1-2. (a) Kade n na yang mungdan ga daga ni gaw hpa hpe ndau shana wa na kun? (b) Gara ga san ni a mahtai hpe chye ra ai kun?

MUNGDAN ga daga ni gaw grai na hkra la wa ai “ngwi pyaw ai hte asan apan rai nga ai” ngu ai ndau shana ai lam hpe ya sha shana dat ai ngu shingran yu u. Mungkan ga gaw grai shim lum sai ngu arawng la let shanhte tsun na re. Mungkan a mung masa lam yawng gaw shanhte a hkang da ai npu hta nga sai ngu shadu shangun mayu ai. Raitim, hpang de byin wa na lam hpe shanhte tsep kawp hkang lu na n re. Hpa majaw kun? Chyum Laika myihtoi ga hku nga yang, “shanhte a ntsa e hten byak wa ai gaw akajawng sha du na ra ai rai nna, shanhte kaning rai mung hprawng wa lu na ma ai n rai.”​—1 Ht 5:3.

² Ndai ahkyak ai ga san ni a mahtai hpe chye ra ai: “Ru tsang kaba” laman hpa ni byin wa na kun? Dai aten laman hpa galaw na matu Yehowa anhte hpe myit mada ai kun? Ru tsang kaba laman matut nna sadi dung lu na matu ya aten kaw nna anhte hkum anhte gara hku hkyen lajang da mai ai kun?​—Mat 24:21.

3. Shingran 17:5, 15-18 hku nga yang “Galu Kaba Ai Babelon” hpe Karai Kasang gara hku jahten na kun?

³ Shingran 17:5, 15-18 hpe hti u. “Galu Kaba Ai Babelon” gaw jahten kau hkrum na re. Shawng hta shaleng dan wa sai hte maren, mungdan ga daga ni gaw dai aten hta byin wa na lam ni hpe hkang lu na n re. Hpa majaw kun? “Karai Kasang a myit hku shadik na hte, . . . Karai Kasang gaw shanhte a kraw lawang hta hpaji daw bang ya mu ai.” Dai hpaji gaw hpa rai na kun? Shut shai ai Hkristan ni hte hpawn shut shai ai nawku htung yawng hpe jahten na matu re. “Nrung shi tu” ai “hkyeng kabrim ai matse labye” a myit masin de Karai Kasang gaw shi a hpaji daw bang ya na re. Nrung shi re ai mung masa yawng gaw, Mungkan  Wunpawng Hpung (UN) re ai “matse labye” hpe madi shadaw ya ai. (Shr 17:3, 11-13; 18:8) Mung masa ahkang aya nga ai ni gaw, shut shai ai nawku htung hpe gasat ai shaloi, ru tsang kaba hpang wa sai kumla re. Teng sha kajawng kaja byin wa na mabyin masa re.

4. (a) Mungdan ga daga ni hku nna shut shai ai nawku htung hpe gasat ai gaw tara ai ngu tsun na matu hpa lam nga ai kun? (b) Dai nawku htung a hpung shang masha ni gaw hpa galaw na kun?

⁴ Galu Kaba Ai Babelon hpe mungdan ga daga ni hku nna gasat ai shaloi tara ai ngu tsun na matu hpa lam nga ai hpe gaw anhte n chye ga ai. Nawku htung ni gaw simsa lam lu na matu dingbai dingna jaw nna, mung masa lam hta mung ginjang nga ai ngu shanhte tsun chye ai. Dai nawku htung ni gaw sutgan ni hte arung arai ni hpe grai law hkra mahkawng da sai ngu nna mung shanhte tsun chye ai. (Shr 18:3, 7) Dai gasat ai lam gaw nawku htung hta lawm ai hpung shang masha yawng hpe jahten kau na masa gaw n re. De a malai, mungdan ga daga ni gaw nawku htung a uhpung ni hpe sha jahten kau na masa nga ai. Dai uhpung ni jahten hkrum ai majaw, hpung shang masha ni gaw shanhte a ningbaw ni hkrat sum mat sai hpe chye nna, dai nawku htung ni hte tsan tsan nga mat na re.

