1. Yehowa hpe anhte hpa majaw npu taw ging ai kun?

YEHOWA gaw Hpan Madu re ai majaw, anhte shi hpe npu taw * ging ai. Shi hpan da ai ni a ntsa tsang madang ni jahkrat lu ai ahkaw ahkang nga ai. (Shr 4:11) Shi a uphkang ai lam gaw kaja htum re ai majaw mung, shi a ga madat ging ai. Masha labau hta uphkang du ni gaw, kaga ni a ntsa shanhte a atsam, ahkang aya hpe madun nna uphkang ma ai. Yehowa gaw shanhte hte n bung ai. Shi gaw hpaji rawng ai, tsawra myit rawng ai, matsan dum myit nga nna, myit tau ya ai Uphkang Madu re.​—⁠Pru 34:6; Rom 16:27; 1 Yh 4:8.

2. Hebre 12:9-11 hku nga yang Yehowa hpe madat mara ging ai gara lam nga ai kun?

² Yehowa gaw anhte shi hpe hkrit ai majaw, madat ai hpe n ra sharawng ai. Tsawra ai Kawa langai hku mu mada ai majaw, ga madat ai hpe sha ra sharawng ai. Yehowa gaw “anhte a akyu matu” sharin ya ai majaw, shi a “npu e anhte mai taw nga ga ai” nga nna Hebre laika hta, Pawlu sanglang dan ai.​—⁠Hebre 12:9-11 hpe hti u.

3. (a) Yehowa hpe npu taw ai lam anhte gara hku madun na kun? (b) Gara ga san ni a mahtai hpe anhte hkaja na kun?

³ Lam yawng mayawng hta Yehowa a ga madat let kaja htum galaw ai hku nna, tinang a nyan hpaji hta n shamyet shanat ai hku nna, Yehowa hpe anhte npu taw ga ai. (Gsh 3:5) Anhte gaw Yehowa a kaja ai atsam ningja ni hpe chye wa ai hte maren, shi hpe madat mara na matu grau loi wa ai. Hpa majaw nga yang shi galaw ai lam yawng hta, dai atsam ningja ni hpe mu lu ai majaw re. (Shk 145:9) Yehowa a lam grau hkaja magang, shi hpe grau  tsawra wa magang re. Yehowa hpe tsawra wa yang, galaw ra na lam, n galaw ra na lam hte seng ai ahkri ahkrai tara ni anhte n ra sai. Yehowa ra sharawng ai hte maren anhte myit mang lu na matu, hkamsha lu na matu hte n kaja ai lam ni hpe koi lu na matu anhte shakut nna sharin la ga ai. (Shk 97:10) Kalang lang, Yehowa a ga madat na matu n loi ai. Dai gaw hpa majaw rai na kun? Myitsu salang ni, kanu kawa ni gaw Munggyi Nehemia, Hkawhkam Dawi hte Yesu a kanu Mari a kasi ningli ni kaw nna hpa sharin la lu ai kun? Dai ga san ni a mahtai hpe ndai sumhpa hta chye lu na re.

4-5. Roma 7:21-23 hku nga yang Yehowa hpe npu taw na matu hpa majaw yak chye ai kun?

⁴ Lam langai hku nna, anhte gaw yubak masha ni rai nna, n hkum tsup ai majaw Yehowa hpe npu taw na matu yak chye ai. Dai majaw, Karai Kasang a ga hpe ayan madat na matu yak ai re. Adam yan Ewa gaw, Karai Kasang hpe gumlau nna hkum pat da ai namsi hpe sha kau ai. Dai gaw shanhte hkrai tsang madang ni jahkrat dat ai hte bung ai. (Nin 3:22) Dai ni aten na masha law malawng mung, Yehowa hpe nyet kau nna, Adam yan Ewa zawn tinang hkrai tsang madang ni jahkrat ma ai.

