1-2. Hpaji 11:6 hte Mungdan kabu gara shiga hkaw tsun ai gaw gara hku matut mahkai nga ai kun?

MUNGDAN nkau mi hta masha ni gaw, kabu gara shiga hpe sharawng ai myit hte bai htang ma ai. Dai shiga gaw shanhte myit mada nga ai shiga rai na re. Mungdan nkau mi hta, Karai Kasang (sh) Chyum Laika hpe myit n lawm ma ai. Nang nga ai shara hta gaw gara hku kun? Gara hku mi raitim, Yehowa gaw hkaw tsun bungli ngut sai ngu nna shi tsun ai aten du hkra galaw na hpe ra sharawng ai.

² Yehowa masat da ai aten hta, hkaw tsun bungli gaw ngut mat nna, “jahtum” du wa na re. (Mat 24:14, 36) Dai aten garai n du shi yang, nli n gat ai hkum nga * ngu ai hpe gara hku hkan sa lu na kun?​—Hpaji 11:6 hpe hti u.

3. Ndai sumhpa hta hpa lam ni hpe hkaja na kun?

³ Shawng na sumhpa hta, masha hpe hkwi ai ni byin wa hkra galaw ra ai lam 4 hpe hkaja wa sai. (Mat 4:19) Ndai sumhpa hta gaw, hpa mi hkrum tim, hkaw tsun na ngu ai anhte a dawdan lam hpe shangang shakang ya lu ai lam 3 hpe hkaja mat na re. (1) Myit maju jung na matu, (2) myit galu na matu, (3) makam masham ngang kang nga na matu hpa majaw ahkyak ai hpe mung hkaja mat na re.

4. Yehowa jaw tawn da ai bungli hta hpa majaw myit maju jung ra ai kun?

⁴ Hpang jahtum nhtoi na mabyin masa ni gaw, hkaw tsun  bungli hpe ngut kre hkra galaw ai lam kaw nna myit bra mat shangun chye ai ngu, sape ni hpe Yesu tau hkrau tsun wa ai. “Maja nga” na matu sape ni hpe shi sadi jaw wa ai. (Mat 24:42) Noa shana wa ai shiga hpe myit maju n lu jung hkra dai aten na masha ni hpe hkum pat wa ai lam ni nga wa ai. Dai ni aten hta mung dai hte maren hkrum taw nga ai. (Mat 24:37-39; 2 Pe 2:5) Dai majaw, Yehowa anhte hpe jaw tawn da ai bungli hta myit maju jung mayu ga ai.

5. Kasa 1:6-8 hta hkaw tsun bungli gaw kade daram chyam bra hkra galaw ra na ngu tsun da ai kun?

⁵ Mungdan shiga hkaw tsun ai bungli hpe atsawm myit maju jung ra ai. Dai bungli hpe shi si mat ai hpang, sape ni gaw matut nna galaw nga na, shi galaw wa ai hta na pyi grau galaw lu na re ngu Yesu tau hkrau tsun da ai. (Yhn 14:12) Yesu si mat ai hpang sape nkau mi gaw, nga hkwi ai bungli hpe bai galaw ma ai. Shi bai hkrung rawt wa ai hpang, sape nkau mi hpe nga law law lu hkwi hkra karum ya wa ai. Dai mabyin hpe lakap nna, kaga bungli hpe shakut shaja ai hta na, masha hpe hkwi ai bungli gaw grau ahkyak ai lam hpe tsun dan wa ai. (Yhn 21:15-17) Sumsing lamu de garai n lung shi yang, shi galaw hpang wa ai ndai bungli gaw, Israela mung hta sha n-ga, kaga shara shagu hta mung chyam bra wa na re ngu sape ni hpe tsun wa ai. (Kasa 1:6-8 hpe hti u.) Shaning ni na mat ai hpang, Yesu gaw “Madu a nhtoi” * hte seng nna byin wa na lam ni hpe kasa Yawhan hpe shingran jaw wa ai. Lamu kasa langai gaw, “htani htana a kabu gara shi ga” hpe “amyu baw shagu, baw lakung shagu, ga amyu shagu hte masha mungdan shagu” hpe hkaw tsun nga ai shingran hpe mung Yawhan mu wa ai. (Shr 1:10; 14:6) Bungli ngut kre ai aten du hkra hkaw tsun na hpe Yehowa ra sharawng nga ai.

