Matut hpa byin ai hpe n tsun shi yang, aten hpring magam hta gara hku shang lawm wa ai hpe tsun dan na.

1942, Karebiyan panglai na tsawm ai Kuratsau zunlawng hta ngai shangai wa ai. Awa gaw nnan hta Surinam kaw na re. Raitim, bungli a majaw ndai zunlawng de htawt wa ai re. Ngai n shangai shi ai shaning loi mi hta, awa gaw Kuratsau hta shawng nnan hkalup hkam ai Yehowa Sakse re. a Awa gaw kasha ni hte bat shagu Chyum Laika hkaja ai. Anhte gaw galoi shagu aput angun galaw ai. Awa gaw shi kanu hpe yu na matu, ngai asak 14 ning hta Surinam de nta ting htawt mat wa ai.

Surinam de du ai shaloi, nawku hpung hta Yehowa hpe myit rawt let magam gun nga ai ramma ni hte kanawn byin ai. Ngai hta asak loi mi kaba ai aten galu ningshawng ni re. Shanhte a hkaw tsun magam mahkrum madup ni tsun dan ai shaloi, shanhte grai pyaw nga ai. Zuphpawng ngut shagu anhte Chyum Laika lam ni tsun byin ai. Kalang lang shinggan kaw dung nna, shagan grai law ai lamu de yu let shaga byin ai. Nye prat hta hpa byin mayu ai hpe chye hkra, dai manang ni karum ya ai. Yehowa a matu ngai magam gun mayu ai. Dai majaw, asak 16 ning hta hkalup hkam dat ai. Asak 18 ning hta aten galu ningshawng galaw hpang ai.

Ningshawng galaw let, lam law law sharin la lu wa ai. Dai ni gaw aten hpring magam hta karum ya ai. Sharin la ai lam langai gaw, kaga ni hpe shaman ya na matu grai ahkyak ai lam chye wa ai. Ngai ningshawng galaw hpang ai shaloi, sasana magam gun hpunau Wilam Ban Sa-i gaw, kaji kajaw lam kaw na hkawt yu ya ai. b Nawku  hpung lit ni gara hku gun hpai ra na hpe sharin ya ai. Dai zawn shaman hkrum na matu kade daram ahkyak ai hpe dai shaloi ngai n chye shi ai. Hpang shaning hta laksan ningshawng hku nna lit ap hkrum ai. Surinam lanam nam maling kaw na san san re ai hpung ni hpe shawng nnan woi awn ya ra ai. Hpunau ni aten hkrak shaman ya ai majaw chyeju dum ai. Dai aten kaw na shanhte a kasi ningli hte maren, kaga ni hpe shaman ya na matu ngai shakut ai.

Lahkawng ngu na sharin la lu ai lam gaw, prat hpe asan sha hte atsawm nga ai gaw akyu nga ai lam chye wa ai. Shata praw shagu, shata mi hta ra na arai ni hpe ningshawng manang hte ngai jahpan galaw ai. Langai gaw mare de sa nna mari ai. Shata mi na jai jarik re ai majaw atsawm lajang ra ai. Arai ni shata mi hkam hkra ka-ang hkup masat da ra ai. Lanam nam maling hta lama ma ma mat yang, karum ya na masha nau n nga ai. Prat hpe atsawm sha hte asan sha nga chye hkra, kaji ai aten kaw na sharin la da ai majaw, Karai a magam hta myit maju jung lu ai ngu ngai shadu ai.

Masum ngu na lam gaw, masha ni hpe shanhte a amyu ga hte sharin ya lu ai re. Dat, Ingalik, Papiyamanto, Surinam hta law malawng tsun ai ga re ai Sarannantungo (Sarannan amyu ga ngu nna mung chye) amyu ga ni hpe ngai chye tsun ai. Raitim, lanam nam maling hta nga ai ni gaw, shanhte a amyu ga hte tsun yang she kabu gara shiga hpe madat ma ai lam ngai sadi hkrup ai. Saramekkan amyu ga zawn re ai shanhte a amyu ga nkau gaw, nye matu grai yak ai. Nsen nem, tsaw grai law ai. Raitim, grai akyu nga ai. Shanhte a amyu ga hte lu tsun ai majaw, shaning ni laman masha law law hpe tengman ai tara sharin ya lu wa ai.

Kalang marang mani hpa byin mat ai aten ni mung nga ai. Kalang mi hta, shat kan machyi chye ai chyum ga sharin langai hpe, kan gara hku rai ngu san mayu ai wa, gaja wa san dat ai shaloi gaw ma hkum nga taw ai kun? ngu san hkrup mat ai. Dai num nga yak mat ai. Dai zawn shut ai lam ni nga tim, tinang lit ang ai shara na masha ni hpe shanhte a ga hte shaga na matu ngai ayan shakut ai.

