Hkaja Na Sumhpa 38
“Ngai Kaw Wa Ma Rit; Ngai Nanhte Hpe Ban Sa Shangun Na Ma De Ai”
“Hki ba la nna lit li gun ai ni yawng hte e, ngai kaw wa ma rit; ngai nanhte hpe ban sa shangun na ma de ai.”—MAT 11:28.
Mahkawn 17 ‘Ngai Hkraw Nngai’
Sumhpa Hta Lawm Ai Lam *
1. Mahte 11:28-30 hku nga yang Yesu hpa ga sadi jaw da ai kun?
YESU gaw shi a ga madat nga ai masha uhpung hpe laklai ai ndai ga sadi jaw wa ai: “Ngai kaw wa ma rit; ngai nanhte hpe ban sa shangun na ma de ai.” (Mahte 11:28-30 hpe hti u.) Dai gaw lachyum n nga ai ga sadi n re. Ga shadawn, grai sawng ai ana hkamsha nga ai num hpe Yesu hpa galaw wa ai lam myit yu ga.
2. Machyi ai num a matu Yesu hpa galaw ya wa ai kun?
2 Num langai gaw karum shingtau lam grai ra nga ai. Grai mai mayu ai majaw tsi sara law law hte mung madun wa sai. Machyi sawng ai gaw 12 ning jan tim, n mai hkraw shi ai. Mawshe A Tara hku nga yang, shi gaw n san n seng ai. (Jaw 15:25) Machyi ai masha ni hpe Yesu shamai ya ai lam na ai majaw, Yesu hpe tam na matu sa wa ai. Shi hpe mu ai shaloi, shi a palawng matu hpe jum dat ai hte kalang ta mai mat ai. Yesu gaw shi hpe shamai ya ai sha n-ga, tsawra hkungga ai lam madun wa ai. Ga shadawn, shi hte ga shaga ai shaloi, tsawra myit lawm ai hku nna “shayi sha e” ngu shaga wa ai. Dai num gaw ban sa lam hte n-gun lu mat na gaw teng sha re.—Luk 8:43-48.
3. Gara ga san ni a mahtai hpe chye lu na kun?
3 Dai num gaw Yesu hpang de sa ai hpe sadi yu u. Shi a maga hku nna shawng galaw wa ai. Dai hte maren, anhte mung Yesu hpang de sa na matu shakut ra ai. Dai ni na aten hta, machyi ai ni Yesu hpang sa ai shaloi, mauhpa lam hku nna shamai shatsai hkrum na gaw n re. Raitim, “ngai kaw wa ma rit; ngai nanhte hpe ban sa shangun na ma de ai” nga nna anhte hpe matut saw shaga nga ai. Ga san 5 a mahtai hpe ndai sumhpa hta chye lu na re: Madu Yesu hpang de gara hku sa lu na kun? “Nye a kandang hpe hpai mu” ngu Yesu tsun ai gaw hpa lachyum rai kun? Yesu kaw nna hpa sharin la lu ai kun? Anhte hpe jaw da ai lit gaw hpa majaw ban sa lam jaw ai kun? Yesu a
kandang hpai let matut nna gara hku ban sa lu na kun?Ngai Hpang De Sa Marit
4-5. Yesu hpang de sa lu ai lam nkau gaw hpa ni rai kun?
4 Yesu hpang sa lu ai lam langai gaw shi tsun ai, galaw ai lam ni hpe dang lu ai daram hkaja ai hku nna re. (Luk 1:1-4) Shi a lam hkaja ai lamang hpe anhte a malai kadai mung n lu galaw ya ai. Anhte gaw hkalup hkam na matu hte Hkristu a sape byin wa na matu dawdan ai hku nna Yesu hpang de sa ga ai.
5 Anhte karum shingtau lam ra ai shaloi, nawku hpung myitsu salang ni hpang de sa ai hku nna mung Yesu hpang de sa lu ai. Yesu gaw shi a sagu ni hpe yu na matu kumhpa hku nna jaw da ai dai masha ni hpe akyu jashawn ai. (Ehp 4:7, 8, 12; Yhn 21:16; 1 Pe 5:1-3) Anhte maga hku nna shanhte hpe shawng karum hpyi ra ai. Myitsu salang ni gaw anhte ra nga ai lam hpe chye nna myit masin hpe mung mu lu ai ngu n mai sawn la ai. Hpunau Juliyan ndai hku tsun ai: “Nye a hkamja lam a majaw Behtela kaw nna pru ra na shaloi, manang langai gaw sagu kawan galaw ya na matu hpyi shawn u ngu nna tsun ai. Shawng nnan hta, dai hku galaw n ra ai ngu shadu ai. Raitim, ngai karum hpyi dat ai. Dai sagu kawan ai lamang gaw ngai lu la ai kaw nna kaja htum kumhpa langai re.” Juliyan hpe sa kawan ai myitsu salang yan zawn, sadi dung ai myitsu salang ni gaw “Hkristu a myit” hpe chye wa hkra anhte hpe karum ya lu ai. Dai hku nna Hkristu a myit mang ai lam hte myit jasat hpe chye na nna kasi la lu ai. (1 Ko 2:16; 1 Pe 2:21) Dai hku galaw ai hku nna shanhte gaw anhte hpe kaja htum kumhpa jaw ma ai.
