1. Yehowa gaw anhte a nawku dawjau ai lam hpe hpa majaw lu ging ai kun?

YEHOWA gaw Hpan Madu hte Asak Jaw Ai Madu re ai majaw, anhte a nawku dawjau ai lam hpe lu ging ai. (Shr 4:11) Raitim, anhte dai hku galaw na matu yak nga ai. Yehowa hpe anhte tsawra nna hkungga tim, shi lu ging ai anhte a nawku dawjau ai lam hpe n jaw na matu gung lau hkrum chye ai. Dai zawn hpa majaw byin ai hpe anhte chye ra ai. Shi hpe nawku dawjau ai hta hpa ni lawm ai lam shawng nnan hkaja yu ga.

2. Pru Mat 34:14 hta Yehowa hpe nawku dawjau ai nga yang anhte hpa galaw na kun?

² Chyum Laika hta, Yehowa hpe myit masin mahkra hte tsawra ai lam hte shi hpe sha nawku dawjau ai lam hpe matut mahkai da ai. Anhte a myit masin hta kaga marai langai (sh) kaga lam ni shang na ahkang anhte jaw na n re.​—Pru Mat 34:14 hpe hti u. *

3. Anhte gaw Yehowa hpe hpa majaw myi di chyip nawku dawjau ai n re ai kun?

³ Anhte gaw Yehowa hpe myi di chyip nawku dawjau ai n re. Hpa majaw kun? Shi a lam hkaja ai kaw nna lu la wa ai lam ni hta madung tawn ai majaw re. Shi a kaja ai atsam ningja ni hpe anhte grai ra sharawng wa ai. Shi ra ai, n ra ai lam ni hpe anhte chye nna dai hte maren hkap la wa ai. Anhte a matu shi yaw shada da ai lam hpe chye na nna, anhte madi shadaw ya ai. Shi a manang byin lu ai ahkaw ahkang anhte hpe jaw ai hku nna shi shagrau ai. (Gsh 3:32) Anhte a Hpan Madu hte seng ai lam ni hpe ahkri ahkrai hkaja ai gaw shi hte grau nihtep wa shangun ai.​—Yak 4:8.

4. (a) Yehowa hpe tsawra ai myit yawm mat hkra Satan hpa hpe akyu jashawn nga ai kun? (b) Ndai sumhpa hta hpa lam hkaja lu na kun?

 ⁴ Satan gaw ndai mungkan hpe hkang nga nna, masha ni a ra marin ai myit hte gawng kya ai lam ni hpe akyu jashawn ai. (Ehp 2:1-3; 1Yh 5:19) Anhte gaw Yehowa hpe tsawra ai sha n-ga, kaga lam ni hpe mung shi tsawra shangun mayu ai. Satan galaw lu ai lam lahkawng hpe hkaja yu ga. Langai, gumhpraw ra marin ai myit nga wa hkra gung lau ai. Lahkawng, n kaja ai shangwi shapyaw lam hpe anhte lata wa hkra shi shakut ai.

5. Gumhpraw ra marin ai myit hpe hpa majaw koi ra ai kun?

⁵ Anhte yawng gaw sha mayu, bu hpun mayu, nga na shara lu mayu ai gaw yu maya sha re. Raitim, gumhpraw ra marin ai myit hpe gaw koi ra ai. Satan mungkan hta nga ai masha law law gaw, “gumhpraw marin ai ni” rai nna, gumhpraw hte mari da ai arung arai law law hpe mung ra sharawng ma ai. (2 Tm 3:2) Dai zawn ra sharawng ai myit grau nga wa hkra shi hpang hkan ai ni hkalem hkrum na hpe Yesu chye ai. Yesu ndai hku tsun ai: “Kadai rai ti mung, madu lahkawng kaw chyang lu na n rai; shi langai mi hpe n dawng nna kaga hpe tsaw ra na wu ai; shing n rai langai mi hpe kasawt nna, kaga hpe n kaw n law di na wu ai: nanhte Karai Kasang hpe mung, mungkan a sut gan hpe mung, rau chyang lu na myit dai n rai.” (Mat 6:24) Yehowa hpe nawku dawjau ai marai langai gaw, lusu na matu n-gun atsam hte ahkying aten ni shajan shalai akyu jashawn ai nga yang, madu lahkawng kaw mayam hkam nga ai re. Shi gaw Yehowa hpe sha nawku dawjau nga ai n re.

