1. Hkalup hkam da sai Hkristan ni gaw matut nna hpa galaw ra ai kun?

NANG hkalup hkam sai kun? Rai yang, Yehowa hpe kamsham ai lam hte shi a uhpung * hte arau sharawng awng let magam gun mayu ai lam shawa man hta sakse madun wa sai. Yehowa hpe kamsham ai lam matut nna ngang kang ra ai. Dai ni aten hta, Yehowa gaw shi a uhpung hpe akyu jashawn nga ai lam tsep kawp kam ra ai.

2-3. Dai ni aten hta Yehowa gaw shi a uhpung hpe gara lam hku nna lam matsun ya nga ai kun? Ga shadawn tsun dan u.

² Dai ni aten hta Yehowa gaw shi a atsam ningja, yaw shada lam, tsang madang ni hte maren uhpung hpe lam matsun ya nga ai. Uhpung hta mu lu ai Yehowa a atsam ningja 3 hpe anhte chye lu na re.

³ Langai, “Karai Kasang masha myi man n tau ai.” (Kas 10:34) Yehowa a tsawra myit gaw yawng a matu, “gawng malai hkungga” hku nna Kasha hpe jaw na matu shadut ya ai. (1 Tm 2:6; Yhn 3:16) Kabu gara shiga madat mayu ai ni yawng hpe, hkaw tsun na matu Yehowa gaw shi a masha ni hpe akyu jashawn ai. Dai majaw, gawng malai hkungga kaw nna, masha law law akyu lu la na matu karum ya nga ai. Lahkawng, Yehowa gaw kashuk kashak n re ai sha ngwi pyaw simsa ai Karai re. (1 Ko 14:33, 40) Dai majaw, shi hpe nawku dau jau ai ni gaw, kashuk kashak n re ai sha, ngwi pyaw simsa ai uhpung rai na hpe anhte myit mada ai. Masum, Yehowa gaw “Grau Htum Ai Sara re.” (Esa 30:20, 21, NW) Dai majaw, shi a uhpung gaw nawku hpung hta mung, hkaw tsun bungli hta mung, Chyum Laika kaw nna sha sharin ya ai. Tsa ban langai na nawku hpung gaw, Yehowa a atsam ningja 3 hpe gara hku kasi la ai kun? Dai ni aten hta mung gara hku kasi la nga ai kun? Dai ni  aten hta, Yehowa a uhpung hte arau magam gun na matu chyoi pra ai wenyi gaw nang hpe gara hku karum ya ai kun?

4. Kasa 1:8 hta tsun da ai hte maren Yesu gaw shi a hpang hkan ai ni hpe hpa galaw na matu htet da ai kun? Shanhte gaw hpa karum shingtau lam lu na kun?

⁴ Tsa ban langai hta. Yesu hkaw tsun ai shiga gaw masha yawng hpe myit mada lam jaw ai. (Luk 4:43) “Lamu ga htum hkra” sakse tai na matu, Yesu gaw shi galaw hpang wa ai bungli hpe matut galaw na matu, shi a hpang hkan ai ni hpe htet da ai. (Kasa 1:8 hpe hti u.) Ndai bungli hpe shanhte a n-gun atsam hte n lu galaw ai. Yesu shanhte hpe ga sadi jaw da ai “karum ai wa ngu ai chyoi pra ai wenyi” ra ai.​—Yhn 14:26, JCLB; Zeh 4:6.

5-6. Chyoi pra ai wenyi gaw Yesu hpang hkan ai ni hpe gara hku karum ya wa ai kun?

⁵ Yesu a hpang hkan ai ni gaw, A.D. 33 Pentekoti Poi hta chyoi pra ai wenyi lu la ai. Dai wenyi a karum shingtau ai lam hte, kalang ta hkaw tsun hpang wa ai. Aten kadun laman hta sha, hkying hku law ai masha ni gaw kabu gara shiga hpe hkap la ma ai. (Kas 2:41; 4:4) Ninghkap ai lam ni nga wa ai shaloi, sape ni gaw hkrit nna asum jaw kau na malai, Karai Kasang kaw karum hpyi ma ai. Shanhte ndai hku akyu hpyi ai “na a mayam ni, na a mung ga hpe nden ja ai myit hte tsun dan nga lu hkra, karum ya mi law.” Dai hpang shanhte chyoi pra ai wenyi hte hpring wa nna, “Karai Kasang a mung ga hpe nden ja ai myit hte tsun dan wa ma ai”.​—Kas 4:18-20, 29-31.

