Moi Israela Ni Majan Gasat Wa Tim Anhte Hpa Majaw N Gasat Ai Kun?
NAMBAT 2 Mungkan Majan laman, Nazi du langai gaw Yehowa Sakse hpung hpe ndai hku marawn tsun ai: “Pyintit hpe raitim, Ingalan hpe raitim, n gasat yang, nanhte yawng si ra na.” Laknak ni lang da ai Nazi hpyen la ni makau hta tsap nga tim, hpunau langai mi mung asum n jaw ai. Grai nden marai nga ai. Ndai ga shadawn gaw, mungkan majan ni hta n gasat ai ngu ai Yehowa Sakse ni a ningmu hpe dan dawng shangun ai. Sat kau na ngu jahkrit shama hkrum tim, mungkan a manghkang ni hta n shang lawm ai.
Hkristan amying hkam la ai ni yawng gaw dai zawn n re. Hkristan langai gaw tinang a mungdan hpe makawp maga lu ai. Makawp mung makawp maga ging ai. ‘Karai a amyu masha re ai moi na Israela ni pyi, majan gasat wa ai nga yang, dai ni aten na Hkristan ni mung gasat ging ai’ ngu shanhte myit hkrup chye ai. Nang gara hku htai na kun? Moi Israela ni a masa hte dai ni aten na Karai a masha ni a masa gaw grai shai ai hpe nang sanglang dan lu ai. Shai ai lam 5 hpe bawngban yu ga.
1. Karai A Amyu Masha Gaw Amyu Langai Sha Re
Moi aten hta, tinang a amyu hpe Israela amyu langai hku nna Yehowa kahkyin la ai. Israela ni hpe “masha amyu nlang hte hta na nanhte nye a sali wunli tai na” ngu Karai Kasang tsun ai. (Pru 19:5) Shanhte hpe mungdan san san garan ya ai. Kaga amyu ni hpe gasat ai shaloi, Yehowa hpe nawku ai shada da n gasat na matu, n sat na matu Karai Kasang htet da ai. *
Dai ni aten, Yehowa hpe jaw ai ladat hte nawku nga ai ni gaw, ‘masha mungdan shagu hta na, baw lakung shagu hta na, amyu baw shagu hta na, ga amyu shagu hta na’ ni re. (Shr 7:9) Karai a amyu ni majan gasat na nga yang, nawku ai shada da gasat hkrup chye ai.
2. Majan Gasat Na Matu Israela Ni Hpe Yehowa Htet Da
Moi aten hta, Israela ni gaw gara aten hta, hpa a majaw majan gasat ra ai hpe Yehowa dawdan ya ai. Ga shadawn, shut shai ai nawku dawjau lam, ma hpe hkungga nawng ai lam, hpye ai amu galaw ai lam ni a majaw, mying hten ai Hkanan masha ni hpe Karai a tara jeyang ai hte maren galaw na matu, Ga Sadi Tawn Da Ai Mungdan hta, shanhte a n kaja ai shingkang ka-up ai lam n nga hkra yeng seng kau na matu, Israela ni hpe Karai matsun ai. (Jaw 18:24, 25) Ga Sadi Tawn Da Ai Mungdan hta, Israela ni sa shanu ngut ai hpang, kalang lang zingri zingrat ai hpyen ni a lata kaw na makawp maga na matu, majan gasat u ngu Karai Kasang htet da ai. (2 Sa 5:17-25) Raitim, tinang hkrai dawdan nna, majan gasat ai hpe gaw, Yehowa ahkang n jaw ai. Israela ni dai zawn gasat ai shaloi, galoi mung sum ai.—Bhk 14:41-45; 2 Hl 35:20-24.