1970 hta hpung kawan hku nna lit ap hkrum ai. Dai shaning ting, lanam nam maling na san san rai nga ai hpung law law hpe “Yehowa Sakse Ni A Gin Jaw De Sa Chyai Ai Lam” sumla madun dan ai. Shanhte kaw du na matu, hpunau nkau hte ngai hkanu dingyang hkali hte sa ra ai. Wan jak, sau pung, wan kawk, sumla madun jak ni hte hpring tup sha re. Hkin gau de du ai shaloi, sumla madun na shara de du na matu rai ni bai hpai sa ra ai. Dai zawn mayak mahkak ni nga tim, dai lamang ni hpe san san byin nga ai shara kaw na masha ni grai ra ai majaw, dai hkrun lam ni hpe ngai grai dum ai. Yehowa a lam, uhpung a ginding aga daw hte seng ai lam ni hpe kaga ni hpe sharin ya lu ai ahkang lu ai majaw grai pyaw ai.  Masha ni Yehowa hte hku hkau wa ai hpe mu lu ai shaman chyeju gaw, magam gun ai shaloi sak jaw wa ai lam yawng hta grau ai.

Shabrang prat hte magam gun ai a akyu ni hpe chye tim, ningrum ningtau ra ai ngu hkamsha wa ai. Dai majaw, lanam nam maling kaw na aten hpring magam a mayak mahkak ni hpe hkam jan lu ai ningrum ningtau langai jaw rit ngu laksan akyu hpyi ai. Laning mi daram na ai hpang, shawang myit nga ai laksan ningshawng nauna I-te hte hkrum ai. I-te gaw kaji ai shaloi kaw na kasa Pawlu hpe grai yu kaba ai wa, Pawlu zawn hkaw tsun magam hta dang lu ai daram sak jaw mayu ai wa re. 1971 September hta anhte hkungran nna, hpung kawan bungli hta rau shang lawm ai.

I-te gaw matsan ai dinghku hta kaba wa ai majaw, lanam nam maling na hpung kawan bungli hta aloi sha nga manu mat ai. Ga shadawn, nam maling kata na nawku hpung ni hpang de sa chyai ai shaloi, rai law law n la sa ai. Hkanu kaw sha rai hkrut, hka shin ai. Nta madu ni shadu jaw ai hpa raitim sha ai. Hka sing gu ni, nga ni, nam maling hte hkanu ni kaw na rim la ai dut sat ni re. Hka wan n nga yang, lahpaw lap hte sha ai. Chyaw n nga yang, ta hte sha ai. Yehowa a magam hta sak jaw nna shang lawm let masum rit ai sumri grau ngang wa ai ngu an hkamsha ai. (Hpj 4:12) Dai mahkrum madup ni hpe an hpa hte mung n lu galai ai.

Sumhpa nnan hta tsun wa ai mabyin gaw, lanam nam maling na san san byin nga ai hpung langai kaw na bai wa ai shaloi hta re. Hka hpungla ni ntsa gawt ai shaloi, hkali gaw hka kata de chyahkring mi du mat tim, kalang ta hka ntsa bai waw wa ai. Anhte gaw asak hkye palawng hpun da ai majaw,  hkali kaw na n hkrat mat ai. Li kata de gaw hka ni shang wa ai. Dai majaw di kata na lusha ni hpe shaw kau nna, dai di hte hka ni hpe dagawt kau ra ai.

Sha na matu hpa n ngam sai majaw, hkanu ding yang yu wa let nga myek ai. Raitim, langai mi pyi n lu ai. Dai majaw, sha hpa lu hkra karum ya rit ngu Yehowa kaw akyu hpyi ai. Akyu hpyi nna kalang ta sha, hpunau langai nga shat jahkrat ai shaloi nga kaba langai lu ai. Marai manga hkru hkra lu sha ai.

Hpung kawan bungli hta manga ning lawm ngut ai hpang, I-te hte ngai n myit mada da ai shaman chyeju lu wa ai. Kanu kawa byin sana. Matut hpa galaw ra na hpe hkrak n lu tsun tim, dai shiga na ai majaw pyaw ai. Byin mai yang, lahkawng yan aten hpring magam hta matut lawm mayu ai. 1976 hta, kasha ma gam Iteniye shangai wa ai. Lahkawng ning jan na ai hpang, ma naw Jobani shangai wa ai.