⁶ Yesu a sape ni gaw kaga chyam dinglik ai lam ni hte mung hkrum wa ai. Ga shadawn, Chyum Laika katsu ni mung kachyi mi sha nga ai. Anhte hta nga ai zawn, Chyum Laika hpe sanglang dan ai laili laika ni n nga ai. Sape ni gaw amyu ga amyu myu tsun ai masha ni hpe mung hkaw tsun ra ai. Dai zawn manghkang ni nga tim, myit rawt ai sape ni gaw, n lu galaw na zawn re ai lam ni hpe galaw lu wa ai. 30 ning daram hta, kabu gara shiga hpe “sumsing lamu a npu e hpan da mada hte hpe” hkaw tsun lu wa ai.​—Kol 1:6, 21-22.

7. Lai wa sai 100 ning jan hta Yehowa a mayam ni gaw shanhte hpe Karai Kasang hpa hpyi shawn da ai hpe chye wa ai kun? Shanhte gara hku bai htang wa ai kun?

⁷ Dai ni na aten. Yehowa gaw shi a masha ni hpe matut lam matsun ya nga nna n-gun atsam jaw ai. Chyoi pra ai wenyi shung ya nna ka da ai Chyum Laika hte law malawng lam matsun ya nga ai. Chyum Laika hta, Yesu a hkaw tsun bungli hte seng ai lam, shi hpang hkan ai ni gaw shi galaw hpang wa ai bungli hpe matut galaw na matu hkang da ai lam hpe anhte lu hti ai. (Mat 28:19, 20) 1881, July shata na Sin Langchyi hta ndai hku tsun da ai: “Yehowa gaw anhte lusu wa na matu, shinggyim masha ni a shagrau hkrum na matu shaga da ai (sh) namman jaw da ai n re. Dai majaw, kabu gara shiga hpe hkaw tsun na matu, anhte hta nga ai lam yawng hpe akyu jashawn na re.” 1919 hta shapraw ai Kadai Kaw Bungli Ap Da Ai Kun? ngu ai laika buk hta ndai hku tsun da ai: “Dai bungli gaw n mai byin ai zawn re. Raitim, dai gaw Madu a bungli re. Shi jaw ai n-gun atsam hte sha dai bungli hpe anhte galaw na re.” Tsa ban langai na Hkristan ni zawn, dai hpunau ni mung nden marai hte grai shakut shaja let galaw wa ai. Hpa majaw nga yang, masha amyu baw yawng hpe hkaw tsun na matu, chyoi pra ai wenyi gaw shanhte hpe karum ya na hpe kam ai majaw re. Dai ni anhte hpe mung chyoi pra ai wenyi karum ya na hpe kam ai.

8-9. Yehowa a uhpung gaw kabu gara shiga chyam bra na matu gara ladat ni hpe akyu jashawn ai kun?

⁸ Yehowa a uhpung gaw kabu gara shiga chyam bra na matu, kaja htum hkingrai ni hpe akyu jashawn ngut sai. Dai hkingrai ni hta, dip shapraw ai laili laika ni, “Hpan Da Ai Lam Kamung Naura,” dat nsen jak ni, nsen htawn mawdaw ni, rediyo nsen shapoi ai ni hte nau n na shi ai shaning ni hta, kumpyuta ni, intanet ni hku nna galaw da ai lamang ni lawm ai. Karai a  uhpung gaw moi na hta grau nna, amyu ga law law hte ga gale nga ai. Hpa majaw kun? Tinang a amyu ga hte kabu gara shiga na la lu na matu re. Yehowa gaw myi man n lata ai. Kabu gara shiga hpe “amyu baw shagu, baw lakung shagu, ga amyu shagu hte masha mungdan shagu” hpe hkaw tsun na ngu shi tau hkrau tsun da ai. (Shr 14:6, 7) Shi gaw masha amyu yawng hpe Mungdan shiga na la shangun mayu ai.