5. Ru tsang kaba hte seng nna Yehowa hpa ga sadi jaw da ai kun? Hpa majaw kun?

⁵ Galu Kaba Ai Babelon hpe jahten na matu aten kade daram na na hpe Chyum Laika hta n tsun da ai. Raitim, aten kadun laman sha byin na hpe gaw anhte chye ai. (Shr 18:10, 21) Ru tsang kaba aten hpe “shayawm shagying kau” na ngu Yehowa ga sadi jaw da ai majaw, shi “lata la” ai ni hte tengman ai nawku htung gaw ngam nga na re. (Mrk 13:19, 20, JCLB) Raitim, ru tsang kaba hpang na aten hte Hara Magedon majan laman anhte hpe hpa galaw na matu Yehowa myit mada ai kun?

6. Shut shai ai nawku htung hte san san nga ai hte sha hpa majaw n mai ai kun?

⁶ Shawng na sumhpa hta anhte hkaja wa sai hte maren, shi hpe nawku dawjau ai ni gaw Galu Kaba Ai Babelon hte san san nga na matu Yehowa myit mada ai. Raitim, dai hte sha n hkum tsup shi ai. Yehowa hpe nawku dawjau na matu dawdan ra ai. Anhte galaw lu ai lam lahkawng hpe myit yu ga.

7. (a) Yehowa a ding hpring ai tsang madang ni hpe matut nna gara hku hkan sa mai na kun? (b) Hebre 10:24, 25 hta tsun da ai hte maren laksan hku nna ya aten hta arau zuphpawng na matu hpa majaw ahkyak ai kun?

 ⁷ Langai, Yehowa a ding hpring ai akyang lailen hte maren matut nna nga ra ai. Anhte gaw mungkan a manu shadan ai lam hte tsang madang ni hpe n hkap la ai. Ga shadawn, akyang lailen htenza ai lam yawng hpe koi ra ai. Dai ni hta, hkrang bung shada hkungran ai lam hte num shada la shada nga sha ai lam ni lawm ai. (Mat 19:4, 5; Rom 1:26, 27) Lahkawng, anhte gaw hpunau nauna ni hte arau matut nna nawku dawjau ra ai. Dai hpe gara shara kaw nga ai raitim anhte galaw lu ai. Nawku Htingnu (sh) ra ang yang nta hta (sh) kadai n chye ai shara hta pyi anhte nawku ra chye ai. Hpa mi byin tim, anhte arau nawku dawjau ai lam hpe gaw jahkring kau na n re. “Dai nhtoi du magang ra ai hpe, [anhte] chye myit dai majaw” arau zuphpawng ra ai.​—Hebre 10:24, 25 hpe hti u.

8. Htawm hpang hta anhte ndau shana ra na shiga gaw gara hku galai shai chye ai kun?

⁸ Ru tsang kaba laman, anhte ndau shana ai shiga gaw galai shai chye ai. Ya aten hta anhte gaw Mungdan kabu gara shiga hpe hkaw tsun nga nna, sape shatai ai bungli hpe shakut nna galaw nga ai. Raitim, dai aten hta gaw, dingtawk re ai shiga hpe anhte hkaw tsun ra chye ai. Dai shiga hpe sin kaba htu ai hte shingdaw da ai. (Shr 16:21) Satan a mungkan gaw, kade n na yang tsep kawp jahten hkrum sana ngu ai hpe anhte tsun ra chye ai. Gara shiga hpe hkaw tsun ra na, gara hku tsun ra na hpe dai aten hta tup hkrak chye wa na re. Anhte a hkaw tsun magam hta shaning tsa lam hku akyu jashawn nna awng dang wa ai ladat hte sha hkaw tsun ra na kun? Shing nrai kaga ladat ni hte hkaw tsun ra na kun? Anhte n chye ga ai. Gara hku mi raitim, Yehowa a tara jeyang ai shiga hpe nden marai hte hkaw tsun ra na ahkang anhte lu na masa nga ai.​—Eze 2:3-5.

