1. Anhte a ngwi pyaw lam gaw, “wenyi lam hta ra kadawn ai” lam hte gara hku matut mahkai nga ai kun?

 JET ai ngwi pyaw lam ngu ai gaw, nga dat, n nga dat byin chye ai hkamsha lam n re. Prat tup na matu re. Gara hku nna kun? Bum Ntsa Na Mungga hta Yesu ndai hku tsun da ai: “Wenyi lam hta ra kadawn ai ni gaw ngwi pyaw ma ai.” (Mat 5:3, NWT) Masha gaw, Hpan Madu Yehowa Karai Kasang hpe chye chang mayu ai, nawku dawjau mayu ai myit hpe bang nna hpan da hkrum ai hpe Yesu chye ai. Dai gaw “wenyi lam hta ra kadawn ai” lam re. Yehowa gaw “ngwi pyaw ai Karai Kasang” re ai majaw, Karai hpe nawku ai ni gaw ngwi pyaw lu ai.​—1 Tm 1:11, NWT.

2-3. (a) Yesu a ga hku nga yang, kadai ni ngwi pyaw lu ai kun? (b) Ndai sumhpa hta hpa lam bawngban na kun? Hpa majaw kun?

² Ngwi pyaw lam gaw prat masa hte seng ai kun? N seng ai. Bum Ntsa Na Mungga hta, laklai ai lam langai hpe Yesu tsun ai. Tinang a mara a majaw byin ai raitim, myit htum hpa prat masa a majaw raitim, “yawn hkyen hkrum ai ni” ngwi pyaw lu ai ngu tsun da ai. “Ding man ai lam majaw, zingri zingrat hkrum ai ni,” Hkristu hpang hkan ai majaw, “asawng asang di” hkrum ai ni mung, ngwi pyaw lu ai ngu Yesu matut tsun ai. (Mat 5:4, 10, 11) Raitim, dai zawn masa ni hta teng sha ngwi pyaw lam lu mai ai kun?

³ Ngwi pyaw lam ngu ai gaw, prat masa hte n seng ai. Wenyi lam hta ra kadawn ai hpe jahpring shatsup yang she, Karai hte hku hkau yang she, lu na ngu Yesu sharin ya ai. (Yak 4:8) Gara  lam hku nna dai zawn galaw lu ai kun? Jet ai ngwi pyaw lam lu shangun ai madung lam 3 hpe ndai sumhpa hta bawngban na re.

4. Jet ai ngwi pyaw lam lu shangun ai nambat 1 lam gaw hpa rai kun? (Shakawn 1:1-3)

⁴ LAM 1: Jet ai ngwi pyaw lam lu na matu, wenyi lusha sha ra ai. Chyum Laika hpe lusha hte shingdaw mai ai. Masha hte dusat ni gaw, asak hkrung na matu, lusha sha ra ai. Raitim, Chyum Laika hpe shinggyim masha ni sha lu hti ai. Hti mung hti ra ai. Dai majaw Yesu ndai hku tsun ai: “Masha gaw, muk hte sha hkrung nga lu na n rai; Karai Kasang a n-gup hta na pru ai mungga nlang hte hte hkrung nga lu na ra ai.” (Mat 4:4) Dai majaw, lani mi pyi wenyi lusha n sha kau dat ai baw n byin ging ai. Shakawn kungdawn sara ndai hku tsun ai: “Yehowa a tara hta awng nga nna, Shi a tara hpe shani shana myit mang ai wa gaw, a [ngwi pyaw, NWT] nga ai.”​—Shakawn 1:1-3 hpe hti u.

5-6. (a) Chyum Laika kaw na hpa ni chye wa ai kun? (b) Chyum Laika hti ai gaw gara hku karum ya lu ai kun?

⁵ Ngwi pyaw ai prat lu mai ai lam hpe, Chyum Laika hta Yehowa tsun da ai. Anhte a prat a matu Karai a yaw shada lam gaw hpa rai? Karai hte hku hkau hkra, mara ni raw hkrum hkra hpa galaw lu ai kun? Karai jaw na htawm hpang myit mada lam gaw hpa rai kun? ngu ai hpe anhte chye wa ai. (Yer 29:11) Chyum Laika kaw na chye wa ai dai tengman lam ni gaw anhte hpe ngwi pyaw shangun ai.

⁶ Chyum Laika hta, shani shagu na prat hkrun lam a matu, tatut re ai nyan hpaji ni hpring tup rawng ai. Dai hte maren hkan sa yang ngwi pyaw lu ai. Prat hta hkrum wa ai  manghkang ni a majaw, myit daw wa shagu, Chyum Laika hti na matu, myit sawn sumru na matu aten grau la u. Yesu ndai hku tsun ai: “Karai Kasang a mungga madat la nna, hkan nang ai ni gaw a lu [ngwi pyaw, NWT] ma ai.”​—Luk 11:28.