⁹ Shinggan masha ni n mai shang ai nta ni kaw nga ai masha ni a matu gaw gara hku kun? Shanhte hpe hkaw tsun lu na matu, shawa hpawng man sakse hkam ai lam amyu myu hpe akyu jashawn lu hkra, Yehowa gaw uhpung hpe karum ya nga ai. Ga shadawn 2001 hta, Pyintit mungdan kaw laili laika leng ni hte laili laika ni hpe madun lu ai kaga lam ni hpe akyu jashawn na matu, Uphkang Hpung gaw ahkang jaw dat ai. Dai hpang, kaga shara ni kaw mung dai hte maren galaw na matu ahkang jaw dat ai. Kaja ai akyu ni lu wa ai. 2011 hta, Amerikan mungdan Nyu Yawk Siti a masha grai law ai shara langai hta lamang nnan hpe galaw hpang ai. Nnan hpang ai shaning laman, laika buk 102,129 hte magazin 68,911 hpe garan lu wa ai. Masha 4,701 gaw Chyum ga sharin na matu hpyi shawn ai. Dai bungli hpe chyoi pra ai wenyi karum ya nga ai gaw dan leng nga ai. Dai majaw, uphkang hpung gaw mungkan ting hta dai ladat hpe akyu jashawn na matu, ahkang jaw dat ai.

10. Hkaw tsun bungli hta rawt jat na matu anhte hpa galaw mai ai kun?

¹⁰ Nang galaw lu ai lam. Hkristan zuphpawng ni hta, Yehowa shaman shakyang ya ai lam kaw nna akyu nga hkra galaw u. Tinang a magam lawk hta ayan hkaw tsun u. Dai shaloi nang ra nga ai karum shingtau lam lu nna, kaga ni a kaja ai kasi ningli ni kaw nna mung, n-gun lu la na re. Yakhkak tim matut nna hkaw tsun u. Ndai sumhpa a madung Chyum daw hta tsun da ai hte maren, Karai a myit ra ai lam hpe anhte a n-gun atsam hte n re ai sha, chyoi pra ai wenyi hte ngut kre hkra galaw lu ai. (Zeh 4:6) Anhte gaw Karai a bungli hpe galaw nga ai re.

11. Tsa ban langai na uphkang hpung gaw Karai a masha ni a lapran matut kahkyin gumdin lu na matu gara hku galaw wa ai kun?

¹¹ Tsa ban langai hta. Yerusalem kaw nga ai uphkang hpung gaw Karai a masha ni a lapran kashuk kashak n re ai sha, ngwi pyaw simsa na matu kahkyin gumdin let galaw wa ai. (Kas 2:42) Ga shadawn, A.D. 49 daram hta, matu gadoi  ai hte seng ai lam paw pru wa ai shaloi, uphkang hpung gaw chyoi pra ai wenyi lam matsun ai hte maren bawngban wa ai. Nawku hpung gaw dai lam hte seng nna, myit bra taw ai nga yang, hkaw tsun bungli gaw tang du hkra galaw lu na n re. Kasa ni hte myitsu salang ni gaw, Yuda masha ni raitim, Yuda htung lailen (sh) shanhte a sharin achyin ya ai lam ni hpe shingkang ka-up na ahkang n jaw wa ai. Shanhte gaw Chyum Laika hte chyoi pra ai wenyi lam matsun hpe sha kamhpa wa ai. (Kas 15:1, 2, 5-20, 28) Akyu lu wa ai kun? Yehowa shaman chyeju jaw wa ai majaw, nawku hpung gaw matut ngwi pyaw simsa nna, kahkyin gumdin wa ai. Hkaw tsun bungli hpe mung matut galaw lu wa ai.​—Kas 15:30, 31; 16:4, 5.