6. Hkaw tsun bungli hpe gara hku nna matut myit maju jung lu na kun?

⁶ Yehowa karum ya wa ai lam ni hpe myit yu yang, hkaw tsun bungli hpe myit maju jung lu  wa na re. Ga shadawn, laili laika ni hpe laika buk hku, digital hku, nsen rim da ai hku, video lamang hku, intanet TV lamang ni hku nna wenyi malu masha law law hpe lajang da ya ai. Anhte a tara shang website hta, amyu ga 1,000 jan hte mara da ya ai. (Mat 24:45-47) Mungkan masha ni gaw, mung masa, nawku htung hte hpaga lam amyu myu a majaw, dumbru dumbra byin nga tim, wan 8 jan ai Karai a masha ni gaw teng sha zinlum nga ma ai. Ga shadawn, 2019, April 19, Bat Manga Ya shani hta, shani shagu na Chyum daw hpe bawngban da ai video hpe mungkan ting na Yehowa Sakse Ni arau lu yu ai hpe yu yang, zinlum nga ai hpe mu lu ai. Dai shana maga daw hta galaw ai Yesu A Myit Dum Poi hpe marai 20,919,041 lung ai. Dai zawn mauhpa lam ni hpe mu lu nna, dai hta lawm lu ai gaw, Mungdan shiga hpe matut hkaw tsun na matu shadut ya ai.

7. Yesu a kasi ningli gaw myit maju jung nga lu na matu anhte hpe gara hku karum ya ai kun?

⁷ Hkaw tsun bungli hpe myit maju jung lu ai kaga lam langai gaw, Yesu a kasi hpe hkan sa ai hku nna re. Shi gaw hkaw tsun bungli hpe myit bra mat shangun chye ai hpa lam hpe mung ahkang n jaw wa ai. (Yhn 18:37) Satan gaw Yesu hpe “mungkan ga na mungdan nlang hte hte dai ni a arawng sadang” hpe jaw na ngu tsun ai shaloi shi ndang kau ai. Masha ni shi hpe hkawhkam shatai mayu ai shaloi mung n hkap la ai. (Mat 4:8, 9; Yhn 6:15) Arung arai marin ai myit n nga ai sha n-ga, laja lana ninghkap ai lam ni hpe mung n hkrit ai. (Luk 9:58; Yhn 8:59) Anhte mung makam masham chyam dinglik hkrum ai shaloi, kasa Pawlu a hpaji jaw ga hpe myit dum na nga yang, matut myit maju jung lu na re. “Myit daw myit hten asum jaw ai lam” n nga na matu, Yesu a kasi hpe hkan sa u ngu Hkristan ni hpe Pawlu n-gun jaw wa ai.​—Heb 12:3, JCLB.

8. Myit galu ai gaw hpa rai kun? Ya aten hta dai atsam hpa majaw nga ra ai kun?

⁸ Myit galu ai ngu ai gaw masa lam galai shai mat tim, myit asim sha hte la nga ai atsam ningja hpe tsun ai re. N kaja ai lam ni htum mat na matu (sh) kaja ai lam ni byin wa na matu grai na hkra myit mada nga ra ai majaw, anhte myit galu ai atsam nga ra ai. Myihtoi Habaku gaw, Yuda mung na nhkru ai lam ni htum mat na hpe aten na na la wa ai. (Hab 1:2) Yesu a sape ni mung Mungdan gaw “alawan dan pru” wa nna, Roma masha ni a adip arip ai lam kaw nna shanhte hpe hkye la lu na ngu myit mada wa ai. (Luk 19:11) Nhkru ai lam ni hpe yeng seng kau ya na Karai a Mungdan hte ding hpring ai ni mungkan nnan hta nga lu na aten hpe anhte myit mada nga ga ai. (2 Pe 3:13) Raitim, myit galu let Yehowa masat da ai aten du hkra la ra ai. Myit galu na matu Yehowa sharin ya ai lam nkau hpe myit yu ga.

9. Yehowa a myit galu ai lam hpe gara kasi ningli ni gaw madun dan ai kun?

⁹ Yehowa gaw myit galu ai hta kaja htum kasi madun ai wa re. Yehowa gaw Noa hpe “ding hpring ai tara hkaw dan” lu na matu hte sanghpaw gap na matu aten law hkra jaw wa ai. (2 Pe 2:5; 1 Pe 3:20) Sodom hte Gomora hta nga ai nhkru ai masha ni hpe jahten na ngu ai dawdan lam hte seng nna Abraham chyahkring hkring ga san san ai shaloi mung madat ya wa ai. (Nin 18:20-33) Sadi n dung ai Israela masha ni hpe shaning grai na hkra myit galu wa ai. (Neh 9:30, 31) Dai ni aten hta mung, masha yawng “myit kayin wa” nna, shi hpang de du wa lu na matu, aten jaw da ai hpe yu yang, Yehowa myit galu ai hpe mu lu ai. (2 Pe 3:9; Yhn 6:44; 1 Tm 2:3, 4) Yehowa a kasi ningli gaw, hkaw tsun ai hte sharin achyin ya ai lam hta myit galu let shang lawm na matu karum ya ai. Shi gaw Chyum Laika hta mu lu  ai ga shadawn hku nna mung myit galu na matu anhte hpe sharin ya ai.