7. Chyum Laika hti ai shaloi, akyu grau lu hkra hpa galaw lu ai kun?

⁷ Chyum Laika hti ai shaloi, aten la nna nam chyim nga hkra hti u. Ga shadawn, marai langai ngai gaw, tinang ra dik htum lusha shadu ya ai ngu saga. Aten n nga ai majaw (sh) myit bra nga ai majaw, nam chyim n hkam ai sha, sha dat ai. Sha ngut yang she, tin shapun sha dat ai hpe chye dat ai. Aten la nna, angwi ngwi nam chyim nga hkra sha dat yang kaja na wa ngu myit hkrup ai. Chyum Laika hti ai shaloi hta mung, dai hta lawm ai lam ni hpe nam chyim n hkam ai sha, tin shapun hti dat ai baw byin ga ai kun? Chyum Laika hti ai shaloi, aten la nna nam chyim nga hkra hti u. Mabyin ni hpe shingran yu u. Nsen na hkra shingran yu u. Hti ai hpe myit sawn sumru u. Rai yang, hti ai hpe grau pyaw wa na re.

8. “Sadi ai hte myit su ai mayam” gaw shanhte a lit hpe kangka hkra gara hku galaw nga ai kun? (Lawu matsing hpe mung yu u.)

⁸ Wenyi lusha hpe aten dep jaw sha na matu, “sadi ai hte myit su ai mayam” hpe Yesu san da ai majaw, anhte hkru hkru kat kat lu sha ai. * (Mat 24:45) Sadi dung ai mayam hkyen lajang ya ai hta, madung hku nna lawm ai gaw, chyoi pra ai wenyi lam matsun hte ka da ai Chyum Laika re. (1 Ht 2:13) Dai wenyi lusha gaw, Chyum Laika hta tsun da ai Yehowa a myit mang ai lam hpe chye hkra karum ya ai. Dai majaw, anhte gaw, Sin Langchyi, Dum Hprang! hte jw.org hta lawm ai sumhpa ni hpe hti ai. Bat lapran zuphpawng, kru ya hte laban hta galaw ai zuphpawng ni a matu mung hkyen lajang ai. Shata shagu JW TV lamang hpe yu ai. Dai ni gaw, jet ai ngwi pyaw lam lu shangun ai nambat 2 lam hpe galaw na matu karum ya na re.

9. Jet ai ngwi pyaw lam lu shangun ai nambat 2 lam gaw hpa rai kun?

⁹ LAM 2: Jet ai ngwi pyaw lam lu na matu, Yehowa a tsang madang ni hte maren asak hkrung ra ai. “Yehowa hpe hkrit hkungga nna, shi a lam hta hkan nang ai ni yawng hte gaw, a [ngwi pyaw, NWT] nga ma ai” ngu shakawn kungdawn sara ka wa ai. (Shk 128:1) Yehowa hpe hkrit kamyin ai ngu ai gaw, Karai hpe grai hkungga ai majaw, Karai n ra ai hpe n galaw na matu, koi yen ai hpe tsun ai re. (Gsh 16:6) Dai majaw, Chyum Laika hta lawm ai, jaw ai shut ai hte seng ai Karai a tsang madang ni hte maren anhte dang lu ai daram asak hkrung ai. (2 Ko 7:1) Yehowa ra sharawng ai hpe galaw nna, Shi n ju n dawng ai hpe koi na nga yang, anhte ngwi pyaw wa na re.​—Shk 37:27; 97:10; Rom 12:9.

10. Roma 12:2 hku nga yang, anhte a lit gaw hpa rai kun?

¹⁰ Roma 12:2 hpe hti u. Gara gaw jaw ai, gara gaw shut ai hpe dawdan na ahkang Yehowa hta nga ai hpe chye ai hte n ngut ai. Karai a tsang madang ni hpe hkan sa ra ai. Ga shadawn, ningmaw lam kaba hta, kade daram lawan hkra gau ra ai hpe asuya gaw tara jahkrat na ahkang nga ai hpe chye tim, n hkan sa yang, jahkrat da ai tara hta jan nna grai lawan hkra gau hkrup chye ai. Anhte mung, Yehowa a tsang madang ni hpe hkan sa ai gaw, kaja htum prat hkrun lam re ai hpe kam ai lam, tinang a arawn alai hku nna madun ai. (Gsh 12:28) Dawi dai zawn hkamsha nna ndai hku  ka wa ai: “Nang ngai hpe asak hkrung ai lam madun ya na ndai; Na a man e kabu gara htum nga ai: Na a hkra lata hta pyaw ai lam tut tut a nga nga ai law.”​—Shk 16:11.