⁵ Yehowa hpe tsawra nna shi hpe chye chyang ai masha ni pyi, tsep kawp npu taw na matu yak chye ai. Kasa Pawlu dai zawn byin wa ai. (Roma 7:21-23 hpe hti u.) Pawlu zawn, anhte mung Yehowa a man hta jaw ai hpe galaw mayu ga ai. Raitim, shut ai lam hpe galaw mayu ai myit jasat hpe ayan na ninghkap nga ra ai.

6-7. Yehowa hpe npu taw na matu yak chye ai lahkawng ngu na lam gaw hpa rai kun? Ga shadawn tsun dan u.

⁶ Yehowa hpe npu taw na matu yak chye ai lahkawng ngu na lam gaw, anhte nga kaba wa ai htunghking ni a shingkang ka-up hkrum ai majaw re. Shinggyim masha law law a myit mang ai lam gaw Yehowa a myit ra ai lam hte nhtan shai nga ai. Dai majaw, masha law law myit ai hku n myit na matu, anhte ayan na shakut ra ai. Ga shadawn langai hpe myit yu ga.

⁷ Ramma ni gaw gumhpraw law law tam na matu shadut hkrum nga ma ai. Nauna Meri * gaw dai zawn hkrum wa ai. Yehowa a lam garai n sharin shi yang, shi a mungdan na kaja htum dakkasu hta lung wa ai. Masha ni hkungga nna gumhpraw law law lu ai bungli lu na matu Meri hpe shi a nta masha ni shadut ma ai. Shi mung ra sharawng ai. Raitim, Yehowa a lam sharin la nna, tsawra wa ai majaw shi a bandung hpe galai shai kau ai. Shi ndai hku tsun ai: “Kalang lang, gumhpraw law law lu na lam ni hpe ngai mu ai. Raitim, dai gaw Yehowa ra sharawng ai lam galaw ai kaw nna ngai hpe pat shingdang lu ai hpe ngai chye ai. Ngai gaw hpaga galaw ai dinghku hta kaba wa ai majaw, hpaga bungli hpe n galaw na ngu tsun na matu yak nga ai. Yehowa a magam n lu gun hkra pat shingdang ai bungli hpe n hkap la hkrup hkra Yehowa kaw karum hpyi nga ai.”​—⁠Mat 6:24.

8. Ya anhte hpa hpe hkaja na kun?

⁸ Anhte hkaja wa sai hte maren, Yehowa hpe anhte npu taw ging ai. Raitim, ahkang aya lu da ai myitsu salang ni, kanu kawa ni gaw Karai Kasang a lam matsun hpe grau hkan sa na nga yang, kaga ni akyu lu la na re. Yehowa myit ra ai hte maren ahkang aya hpe gara hku akyu jashawn ra na hpe chye lu hkra Chyum Laika kaw nna ga shadawn nkau mi hpe myit yu ga.

9. Nehemia gaw gara chyam dinglik lam hte hkrum wa ai kun?

⁹ Yehowa gaw shi a masha ni hpe yu lanu lahku ra na ahkyak ai lit hpe myitsu salang ni hpe  jaw da ai. (1 Pe 5:2) Yehowa a masha ni hpe Nehemia gara hku kanawn mazum wa ai lam hpe myitsu salang ni myit sawn sumru mai ai. Yuda munggyi Nehemia hta ahkang aya law law nga ai. (Neh 1:11; 2:7, 8; 5:14) Nehemia hkrum wa ai chyam dinglik lam nkau hpe myit yu ga. Yuda masha ni gaw nawku htingnu hpe awu asin di nna, Lewi masha ni hpe madi shadaw ra na Tara hpe n hkan sa ma ai lam shi chye wa ai. Laban nhtoi hte seng ai tara hpe mung tawt lai ma ai. La nkau mung maigan num ni hte hkungran la ma ai. Munggyi Nehemia gaw dai zawn yakhkak ai masa hpe gara hku hparan na kun?​—⁠Neh 13:4-30.