Dai ni aten, majan gasat sa na matu masha ni hpe Yehowa ahkang n jaw da ai. Mungdan ni hpyen gasat ai gaw Karai Kasang a matu n re ai sha, tinang a matu gasat nga ai re. Lamu ga kashun na matu, hpaga lam, mung masa lam akyu lu na matu gasat nga ai re. Raitim, nawku dawjau lam hpe makawp maga na matu, Karai a hpyen ni hpe yeng seng kau na matu, Karai a amying hte gasat nga ai ngu tsun ai ni gaw gara hku kun? Htawm hpang Hara Magedon majan hta, Yehowa gaw shi hpe nawku dawjau ai ni hpe makawp maga nna, hpyen ni hpe jahten kau na re. (Shr 16:14, 16) Dai majan hta gasat na gaw Karai a sumsing lamu hpyen dap rai na re. Yehowa hpe nawku dawjau ai shinggyim masha ni n re.—Shr 19:11-15.
3. Kamsham Ai Lam Madun Ai Ni Hpe Israela Ni Asak Shalawt Ya
Yerihko mare hpe gasat ai Yehowa a majan gaw, Rahab hte nta masha ni hpe asak shalawt ya ai zawn, dai ni aten na majan ni gaw, kamsham ai ni hpe asak shalawt ya ai kun?
Moi aten hta, Israela hpyen dap gaw, Karai hpe kamsham ai lam madun ai ni hpe tsawra myit madun ai. Si dam hkrum ging ai ngu Yehowa jeyang ai ni hpe gaw sat kau ai. Mabyin 2 hpe yu yu ga. Yerihko mare hpe jahten na matu, Yehowa htet ai shaloi Rahab a makam masham a majaw, shi hte nta masha ni hpe Israela ni asak shalawt ya wa ai. (Ysh 2:9-16; 6:16, 17) Bai nna, Gibeon masha ni Karai Kasang hpe hkrit hkungga ai lam madun ngut ai hpang, mare ting hpe Israela ni asak shalawt ya wa ai.—Ysh 9:3-9, 17-19.
Dai ni aten hta, mungdan ni majan gasat ai shaloi, kamsham ai lam madun ai ni hpe asak n shalawt ya ai. Kalang lang, mara n nga ai mung masha ni si ra ai.
4. Karai A Majan Hte Seng Ai Tara Ni Hpe Israela Ni Hkan Sa Ra
Moi aten hta, Karai a lam matsun hte maren, Israela hpyen la ni gasat ra ai. Ga shadawn, mare langai hpe n gasat shi yang, “htinglu htinglai na lam [simsa lam, NWT]” tsun na matu, kalang lang Karai Kasang lam matsun ai. (Trj 20:10) Israela hpyen la ni mung, dap ting mung, hkum hkrang hte akyang lailen hta san seng na matu, Yehowa myit mada ai. (Trj 23:9-14) Htingbu mungdan kaw na hpyen dap ni gaw majan awng dang yang, dai ginra hta nga ai num ni hpe hkum shan roi rip ma ai. Yehowa gaw dai zawn n galaw na matu Israela ni hpe hkum pat ai. Mare hpe zing ngut nna, shata mi na yang she, bawng masha num hpe la na ahkang nga ai.—Trj 21:10-13.
Dai ni aten hta, mungdan ga daga majan n byin na matu, mungdan law law gaw myit hkrum ga shaka tawn ma ai. Mung masha ni hpe makawp maga na matu, yaw shada tim, dai ga shaka ni hpe tawt lai ai gaw yawn hpa re.
5. Karai Kasang Gaw Shi Amyu A Matu Gasat Ya
Yerihko mare hta, Israela ni a matu, Karai Kasang gasat ya wa ai zawn, dai ni aten hta, mungdan langai a matu gasat ya ai kun?
