1. Chyum ga sharin hpe hkalup hkam ai kaw du hkra sharin ya lu ai gaw ahkaw ahkang re ai lam 2 Korinhtu 3:1-3 gaw gara hku chye na shangun ai kun? (Makawp sumla hpe yu u.)

NAWKU hpung kaw na Chyum ga sharin langai hkalup hkam ai hpe mu ai shaloi, nang gara hku hkamsha ai kun? Grai kabu na re. (Mat 28:19) Dai sape nnan gaw, na a Chyum ga sharin rai yang grau kabu na re. (1 Ht 2:19, 20) Hkalup hkam da sai sape nnan ni gaw, shanhte hpe sharin ya ai ni a matu sha n-ga, nawku hpung ting a matu, madi shadaw laika byin wa ai.​—2 Korinhtu 3:1-3 hpe hti u.

2. (a) Gara ga san ni hpe anhte myit yu ra ai kun? Hpa majaw kun? (b) Chyum Laika hkaja ai ngu ai gaw hpa rai kun? (Lawu matsing hpe yu u.)

² Lai wa sai 4 ning daram kaw nna mungkan ting hta, shata shagu Chyum ga sharin * wan 10 daram nga wa ai gaw kabu hpa re. Dai shaning ni laman hta sha, Yehowa Sakse hku nna shaning shagu hkalup hkam ai gaw marai 280,000 jan rai nna, Yesu Hkristu a sape nnan ni byin wa ai. Wan hku law ai Chyum ga sharin ni hpe hkalup hkam ai kaw du hkra gara hku karum ya lu na kun? Yehowa gaw shi a sakse byin wa na matu, masha ni hpe ya aten du hkra ahkaw ahkang jaw nga ai. Dai majaw, shanhte hpe hkalup hkam ai kaw du hkra dang lu ai daram alawan  karum ya ga. Aten htum grai lawan ai.​—1 Ko 7:29a; 1 Pe 4:7.

3. Ndai sumhpa hta Chyum ga sharin ai hte seng nna hpa hpe chye lu na kun?

³ Ya aten gaw sape shatai na matu grai ahkyak ai majaw, Chyum ga sharin ni hkalup hkam ai kaw du hkra rawt jat wa na matu, gara hku galaw mai ai lam hpe Uphkang Hpung gaw, ginjaw garan rung ni hpe san ai. Ndai sumhpa hte hpang na sumhpa hta mahkrum madup nga ai ningshawng ni, sasana magam gun ni hte hpung kawan ni kaw nna sharin la mai ai lam hpe hkaja lu na re. * (Gsh 11:14; 15:22) Chyum ga sharin ya ai ni hte Chyum ga sharin ni gaw, Chyum Laika hkaja ai shaloi grau nna awng dang lu na matu, galaw mai ai lam ni hpe shanhte tsun dan ai. Chyum ga sharin ni hkalup hkam ai kaw du hkra rawt jat na matu, galaw ra ai lam 5 hpe ndai sumhpa hta hkaja lu na re.

4. Chyinghka lam hta Chyum Laika hkaja ai hte seng nna anhte hpa hpe chye ging ai kun?

⁴ Hpunau nauna law law gaw, nta madu a chyinghka lam kaw tsap nna sha Chyum ga sharin galaw ma ai. Chyum Laika hpe grau myit lawm wa hkra, ndai hku galaw ai gaw kaja ai raitim, law malawng gaw kadun dawk rai nna, bat shagu n galaw lu ai. Grau myit lawm wa hkra, hpunau nauna nkau gaw, myit lawm ai masha ni hpe matut mahkai lu na lam ni hpe san ai. Dai hpang, phone (sh) laika hte Chyum Laika kaw nna lam nkau mi hpe sa ya ai. Ndai zawn bawngban ai lam gaw, shata hku na tim, rawt jat ai Chyum ga sharin byin wa na n re. Chyum ga sharin gaw, Karai a mungga hkaja na matu ahkying aten hte shakut shaja lam n nga ai nga yang, apnawng nna hkalup hkam ai du hkra rawt jat wa na kun? Rawt jat wa na n re.