9. Anhte a shiga hpe mungdan ga daga ni gara hku bai htang chye ai kun? Raitim anhte hpa hpe kam mai ai kun?

⁹ Anhte tsun ai shiga a majaw mungdan ga daga ni gaw, anhte a hkaw tsun magam hpe tsep kawp jahkring kau mayu wa na masa nga chye ai. Ya aten hta anhte a hkaw tsun magam hpe madi shadaw ya na matu Yehowa hpe kamhpa ai zawn, dai aten hta mung shi a madi shadaw lam hpe kamhpa ra ai. Karai Kasang gaw shi a yaw shada lam hpe awng dang na matu ra nga ai n-gun atsam jaw na hpe kam mai ai.​—Mik 3:8.

10. Luka 21:25-28 hta tau hkrau tsun da ai hte maren ru tsang kaba laman byin wa na lam ni hpe masha law malawng gara hku bai htang na kun?

¹⁰ Luka 21:25-28 hpe hti u. Ru tsang kaba laman, mungkan hta moi grai ngang kang ai ngu masha ni shadu da ai lam yawng mayawng hkrat sum mat ai hpe mu ai shaloi shanhte kajawng mat na re. Shanhte gaw “kyin dut hkrum” nga ai ngu hkamsha nna, masha labau hta sawng dik htum aten laman hta sat hkrum na hpe mung myit tsang nga chye ai. (Zep 1:14, 15) Dai aten hta, Yehowa a masha ni a matu grau yak wa na masa nga chye ai. Anhte gaw mungkan hte n seng ai majaw, yakhkak ai lam nkau hpe hkrum chye ai. Anhte hta ra kadawn ai lam ni n lu ai baw byin chye ai.

11. (a) Yehowa Sakse Ni gaw hpa majaw myit maju jung hkrum na kun? (b) Ru tsang kaba hpe anhte hpa majaw n hkrit ra ai kun?

¹¹ Jahten hkrum ai nawku htung a masha ni gaw, Yehowa Sakse ni a nawku htung sha ngam nga ai majaw, aten langai ngai hta grai masin pawt wa na re. Dai majaw, Internet zawn re ai shara kaw nna shanhte a yawn madai ai hkamsha lam hpe kaga ni chye hkra galaw yang galaw na re. Mungdan ga daga ni hte shanhte a uphkang madu Satan gaw, anhte hpe nju ndawng na re. Hpa majaw nga yang,  anhte a nawku htung sha n jahten hkrum ai majaw re. Mungkan ga kaw na nawku htung yawng hpe shamyit na ngu ai shanhte a yaw shada lam gaw n awng dang wa ai. Dai majaw, anhte gaw shanhte a myit maju jung shara byin wa na re. Dai lam a majaw, mungdan ga daga ni gaw Magoga mung na Goga byin wa na re. * Shanhte a n-gun atsam yawng hte Yehowa a masha ni hpe gasat na matu hpawng chyawm na re. (Eze 38:2, 14-16) Ru tsang kaba laman byin wa na lam ni hpe ahkri ahkrai n chye ai majaw, hpa byin wa na hte seng nna anhte myit tsang chye ai. Raitim, ndai lam hpe kam mai ai: Ru tsang kaba hte seng nna anhte hkrit ra na n re. Yehowa gaw asak lawt na matu anhte hpe lam matsun ni jaw na re. (Shk 34:19) Anhte hpe “hkrang shaw la ai lam du na ni wa” sai majaw, “baw sharawt” nna mada yu lu na re. *

12. Htawm hpang hta byin wa na lam ni a matu “sadi ai hte myit su ai mayam” gaw anhte hpe gara hku lajang da ya ai kun?

¹² “Sadi ai hte myit su ai mayam” gaw, ru tsang kaba aten du hkra matut nna sadi dung lu na matu anhte hpe hkyen lajang ya nga ai. (Mat 24:45) Lam amyu myu kaw nna ga shadawn langai gaw, 2016-2018 shaning ni laman aten dep lajang da ya ai ginwang zuphpawng lamang ni re. Dai lamang ni gaw, Yehowa a shani ni wa sai hte maren, anhte ra nga ai atsam ningja ni hpe rawt jat wa na matu n-gun jaw ya wa sai. Dai atsam ningja ni hpe kadun dawk bai maram yu ga.