11-12. (a) Mayak mahkak ni hkrum ai shaloi, myit daw ai shaloi, hpa hpe sadi ra ai kun? (b) Hpilipi 4:8 hta lawm ai ga ni gaw, shangwi shapyaw lam lata ai hta gara hku karum ya lu ai kun?

¹¹ Mayak mahkak ni hkrum ai shaloi, myit daw ai shaloi, lawt lam lu hkra, lama ma hte myit pyaw hkra galaw ra ai ngu hkamsha chye ai. Dai gaw n shut ai. Raitim, Yehowa n ju n dawng ai lam hpe n galaw hkrup hkra sadi ra ai.​—Ehp 5:10-12, 15-17.

¹² Hpilipi nawku hpung hpe kasa Pawlu ka ai laika hta, “dinghpring ai lam . . . san seng ai lam . . . sharawng awng ai lam . . . arawng re ai lam” ni hpe galoi mung myit sawn sumru nga na matu n-gun jaw da ai. (Hpilipi 4:8 hpe hti u.) Shangwi shapyaw lam hpe Pawlu laksan hku nna tsun nga ai n raitim, shi tsun nga ai lam ni gaw, anhte lata ai shangwi shapyaw lam hta mung akyu shabyin ya ging ai. Chyum daw hta lawm ai “hpa” ngu ai shara hta “mahkawn ni,” “sumla hkrung ni,” “sumroi laika ni,” “video gim ni” ngu ai gasi ni hpe malai bang yu u. Dai gaw, Karai ningmu hta hkap la mai ai, n mai ai hpe chye na matu karum ya lu ai. Yehowa a tsang madang hte maren anhte asak hkrung mayu ai. (Shk 119:1-3) Rai yang, jet ai ngwi pyaw lam lu shangun ai kaga lam hpe san seng ai myit nsam hte galaw lu na re.​—Kas 23:1.

13. Jet ai ngwi pyaw lam lu shangun ai nambat 3 lam gaw hpa rai kun? (Yawhan 4:23, 24)

¹³ LAM 3: Prat hta Yehowa hpe nawku ai lam hpe shawng tawn u. Yehowa gaw Hpan Madu re ai majaw, anhte shi hpe nawku dawjau ai hpe lu ging ai. (Shr 4:11; 14:6, 7) Dai majaw, prat hta ahkyak htum gaw, “wenyi hta mung, teng man ai hta mung” Karai ra sharawng ai hte maren nawku dawjau ra ai. (Yawhan 4:23, 24 hpe hti u.) Chyum Laika tengman lam hte maren nawku lu hkra, chyoi pra ai wenyi lam matsun ai hpe anhte hkam la mayu ai. Uhpung galaw ai lam ni hpe shadawn sharam sha galaw shangun ai (sh) hkum pat da ai shara hta nga nga tim pyi, nawku daw jau ai lam hpe shawng tawn ra ai. Yehowa Sakse byin ai majaw, hpunau nauna 100 jan gaw, ya aten hta htawng hkrat hkrum nga ai. * Dai pyi, akyu hpyi na matu, hkaja na matu, Karai Kasang hte shi a Mungdan lam kaga ni hpe tsun dan na matu, shanhte dang lu ai daram kabu gara let shakut nga ai. Jahpoi asawng hkrum ai, zingri zingrat hkrum ai shaloi, anhte hte rau Yehowa nga ai, kumhpa jaw na ngu ai hpe chye ai majaw kabu ai re.​—Yak 1:12; 1 Pe 4:14.

14. Tajitkitsatan kaw na ramma hpunau hpa ni hkrum wa ai kun? Hpa majaw kun?

¹⁴ Gaja wa byin lai wa ai mahkrum madup ni gaw, anhte a prat masa gara hku mi raitim, hkaja wa sai lam 3 a majaw, jet ai ngwi pyaw lam lu mai ai hpe shagrin ya ai. Hpyen magam gun na matu nyet kau ai, asak 19 re ai, Tajitkitsatan mungdan kaw na hpunau Jobidan Babajana hpa ni byin wa ai hpe yu yu ga. 2019, October 4 hta, nta kaw na atik anang woi la hkrum nna, shata law law sharen da hkrum ai. Tara tawt lai da ai wa zawn kanawn mazum hkrum ai. Shi hkrum ai n tara ai lam hte seng nna mungdan law law a shiga ni hta lawm wa ai. Hpyen dap ga shaka tsun na matu, hpyen hking hpun na matu, atik anang shadut ai hku  nna, kayat hkrum ai. Mara nga ai ngu tara jeyang hkrum nna, laja lana bungli galaw ra ai htawng de sa kau hkrum ai. Hpang jahtum, Tajitkitsatan gumsan magam a shalawt ya ai aming hte lawt wa ai. Dai aten ni laman, Jobidan sadi dung wa nna ngwi pyaw lam n mat hkra makawp maga wa ai. Gara hku nna kun? Wenyi lam hta ra kadawn ai lam hpe chye nna dai hpe galoi mung jahpring shatsup nga ai majaw re.