“Nye A Kandang Hpe Hpai Mu”
6. “Nye a kandang hpe hpai mu” ngu Yesu tsun ai gaw hpa lachyum rai kun?
6 “Nye a kandang hpe hpai mu” ngu Yesu tsun ai gaw “nye a ahkang aya hpe hkap la mu” ngu tsun ai rai na re. Bai, “ngai hte kandang arau hpai nna, Yehowa a magam hpe arau gunhpai ga” ngu nna mung lachyum nga chye ai. Gara mahtang raitim, anhte maga hku nna galaw ra na lachyum re.
7. Mahte 28:18-20 hku nga yang gara magam hpe galaw na matu anhte hpe tsun da ai kun? Hpa hpe kam mai ai kun?
7 Anhte a aprat hpe Yehowa hpang apnawng nna hkalup hkam la ai gaw Yesu a saw shaga ai hpe hkap la ai re. Dai saw shaga ai lam gaw masha yawng a matu re. Karai Kasang hpe myit madung hte nawku mayu ai kadai hpe mung Yesu ningdang kau na n re. (Yhn 6:37, 38) Hkristu hpang hkan nang ai ni gaw, Yesu hpe Yehowa galaw shangun da ai magam lit hpe sha galaw na matu ahkaw ahkang lu da ai. Dai magam lit hpe gun hpai lu hkra Yesu karum ya na re.—Mahte 28:18-20 hpe hti u.
“Nye A Lam Sharin La Mu”
Yesu Galaw Wa Ai Zawn Kaga Ni Hpe Ban Sa Ya U (Laika pang 8-11 hpe yu u) *
8-9. Shagrit shanem ai masha ni hpa majaw Yesu hpang de shaga la hkrum ai kun? Tinang hkum tinang gara ga san ni san ging kun?
8 Shagrit shanem ai masha ni gaw Yesu hpang de shaga la hkrum ai. (Mat 19:13, 14; Luk 7:37, 38) Hpa majaw kun? Yesu hte Hparishe ni a lapran shai ai lam hpe myit yu ga. Hparishe ni gaw tsawra myit n rawng nna gumrawng ma ai. (Mat 12:9-14) Yesu gaw tsawra myit rawng nna shagrit shanem ai. Hparishe ni gaw grai mying kaba mayu nna ahkyak ai masha byin ai hpe arawng la ma ai. Yesu gaw dai zawn myit jasat hpe n ra sharawng ai. Shi a sape ni hpe mung shagrit shanem na matu hte kaga ni a ali ama tai na matu sharin ya ai. (Mat 23:2, 6-11) Hparishe ni gaw masha ni hkrit mat hkra jahkrit shama ai lam ni galaw ma ai. (Yhn 9:13, 22) Yesu gaw tsawra myit hte tsun ai, galaw ai hku nna kaga ni hpe ban sa ya ai.
9 Yesu kaw nna hpa sharin la lu ai kun? Tinang hkum tinang ndai hku san yu u: ‘Ngai gaw si mani nna shagrit shanem ai masha langai re ngu
kaga ni mu mada ai kun? Grit nem ai amu bungli hpe kaga ni a matu sharawng awng let ngai galaw ya mayu ai kun? Kaga ni hpe tsawra myit ngai madun ai kun?’10. Yesu hte bungli arau galaw ai ni gaw hpa hte bung ai kun?
10 Yesu gaw simsa lam nga hkra galaw wa nna, shi a sape ni hpe mung dai hku galaw na matu saw shaga wa ai. Shi gaw shanhte hpe shaman shakyang ya ai hta grai sharawng ai. (Luk 10:1, 19-21) Shi a sape ni a ningmu hpe chye mayu ai majaw shanhte hpe ga san san wa ai. (Mat 16:13-16) Du hkra ladaw yawng kaw nna makawp maga hkrum ai hpun ni gaw galu kaba wa ai zawn, Yesu a sape ni mung galu kaba wa ai. Shanhte gaw Yesu sharin achyin ya ai lam ni hpe atsawm madat nna kaja ai amu amyu myu hpe galaw ai majaw akyu law law lu wa ai.