12. Dai ni aten na Yehowa a uhpung hta ngwi pyaw simsa lam nga ai hpe hpa gaw madun nga ai kun?

¹² Dai ni na aten. Yehowa a uhpung gaw, Yehowa a masha ni a lapran kashuk kashak n re ai sha, ngwi pyaw simsa na matu galaw nga ai. 1895 ning kaw nna Ziun Sin Langchyi hte Hkristu Du Nga Ai Lam ngu ai hta, 1 Korinhtu 14:40 hpe madung tawn da ai “Htap Htuk Nna Kashuk Kashak N Re” ngu ai sumhpa lawm wa ai. Dai hta, ndai hku tsun da ai: “Kashuk kashak n byin na matu tsa ban langai na nawku hpung ni hpang de kasa ni laika law law ka wa ai. . . . ‘Shawng e ka da ai lam shagu gaw, anhte hpe sharin achyin ya na matu, ka da’ ai majaw, dai hpe atsawm hkan sa ra ai.” (Rom 15:4) Tsa ban langai na Hkristan ni hta nga wa ai simsa mayu ai myit gaw, dai ni aten na Yehowa a uhpung hta mung nga nga ai. Ga shadawn, kaga mungdan raitim, kaga nawku hpung raitim, Sin Langchyi Hkaja Hpawng hta nang sa lung ai rai yang, gara hku woi awn na, gara sumhpa hpe hkaja na lam hte seng nna, nang chye na re. Kalang ta tinang a nawku hpung zawn hkamsha na re. Dai zawn kahkyin gumdin na matu, Karai a chyoi pra ai wenyi sha galaw ya lu ai.​—Zep 3:9.

13. Yaku 3:17 hku nga yang tinang hkum tinang gara ga san ni san ging ai kun?

¹³ Nang galaw lu ai lam. Yehowa gaw shi a masha ni hpe “wenyi a myit hkrum ai lam hpe ngwi pyaw ai makyit sumri hte hkan shatup” shangun mayu ai. (Ehp 4:1-3) Dai majaw, tinang hkum tinang ndai hku san u: ‘Ngai gaw nawku hpung kahkyin gumdin nna ngwi pyaw simsa hkra galaw nga ai kun? Woi awn nga ai ni hpe ngai madat mara nga ai kun? Nawku hpung hta lit lu da ai rai yang, ngai hpe kaga ni kamhpa ai kun? Tup hkrak galaw chye ai, karum ya mayu  ai, sak jaw mayu ai wa rai kun?’ (Yaku 3:17 hpe hti u.) Nang hta rawt jat ra ai lam lama ma hpe mu yang, chyoi pra ai wenyi lu na matu hpyi shawn u. Nang galaw ai lam hte atsam ningja ni hta chyoi pra ai wenyi karum ya ai hpe hkap la yang, hpunau nauna ni gaw nang hpe grau tsawra nna grau manu shadan na re.

14. Kolose 1:9, 10 hku nga yang Yehowa gaw tsa ban langai na shi a masha ni hpe gara hku sharin ya wa ai kun?

¹⁴ Tsa ban langai hta. Yehowa gaw shi a masha ni hpe sharin ya mayu ai. (Shk 32:8) Shanhte hpe shi a lam chye na matu, tsawra na matu hte shi tsawra ai kashu kasha ni hku nna htani htana asak hkrung shangun mayu ai. Dai lam yawng gaw shi lajang da ya ai sharin achyin ya ai lam n nga yang n mai byin ai. (Yhn 17:3) Yehowa gaw shi a masha ni hpe sharin ya na matu, tsa ban langai na Hkristan nawku hpung hpe akyu jashawn ai. (Kolose 1:9, 10 hpe hti u.) Yesu ga sadi jaw da ai “karum na wa” ngu ai chyoi pra ai wenyi mung sape ni hpe karum ya wa ai. (Yhn 14:16, JCLB) Chyoi pra ai wenyi gaw, sape ni hpe Chyum Laika a lam chye na hkra karum ya wa ai. Yesu tsun ai, galaw ai lam law law hpe matsing lu nna, Kabu Gara Shiga Laika hku nna bai ka lu hkra karum ya wa ai. Dai machye machyang gaw, tsa ban langai na Hkristan ni a makam masham hpe shangang shakang ya wa ai zawn, Karai Kasang, Shi a Kasha hte shanhte shada da tsawra ai myit hpe mung, shangang shakang ya wa ai.

