Nang Chye Ai Kun?
Mordehkai gaja wa asak hkrung wa ai kun?
MORDEHKAI ngu ai Yuda la gaw, Eshta Laika kaw na ahkyak ai shara hta lawm ai wa re. Persi hkawhkam htingnu hta magam gun ai Yuda bawng masha re. B.C. tsa ban 5 nnan hpang ai aten, “hkawhkam Ahasuru a lakhtak” hta re. (Dai ni aten, masha law law gaw, dai hkawhkam hpe Zaksi I ngu nna chye ma ai.) Hkawhkam hpe masha ni sat na matu lajang ai lam hpe Mordehkai aten dep hkum pat kau lu ai. Grai chyeju dum ai majaw, masha yawng a man hta shagrau na matu lajang ai. Mordehkai hte kaga Yuda ni a hpyen Haman si mat ai hpang, Mordehkai hpe hkringmang daju aya jaw ai. Dai ahkang aya a majaw Persi hkawseng mungdan kaw na Yuda amyu masha yawng sat shamyit n hkrum hkra, shi hkye la lu wa ai.—Eshta 1:1; 2:5, 21-23; 8:1, 2; 9:16.
Tsa ban 20 nnan daw na labau hpaji du nkau gaw, Eshta Laika gaw, maumwi sha re, Mordehkai gaja wa asak n hkrung wa ai ngu tsun ma ai. Raitim, 1941 hta, Mordehkai hte seng ai Chyum Laika labau hpe madi shadaw ai madi madun lam hpe lamu ga sawk sagawn hpaji du ni tam mu wa ai rai na re. Hpa hpe kun?
Maduka (Jinghpaw hku Mordehkai) ngu ai la langai a lam ka da ai Persi chyuni hpawm (cuneiform) laika hpe shanhte tam mu wa ai. Dai la gaw, Shushan mare hta hpajang ai du hku nna magam gun wa ai. Jahpan jum wa rai na re. Dai laika hpe mu tam ai shaloi, Sinpraw mung na labau sara Ata Anganat gaw, “Chyum Laika a daw n re ai laili laika hta Mordehkai a lam lawm ai shawng nnan lang re” ngu tsun ai.
Hpang de, hpaji du ni gaw, hkying hku law ai kaga Persi chyuni hpawm laika hpe ga gale ma ai. Dai hta, Pasepalat mare bunghku ni a makau na gumhpraw dum jahten hta tam mu wa ai nlung pa ni lawm ai. Zaksi I lakhtak na nlung pa ni re. Dai hta Elan amyu ga hte ka da nna, Eshta Laika kaw na mying law law lawm ai. a
Persi chyuni hpawm laika hta mu lu ai Mordehkai (Maduka) a mying
Pasepalat nlung pa law law hta, Zaksi I lahtak, Persi hkaw na amu madu Maduka a mying madun da ai. Nlung pa langai hta Maduka hpe ga gale ai wa hku nna madun da ai. Dai gaw Mordehkai hte seng ai Chyum Laika hta tsun da ai lam hte hkrak sha re. Mordehkai gaw, Hkawhkam Ahasuru (Zaksi I) a hkaw hta magam gun wa ai wa rai nna, yawm htum amyu ga 2 chye tsun ai. Shushan hkaw chyinghka hta, galoi shagu dung ai. (Eshta 2:19, 21; 3:3) Dai chyinghka gaw, hkaw hta magam gun ai du ni bungli galaw ai htingnu kaba re.
Nlung pa ni hta madun da ai Maduka hte Chyum Laika na Mordehkai gaw, bung ai lam law law nga ai. Aten hte shara langai hta sha asak hkrung wa ai. Shara langai kaw sha hkaw hta magam gun wa ai re. Dai zawn bung ai lam ni hpe yu yang, Mordehkai hte Maduka gaw langai sha re ai ngu lu tsun ai.
a 1992 hta, labau Hpaji du Edawin Em Yama Uji gaw, Pasepalat nlung pa ni kaw na mying 10 a lam hpe sumhpa langai hku nna ka wa ai. Dai mying ni hpe Eshta Laika hta mung mu lu ai.