15. Jobidan htawng hkrat nga ai laman, Yehowa a lam gara hku matut hkaja ai kun?

¹⁵ Jobidan htawng hkrat nga ai shaloi, Chyum Laika, Chyum Laika hte seng ai laili laika langai mi pyi n nga tim, Yehowa a lam matut hkaja ai. Gara hku nna kun? Buga hta nga ai hpunau nauna ni gaw, shahpa la sa ya ai shaloi, bang ya ai sumbu ni a ntsa hta, shani shagu na Chyum Daw ka ya ai. Dai majaw, shani shagu Chyum Laika lu hti nna, myit sawn sumru lu wa ai. Htawng kaw na lawt wa ai hpang, Jobidan gaw, laja lana re ai chyam dinglik lam n hkrum shi ai ni hpe ndai hku hpaji jaw ai: “Tinang wanglu wanglang byin nga ai aten hta, Chyum Laika hte Chyum Laika laili laika ni hpe hti ai hku nna, Yehowa a lam grau chye hkra galaw da na matu grai ahkyak ai.”

16. Jobidan hpa hpe myit maju jung nna myit sawn sumru ai kun?

¹⁶ Jobidan gaw, Yehowa a tsang madang ni hte maren asak hkrung ai. Shut shai ai ra marin ai lam ni hpe sha myit nna, shut ai lam hpe galaw na malai, Yehowa a lam, Karai manu shadan ai lam ni hpe madung myit ai. Karai hpan da ai lam ni a tsawm htap ai lam gaw mauhpa re. Jahpawt shagu, u ni a mahkawn hkawn ai nsen hte rawt wa nna, shana aten hta mung shata shagan ni hpe yu chyai ai.  “Yehowa jaw ai dai kumhpa ni gaw, ngai hpe ngwi pyaw shangun ai, n-gun lu shangun ai” ngu shi tsun ai. Wenyi lam hta, hkum hkrang hta, ra kadawn ai lam ni hpe Yehowa hkyen lajang ya ai hpe chyeju dum ai gaw, anhte hpe ngwi pyaw shangun ai. Dai ngwi pyaw lam gaw, hkam jan lu ai atsam hpe rawt jat shangun ai.

17. 1 Petru 1:6, 7 hta lawm ai ga ni gaw, Jobidan a masa zawn byin nga ai ni hte gara hku seng ai kun?

¹⁷ Jobidan gaw, Yehowa hpe nawku daw jau ai lam hpe shawng tawn ai. Jet ai Karai hpe sadi dung na matu ahkyak ai hpe mung chye ai. “Dai Madu na a Karai Kasang hpe nang naw ku lu na rai nna, shi hpe hkrai daw jau lu na ndai” ngu Yesu tsun ai. (Luk 4:8) Hpyen du ni, hpyen la ni gaw, Jobidan hpe Yehowa Sakse kaw na pru shangun mayu ai. Raitim, makam masham hpe asum n jaw hkrup hkra karum ya na matu, Yehowa hpang shani, shana akyu hpyi ai. N tara ai hku kanawn mazum hkrum tim, tsep kawp asum n jaw ai. Akyu hku nna, rim n hkrum shi yang, kayat n hkrum shi yang, htawng n hkrat shi yang, n nga wa ai lam ni hpe ya, lu la ai majaw grai kabu ai. Dai gaw, chyam dinglik hkrum ngut sai makam masham re.​—1 Petru 1:6, 7 hpe hti u.

18. Ngwi pyaw lam gara hku matut lu la mai ai kun?

¹⁸ Jet ai ngwi pyaw lam lu na matu, anhte hpa ra ai ngu ai hpe Yehowa chye ai. Dai majaw, jet ai ngwi pyaw lam lu shangun ai lam 3 hpe hkan sa na nga yang, mayak mahkak ni a lapran hta pyi, ngwi pyaw lam matut lu la na re. “Karai Kasang matu Yehowa lu ai amyu gaw, a [ngwi pyaw, NWT] nga ai” ngu lu tsun na re.​—Shk 144:15.