Manang Byin Mayu Wa Hkra Hku Hkau Mayu Hkra Galaw U
Myit Rawt Nna Shakut Shaja U
Shagrit Shanem Nna Bungli Shakut U *
11. Tinang hkum tinang gara ga san ni san ging ai kun?
11 Nang gaw ahkang aya nga ai wa rai yang, tinang hkum tinang ndai hku san yu u: ‘Bungli (sh) nta hta kaga ni hpe ngai gara hku kanawn mazum nga ai kun? Ngai gaw simsa hkra galaw ai wa rai kun? Kaga ni a ningmu hpe chye hkra ga san san ai kun? Kaga ni a ningmu hpe sharawng awng let madat ya ai kun?’ Anhte ni gaw Hparishe ni hte n bung mayu ga ai. Hparishe ni gaw shanhte hpe ga san san wa yang grai pawt ma ai. Bai kaga ni a ningmu hpe tsun dan wa ai shaloi, shanhte a ningmu hte n bung yang mung, zingri zingrat ai lam ni galaw ma ai.—Mrk 3:1-6; Yhn 9:29-34.
“Nanhte A Myit Masin Ban Sa Ai Hkrum Na Ma Lit Dai”
12-14. Yesu jaw da ai lit gaw hpa majaw ban sa lam jaw ai kun?
12 Yesu anhte hpe jaw da ai magam lit hpe galaw yang hpa majaw ban sa lam lu ai kun? Lam law law nga ai kaw nna nkau hpe hkaja mat wa ga.
13 Anhte hta kaja htum woi awn ai ni nga ai. Yehowa gaw Tsaw Htum Ai Woi Awn Ai Wa rai nna shi gaw chyeju n chye dum ai wa, mazut ai wa n re. Anhte galaw ai lam ni hpe manu shadan ai. (Heb 6:10) Anhte a magam lit ni hpe galaw lu hkra, ra ai n-gun atsam hpe shi jaw ya ai. (2 Ko 4:7; Gal 6:5) Anhte a Hkawhkam Yesu gaw kaja ai kasi ningli madun wa ai. (Yhn 13:15) Sagu rem ni re ai myitsu salang ni gaw “sagu hpung ni a sagu rem wa kaba” re ai Yesu hpe shakut nna kasi la ma ai. (Heb 13:20; 1 Pe 5:2) Shanhte ni gaw anhte hpe lam matsun ya na matu, makawp maga ya na matu tsawra myit, n-gun atsam hte nden marai nga hkra shakut ma ai.
14 Anhte hta kaja htum manang ni nga ai. Tsawra myit rawng ai manang ni, lachyum nga ai bungli ni lu da ai. Ndai hpe myit yu ga: San seng ai akyang lailen ni nga nna, tinang gaw kaga masha ni hta na grau ai ngu n myit la ai ni hte anhte arau bungli galaw lu ai gaw laksan ahkaw ahkang re. Shanhte hta atsam amyu myu nga ai raitim, rai dum ai myit n nga ai sha, kaga ni gaw shanhte hta grau ai ngu hkap la ai. Shanhte gaw anhte hpe magam arau gun ai ni hku sha n-ga, manang ni hku nna mung mu mada ai. Dai zawn tsawra myit ngang kang ai majaw, anhte a matu shanhte a asak hpe pyi sharawng awng let jaw mayu ma ai.
15. Anhte galaw nga ai magam hte seng nna gara hku hkamsha ging ai kun?
15 Anhte hta kaja htum bungli nga ai. Anhte gaw masha ni hpe Yehowa hte seng ai tengman ai lam sharin ya nna Satan a masu hkalem ga ni hpe hpaw tsun dan ai. (Yhn 8:44) Satan gaw masha ni n dang hpai ai lit ni hpe hpai shangun ai. Ga shadawn, anhte a mara ni hpe Yehowa raw ya na n re. Anhte gaw Yehowa a tsawra myit hte n gingdan ai ni re nga nna Satan kam shangun mayu ai. Dai gaw li la ai lit rai nna grai sawng ai masu ga rai a hka! Anhte gaw Yesu hpang sa yang shi anhte a mara ni hpe raw ya na re. Anhte yawng hpe Yehowa grai tsawra ai ngu ai gaw tengman ai lam re. (Rom 8:32, 38, 39) Masha ni a asak aprat rawt jat na matu hte Yehowa hpe kamhpa chye na matu, masha ni hpe karum ya ai lam gaw kabu hpa re.