13. Yehowa hpe sadi dung ai lam ngang kang hkra gara hku galaw mai ai kun? Ya kaw nna dai hku hpa majaw galaw ra ai kun?

¹³ Sadi dung ai lam: 2016 ginwang zuphpawng na ga baw gaw “Yehowa Hpe Matut Sadi Dung Nga U!” ngu ai re. Yehowa hte hku hkau ai lam ngang kang hkra galaw ai nga yang, shi hpe sadi dung lu ai ngu dai lamang gaw sharin ya ai. Chyum Laika hpe sharawng awng let hkaja nna, myit masin mahkra hte akyu hpyi ai hku nna Yehowa hte nihtep hkra galaw mai ai lam anhte hpe shadum ya ai. Dai hku galaw ai nga yang, gara manghkang mi hkrum tim, anhte tawt lai lu na re. Satan a mungkan htum wa hkyen sai majaw, Karai Kasang hte shi a Mungdan hpe sadi dung na matu yak chye ai masa ni hpe grau nna hkrum yang hkrum wa na re. Masha ni gaw anhte hpe matut nna jahpoi asawng wa na masa nga ai. (2 Pe 3:3, 4) Anhte a lapran nga ai lam gaw, grau grau nna chyam dinglik lam byin wa chye ai. Anhte a sadi dung ai lam hpe ya kaw nna ngang kang hkra galaw da yang she, ru tsang kaba laman hta matut sadi dung lu na re.

14. (a) Mungkan ntsa woi awn na hpunau ni hte seng nna hpa galai shai ai lam nga wa na kun? (b) Dai aten hta anhte hpa majaw sadi dung ra ai kun?

¹⁴ Ru tsang kaba laman, mungkan ntsa hta woi awn na hpunau ni hte seng nna galai shai ai lam nga na re. Aten langai ngai hta, mungkan ga hta naw ngam nga ai namman chya hkrum ai yawng gaw, Hara Magedon majan hta gasat ra ai majaw sumsing lamu de jahpawng la hkrum na re. (Mat 24:31; Shr 2:26, 27) Uphkang Hpung Ni gaw mungkan ntsa hta anhte hte arau nga sana n re. Raitim, wunawng wuwa kaba gaw matut nna zin lum nga na re. Sagu kaga ni kaw nna atsam hpring ai hpunau ni gaw woi awn mat wa na re. Karai Kasang kaw nna lu la ai shanhte a lam matsun ni hpe hkan sa ai hku nna, shanhte hpe madi  shadaw ya ai hku nna sadi dung ai lam anhte madun ra ai. Anhte a asak hkrung lawt lu na lam gaw dai hta madung ai.

15. Anhte a hkam sharang ai lam gara hku ngang kang lu na kun? Ya aten hta dai hku galaw na matu hpa majaw ahkyak ai kun?

¹⁵ Hkam sharang nga u: 2017 ginwang zuphpawng a ga baw gaw “Asum Hkum Jaw!” ngu ai re. Yakhkak ai lam hpe hkam sharang lu ai atsam ngang kang hkra dai lamang gaw karum ya wa sai. Anhte a hkam sharang lu ai atsam gaw kaja ai prat masa hta n hkan ai hpe chye wa ai. Yehowa hpe shamyet shanat ai hku nna sha hkam sharang lu ai. (Rom 12:12) Yesu a ndai ga sadi hpe galoi mung dum nga ga: “Jahtum du hkra shakut sharang ai wa gaw, hkye hkrang la ai hkrum na ra ai.” (Mat 24:13) Dai ga sadi a lachyum gaw, anhte gara mayak mahkak mi hkrum tim, matut nna sadi dung ra ai ngu tsun mayu ai re. Ya aten hta yakhkak ai lam ni hpe hkam sharang yang, ru tsang kaba garai n hpang shi yang, makam masham ngang kang nga na re.

