1. Nga hkwi ai marai 4 hpe hpa galaw na matu Yesu saw shaga ai kun? Shanhte gara hku bai htang wa ai?

PETRU, Andre, Yaku hte Yawhan ni gaw, nga hkwi ai hpaga bungli hpe galaw ma ai. “Ngai kaw hkan ma rit; masha hpe hkan hkwi na masha, * ngai nan hpe shatai na ma de ai” ngu Yesu a saw shaga ai lam hpe shanhte na ai shaloi grai mau mat na re. Shanhte a bai htang ai lam hpe Chyum Laika hta ndai hku tsun da ai: ‘Shaloi jang, sumgawn ni hpe kau da nna shi kaw hkan nang ma ai.’ (Mat 4:18-22) Dai gaw shanhte a prat hpe prat tup galai shai mat shangun ai. Nga hkwi ai n re ai sha, “masha hpe hkan hkwi” ai ni byin wa ma ai. (Luk 5:10) Dai ni aten hta mung, tengman ai lam hpe tsawra ai, myit dingman ai ni hpe Yesu saw shaga nga ai. (Mat 28:19, 20) Dai saw shaga ai lam hpe nang hkap la sai kun?

2. Masha hpe hkwi ai ni byin na matu dawdan lam hpe hpa majaw ahkyak shatai ging ai kun? Dai hku galaw lu na matu hpa gaw karum ya lu na kun?

² Nang gaw rawt jat nga ai Chyum ga sharin langai rai yang, kabu gara shiga hkaw tsun ai wa byin na matu dawdan ra na re. Yesu a saw shaga ai lam hpe hkap la na matu htingnut nga ai rai yang pyi, myit hkum daw. Dai dawdan lam gaw, grai ahkyak ai hpe chye ai majaw htingnut nga ai rai na re. Petru hte manang ni gaw, sumgawn hpe kalang ta kau da ai ngu Chyum Laika hta tsun da ai. Raitim, Petru yan nau gaw hpa n myit ai sha, kalang ta dawdan kau ai n re. Lai wa sai shata 6 jan kaw nna Yesu gaw Meshia re ai hpe chye wa nna, hkap la wa ma ai. (Yhn 1:35-42) Nang mung Yehowa hte Yesu a lam hpe sharin la wa nna, wenyi  lam hta matut rawt jat mayu na re. Raitim, garai n dawdan shi yang, atsawm myit yu ra ai. Dawdan lam jahkrat lu hkra, Petru, Andre hte kaga ni hpe hpa gaw karum ya wa ai kun?

3. Yesu a saw shaga ai lam hpe hkap la na matu gara atsam ningja ni gaw shadut ya ai kun?

³ Yesu a dai sape ni hta myit rawt ai lam, machye machyang, nden marai hte tinang hkum tinang hkang lu ai atsam ni nga ai. Masha hpe hkwi ai ni byin na matu, dai atsam ningja ni gaw karum ya wa ai. Nang hta mung dai atsam ningja ni nga lu nna, Hkristu a sape gara hku byin lu ai lam hpe ndai sumhpa hta hkaja mat na re.

4. Petru gaw nga hkwi ai bungli hpe hpa majaw galaw wa ai kun?

⁴ Petru gaw dinghku hpe madi shadaw na matu nga hkwi ai bungli hpe galaw ai. Raitim, nga hkwi ai hpe bungli langai hku nna sha galaw ai n re. Dai bungli hpe shi grai ra sharawng ai. (Yhn 21:3, 9-15) Masha hpe hkwi ai bungli hpe mung ra sharawng wa hkra sharin la ai. Yehowa karum ya ai majaw dai bungli hta shi grai ram ai.​—Kas 2:14, 41.

5. Luka 5:8-11 hku nga yang Petru hpa majaw hkrit ai kun? Dai zawn hkamsha lam ni hpe tawt lai lu hkra anhte hpe hpa gaw karum ya lu ai kun?