Yesu A Kandang Npu Hta Ban Sa Ai Lam Matut Tam U
16. Yesu anhte hpe hpai shangun ai lit gaw anhte hpai nga ai kaga lit ni hte gara hku shai ai kun?
16 Yesu anhte hpe hpai shangun ai lit gaw, anhte hpai nga ai kaga lit ni hte n bung ai. Ga shadawn, masha law law gaw kan bau bungli galaw ngut nna, shana maga du wa ai shaloi, grai pu ba ai sha n-ga myit dik lam mung n lu la ma ai. Dai hte n bung ai sha, Yehowa hte Hkristu a magam gun ngut ai hpang hta gaw, anhte ni grai myit dik lam lu la ai. Kan bau bungli galaw ngut ai shana daw ni hta pu ba taw ai majaw, zuphpawng sa na matu n-gun shadat ra ai. Raitim, zuphpawng kaw nna nta de bai wa ai shaloi, ban sa lam hte n-gun lu la ai. Hkaw tsun bungli hte tinang hkrai Chyum Laika hkaja ai lamang hpe n-gun shadat nna galaw ai nga yang, anhte dai zawn hkamsha na re. Anhte n-gun shadat yang grau nna akyu lu la na re.
17. Hpa hpe chye da ra nna hpa hpe sadi ra ai kun?
17 Anhte langai hpra hta n-gun atsam shadawn sharam sha nga ai hpe dum ra ai. Dai majaw, tinang kade daram lu galaw ai hpe atsawm myit ra ai. Ga shadawn, arung arai law law lu na matu shakut ai lam hta n-gun atsam hpe shama kau chye ai. “N htum n wai asak sali wunli lu la hkra, ngai hpa mi galaw na rai ta?” ngu nna san wa ai lu su ai la hpe Yesu tsun wa ai ga hpe yu yu ga. Dai la gaw Tara Ni hpe hkan nang chyalu re. Yesu gaw “shi hpe tsawra wu ai” ngu Marku Laika hta laksan hku nna tsun da ai majaw, dai wa gaw masha kaja mai byin ai. Yesu gaw shi hpe ndai hku saw shaga ai: “Nang wa su, lu malu hte hpe dut kau” nna ‘ngai kaw hkan nang rit.’ Dai wa gaw Yesu hpang hkan nang mayu tim, shi a “arai law law” hpe n kau da lu ai. (Mrk 10:17-22) Kandang hpai na matu shi hpe Yesu saw shaga ai hpe ningdang kau nna, “mungkan a sutgan” hpe matut nna mayam hkam wa ai. (Mat 6:24) Nang rai yang hpa hpe lata na kun?
18. Anhte ayan na hpa galaw ging ai kun? Hpa majaw kun?
18 Anhte a prat hta shawng tawn ai lam ni hte seng nna ayan san jep ra ai. Rai yang she, anhte a n-gun atsam hpe hpaji rawng ai hku akyu jashawn lu na re. Ramma Mak ndai hku tsun ai hpe myit yu ga: “Shaning law law nye a prat hpe asan sha tawn wa ai ngu shadu da ai. Ngai gaw ningshawng galaw let, gumhpraw lu na matu hte prat hpe grau nga manu na matu sha myit nga ai. Nye a prat gaw hpa majaw lit li nga ai kun? nga nna myit hkrup ai. Ngai gaw tinang ra ai hpe sha shawng tam nna, jan ai aten hte n-gun atsam hpe sha, Yehowa hpe jaw wa ai.” Mak gaw shi a myit mang ai lam hte prat masa hpe galai shai kau ai majaw, Yehowa a magam hpe grau nna gun hpai lu wa ai. Shi ndai hku tsun ai: “Kalang lang gumhpraw hte seng nna myit tsang ai. Raitim Yehowa a karum shingtau lam hte Yesu a madi shadaw ya ai lam a majaw dai hpe tawt lai lu wa ai.”