6. Ladoki hta nga ai nawku hpung hpe Yesu tsun ai ga ni kaw nna hpa sharin la lu ai kun?

⁶ A.D. shaning 100 daram hta, Ladoki mare hta nga ai nawku hpung shang masha ni gaw shanhte grai lusu nna, sut gan ni grai mahkawng da sai majaw, hpa n ra ai nga nna  shakawng nga ma ai. Raitim, Yehowa hte Yesu a ningmu hta shanhte gaw, tsin-yam tsindam hkrum ai ni, garen gari ai ni, matsan mayan re ai ni, myi kyaw ai ni hte singgu krin re ai ni hte bung nga ai. Shanhte lusu ai majaw n re ai sha, gumhpraw ra marin nna Yehowa hte hku hkau lam htenza nga ai majaw, shanhte hpe Yesu sharin shaga wa ai re. (Shr 3:14-17) Anhte a myit masin hta gumhpraw ra marin ai myit law wa ai hpe chye yang, anhte a myit mang ai lam hpe alawan shading sharai ra ai. (1 Tm 6:7, 8) Dai hku n galaw yang, anhte a myit masin gaw bra mat wa nna, anhte a nawku dawjau ai lam hpe Yehowa hkap la sana n re. Yehowa gaw “shi hpe sha nawku na matu hpyi shawn ai.” (Trj 4:24, NW) Gumhpraw hte seng nna anhte a rap ra ai ningmu gara hku mat mat chye ai kun?

7-9. Myitsu salang Debit a mahkrum madup kaw nna hpa sharin la lu ai kun?

⁷ Amerika mung na bungli shakut ai myitsu salang Debit a mahkrum madup hpe myit yu ga. Shi gaw bungli grai galaw ai wa re ngu nna shi hkum shi tsun ai. Shi galaw ai company hta shi shagrau hkrum nna, shi a mungdan hta mung kaja htum bungli shakut ai wa hku nna masat hkrum ai. “Ngai lu la wa ai kumhpa ni gaw Yehowa ngai hpe shaman chyeju jaw ai re ngu dai aten hta ngai shadu wa ai” ngu nna Debit tsun ai. Raitim, dai ni gaw teng sha Yehowa kaw na rai kun?

⁸ Shi a bungli gaw Yehowa hte shi a hku hkau lam hpe htenza shangun ai hpe angwi ngwi chye wa ai. “Nawku zuphpawng ni hte hkaw tsun magam hta pyi, bungli na manghkang ni hte seng nna sha myit nga ai hpe nye hkum ngai chye wa ai” nga nna shi tsun ai. “Ngai gaw gumhpraw law law tam lu wa ai. Raitim, myit pu ba ai lam ni grau grau law wa nna, dinghku hta mung manghkang nga wa ai.”

⁹ Shi a shawng tawn ai lam ni hte seng nna bai myit ra sai hpe Debit chye wa ai. “Nye a  masa hpe shading sharai na matu dawdan lam jahkrat ra sai” nga nna shi tsun ai. Debit gaw shi a bungli chyarang hpe galai shai mayu ai lam shi a bungli madu hpe tsun dan wa ai. Hpa byin wa ai kun? Shi bungli n lu mat ai. Shi gara hku bai htang wa ai kun? “Hpang shani jang, aten kadun ningshawng matut manoi galaw na matu tang shawn wa ai” nga nna shi tsun ai. Shanhte hkum shanhte madi shadaw na matu, Debit yan la gaw jasan jaseng bungli galaw ai. Aten loi mi na ai hpang, aten galu ningshawng byin wa nna, madu jan mung hpang e shi hte arau ningshawng magam gun wa ai. Dai yan la galaw wa ai kan bau bungli gaw, masha ni yu kaji ai bungli re. Raitim, shan galaw ai bungli gaw shan a matu ahkyak htum lam n re. Shan a shang gumhpraw gaw htam shi kaw nna htam mi sha lu mat tim, shan ra ai lam hta jai na matu law nga ai. Shan yan gaw Yehowa hpe shawng tawn mayu ai. Mungdan lam hpe shawng tawn mayu ai ni hpe mung Yehowa lanu lahku ai lam shan tatut chye wa ai.​—Mat 6:31-33.

10. Anhte a myit masin hpe gara hku hkang lu ai kun?

¹⁰ Anhte hta gumhpraw grai law hkra nga ai raitim, kachyi mi sha nga ai raitim, anhte a myit masin hpe hkang ra ai. Gara hku nna kun? Gumhpraw ra marin ai myit n mai nga ai. Na a kan bau bungli gaw, Yehowa hpe nawku dawjau ai lam hta grau ahkyak ai baw n byin ging ai. Nang hta dai zawn myit nga ai hpe gara hku chye lu na kun? Tinang hkum tinang ndai hku san yu u: ‘Nawku zuphpawng (sh) hkaw tsun magam hta nye a kan bau bungli hte seng ai lam hpe chyahkring hkring myit nga ai kun? Htawm hpang a matu gumhpraw hte seng nna myit tsang nga ai kun? Gumhpraw hte arung arai ni gaw ngai hte nye dinghku hpe manghkang byin shangun na kun? Yehowa a magam hta grau shang lawm lu na matu kaga ni yu kaji ai kan bau bungli raitim, byin mai yang ngai galaw na matu jin jin rai nga ai kun?’ (1 Tm 6:9-12) Dai ga san ni hpe myit ai shaloi, Yehowa gaw anhte hpe tsawra nna shi hpe sha nawku ai ni hpe ndai hku ga sadi jaw da ai: “Ngai nang hte teng teng n hka na nngai, gaja wa teng teng n kau da na nngai.” Dai majaw kasa Pawlu gaw, “gumhpraw marin ai lam hkum hkan myit” nga nna ka wa ai.​— Heb 13:5, 6.

