“Mung daw hkan e matsan mayan ni hpe zingri zingrat nna, adip arip re ai ni gaw tara lam hte ding hpring ai hpe shanut kau ai nang mu hkrup yang, hkum mau et: kaning rai nme law, tsaw htum ai shara hte grau tsaw nga ai wa langai mi yu matsing nga ai rai nna, shanhte hta grau tsaw ai ni mung rai nga ma ai” ngu dai Chyum daw hta tsun da ai.​—Hpj 5:8.

Masha ningmu hku yu yang, dai Chyum daw gaw, masha asuya uphkang du ni hpe tsun nga ai. Raitim, atsawm myit dat na nga yang, anhte hpe shalan shabran ya ai Yehowa hte seng ai tengman ai tara hpe mung madun dan ai.

Matsan mayan ni hpe adip arip di nna, rap ra ai lam n nga ai uphkang madu ni a lam Hpaji Ningli 5:8 hta tsun da ai. Dai uphkang du gaw, shi hta grau kaba ai, ahkang aya grau nga ai marai langai shi hpe yu nga ai lam dum ging ai. Shanhte hta grau kaba ai ni mung nga chye ai. Raitim, shinggyim asuya ni gaw akyang hten za ai. Shanhte a akyang hten za ai lam a majaw, mung masha ni gaw yakhkak hkrum ma ai.

Masa ni kade daram sawng nga tim, shinggyim asuya ni hta grau kaba ai Yehowa yu nga ai hpe chye lu ai gaw n-gun lu hpa re. Karai Kasang hpang anhte karum hpyi mai nna, anhte a lit ni hpe ap da mai ai. (Shk 55:22; Hpl 4:6, 7) “Yehowa gaw, ding hpring ai ni a matu ngang ai shingbyi shara tai na nga, shi a myi mungkan ting hproi hkra mada yu nga ai” hpe anhte chye ai.​—2 Hl 16:9.

Hpaji Ningli 5:8 gaw, shinggyim asuya hta grau kaba ai wa galoi mung nga ai ngu ai tengman ai lam hpe myit dum shangun ai. Yehowa gaw Tsaw Htum Ai Karai, Chyahtum Chyalai N-gun Rawng Ai Karai re ai hpe mung, dai Chyum daw gaw chye shangun ai. Ya nga yang, Yehowa gaw Mungdan Hkawhkam Re Ai Kasha Yesu Hkristu hku nna uphkang nga ai. Yawng mayawng hpe yu nga ai Chyahtum Chyalai N-gun Rawng Ai Karai Kasang mung, Karai A Kasha mung tsep kawp tara rap ra ai lam anhte kam mai ai.