19. Kaja ai ningmu nga na matu hpa majaw ahkyak ai kun?
19 Anhte ndai lam 3 hpe galaw ai nga yang, Yesu a kandang npu hta ban sa ai lam matut lu la na re. Langai, matut nna kaja ai ningmu nga u. Anhte ni gaw Yehowa a magam gun nga ai majaw shi a lam matsun hte maren galaw ra ai. Yehowa gaw Bungli madu rai nna anhte gaw ali ama ni re. (Luk 17:10) Lama na, anhte gaw shi a bungli hpe anhte galaw mayu ai lam hku galaw ai nga yang, tinang hkum tinang yak hkra galaw ai re. Grai n-gun ja ai dumsu ula gaw shi hpe hkang ai wa a hkang ai hku n re ai sha, shi sa mayu ai hku sa na nga yang, shi hkum shi hkra machyi shangun nna n-gun yawm mat na re. Dai zawn n re ai sha, Yehowa a lam matsun hpe hkan sa na nga yang, grai yak ai lam ni hpe galaw lu nna gara mayak mahkak hpe raitim tawt lai lu na re. Yehowa a yaw shada lam hpring tsup wa na lam hpe kadai mung pat shingdang n lu ai hpe dum u.—Rom 8:31; 1 Yh 4:4.
20. Yesu a kandang hpai ai shaloi anhte a myit jasat gaw gara hku byin ging ai kun?
20 Lahkawng, myit madung hte galaw u. Anhte a bandung gaw tsawra myit rawng ai Kawa Yehowa hpe shagrau na matu re. Tsa ban langai hta, lawhpa ai myit, tingkyeng myit ni nga wa ai ni gaw, Yesu a kandang hpai ai hpe n pyaw wa nna kau da ma ai. (Yhn 6:25-27, 51, 60, 66; Hpl 3:18, 19) Shanhte hte n bung ai sha, Karai Kasang hpe tingkyeng akyu n tam ai tsawra myit hte tsawra nna, htingbu wa hpe tsawra ai masha ni mung nga ma ai. Shanhte gaw sumsing lamu hta Hkristu hte arau magam gun na matu myit mada let, mungkan ga hta nga ai shaloi shanhte a prat ting kabu gara let kandang hpe hpai ma ai. Shanhte zawn, Yesu a kandang hpe myit madung hte hpai ai hku nna matut kabu gara lu ai.
21. Mahte 6:31-33 hku nga yang Yehowa hpa galaw ya na hpe anhte myit mada mai ai kun?
21 Masum, jaw ai myit mada lam nga u. Anhte gaw prat hpe sak jaw nna shakut shaja na matu lata wa sai. Dai majaw, anhte zingri zingrat hkrum wa na nga nna Yesu sadi jaw ai. Raitim, mayak mahkak ni hpe hkamjan lu na matu, Yehowa n-gun atsam jaw na hpe anhte myit mada mai ai. Grau nna hkamjan lu magang, n-gun atsam grau nga wa magang re. (Yak 1:2-4) Yehowa gaw anhte ra kadawn ai hpe madi shadaw ya na, Yesu mung anhte hpe lam woi ya nna hpunau nauna ni mung anhte hpe n-gun jaw na lam kam mai ai. (Mahte 6:31-33 hpe hti u; Yhn 10:14, 15; 1 Ht 5:11) Gara mayak mahkak hpe raitim, hkamjan lu na matu ra mara yawng anhte hta nga ai.
22. Anhte hpa lam a majaw chyeju dum mai ai kun?
22 Yesu shamai ya ai num gaw, dai shani jang shamai shatsai hkrum nna ban sa lam lu wa ai. Raitim, shi gaw Hkristu a sadi dung ai sape byin yang she, htani htana ban sa lam lu na re. Shi hpa galaw na ngu nang shadu ai kun? Lama na, shi gaw Yesu a kandang hpe hpai na matu lata yang, sumsing lamu hta Yesu hte arau magam gun lu ai shaman chyeju lu la na re. Yesu hpang hkan na matu shi sak jaw ai lam yawng gaw grai ging dan ai. Anhte a myit mada lam gaw sumsing lamu (sh) ginding aga hta raitim, “ngai kaw wa ma rit” ngu Yesu a saw shaga lam hpe anhte hkap la lu ai gaw grai chyeju dum hpa re.
Mahkawn 13 Hkristu, Anhte A Kasi Ningli
^ စာပိုဒ်၊ 5 Yesu gaw shi hpang sa na matu anhte hpe saw shaga da ai. Shi a saw shaga ai hpe hkap la ai hta hpa ni lawm ai kun? Mahtai hpe ndai sumhpa hta chye lu na re. Hkristu hte arau bungli galaw ai gaw kade daram ban sa lam lu ai hpe mung bai shadum ya na re.
^ စာပိုဒ်၊ 60 SUMLA HPE HTAI DAN AI LAM: Yesu gaw lam amyu myu hku nna kaga ni hpe ban sa ya ai.
^ စာပိုဒ်၊ 66 SUMLA HPE HTAI DAN AI LAM: Yesu zawn, hpunau langai mung lam amyu myu hku nna kaga ni hpe ban sa ya ai lam madun nga.