⁵ Yehowa hpe tsawra ai majaw anhte hkaw tsun ai. Dai gaw ahkyak htum rai nna, atsam n hpring ai ngu ai hkamsha lam hpe tawt lai lu hkra karum ya lu ai. Masha hpe hkwi ai wa byin na matu, Petru hpe Yesu saw shaga ai shaloi, “hkum hkrit et” ngu nna tsun wa ai. (Luka 5:8-11 hpe hti u.) Petru gaw sape byin wa yang, hpa ni byin wa na hpe n hkrit ai. Raitim, shanhte nga law law lu hkra mauhpa lam hte Yesu galaw ya wa ai hpe mu ai shaloi, grai mau mat ai. Dai majaw, Yesu hte arau bungli galaw na matu, atsam n hpring ai ngu hkamsha ai. Shi zawn nang mung hkrit na re. Hkristu  a sape byin na matu galaw ra ai lam ni hte seng nna, myit tsang nga na re. Yehowa, Yesu hte htingbu ni hpe tsawra ai myit rawt jat wa yang, masha hpe hkwi ai ni byin na matu, Yesu a saw shaga ai lam hpe hkap la mayu wa na re.​—Mat 22:37, 39; Yhn 14:15.

6. Hkaw tsun na matu shadut ya ai gara lam ni naw nga ai kun?

⁶ Hkaw tsun na matu shadut ya ai kaga lam ni hpe bai myit yu ga. ‘Pru sa nna, . . . sape shatai mu’ ngu ai Yesu a lam matsun hpe hkan sa mayu ga ai. (Mat 28:19, 20) Masha ni gaw, “ru tsang hkrum ai hte bra mat wa ai sagu” ni hte bung nna, Mungdan hte seng ai tengman ai lam hpe sharin la ra ai majaw, hkaw tsun mayu ga ai. (Mat 9:36) Yehowa gaw, masha amyu baw shagu hpe tengman ai machye machyang chye shangun mayu nna, hkye la mayu ai.​—1 Tm 2:4.

7. Roma 10:13-15 hku nga yang hkaw tsun bungli gaw grai ahkyak ai hpe gara hku madun nga ai kun?

⁷ Anhte a hkaw tsun bungli gaw masha asak hpe hkye lu ai hpe myit yu na nga yang, hkaw tsun mayu wa na re. Dut na matu (sh) sha na matu nga hkwi ai bungli hpe galaw nga ai ni hte n bung ai sha, anhte gaw masha asak hpe hkye na matu, masha ni hpe hkwi nga ai re.​—Roma 10:13-15, NW hpe hti u; * 1 Tm 4:16.

8-9. Nga hkwi ai wa gaw hpa hpe chye ra ai kun? Hpa majaw kun?

⁸ Yesu aten na Israela nga hkwi ai wa gaw, gara baw nga hpe mai hkwi ai ngu ai hpe chye ra ai. (Jaw 11:9-12) Nga lu rim na shara hpe mung chye ra ai. Nga ni gaw lusha law ai shara hte manu ai shara hta law malawng nga ai. Nga hkwi na matu aten gaw ahkyak ai kun? Nga hkwi na matu kaja htum aten hte seng nna, Pasihpik zunlawng hta nga ai hpunau gaw, sasana hpunau hpe tsun ai ga hpe yu yu ga. Sasana hpunau gaw, ‘hpawt de jahpawt hkying 9 kaw hkrum ga yaw’ ngu tsun ai. Dai shaloi, buga na hpunau gaw ‘nang n chye shi nga ai. Anhte rau ai aten kaw sa ai baw n re. Nga lu ai aten kaw sa ai baw she re’ ngu nna bai tsun ai.