Dai shaloi, Surinam hta hpung kawan ra ai majaw, kasha lu wa tim hpung kawan matut galaw na matu ginjaw garan rung gaw lajang ya ai. Kasha ni naw kaji ai shaloi, nawku hpung nau n law ai ninghtawn hta sha lit ang ai. Dai majaw, shata shagu bat nkau hta hpung kawan nna, ngam ai shani ni hta tinang lit ang ai nawku hpung hta ningshawng galaw ai. Nta hte ni ai nawku hpung ni hpang de sa kawan ai shaloi, I-te hte ma ni hkan ma ai. Raitim, lanam nam maling kaw na nawku hpung ni, ninghtawn zuphpawng ni nga yang, ngai hkrai sha sa ai.

Lit yawng hpe tup hkrak galaw lu hkra, atsawm lajang ra ai. Bat shagu dinghku nawku galaw ya ai. Lanam nam maling kaw na nawku hpung ni hpang de sa kawan ai shaloi hta gaw, nta kaw I-te gaw kasha lahkawng hte dinghku nawku galaw ai. Byin mai shagu gaw, dinghku nawng rau galaw na matu anhte shakut ai. Kasha ni a matu akyu nga ai ban sa lam ni lajang ya ai. Gim ni ginsup ai. Nta makau na myit lawm hpa shara ni de sa chyai ai. Ngai gaw nawku hpung lit ni lajang let yup tung du hkra du mat chye ai. I-te gaw, Ga Shagawp 31:15 hta lawm ai grai kyet ai ningrum ningtau re. Kasha ni jawng n sa shi yang, shani shagu Chyum Laika lu hti hkra, jahpawt shat rau sha lu hkra, nhtoi n htoi shi yang rawt chye ai.  Yehowa jaw ai lit ni hpe kangka hkra galaw lu na matu galoi shagu karum ya ai, sak jaw mayu ai myit nga ai ningrum ningtau lu la ai majaw, chyeju dum ai.

Yehowa hte hkaw tsun magam hpe kasha ni tsawra wa hkra, an shakut nna karum ya ai. An byin shangun mayu ai majaw n re ai sha, shanhte nan lata nna aten hpring magam hta lawm wa ai baw byin shangun mayu ai. Mayak mahkak ni a lam tsun dan tim, aten hpring magam hta lu ai ngwi pyaw lam, Yehowa gara hku karum ya ai, dinghku nawng hpe gara hku shaman chyeju jaw ai ngu ai lam hpe ahkyak shatai nna tsun dan ai. Prat hta Yehowa hpe shawng tawn ai Sakse Hkam ni hte kanawn lu hkra mung lajang ya ai.

Nta masha ni hpe lanu lahku na matu anhte ra ai lam yawng hpe Yehowa lajang ya ai. Tinang maga kaw na gaw dang lu ai daram shakut ra ai. Shabrang prat hte laksan ningshawng hku nna lanam nam maling hta lu wa ai mahkrum madup ni gaw, ra ai arung arai ni a matu tau hkrau lajang da chye hkra karum ya ai. Raitim, kalang lang, dang lu ai daram shakut ai lapran, n hkang lu ai masa ni a majaw, ra kadawn ai hpe n lu ai aten ni mung nga ai. Dai zawn aten ni hta, Yehowa galoi shagu karum ya na hpe kam ai. Ga shadawn, 1980 hte 1990 lapran, Surinam hta kasu kabrawng ai lam byin ai. Dai shaning ni laman, madung ra kadawn ai hpe lu na matu yak ai aten ni pyi nga ai. Raitim, Yehowa galoi shagu lajang ya ai.​—Mat 6:32.

Prat ting, Yehowa anhte hpe ayan lanu lahku ya ai. Myit dik lam nga hkra karum ya ai. Kasha yan gaw laksan shaman chyeju nan re. Yehowa hpe nawku wa hkra bau maka lu ai gaw laksan ahkaw ahkang re. Aten hpring magam hpe kanbau bungli hku nna shanhte lata ma ai majaw an grai pyaw ai. Iteniye mung, Jobani mung uhpung lajang ya ai jawng ni lung nna, ya, ningrum ningtau ni hte rau Surinam ginjaw garan rung kaw magam gun nga ai.

I-te mung, ngai mung, ya, asak kaba sai. Raitim, laksan ningshawng hku nna Yehowa a magam hta bungli law nga dingyang re. Bungli grai law ai majaw, hka hpung yawt sharin na matu pyi aten n lu shi ai. Myit malai gaw n lu ai. Lai wa sai aten hpe bai myit yu ai shaloi, aten hpring magam hpe prat ting galaw na matu kaji ai aten kaw na dawdan wa ai gaw, kaja htum dawdan lam re.