10. Yaku 5:7, 8 hta lawm ai hkauna galaw ai wa a ga shadawn gaw hpa sharin ya ai kun?

¹⁰ Yaku 5:7, 8 hpe hti u. Hkauna galaw ai ga shadawn gaw, myit galu na matu anhte hpe sharin ya ai. Hpun nkau gaw kaba lawan ai. Raitim, hpun law malawng gaw, namsi si wa na matu, myin wa na matu aten la ra ai. Israela mung hta, nai mam ni kaba wa na matu shata 6 daram aten la ra ai. Hkauna galaw ai wa gaw, nmut ta shang ai hte nai mam hkai nna, lanam htum ai hte dan la ai. (Mrk 4:28) Hkauna galaw ai wa a myit galu ai lam hpe anhte kasi la ra ai. Raitim, dai gaw n loi ai.

11. Hkaw tsun bungli hta myit galu ai lam gaw gara hku karum ya lu ai kun?

¹¹ N hkum tsup ai shinggyim masha ni gaw, tinang shakut ai kaw nna kalang ta akyu lu la mayu ai. Raitim, anhte a hkai n mai ni hpe law law dan la mayu ai nga yang, ga ni hpe bawng ya ra ai, hkai ra ai, tsing magang ya ra nna, hka jaw ya ra ai. Sape shatai ai bungli hpe mung grai shakut nna galaw ra ai. Anhte a Chyum ga sharin ni hpe myiman n lata ai ni byin na matu, tsawra myit nga ai ni byin na matu sharin ya ai shaloi aten la ra ai. Myit galu ai gaw, mayak mahkak ni hkrum wa ai shaloi, myit n daw na matu karum ya ai. Anhte a shiga hpe sharawng ai myit hte madat mayu ai, sharin mayu ai nkau mi hpe pyi matut nna myit galu ra ai. Chyum ga sharin ni makam masham hta rawt jat wa na matu, atik anang n mai shadut ai. Kalang lang, Yesu a sape ni pyi shi sharin achyin ya ai lam ni hpe chye na na matu grai yak ai. (Yhn 14:9) Anhte gaw hkai ai, hka jaw ai ni rai nna, Karai Kasang sha kaba wa shangun ai hpe dum ra ai.​—1 Ko 3:6.

12. Yehowa Sakse n re ai nta masha ni hpe hkaw tsun ai shaloi myit galu ai lam gara hku madun lu na kun?

¹² Yehowa Sakse n re ai anhte a nta masha ni hpe hkaw tsun ai shaloi, myit galu na matu yak chye ai. Hpaji 3:1, 7 hta mu lu ai npawt tara gaw karum ya lu ai. Dai hta ‘atsin sha nga ai aten hte, ga tsun na aten mung nga ai’ ngu  tsun da ai. Anhte a kaja ai akyang lailen gaw, sakse hkam lu ai. Raitim, tengman ai lam hpe tsun dan na matu ahkaw ahkang hpe galoi shagu tam nga ra ai. (1 Pe 3:1, 2) Anhte a nta masha ni hte hpawn, masha yawng hpe myit rawt let hkaw tsun nna, sharin achyin ya ra ai.

13-14. Anhte hkan sa lu ai myit galu ai kasi ningli nkau gaw hpa rai kun?

¹³ Myit galu ai lam madun mai na matu Chyum Laika aten hte dai ni aten na sadi dung ai mayam ni kaw na sharin la lu ai. Habaku gaw nhkru ai lam ni htum mat na hpe ra sharawng ai. Raitim, “ala nga na nngai” ngu nna myit galu let tsun wa ai. (Hab 2:1) Kasa Pawlu mung shi a magam bungli hpe ngut kre hkra galaw mayu ai ngu tsun wa ai. Raitim, myit galu let matut nna, “kabu gara shi ga lam sakse hkam” wa ai.​—Kas 20:24.

¹⁴ Gilat jawng yu nna kaga mungdan de lit ap hkrum ai yan la langai a kasi ningli hpe myit yu ga. Dai mungdan hta Sakse Hkam kachyi mi sha nga nna, law malawng gaw Hkristan ni n rai ma ai. