LAMU marang masa hpe tau hkrau maram ai wa gaw lamu marang nsen rim jak hta pru wa ai lam ni hpe sawn maram nga ai. Masha grai law ai shara de shoihpa nga ai nbung laru bung wa ai hpe shi mu ai. Masha ni a shim lum lam hpe shi myit tsang nga ai majaw, garai n hpang hkrat shi yang, shanhte hpe sadi jaw na matu dang lu ai daram galaw wa ai.

Dai hte maren, Yehowa mung ya aten hta, lamu marang maram ai shiga kaw na anhte na lu ai shiga yawng mayawng hta na grau shoihpa nga ai “nbung laru” a lam mungkan ting na masha ni hpe shana ya nga ai. Dai hpe shi gara hku shana ya ai kun? Sadi jaw ga hpe bai htang na matu masha ni hpe aten jaw nga ai lam anhte hpa majaw kam mai ai kun? Mahtai lu na matu, lai wa sai aten hta Yehowa jaw wa ai sadi jaw lam nkau hpe shawng myit yu ga.

Chyum Laika prat hta, “nbung laru” hte bung ai tara jeyang ai lam ni hpe Yehowa sadi jaw wa ai. Shi a tara ni hpe dingsang n madat ai ni hpe shi ari jaw na matu re. (Gsh 10:25, JCLB; Yer 30:23) Masa lam shagu hta, dai masha ni gaw shi a yaw shada lam hte maren galai shai lu hkra tau hkrau chye hkra lam matsun jaw wa ai. (2 Hk 17:12-15; Neh 9:29, 30) Ginding aga na sadi dung ai mayam ni hpe akyu jashawn nna shi tara jeyang sana lam tsun shangun ai. Rai yang she, masha ni gaw galai shai ra na lam hpe chye nna kalang ta hkan sa lu na re.​—Amo 3:7.

Noa gaw sadi dung ai mayam ni kaw nna langai re. Shi a aten na akyang lailen n kaja ai, daw sa ai masha ni hpe Hka Sha-u Ing wa sana lam shaning law law n hkrit n tsang sadi jaw wa ai. (Nin 6:9-13, 17) Hka Sha-u Ing ai kaw na lawt lu na matu hpa galaw ra ai hpe shanhte chye hkra tsun dan wa ai. Dai majaw, shi hpe “dinghpring ai tara hkaw dan ai sara” ngu nna chye ma ai.​—2 Pe 2:5.

Noa shakut wa tim, Karai Kasang a shiga re ai Hka Sha-u Ing ai sadi jaw ga hpe masha ni nyet kau ai. Shanhte hta makam masham n nga ai lam madun wa ai. Dai majaw, “sha-u ing wa ai hte nlang hte hpe magawn mat wa ai” shaloi, shanhte si mat ai. (Mat 24:38, 39; Heb 11:7) Karai Kasang gaw sadi n jaw wa ai ngu shanhte n lu tsun ai.

Kaga aten ni hta, Yehowa gaw shi a tara jeyang na shiga re ai “nbung laru” garai n byin shi ai aten kadun laman, mabyin langai hpra hta sadi jaw wa ai. Aten kadun tim pyi, shanhte bai htang lu na matu aten law hkra jaw wa ai. Ga shadawn, moi na Egutu mung hta Ari Zinli 10 byin ai laman, Yehowa gaw tau hkrau nna sadi jaw wa ai hpe mu lu ai. Ga shadawn langai hku nna, Hpara-u hte shi a mayam ni hpe 7 lang na sin marang htu na lam hpe tau hkrau sadi jaw na matu Mawshe yan Arun hpe Yehowa shangun dat ai. Sin marang gaw hpang shani hta htu wa na re ai majaw, dai kaw na lawt lu hkra makoi na shara mu tam na matu aten law hkra Karai Kasang jaw wa ai kun? Chyum Laika hta ndai hku tsun da ai: “Yehowa a ga hkrit kamyin ai Hpara-u agyi salang ni gaw, shanhte a shangun ma ni hte tinang yam nga ni hpe nta de hprawng wa shangun mu ai: Yehowa a mung ga hpe hpa n nawn ai ni chyawm gaw shanhte a shangun ma ni hte tinang a yam nga ni hpe pa e dam da mu ai.” (Pru 9:18-21) Yehowa gaw aten law hkra jaw wa ai. Dai majaw, alawan bai htang ai ni gaw shoihpa n hkrum ma ai.

Hpara-u hte shi a mayam ni gaw 10 lang na ari zinli du hkra tau hkrau nna sadi jaw hkrum wa ai. Raitim, sadi jaw ga hpe shanhte nyet kau ai gaw angawk ai lam re. (Pru 4:22, 23) Shanhte a kasha alat ni si mat ai hpe sha mu lu wa ai. Grai yawn hpa re! (Pru 11:4-10; 12:29) Sadi jaw ga hpe aten dep bai htang lu na ahkaw ahkang shanhte hta nga wa ai kun? Nga wa ai. Mawshe gaw 10 lang na ari zinli byin wa na hte seng nna Israela ni hpe kalang ta sadi jaw wa ai. Shanhte a nta masha ni gara hku lawt lu na hte seng nna mung lam matsun jaw wa  ai. (Pru 12:21-28) Sadi jaw ga hpe marai kade bai htang wa ai kun? Sawn maram ai lam nkau hku nga yang, masha wan 3 jan gaw Egutu mung kaw na pru wa ai. Dai hta, Israela ni, Egutu masha ni, Israela n re ai “amyu kaga law law” lawm ai. Karai Kasang a tara jeyang ai lam kaw nna shanhte lawt lu wa ai.​— Pru 12:38.

Dai ga shadawn ni hpe yu yang, Yehowa gaw shi a sadi jaw ga hpe hkan sa na matu aten law hkra jaw ai hpe chye lu ai. (Trj 32:4) Karai Kasang gaw hpa majaw dai hku galaw wa ai kun? Yehowa gaw “yawng mayawng myit kayin wa nna, kadai rai ti mung, hten bya ai n hkrum mu ga, shi ra nga ai” lam Petru sanglang dan wa ai. (2 Pe 3:9) Karai Kasang gaw shinggyim masha ni hpe lanu lahku ai. Tara jeyang ai lam garai n byin shi yang, myit malai lu nna hpaji jaw ga ni hpe hkan sa na matu shi ra sharawng ai.​—Esa 48:17, 18; Rom 2:4.

Dai ni aten hta mung, mungkan ting hpe shabra nga ai ahkyak ai sadi jaw ga hpe masha yawng hkan sa ra ai. Yesu mungkan ntsa nga ai shaloi, ndai mungkan a mabyin masa hpe “ru tsang kaba” laman hta jahten kau na lam sadi jaw wa ai. (Mat 24:21) Htawm hpang hta tara jeyang ai hte seng nna, shi hpang hkan ai ni chye na na matu hte dai aten ni wa sai hpe chye na matu myihtoi ga hpe dan dan leng leng tsun dan wa ai. Dai ni aten hta anhte mu lu nga ai mungkan a ahkyak ai mabyin masa ni hte seng nna Yesu tsun dan wa ai.​—Mat 24:3-12; Luk 21:10-13.

Dai myihtoi ga hte maren, Yehowa gaw shi hpe nawku nna shi a ga madat na matu masha yawng hpe ya aten hta n-gun jaw nga ai. Shi gaw, madat mara ai masha ni hpe ya aten hta grau kaja ai aprat lu shangun mayu ai. Htawm hpang hta mung shi a dinghpring ai mungkan nnan hta shaman chyeju lu shangun mayu ai. (2 Pe 3:13) Yehowa gaw shi a ga sadi ni hpe kam na matu masha ni hpe karum ya mayu ai. Dai majaw, “masha amyu baw shagu a matu mara sakse tai lu u ga, mungkan ting hta e hkaw dan lu na rai nga ai” ngu nna Yesu tau hkrau tsun da ai asak hkye ai “mungdan a kabu gara shi ga” hpe lajang da ya ai. (Mat 24:14) Mungdan 240 daram hta Karai Kasang gaw, tengman ai nawku dawjau ai ni hpe “sakse” tai na matu (sh) Karai Kasang a shiga hpe hkaw tsun na matu hpawng de da ya ai. Sadi jaw ga hpe madat mara na matu hte shi a ding hpring ai tara jeyang ai lam re ai “nbung laru” kaw nna masha law law lawt lu na matu Yehowa ra sharawng ai.​—Zep 1:14, 15; 2:2, 3.

Sadi jaw ga hpe bai htang na matu aten law hkra masha ni hpe Yehowa jaw ai kun? N jaw ai kun? ngu ai ga san gaw ahkyak n re. Shi galoi mung aten jaw wa ai hpe anhte mu lu ai. Ahkyak ai ga san gaw: Aten naw nga ai laman masha ni gaw Yehowa a sadi jaw ga hpe madat na kun? Karai a shiga htawn tsun ai anhte ni gaw, ndai hpang jahtum nhtoi hta masha ni asak lawt lu na matu dang lu ai daram masha law law hpe karum ya mat wa ga.