10. Nehemia gaw shi hkrum wa ai chyam dinglik ai lam hpe gara hku bai htang wa ai kun?

¹⁰ Nehemia gaw shi a tsang madang hte maren Karai a masha ni hkan sa na matu, ahkang aya hpe shut ai hku n jailang wa ai. De a malai, Yehowa a lam matsun hpe lu na matu akroi anoi akyu hpyi nna, masha ni hpe Yehowa A Tara sharin ya wa ai. (Neh 1:4-10; 13:1-3) Nehemia gaw shagrit shanem let hpunau ni hte arau bungli galaw wa nna, Yerusalem bunghku bai gawgap na matu pyi karum ya wa ai.​—⁠Neh 4:15.

11. 1 Htesaloni 2:7, 8 hku nga yang myitsu salang ni gaw hpunau nauna ni hpe gara hku kanawn mazum ging ai kun?

¹¹ Myitsu salang ni gaw Nehemia hkrum wa ai manghkang ni hpe hparan ra na n re. Raitim, shi kaw nna law law sharin la lu ai. Ga shadawn, hpunau nauna ni a akyu matu shanhte shakut shaja ma ai. Shanhte hta ahkang aya nga ai majaw, kaga ni hta grau ai ngu nna n myit la ai. De a malai, nawku hpung hpe tsawra myit hte kanawn mazum ai. (1 Htesaloni 2:7, 8 hpe hti u.) Shanhte gaw shagrit shanem nna kaga ni hpe teng sha tsawra ai majaw, tsawra myit hte tsun shaga ai. Mahkrum madup nga ai myitsu salang Andru ndai hku tsun ai: “Hpunau nauna ni hpe myitsu salang ni gaw tsawra myit hte alum ala kanawn mazum yang, atsawm sha bai htang ai hpe ngai mu ai. Dai atsam ningja ni gaw myitsu salang ni hte nawku hpung hpe kahkyin gumdin ya ai.” Myitsu salang galaw ai grai na sai hpunau Toni ndai hku tsun ai: “Hpilipi 2:3 hta mu lu ai hpaji jaw ga hpe hkan sa  nna, kaga ni gaw ngai hta grau ai ngu mu mada na matu ngai shakut ai. Dai gaw nye a ga hpe madat wa hkra masha ni hpe atik anang n shadut na matu karum ya ai.”

12. Myitsu salang ni gaw shagrit shanem na matu hpa majaw ahkyak ai kun?

¹² Myitsu salang ni gaw Yehowa zawn shagrit shanem ra ai. Yehowa gaw ninggawn tawa Awmdawm Uphkang Madu raitim, “shagrit shanem” nna grit nem ai ni hpe ‘nhpu hta na sharawt la ai.’ (Shk 18:35; 113:6, 7) Raitim, Yehowa gaw gumrawng ai ni hte myit tsaw myit dap ai ni hpe nju ndawng ai.​—⁠Gsh 16:5.

13. Myitsu salang ni gaw “tinang a shinglet hpe” hpa majaw hkang ra ai kun?

¹³ Yehowa hpe npu taw ai myitsu salang langai gaw “tinang a shinglet hpe” hkang ra ai. Dai hku n galaw yang, marai langai gaw shi hpe n hkungga ai hku tsun wa ai shaloi, tsawra myit n lawm ai ga ni tsun wa chye ai. (Yak 1:26; Gal 5:14, 15) Myitsu salang Andru ndai hku tsun ai: “Kalang lang, hkungga ai lam n madun ai hpunau nauna langai hpe tsawra myit n lawm ai hku bai htang mayu wa ai. Raitim, Chyum Laika hta lawm ai sadi dung ai masha ni a kasi ningli hpe myit sawn sumru ai. Dai shaloi shagrit shanem nna sumnung shingdi na matu ahkyak ai hpe ngai chye wa ai.” Myitsu salang ni gaw shanhte shada da hte hpawn, nawku hpung hta nga ai ni hte ga shaga ai shaloi, tsawra myit hte si mani let tsun shaga nna, Yehowa hpe npu taw ma ai.​—⁠Kol 4:6.

