin wa ai. “Lagat jahku zawn dwi nga ai.” (Eze 3:3) Hpa majaw kun? Yehowa a malai hku nna galaw ra na ahkaw ahkang gaw, Ezekela a matu, dwi ai namchyim zawn, grai ra sharawng hpa re. (Shk 19:8-11) Myihtoi hku nna, Yehowa hkap la ai hpe Ezekela grai chyeju dum ai.
14. Lit a matu jin jin rai nga hkra Ezekela hpe hpa gaw karum ya ai kun?
14 Hpang hta, Ezekela hpe Yehowa ndai hku tsun ai: “Ngai nang hpe tsun na ra de ai ga mahkra, madat mara nna, kraw lawang hta matsing da u.” (Eze 3:10) Laika katsu hta ka da ai ni hpe matsing da na matu, atsawm myit sawn sumru na matu tsun ai re. Dai hku galaw ai majaw, Ezekela n-gun lu wa ai. Laika katsu hta ndau shana ra na shiga lawm ai. (Eze 3:11) Ezekela a n-gup hta mung, myit hta mung Karai a shiga nga nga ai majaw, Karai jaw ai lit hpe kangka hkra galaw na matu jin jin rai nga sai.—Shakawn 19:14 hte shingdaw yu u.
Dai Ni Aten Anhte Hpe Karai A Mungga N-gun Jaw
15. Hkam jan lu na matu, hpa hpe “kraw lawang hta matsing” da ra ai kun?
15 Hkaw tsun bungli hta, hkam jan lu ai atsam nga na matu, anhte mung Karai a mungga hte jahpring da ra ai. Yehowa tsun ai yawng hpe “kraw lawang hta matsing” da ra ai. Dai ni aten hta, Chyum Laika kaw nna Yehowa ga shaga nga ai. Tinang a myit mang ai lam, hkamsha lam, myit masin hpe Chyum Laika matut shingkang ka-up hkra hpa galaw ra ai kun?
16. Chyum Laika hpe atsawm chye na hkra hpa galaw ra ai kun?
16 Anhte malu masha sha ngut ai hpang, hkum hkrang gaw lu sha hpe rin dat ai shaloi, n-gun nga wa ai zawn, Chyum Laika hti hkaja nna, myit sawn sumru ai gaw makam masham grau ngangkang wa shangun ai. Laika katsu kaw na sharin la lu ai lam ni hpe anhte matsing da ai. Chyum Laika hta lawm ai lam ni hpe atsawm chye na hkra, Yehowa gaw, Shi a Mungga hte “kan hpe jahpring” da shangun mayu ai. Akyu hpyi ai, hkaja ai, myit sawn sumru ai hku nna dai hku galaw mai ai. Shawng nnan myit masin hpe hkyen lajang na matu akyu hpyi ai. Dai hpang, Chyum daw langai hti ai. Hti ai hpe chyahkring hkring nna, atsawm myit sawn sumru ai. Hpa akyu lu na kun? Law law myit sawn sumru yang, Chyum Laika hpe grau chye na wa na, makam masham grau ngangkang wa na re.
17. Chyum Laika kaw na hti ai lam hpe myit sawn sumru na matu hpa majaw ahkyak ai kun?
17 Chyum Laika hti na matu, myit sawn sumru na matu hpa majaw ahkyak ai kun? Dai gaw, ya aten mungdan shiga hkaw tsun na matu, kade n na yang grai sawng ai tara jeyang ai shiga shana na matu n-gun lu shangun ai majaw re. Yehowa a ra sharawng hpa atsam ningja ni a lam, myit sawn sumru ai shaloi, Karai Kasang hte hku hkau lam grau ngang kang wa na re. Akyu hku nna, dwi ai namchyim zawn, ra sharawng hpa simsa lam, myit dik ai lam hkamsha lu na re.—Shk 119:103.
Hkam Jan Lu Na Matu Shadut Hkrum
18. Masha ni hpa hpe hkap la ra na kun? Hpa majaw kun?
18 Anhte gaw Ezekela zawn myihtoi gaw n re. Raitim, ngut sai ngu Karai Kasang tsun ai aten du hkra, Chyum Laika shiga hpe matut ndau shana na matu dawdan da ai. Tara jeyang ai aten du wa ai shaloi, masha ni gaw, sadi jaw ai ga n na wa ai law, Karai Kasang lanu lahku ai lam n nga ai law ngu tsun shara tsep kawp nga na n re. (Eze 3:19; 18:23) De a malai, anhte ndau shana ai shiga gaw Karai Kasang kaw na sa ai hpe shanhte hkap nan hkap la ra na re.
19. Hkaw tsun bungli ngut kre hkra galaw na matu, hpa gaw n-gun jaw na kun?
19 Hkaw tsun magam ngut kre hkra galaw lu na matu, anhte hpe hpa gaw n-gun jaw na kun? Ezekela hpe n-gun jaw ai lam 3 re. Anhte hpe Yehowa shangun dat ai lam, Karai a chyoi pra ai wenyi n-gun jaw ai lam, Karai a Mungga shangang shakang ya ai lam hpe chye da ai majaw, matut hkaw tsun nga ai re. Karai a karum shingtau lam hte hkaw tsun bungli ngut kre hkra galaw na matu, “jahtum du hkra” hkam jan lu na matu anhte shadut hkrum ai.—Mat 24:13.
Mahkawn 65 Karai Magam Hta Rawt Jat Nga U!
a Ndai sumhpa hta, myihtoi Ezekela hpe hkaw tsun bungli awng dang hkra Yehowa karum ya wa ai lam 3 hpe hkaja lu na re. Dai hpe hkaja ai shaloi, hkaw tsun magam awng dang hkra anhte hpe mung karum ya na hpe grau kam wa na re.