⁹ Tsa ban 1 na masha hpe hkwi ai ni mung, masha ni nga chye ai aten hte shara kaw sa ma ai. Ga shadawn, Yesu hpang hkan ai ni gaw, nawku htingnu, tara jawng ni, nta langai hpang langai hte gat hkan e hkaw tsun ma ai. (Kas 5:42; 17:17; 18:4) Anhte mung hkaw tsun lawk hta nga ai masha ni a lam hpe atsawm chye da ra ai. Masha ni hpe mu lu ai aten hte shara hta hkaw tsun lu na matu, anhte maga hku nna sharawng awng let galai shai ra ai.​—1 Ko 9:19-23.

10. Yehowa a uhpung gaw anhte a matu gara hkingrai ni lajang da ya ai kun?

¹⁰ Nga hkwi ai wa gaw, nga hkwi rai ni hpe atsawm chye lang ra ai. Anhte mung, hkaw tsun bungli a matu htap htuk ai hkingrai ni hpe lang ra ai. Gara hku lang ra na hpe mung chye ra ai. Kabu gara shiga gara hku hkaw tsun ra na lam sape ni hpe Yesu sharin ya ai. Hpa ni la sa ra na, gara kaw hkaw tsun ra na, hpa ni tsun ra na hpe mung sharin ya ai. (Mat 10:5-7; Luk 10:1-11) Dai ni aten, Yehowa a uhpung gaw, hkaw tsun bungli a matu grai kaja ai Sharin Achyin Hkingrai Ni hpe lajang da ya ai. * Atsawm chye lang na matu mung sharin ya ai. Dai gaw hkaw tsun ai shaloi, tinang hkum tinang kam ai myit  nga wa nna, atsawm sharin achyin chye ai ni byin hkra karum ya ai.​—2 Tm 2:15.

11. Masha hpe hkwi ai ni gaw hpa majaw nden marai nga ra ai kun?

¹¹ Nga hkwi ai bungli galaw ai wa gaw, nden marai nga ra ai. Kalang lang, shanhte gaw n myit mada da ai sha nbung laru ni byin chye ai panglai hta shana aten hkan bungli galaw ra ai. Masha hpe hkwi ai ni mung nden marai nga ra ai. Shawng nnan hkaw tsun ai shaloi, tinang gaw Yehowa Sakse byin sai lam tsun dan ai shaloi, “nbung laru” hte bung ai nta masha ni a ninghkap ai lam, manang ni a jahpoi asawng ai lam hte anhte a shiga hpe ninghkap ai ni hte hkrum chye ai. Dai gaw mauhpa n re. Yesu gaw shi hpang hkan ai ni hpe ninghkap ai ni a lapran hta hkaw tsun ra na re ngu sadi jaw ai.​—Mat 10:16.

12. Yawshu 1:7-9 gaw nden marai nga hkra anhte hpe gara hku karum ya ai kun?

¹² Nden marai nga hkra gara hku galaw na kun? Ndai bungli hpe Yesu gaw sumsing lamu kaw nna matut lam matsun ya nga ai hpe kam ra ai. (Yhn 16:33; Shr 14:14-16) Nang hpe lanu lahku ya na ngu ai Yehowa a ga sadi hpe mung kam ra ai. (Mat 6:32-34) Makam masham ngang kang wa yang, nden marai mung grau nga wa na re. Petru hte manang ni gaw, Yesu hpang hkan na matu shanhte a kan bau bungli hpe tawn kau da ai gaw, makam masham nga ai hpe madun nga ai re. Nang mung Yehowa Sakse ni hte Chyum Laika hkaja nga nna, zuphpawng ni lung wa sai lam hpe nta masha ni hte manang ni hpe tsun dan ai  gaw, makam masham nga ai hpe madun ai re. Yehowa a tsang madang ni hte maren asak hkrung mayu ai majaw, na a akyang lailen hte nga sat nga sa ni hpe galai shai wa na re. Dai hku galaw na matu makam masham hte nden marai nga ra ai. Rai yang, “nang sa wa ai lam magup hta na a Karai Kasang Yehowa rau rai nga ai” ngu ai lam hpe kam wa na re.​—Yawshu 1:7-9 hpe hti u.