14. Kawa ni hpe Yehowa hpa lit jaw da ai kun? Shanhte kaw nna hpa myit mada ai kun?

¹⁴ Yehowa gaw kawa ni hpe dinghku a baw hku nna, lit ap da ai. Ma ni hpe sharin achyin lam madun na matu shi myit mada ai. (1 Ko 11:3; Ehp 6:4) Raitim, kawa a ahkang aya gaw shadawn sharam sha rai nna, dinghku yawng hte a npawt daju re ai Yehowa a man hta jahpan dan ra na re. (Ehp 3:14, 15) Kawa ni gaw Karai Kasang ra sharawng ai hte maren, shanhte a ahkang aya hpe akyu jashawn ai hku nna, Yehowa hpe npu taw ai lam madun ma ai. Hkawhkam Dawi a lam hpe hkaja ai hku nna lam law law hpe shanhte sharin la lu ai.

15. Kawa ni myit sawn sumru na matu Hkawhkam Dawi a kasi ningli gaw hpa majaw kaja ai kun?

¹⁵ Yehowa gaw Dawi hpe dinghku a baw sha n-ga, Israela mung ting a baw hku nna lit shatsam da ai. Hkawhkam hku nna, Dawi hta ahkang aya law law nga ai. Kalang lang, shi a ahkang aya hpe shut ai hku lang wa nna mara kaba ni galaw wa ai. (2 Sa 11:14, 15) Raitim, sharin shaga ai hpe hkap la ai hku nna Yehowa hpe npu taw ai lam madun wa ai. Yehowa hpe myit masin mahkra hte akyu hpyi wa ai. Yehowa a sharin shaga ai lam hpe atsawm madat  mara wa ai. (Shk 51:1-4) Bai nna, shi gaw kaja ai hpaji jaw ga ni hpe la ni kaw nna sha n-ga, num ni kaw nna mung shagrit shanem let hkap la wa ai. (1 Sa 19:11, 12; 25:32, 33) Dawi gaw shut ai lam ni kaw nna sharin la wa ai. Shi a prat hpe Yehowa a magam gun ai hta myit maju jung wa ai.

16. Dawi kaw nna kawa ni hpa sharin la lu ai kun?

¹⁶ Hkawhkam Dawi kaw nna kawa ni sharin la mai ai lam nkau hpe myit yu ga. Yehowa nang hpe jaw da ai ahkang aya hpe shut ai hku n mai lang ai. Tinang a mara hpe yin la ra ai. Chyum Laika hta madung tawn ai kaga ni jaw wa na hpaji jaw ga hpe hkap la ra ai. Nang dai hku galaw yang, nta masha ni gaw shagrit shanem myit nga ai nang hpe hkungga wa na re. Dinghku hte arau akyu hpyi ai shaloi hta mung, Yehowa hte seng ai na a hkamsha lam hpe shanhte na hkra hpaw tsun dan u. Yawng hta na, Yehowa a magam gaw ahkyak htum lam re ai hpe madun u. (Trj 6:6-9) Na a kaja ai kasi ningli gaw dinghku hpe nang jaw lu ai kumhpa ni kaw nna manu dan dik htum langai re.

17. Yehowa gaw kanu ni hpe hpa lit jaw da ai kun?

¹⁷ Yehowa gaw kanu ni hpe dinghku hta ahkyak ai lit jaw da ai majaw, kasha ni ntsa ahkang aya loi mi nga ai. (Gsh 6:20) Kanu a galaw ai lam, tsun ai lam ni gaw kasha ni a matu prat tup akyu shabyin ya lu ai. (Gsh 22:6) Yesu a kanu Mari kaw nna kanu ni sharin la lu ai lam ni hpe hkaja yu ga.

18-19. Kanu ni gaw Mari a kasi ningli kaw nna hpa sharin la lu ai kun?

¹⁸ Mari gaw Chyum Laika hpe atsawm chye ai. Yehowa hpe grai hkungga nna, shi hte ngang kang ai hku hkau lam mung nga ai. Yehowa ra sharawng ai hpe galaw yang, shi a prat yawng galai shai mat na masa nga tim, galaw wa ai.​—⁠Luk 1:35-38, 46-55.