5. Luka 14:27-33 hku nga yang sape shatai ai bungli hpe karum ya lu ai gara lam hpe Yesu ahkyak shatai tsun da ai kun?

⁵ Marai langai gaw, Yesu a sape byin mayu ai nga yang, galaw ra na lam ni hte seng nna, Yesu gaw ga shadawn langai hte sanglang dan ai. Wahpang langchyi gawgap mayu ai wa hte majan gasat hkyen ai hkawhkam wa a lam hpe shi tsun wa ai. Wahpang langchyi hpe ngut kre hkra gawgap mayu ai wa gaw, ‘hkrat ang ai jahpu hpe dung nna, shawng sawn yu’ ra na lam hte hkawhkam wa gaw shi a hpyen dap awng dang na matu galaw ra ai lam hpe ‘dung nna shawng bawng yu’ ra na lam Yesu tsun wa ai. (Luka 14:27-33 hpe hti u.) Dai hte maren, sape byin mayu ai wa mung, Yesu hpang hkan nang yang hpa ni galaw ra na hpe atsawm myit yu ging ai. Dai majaw, Chyum ga sharin ni hpe  anhte hte arau bat shagu hkaja na matu n-gun jaw ra ai. Gara hku galaw lu na kun?

6. Hkaja ai lam grau rawt jat wa na matu gara hku shakut mai ai kun?

⁶ Chyinghka lam hta hkaja ai lam ni hpe aten loi na na galaw u. Sa chyai shagu Chyum daw langai hta n-ga bawngban mai ai. Dai hku aten loi la nna, bawngban ai hpe shi hkap la wa yang, shara ra hta dung nna bawngban mai na kun? ngu nna shi hpe san u. Nta madu gaw, Chyum Laika hkaja ai lam hpe myit lawm ai kun? N lawm ai kun? ngu ai hpe shi tsun ai ga ni kaw na chye wa na re. Bai nna, shi grau rawt jat wa na matu, bat mi hta lahkawng lang hkaja mayu ai kun? ngu ai hpe san yu u. Bat shagu, kalang (sh) lahkawng lang hkaja ai hta n-ga galaw ra ai lam ni naw nga ai.

7. Sharin ya ai wa gaw Chyum ga sharin ai lamang langai hpra a matu gara hku hkyen lajang lu na kun?

⁷ Sharin ya ai wa hku nna, Chyum ga sharin ai lamang langai hpra a matu, atsawm hkyen lajang ra ai. Arau hkaja na lam ni hpe hti da nna, Chyum daw ni hpe mung yu da mai ai. Madung lam ni hpe atsawm chye hkra galaw u. Hkaja na lam ni hpe sanglang dan lu hkra, ga baw, ga baw kaji ni, ga san ni, “hti” na Chyum daw ni, sumla ni hte video ni hpe atsawm myit da u. Na a Chyum ga sharin aloi sha chye na lu hkra, tatut hkan sa lu hkra, asan sha sanglang dan lu na matu myit da u.​—Neh 8:8; Gsh 15:28a.

8. Kolose 1:9, 10 hta lawm ai kasa Pawlu a ga ni gaw Chyum ga sharin ni a matu akyu hpyi ya ai hte seng nna anhte hpe hpa sharin ya ai kun?

⁸ Hkyen lajang ai shaloi, Chyum ga sharin a lam hte shi hta ra ai lam ni a matu Yehowa kaw akyu hpyi u. Chyum ga sharin a myit masin de du hkra Chyum Laika kaw na sharin ya lu na matu, Yehowa kaw karum hpyi u. (Kolose 1:9, 10 hpe hti u.) Chyum ga sharin chye na yak na, hkap la yak na zawn re ai lam ni hpe tau hkrau myit da u. Na a bandung gaw, shi hpe hkalup hkam ai du hkra rawt jat wa hkra karum ya na matu re ai hpe myit hta bang da u.

9. Sharin ya ai wa gaw hkaja ai lam ni a matu hkyen lajang lu hkra Chyum ga sharin ni hpe gara hku karum ya lu na kun? Sanglang dan u.

⁹ Anhte a myit mada lam gaw, Chyum Laika ayan hkaja ai kaw nna Chyum ga sharin ni Yehowa hte Yesu galaw ya wa ai lam ni hpe chyeju dum na matu hte grau nna sharin mayu wa na matu re. (Mat 5:3, 6) Akyu lu la na matu, Chyum ga sharin gaw sharin la ai lam ni hpe atsawm myit maju jung ra ai. Grau chye na lu na matu, garai n hkaja shi yang, tau hkrau hti  da na matu, tatut hkan sa lu na matu myit sumru ai gaw grai ahkyak ai hpe tsun dan u. Sharin ya ai wa gaw, gara hku karum ya lu na kun? Hkaja na lam ni hpe gara hku hkyen lajang mai ai lam shi hpe madun nna, arau hkyen lajang u. * Ga san ni a mahtai hpe gara hku mu tam na hpe tsun dan u. Mahtai hpe bai myit dum wa hkra, ga si ni hte ga yan ni hpe gara hku mahkret da na lam madun dan u. Tinang chye na ai hku mahtai jaw na matu tsun u. Dai hku galaw yang, hkaja ai lam hpe shi kade daram chye na ai lam nang chye wa na re. Chyum ga sharin galaw ra na matu nang n-gun jaw mai ai kaga lam ni naw nga ai.