13. Myit sawn sumru ai hte akyu hpyi ai gaw nden marai nga hkra gara hku karum ya lu ai kun?

¹³ Nden marai nga hkra gara hku naw galaw lu ai kun? Akyu hpyi ai hku nna re. (Kas 4:30, 31) Yehowa gaw na a akyu hpyi ga hpe mahtai jaw nna, galoi mung kabai da na n re. Ayan na madi shadaw ya na re. Lai wa sai aten hta kaga ni hpe Yehowa hkye la wa ai lam ni hpe mung myit sawn sumru mai ai. Na a prat hpe galai shai lu hkra karum ya wa ai lam ni, mayak mahkak ni hpe tawt lai lu hkra karum ya wa ai lam ni hpe mung bai myit yu u. Nawng Hkyeng hka hpe rap lu hkra karum ya wa ai Yehowa gaw, nang hpe mung Hkristu a sape byin wa hkra karum ya lu ai. (Pru 14:13) “Yehowa ngai hte rau rai nga ai: ngai hpa mung n hkrit nga nngai: Masha wa ngai hpe hpa di lu na a ta?” ngu tsun wa ai shakawn kungdawn sara hta nga ai makam masham zawn nang hta mung nga wa na re.​—Shk 118:6.

14. Masai hte Tomoyo a mahkrum madup kaw nna hpa sharin la lu ai kun?

¹⁴ Kaya ai myit nga ai ni hpe nden marai nga hkra Yehowa karum ya wa ai ni kaw nna mung sharin la lu ai. Nauna Masai a mahkrum madup hpe yu yu ga. Shi gaw kaya chye ai majaw, hkaw tsun bungli hpe galoi mung galaw lu na n re ngu hkamsha ai. Tsasam masha ni hpe ga shaga ai gaw, grai tsaw ai bunghku hpe lung taw ai zawn hkamsha ai. Galoi mung hkaw tsun lu na n re ngu shadu ai. Dai majaw, Karai Kasang hte htingbu ni hpe grau tsawra wa hkra shakut ai. Anhte gaw grai ahkyak ai aten hta asak hkrung nga ai ngu myit nna, hkaw tsun mayu ai myit grau nga wa hkra akyu hpyi ai. Hkrit ai myit hpe tawt lai lu wa nna, aten galu ningshawng pyi galaw nga sai. Yehowa gaw hkaw tsun masha nnan ni hpe nden marai nga hkra karum ya lu ai. Nauna Tomoyo a mahkrum madup hpe mung yu yu ga. Nta langai hpang langai shawng nnan sa ai shaloi, shawng nnan hkrum ai nta madu gaw, “ngai Yehowa Sakse ni hte ga n kam shaga ai” ngu marawn nna, chyinghka hpe ahtem la kau ai. Tomoyo gaw manang hpe nden marai rawng let ndai hku tsun ai: “Nang na ai n re i? Ngai ga hkaw mi pyi n tsun shi ai. Ngai Yehowa Sakse re ai hpe shi chye ai. Ngai grai pyaw ai.” Tomoyo gaw ya nga yang, aten galu ningshawng pyi galaw nga sai.

15. Tinang hkum tinang hkang ai ngu ai gaw hpa rai kun? Hkristan ni a matu dai gaw hpa majaw ahkyak ai kun?

¹⁵ Awng dang ai nga hkwi ai wa gaw, tinang hkum tinang hkang lu ai. Tinang hkum tinang hkang ai ngu ai gaw, “galaw ging ai lam hpe galaw lu hkra tinang hkum tinang shalat la ai atsam” hpe tsun mayu ai re. Nga hkwi ai wa gaw, jahpawt jau jau rawt lu na matu, bungli ngut hkra galaw lu na matu hte lamu marang n kaja tim, galaw lu na matu tinang hkum tinang hkang ra ai. Anhte mung, bungli ngut kre ai aten du hkra hkam sharang lu na matu tinang hkum tinang hkang ra ai.​—Mat 10:22.