Moi aten hta, Israela ni a matu, Yehowa gasat ya ai. Mauhpa lam hku nna awng dang shangun ai. Ga shadawn, Yerihko mare hpe awng dang na matu, Israela ni hpe Yehowa gara hku karum ya ai kun? Yehowa a lam matsun hte maren, “nsen kaba hte garu dat ma ai rai nna, dai bunghku gaw yan ting daw ru mat wa ai.” Mare hpe aloi hte sha zing la lu wa ai. (Ysh 6:20) Amori masha ni hpe mung, gara hku awng dang wa ai kun? “Yehowa gaw lamu de na lungdin kaba jahkrat bun wu ai rai nna, . . . lsraela kashu kasha ni a nhtu hte si ai hta, sin marang e si ai mahtang grau law ma ai.”—Ysh 10:6-11.
Dai ni aten hta, ginding aga na gara mungdan ni a matu mung, Yehowa n gasat ya ai. Hkawhkam Yesu woi awn ai Karai Mungdan gaw, “ndai mungkan ga” hte n seng ai. (Yhn 18:36) Masha asuya yawng hpe, hkang nga ai wa gaw Satan re. Hkrit hpa mungkan majan ni gaw, Satan a lailen hpe madun nga ai.—Luk 4:5, 6; 1 Yh 5:19.
Hkristan Ajet Ni Gaw Simsa Lam Nga Hkra Galaw Ai Ni Re
Dai ni aten na masa hte moi Israela ni a masa gaw grai shai ai hpe chye wa sai. Raitim, dai shai ai lam ni a majaw sha, anhte majan n gasat ai n re. Kaga lam ni mung naw nga ai. Ga shadawn, hpang jahtum nhtoi hta, Karai a sharin achyin ai lam hkam la ai ni gaw, majan hta lawm na matu hkum tsun, “hpyen majan” hpaji hpe pyi “sharin sa na” n re. (Esa 2:2-4) Sape ni gaw, ndai mungkan ga hte n seng ai, “mungkan ga hte seng ai” lam ni hta shang lawm na n re ngu Hkristu tsun ai.—Yhn 15:19.
Dai hta n-ga galaw na matu mung shi hpang hkan ai ni hpe Hkristu n-gun jaw ai. Masin n si hkraw ai, masin pawt ai, majan byin ai lam ni de du mat shangun ai myit jasat ni hpe koi na matu htet da ai. (Mat 5:21, 22) Dai sha n-ga, ‘ngwi pyaw simsa lam a matu galaw ai ni’ byin na matu, hpyen ni hpe pyi tsawra na matu htet da ai.—Mat 5:9, 44, JCLB.
Anhte langai hpra gaw gara hku kun? Majan n gasat mayu tim, nawku hpung hta, dangrang hkat shangun ai, myit n hkrum shangun ai n ju n dawng ai lam ni myit masin hta nga taw ai kun? Dai zawn, hkamsha lam ni hpe, myit kaw nna ru pyi n ngam hkra shaw kau na matu matut shakut mat wa ga.—Yak 4:1, 11.
Majan ni hta shang lawm na malai, shada da a lapran hta simsa lam, tsawra myit nga na matu, anhte shakut ai. (Yhn 13:34, 35) Majan yawng hpe Yehowa tsep kawp jahtum kau na nhtoi hpe la nga let, matut lapran nga na matu dawdan da ga.—Shk 46:9.
^ Kalang lang, Israela shada da gasat ai aten ni nga ai. Raitim, dai hpe Yehowa n ra ai. (1 Hk 12:24) Amyu nkau Karai hpe sadi n dung ai shaloi, mara kaba ni galaw ai shaloi hta gaw, dai zawn gasat na matu Karai ahkang jaw ai.—Trg 20:3-35; 2 Hl 13:3-18; 25:14-22; 28:1-8.
You May Also Like
SAN CHYE AI GA SAN NI
Yehowa Sakse Ni Hpa Majaw Majan Hta N Shang Lawm Ai Kun?
Yehowa Sakse Ni hpe majan hta n shang lawm ai ni hku nna, mungkan ting na masha ni chye ma ai. Anhte hpa majaw majan hta n shang lawm ai hpe hti yu u.