¹⁹ Kanu ni gaw Mari hpe lam amyu myu hku nna kasi la mai ai. Gara hku nna kun? Langai, tinang hkrai Chyum Laika hkaja ai lam hte akyu hpyi ai hku nna Yehowa hte hku hkau lam matut kaja hkra galaw ra ai. Lahkawng, Yehowa ra sharawng ai hpe galaw na matu prat hpe sharawng awng let galai shai ra ai. Ga shadawn, masin pawt ja nna mazut ai ga ni tsun ai kanu kawa ni a bau maka ai hpe nang hkrum wa ai rai na re. Rai yang, ma ni hpe dai hku galaw ai gaw yu maya sha re ngu nna myit la chye ai. Raitim, Yehowa a tsang madang ni hpe sharin la ngut ai hpang, ma ni hpe myit galu nna sim sa let sharin ya na matu nang yak chye ai. Laksan hku nna, nang pu ba nga ai shaloi, ma ni ga n madat ai shaloi hta re. (Ehp 4:31) Dai zawn aten ni hta, nang hpe karum ya na matu, Yehowa kaw grau akyu hpyi ra ai. Ma kanu Ledia ndai hku tsun ai: “Kalang lang, ngai akroi anoi akyu hpyi ai. Dai majaw, nye kasha ga n madat  tim pyi ngai masin pawt ai ga ni n tsun hkrup sai. Ga shaga nga ai laman, ga n htum shi yang, chyahkring mi hkring nna Yehowa karum ya na matu myit kaw nna akyu hpyi dat ai. Akyu hpyi ai gaw ngai hpe simsa hkra karum ya ai.”​—⁠Shk 37:5.

20. Kanu nkau mi gaw gara mayak mahkak ni hkrum nga ai kun? Dai hpe gara hku tawt lai lu na kun?

²⁰ Kanu nkau mi gaw kasha ni hpe tsawra ai lam madun na matu yak chye ai. (Tit 2:3, 4) Kanu nkau mi nga yang, shanhte a kanu kawa ni hte hku hkau lam n kaja ai dinghku hta nga kaba wa ai. Nang dai zawn nga kaba wa yang, nang gaw na kanu kawa ni galaw shut wa ai lam hpe bai kahtap nna hkum galaw sanu. Yehowa a myit ra ai hte maren npu taw mayu ai kanu gaw shi a kasha ni hpe tsawra myit madun na re. Tinang a myit jasat, hkamsha lam, galaw ai lam ni hpe galai shai na matu yak gaw yak chye ai. Raitim, dai hpe galaw lu ai. Dinghku mung grau ngwi pyaw wa na re.

21-22. Esaia 65:13, 14 hku nga yang Yehowa hpe madat mara yang hpa akyu ni lu la na kun?

²¹ Yehowa hpe madat mara ai gaw kade daram kaja ai hpe Hkawhkam Dawi chye ai. Shi ndai hku tsun ai: “Yehowa a jep ai tara ding man nga ai rai nna, myit masin hpe kabu shangun ya nga ai. Yehowa htet da ai ga asan apra rai nga nna, shinggan myi sha hpe jahtoi ya nga ai. Na a mayam wa mung, de a majaw myit dum myit hprang nga nna, Dai hte hpe hkan nang ai majaw, akyu kaba lu la nga ai.” (Shk 19:8, 11) Dai ni aten hta, Yehowa hpe npu taw ai ni hte shi a lam matsun hpe n hkap la ai ni a lapran shai ai lam anhte mu lu ai. Yehowa hpe npu taw ai ni gaw myit pyaw ai majaw, “kabu gara ai myit hte mahkawn mangoi na ma ra ai.”​—⁠Esaia 65:13, 14 hpe hti u.

²² Myitsu salang ni, kanu kawa ni gaw Yehowa hpe npu taw ai nga yang, shanhte a aprat gaw rawt jat galu kaba wa na re. Shanhte a dinghku mung ngwi pyaw nna, nawku hpung mung grau kahkyin gumdin wa na re. Yawng hta ahkyak htum gaw shanhte Yehowa a myit shapyaw ya lu ai lam re. (Gsh 27:11) Dai gaw anhte lu da ai kaja dik htum shaman chyeju re.