11. Shangwi shapyaw lam gaw masha langai hpe hpa byin shangun lu ai kun?

¹¹ Yehowa gaw anhte hpe ngwi pyaw shangun mayu ai. Shangwi shapyaw lam gaw anhte hpe ngwi pyaw lam jaw ai. Chyum Laika hta ndai hku tsun da ai: ‘Masha gaw shi a amu bungli galaw let, lu sha nna myit pyaw nga lu  ai hta, grau kaja ai gaw n nga lu sai.’ (Hpj 2:24) Raitim, mungkan na shangwi shapyaw lam law law gaw anhte hpe n kaja ai lam byin shangun lu ai. Dai gaw masha ni a akyang lailen hte seng ai tsang madang ni hpe shagrit kau ya lu nna, Chyum Laika hta hkum pat da ai lam ni hpe pyi tsawra wa nna, hkap la ai kaw du hkra byin chye ai.

12. 1 Korinhtu 10:21, 22 hku nga yang shangwi shapyaw lam hpe hpa majaw atsawm lata ra ai kun?

¹² Anhte gaw Yehowa hpe sha nawku dawjau mayu ai. Dai majaw, “Madu a sha ku hte nat ni a sha ku” hta rau shang sha lu na n re. (1 Korinhtu 10:21, 22 hpe hti u.) Marai langai ngai hte lusha arau chyahkring hkring sha ai gaw hku hkau ai lachyum re. Daw sa ai lam, nat hte seng ai lam, akyang lailen htenza ai lam (sh) hkum shan ra marin ai myit jasat ni grau nga wa hkra shadut ya ai shangwi shapyaw lam ni hpe nang lata ai nga yang, Karai Kasang a hpyen ni lajang da ai lusha hpe sha ai hte bung na re. Rai yang, anhte hkum anhte jahten ai sha n-ga, Yehowa hte anhte a hku hkau lam hpe mung htenza shangun ai.

13-14. Yaku 1:14, 15 hku nga yang anhte lata ai shangwi shapyaw lam hpe anhte hpa majaw sadi ra ai kun? Ga shadawn jaw u. 

¹³ Shangwi shapyaw lam hte malu masha hpe shingdaw da ai lam nkau hpe myit yu ga. Anhte sha ai shaloi, hpa sha na hpe anhte lata mai ai. Sha ngut ai hpang hta gaw, lu wa na akyu ni hpe n mai lata sai. Kaja ai malu masha gaw hkam kaja lam jaw nna, n kaja ai malu masha gaw, hkam n kaja shangun ai. Akyu hpe lana mi hte sha n mu lu tim, aten na wa yang gaw dan dawng wa na re.

¹⁴ Dai zawn sha, shangwi shapyaw lam hpe anhte lata ai shaloi, anhte a myit masin de hpa ni bang na hpe lata lu ai. Dai hpang, anhte lata ai shangwi shapyaw lam gaw anhte myit ai, hkamsha ai lam hta akyu shabyin ya lu ai. Kaja ai shangwi shapyaw lam gaw anhte hpe shalan shabran ya nna, n kaja ai shangwi shapyaw lam gaw anhte hpe shoihpa jaw lu ai. (Yaku 1:14, 15 hpe hti u.) N kaja ai shangwi shapyaw lam a akyu hpe kalang ta n mu lu tim, angwi ngwi dan dawng wa ai. Dai majaw, Chyum Laika hta anhte hpe ndai hku sadi jaw da ai: “Lam hkum dam myit; Karai Kasang hpe n sawn n sang di lu na n rai: masha gaw gat hkai ai hte maren, dan la na ra ai. Tinang hkum shan hta gat hkai ai wa gaw, hkum shan hta na hten byak ai dan la na ra ai.” (Gal 6:7, 8) Yehowa nju ndawng ai lam ni hpe shadut ya ai shangwi shapyaw lam yawng hpe nyet kau na matu grai ahkyak ai.​—Shk 97:10.