10. Chyum Laika shani shagu hti na matu hpa majaw ahkyak ai kun? Chyum Laika hti ai kaw nna akyu lu la na matu Chyum ga sharin hpa galaw ra ai kun?

¹⁰ Chyum ga sharin gaw, sharin ya ai wa hte bat shagu hkaja ai kaw nna sha n-ga, shani shagu tinang hkrai galaw ai lam nkau kaw nna mung, akyu lu la mai ai. Yehowa hte matut mahkai ra ai. Gara hku nna kun? Yehowa a ga madat nna, shi hte ga shaga ai hku nna re. Chyum Laika hpe shani shagu hti ai hku nna Karai Kasang a ga madat mai ai. (Ysh 1:8; Shk 1:1-3) jw.org/kac hta mara da ai “Chyum Laika Hti Ai Chyarang” ngu ai hpe shaw nna, gara hku akyu jashawn mai ai lam madun dan u. * Chyum Laika hti ai kaw nna akyu hpring tup lu la na matu, Yehowa hte seng ai lam, Chyum Laika hta tsun da ai lam ni hpe atsawm myit sawn sumru na matu hte tinang hkaja wa ai lam ni hpe prat hta gara hku hkan sa mai ai lam n-gun jaw u.​—Kas 17:11; Yak 1:25.

11. Akyu atsawm hpyi chye hkra Chyum ga sharin gara hku sharin la lu na kun? Yehowa hpe shani shagu akyu hpyi na matu hpa majaw ahkyak ai kun?

¹¹ Shani shagu akyu hpyi ai hku nna Yehowa hte ga shaga na matu Chyum ga sharin hpe n-gun jaw u. Chyum ga sharin ai shaloi, nnan hpang ai hte ngut ai aten hta myit masin mahkra hte shi hte arau akyu hpyi u. Na a akyu hpyi ga hpe shi madat la nna, myit masin kaw na gara hku akyu hpyi ra ai lam chye wa na re. Yesu Hkristu a amying gang nna Yehowa Karai Kasang kaw akyu hpyi ging ai lam mung chye wa na re. (Mat 6:9; Yhn 15:16) Chyum Laika hpe shani shagu hti (Yehowa a ga madat) ai hte akyu hpyi (Yehowa hpe ga shaga) ai gaw, Karai Kasang hte grau ni htep wa hkra shi hpe karum ya lu ai. (Yak 4:8) Dai lam ni hpe shani shagu galaw ai nga yang, apnawng nna hkalup hkam ai kaw du hkra, rawt jat wa na re. Kaga hpa naw nga ai kun?

12. Sharin ya ai wa gaw Chyum ga sharin hpe Yehowa hte hku hkau lam rawt jat wa hkra gara hku karum ya lu ai kun?

¹² Chyum ga sharin gaw, sharin la wa ai lam ni hpe myit masin hta matsing hkra galaw ging ai. Hpa majaw kun? Anhte a myit masin hta rawng ai ra marin ai lam ni, hkamsha lam ni gaw, galaw ai lam hta akyu shabyin ya lu ai majaw re. Yesu gaw tatut re ai lam ni hpe sharin ya ai majaw, masha ni ra sharawng ai. Masha ni shi a hpang hkan ai gaw, shi sharin ya ai lam ni myit masin de du ai majaw re. (Luk 24:15, 27, 32) Na a Chyum ga sharin gaw, Yehowa hpe hku hkau lu ai marai langai zawn mu ra ai. Rai yang she, shi a kawa, shi a manang, shi a Karai hku nna mu wa na re. (Shk 25:4, 5) Chyum Laika hkaja ai laman, Karai Kasang a atsam ningja ni hpe myit maju jung wa hkra karum ya u. (Pru 34:5, 6; 1 Pe 5:6, 7) Gara lam hkaja ai raitim, Yehowa a atsam ningja ni mu wa hkra galaw u. Yehowa a tsawra myit, matsan dum myit hpe chye na wa hkra karum ya u. ‘Na a Karai Kasang hpe . . . tsaw ra’ u ngu “hkang da ai ga gaw, grau kaba ai hte shawng na ga” re ai lam Yesu tsun wa ai. (Mat 22:37, 38) Shi a myit masin hta Karai Kasang hpe grau tsawra wa hkra karum ya u.

13. Yehowa a atsam ningja ni hte seng nna Chyum ga sharin chye wa hkra gara hku karum ya lu ai lam ga shadawn langai tsun dan u.