16. Tinang hkum tinang hkang ai myit hpe gara hku shalat lu na kun?

¹⁶ Tinang hkum tinang hkang lu ai atsam gaw shi hkrai shi nga wa ai n re. Anhte gaw loi dik htum hpe sha grau galaw mayu ai. Kalang marang ahkyak dik htum hpe galaw na matu n loi ai. Dai majaw yak ai lam ni hpe galaw lu hkra, tinang hkum tinang shaman shakyang  ya ra ai. Dai hku galaw lu hkra, Yehowa gaw chyoi pra ai wenyi hte karum ya ai.​—Gal 5:22, 23.

17. 1 Korinhtu 9:25-27 hta kasa Pawlu gaw tinang hkum tinang hkang lu hkra gara hku shakut wa ai kun?

¹⁷ Kasa Pawlu gaw tinang hkum tinang hkang wa ai. Raitim, tengman ai hpe galaw na matu shi hkum shi “htwi kau” ra ai ngu yin la ai. (1 Korinhtu 9:25-27 hpe hti u.) Dai atsam nga lu na matu hte yawng hpe “htap htuk ai hte mai ang ai hku” galaw lu hkra kaga ni hpe n-gun jaw wa ai. (1 Ko 14:40) Anhte mung tinang hkum tinang hkang lu hkra, Yehowa hpe matut nna nawku ra nna, kabu gara shiga hkaw tsun ai hte sharin achyin ai lam hta ayan shang lawm ra ai.​—Kas 2:46.

18. Yehowa mu mada ai awng dang lam gaw hpa rai kun?

¹⁸ Nga hkwi ai ni gaw nga law law lu yang, awng dang ai ngu hkamsha ma ai. Raitim, hkaw tsun bungli gaw dai hte n bung ai. Anhte a awng dang ai lam gaw, marai kade hpe Yehowa Sakse byin hkra karum ya wa sai hta madung n tawn ai. (Luk 8:11-15) Kabu gara shiga hkaw tsun ai hte sharin achyin ya ai bungli hpe matut nna galaw taw na nga yang, Yehowa gaw anhte hpe awng dang ai ngu nna mu mada na re. Hpa majaw kun? Yehowa hte Yesu a ra sharawng ai lam hpe galaw nga ai majaw re.​—Mrk 13:10; Kas 5:28, 29.

19-20. Gara ahkyak ai lam a majaw ya aten hta hkaw tsun ra ai kun?

¹⁹ Mungdan nkau mi hta, masat da ai shata laman kaw sha nga mai hkwi ai. Dai majaw, shanhte dai shata laman kaw grai shakut nna nga hkwi ma ai. Masha hpe hkwi ai anhte ni mung, ndai mungkan a jahtum grai ni sai majaw, hkaw tsun bungli hpe grai shakut nna galaw nga ma ai. Ndai asak hkye ai bungli a matu aten kachyi mi sha nga sai majaw, masa lam kaja ai aten hpe hkum la nga sanu.​—Hpj 11:4.

²⁰ Ya kaw nna, myit rawt ai lam ngang kang hkra, Chyum Laika machye machyang nga hkra, nden marai rawng hkra, tinang hkum tinang hkang lu hkra shakut u. Mungkan ting na kabu gara shiga hkaw tsun ai wan 8 jan hte arau bungli galaw na nga yang, Yehowa jaw na shaman chyeju lu la na re. (Neh 8:10) Hkaw tsun bungli ngut sai ngu Yehowa tsun ai aten du hkra galaw na matu dawdan da ga. Hpang na sumhpa hta, mungdan kabu gara shiga hpe matut hkaw tsun na ngu ai dawdan lam hpe ngang kang hkra, galaw ra ai lam 3 hpe hkaja mat na re.