15. Esaia 2:2, 3 hta mu lu ai Yehowa a ga sadi ni hpring tsup nga ai hpe gara lam ni hku nna mu lu ai kun?

¹⁵ Dai ni na aten. “Hpang jahtum na prat hta,” masha amyu baw yawng gaw, Yehowa a lam ni hpe sharin la na matu, shi a ga shadawn bum de sa wa na ngu Yehowa tau hkrau tsun da ai. (Esaia 2:2, 3 hpe hti u.) Dai myihtoi ga hpring tsup nga ai hpe anhte mu lu ai. Tengman ai nawku daw jau lam gaw, shut shai ai nawku daw jau lam hta na grau kaja ai hpe anhte mu lu ai. Yehowa gaw wenyi lusha poi kaba hpe lajang da ya ai. (Esa 25:6) Dai hpe lam amyu myu hku nna lajang ya na matu, “sadi ai hte myit su ai mayam” hpe akyu jashawn ai. Ga shadawn,  sumhpa ni hpe anhte lu hti ai, mungga ni madat lu ai, katun hte video ni hpe lu yu ai. (Mat 24:45) “Shi [Karai Kasang] gaw yawng hta kaba htum ai sara rai nga ai” ngu tsun wa ai Yoba a manang Elihu zawn anhte hkamsha ai.​—Yob 36:22, JCLB.

16. Wenyi lam hta rawt jat na matu nang hpa galaw mai ai kun?

¹⁶ Nang galaw lu ai lam. Karai a chyoi pra ai wenyi gaw Chyum Laika kaw nna nang hkaja wa ai lam ni hpe tatut hkan sa na matu karum ya na re. “Yehowa e, na a lam ngai hpe sharin ya e, Na a teng man ai hta e, ngai hkawm mayu nga nngai. Na a amying hpe hkungga nga n ga, nye a myit shadut ya e” ngu hpyi shawn wa ai shakawn kungdawn sara zawn nang mung hpyi mai ai. (Shk 86:11) Dai majaw, Chyum Laika hte uhpung kaw nna Yehowa lajang da ya ai wenyi malu masha ni hpe matut sha u. Na a bandung gaw Chyum Laika machye machyang lu la na daram sha n re. Tengman ai tara hpe kamsham nna dai hpe prat hta tatut hkan sa mayu na re. Dai hku galaw lu na matu, Yehowa a chyoi pra ai wenyi gaw nang hpe karum ya na re. Hpunau nauna ni hpe mung nang n-gun jaw mayu na re. (Heb 10:24, 25) Hpa majaw kun? Shanhte gaw wenyi lam hta nta masha ni re ai majaw re. Hkristan zuphpawng ni hta myit masin kaw nna mahtai jaw lu na matu hte, lamang ni hta lit ang ai shaloi kaja htum galaw lu na matu, Karai a wenyi hpe hpyi shawn u. Yehowa hte shi Kasha a manu dan ai “sagu ni” hpe nang tsawra ai lam dai lam ni hku nna madun mai ai.​—Yhn 21:15-17.

17. Yehowa a uhpung hpe sadi dung let madi shadaw ai lam gara lam ni hku nna madun mai na kun?

¹⁷ Kade n na yang, ginding aga hta langai sha ngam nga na uhpung gaw Karai a wenyi lam matsun ya ai uhpung re. Dai majaw, Yehowa a uhpung hte arau myit rawt let jawm galaw u. Nang hkrum ai masha yawng hpe kabu gara shiga hkaw tsun ai hku nna, Karai a myi man n lata ai tsawra myit hpe madun mai ai. Nawku hpung hta kahkyin gumdin lam grau nga hkra galaw ai hku nna, kashuk kashak n re ai sha, ngwi pyaw simsa na matu shi a tsawra myit hpe kasi la u. Wenyi lusha poi kaba kaw nna akyu hpring tup lu la na matu, Grau Htum Ai Sara a ga hpe madat u. Satan a mungkan htum wa ai shaloi nang hkrit tsang ra na n re. Nang gaw nden marai nga nna, Yehowa a uhpung hte arau, sadi dung ai ni hte ngang ngang tsap nga lu na re.