¹³ Chyum ga sharin hte ga shaga ai aten ni hta, Yehowa hpe nang grai tsawra ai lam tsun dan u. Rai yang, Yehowa hte hku hkau lam nga ra ai hpe chye wa hkra shi hpe karum ya lu na re. (Shk 73:28) Ga shadawn, na a myit masin hpe shadut ya ai Yehowa a tsawra myit, nyan hpaji, tara rap ra ai lam hte n-gun atsam hte seng ai lama ma hpe madun dan ai Chyum Laika kaw na (sh) hkaja ai laili laika kaw na ga yan langai ngai nga ai kun? Nga yang, shi hpe tsun dan u. Dai gaw, sumsing kawa hpe nang tsawra ai lam ni kaw nna langai sha naw re ai lam tsun dan u. Raitim, hkalup hkam ai kaw du hkra rawt jat wa na matu, galaw ra ai kaga lam ni naw nga ai.

14. Hebre 10:24, 25 gaw Chyum ga sharin ni rawt jat hkra karum ya lu ai nawku zuphpawng ni hte seng nna anhte hpe hpa sharin ya ai kun?

¹⁴ Anhte yawng gaw, Chyum ga sharin ni hkalup hkam ai kaw du hkra rawt jat shangun mayu ai. Shanhte hpe karum ya lu ai ahkyak ai lam langai gaw, zuphpawng ni lung na matu n-gun jaw ai hku nna re. Zuphpawng ni lung ai Chyum ga sharin ni gaw, alawan rawt jat ai ngu nna mahkrum madup nga ai sharin ya ai ni  tsun ai. (Shk 111:1) Chyum Laika hkaja ai kaw nna, Chyum Laika machye machyang hpe ka-ang hkup lu la nna, zuphpawng lung ai kaw nna ka-ang hkup lu la ai ngu sharin ya ai nkau gaw shanhte a Chyum ga sharin ni hpe tsun dan ai. Shi hte arau Hebre 10:24, 25 hpe hti u. (Hti u.) Zuphpawng sa lung yang shi lu la na akyu ni hpe sanglang dan u. Nawku Htingnu Hta Hpa Ni Galaw A Ta? * ngu ai video hpe madun u. Bat shagu zuphpawng lung ai gaw, prat hta ahkyak htum re ai hpe chye wa hkra shi hpe karum ya u.

15. Chyum ga sharin ni ayan na zuphpawng lung wa hkra n-gun jaw na matu hpa galaw lu ai kun?

¹⁵ Na a Chyum ga sharin gaw, zuphpawng ni hpe garai n lung shi ai (sh) ayan na n lung ai nga yang, nang hpa galaw na kun? Lai wa sai bat na zuphpawng hta chye wa ai lam lama ma hpe myit rawt let shi hpe tsun dan u. Zuphpawng lung na matu saw shaga ai hta, dai hku tsun dan ai gaw shi a myit hpe grau shadut ya lu ai. Zuphpawng kaw hkaja nga ai Sin Langchyi (sh) Prat Hte Magam Zuphpawng Shaman Laika Buk hpe jaw u. Du wa na bat hta hkaja na lam hpe madun nna, gara lam hpe myit lawm ai lam san u. Shawng nnan sa lung ai zuphpawng kaw nna lu la ai mahkrum madup ni gaw, kaga nawku htung kaw nna lu la ai mahkrum madup ni hta na grau kaja ai hpe shi chye wa na re. (1 Ko 14:24, 25) Shi kasi la lu ai ni, hkalup hkam ai kaw du hkra karum ya lu ai ni hte shi hkrum wa na re.

16. Hkalup hkam ai du hkra rawt jat wa na matu Chyum Laika sharin ai shaloi hpa galaw ra ai kun? Hpang na sumhpa hta anhte hpa lam hkaja lu na kun?

¹⁶ Hkalup hkam ai kaw du hkra rawt jat wa na matu, Chyum Laika hpe gara hku sharin na kun? Chyum ga sharin hpe bat shagu hkaja na matu hte hkaja ai lamang shagu a matu tau hkrau hkyen lajang da na matu n-gun jaw ai hku nna, hkaja ai lam gaw grai ahkyak ai hpe chye wa hkra karum ya lu ai. Yehowa hte shani shagu matut mahkai na matu hte shi hte hku hkau lam rawt jat hkra galaw na matu, n-gun jaw mai ai. Nawku zuphpawng ni lung na matu mung n-gun jaw mai ai. (“ Hkalup Hkam Ai Du Hkra Rawt Jat Wa Na Matu Chyum Ga Sharin Ni Galaw Ra Ai Lam” ngu ai lawk hpe yu u.) Chyum ga sharin ni hkalup hkam ai kaw du hkra rawt jat wa na matu, Chyum ga sharin ya ai ni kahtap nna galaw mai ai lam 5 hpe hpang na sumhpa hta chye lu na re.