15. Anhte hpe ngwi pyaw na matu Yehowa hpa kumhpa ni lajang da ya ai kun?

¹⁵ Internet kaw nna shapoi ya ai JW TV lamang yu ai hpe Yehowa a masha law law ra sharawng ma ai. Nauna Marilin ndai hku tsun ai: “JW TV lamang gaw kaja ai ningmu grau nga shangun nna, dai hta lawm ai lam yawng gaw nye matu kaja ai majaw, yawng hpe yu lu ai. Ngai garen gari ai, myit daw ai shaloi, n-gun lu shangun ai mungga (sh) Jahpawt Manap Nawku Dawjau Ai lamang hpe yu ai. Dai gaw Yehowa hte shi a uhpung hte ngai hpe grau nihtep wa shangun ai. JW TV lamang gaw nye prat hpe tsep kawp galai shai ya ai.” Yehowa jaw ai dai kumhpa kaw nna nang akyu lu la ai kun? Shata shagu na lamang nnan hta n-ga, JW TV lamang kaw nna nsen rim da ai ni hte video law law hte n-gun jaw ya lu ai mahkawn ni hpe aten shagu madat lu ai, yu lu ai.

16-17. Shangwi shapyaw lam hpe lang ai aten hpe hpa majaw hkang ra ai kun? Dai hpe gara hku galaw lu na kun?

¹⁶ Anhte gaw shangwi shapyaw lam amyu hpan hpe atsawm lata ra ai sha n-ga, aten kade daram na hkra yu ai hpe mung sadi ra ai. Anhte dai hku n sadi yang, shangwi  shapyaw ai lam hta lang ai aten ni gaw, Yehowa hpe nawku dawjau na matu lang ai aten hta na grau law mat chye ai. Masha law law gaw shangwi shapyaw lam hta shanhte lang ai aten hpe hkang na matu grai yak ai hpe chye ma ai. Asak 18 ning rai sai nauna Abige ndai hku tsun ai: “Bungli grai law hkra galaw ngut nna shana maga du ai shaloi, TV yu ai gaw ngai hpe ban san lam jaw ai. Raitim, ngai n sadi yang, TV shawng kaw aten grai na mat chye ai.” Ramma hpunau Semyuye ndai hku tsun ai: “Internet kaw na video kadun ni grai law hkra yu hkrup ai hpe chye wa ai. Ngai n sadi hkrup yang, hkying hkum 3, 4 yu hkrup mat ai.”

¹⁷ Shangwi shapyaw lam yu ai aten hpe nang gara hku hkang na kun? Shawng nnan galaw ra na gaw, shangwi shapyaw lam hta aten kade daram lang kau ai hpe chye ra ai. Bat mi hta lang kau ai aten ni hpe matsing da yu u. TV yu ai, Internet kaw yu ai, phone kaw na game ginsup ai aten ni gaw kade daram na ai hpe shata hti laika kaw matsing da u. Aten hpe grai na hkra lang kau ai ngu nang hkamsha yang, jahpan galaw da mai ai. Shawng nnan, grau ahkyak ai lam ni hpe galaw na matu lajang u. Dai hpang she, shangwi shapyaw lam hpe aten jaw u. Nang galaw da ai jahpan hte maren galaw lu na matu, Yehowa kaw karum hpyi u. Dai hku galaw yang, tinang hkrai hkaja ai lam, dinghku nawku, nawku zuphpawng ni, hkaw tsun magam hte Chyum Ga sharin ya ai lam ni hta nang ra nga ai aten hte n-gun atsam ni lu wa na re. Nang gaw Yehowa hpe shawng tawn ai majaw, shangwi shapyaw lam hta nang lang ai aten hte seng nna mung pyaw wa na re.

18-19. Yehowa hpe sha nawku dawjau nga ai lam anhte gara hku sakse madun lu na kun?

¹⁸ Satan a mungkan hpe jahten kau nna, mungkan nnan du wa na lam hte seng nna ka ngut ai hpang kasa Petru ndai hku tsun ai: “Tsaw ra ai ni e, ngwi pyaw ai hku hkan let, shi a man e, matsat shabat hte agang chyalang n kap myit ga, shakut sharang nga mu.” (2 Pe 3:14) Dai hpaji jaw ga hpe madat yang, akyang lailen hte wenyi lam hta matut san seng hkra kaja htum galaw lu na re. Dai hku nna, anhte gaw Yehowa hpe sha nawku dawjau nga ai hpe madun dan lu ai.

¹⁹ Satan hte shi a mungkan gaw anhte a shawng tawn ai lam ni galai shai mat hkra hkalem nga ai. (Luk 4:13) Raitim, anhte a myit masin kaw bang da ai Yehowa a shara hta kadai hpe mung (sh) gara lam hpe mung nga na ahkang hkum jaw. Yehowa hpe sha nawku dawjau na matu anhte dawdan da ga.