16. Gara lam gaw anhte hpe nden marai nga shangun ai kun? Nden marai nga na matu ya anhte gara hku galaw lu na kun?

¹⁶ Nden marai: 2018 ginwang zuphpawng na ga baw gaw “Nden Marai Nga U”! ngu ai re. Nden marai gaw anhte a atsam marai ni a majaw n re ai hpe dum na matu dai lamang gaw anhte hpe shadum ya ai. Hkam sharang lu ai atsam zawn sha, jet ai nden marai nga na matu mung Yehowa hpe kamhpa ra ai. Grau kamhpa lu hkra gara hku galaw mai na kun? Chyum Laika hpe shani shagu hti nna, lai wa sai aten na shi a masha ni hpe Yehowa gara hku hkye la wa ai hpe myit sawn sumru ai hku nna re. (Shk 68:20; 2 Pe 2:9) Ru tsang kaba laman, mungdan ga daga ni anhte hpe gasat wa ai shaloi, nden marai nga ra nna, shawoi hta grau nna Yehowa hpe kamhpa ra ai. (Shk 112:7, 8; Heb 13:6) Ya aten hta Yehowa hpe kamhpa yang, Goga gasat ai shaloi anhte hta nden marai nga na re. *

17. Hara Magedon hte seng nna anhte hpa majaw n hkrit ra ai kun? (Makawp sumla hpe yu u.)

¹⁷ Lai wa sai sumhpa hta tsun wa sai hte maren, anhte yawng ngu na daram a prat ting gaw hpang jahtum na prat hta asak hkrung nga ai.  Raitim, ru tsang kaba hta asak hkrung lawt lu na hpe myit mada mai ai. Hara Magedon majan gaw ndai mungkan a masa lam hpe tsep kawp jahtum kau na re. Raitim, anhte n hkrit ra ai. Hpa majaw kun? Karai Kasang gasat ya na majaw re. (Gsh 1:33; Eze 38:18-20; Zeh 14:3) Yehowa a lam matsun lu ai shaloi, Yesu Hkristu gaw Karai Kasang a hpyen dap hpe woi awn nna majan gasat na re. Hkrung rawt mat sai namman chya hkrum ai ni hte grai law ai lamu kasa ni gaw shi hte arau rai na re. Shanhte gaw Satan, shi a nat ni hte mungkan ga na hpyen dap ni hpe gasat na re.​—Dan 12:1; Shr 6:2; 17:14.

18. (a) Yehowa gaw gara ga sadi hpe jaw da ai kun? (b) Shingran 7:9, 13-17 gaw htawm hpang hte seng nna grau kamhpa wa na matu gara hku karum ya ai kun?

¹⁸ Yehowa gaw ndai hku ga sadi jaw da ai: “Nang hpe hpyen na matu galaw ai ri nhtu, langai mi tai na n rai.” (Esa 54:17) Yehowa hpe sadi dung let nawku dawjau ai “wunawng wuwa kaba” gaw, “ru tsang kaba kata na” asak hkrung let lawt lu wa na re. Dai hpang, shanhte gaw Yehowa hpe matut nawku mat na re. (Shingran 7:9, 13-17 hpe hti u.) Chyum Laika gaw htawm hpang hte seng nna kamhpa na matu anhte hpe karum ya ai. “Yehowa gaw sadi dung ai ni hpe makawp maga ya” na lam anhte chye ai. (Shk 31:23, NW) Yehowa hpe tsawra nna shi hpe shakawn ai ni yawng gaw, shi a amying chyoi pra san seng wa ai hpe mu lu ai majaw grai kabu na re.​—Eze 38:23.

19. Htawm hpang hta hpa myit mada lam ala nga ai kun?

¹⁹ Satan a shingkang ka-up hkrum wa ai 2 Timohti 3:2-5 hta lawm ai masha ni n nga sana mungkan nnan hpe shingran yu u. (“ Dai Hta Nga Lu Na Masha Ni A Akyang Lailen” ngu ai lawk hpe yu u.) Uphkang Hpung Shang hku nna magam gun wa ai Hpunau George Gangas gaw, ndai hku tsun da ai: “Masha yawng gaw hpunau (sh) nauna sha rai nga yang, mungkan gaw gara hku byin nga na kun? Mungkan nnan hta asak hkrung lu ai ahkaw ahkang hpe kade n na yang nang lu la sana re. Nang gaw Yehowa asak hkrung nga dingyang nang asak hkrung lu na re. Htani htana asak hkrung lu sana re.” Jet ai myit mada lam rai nga ai.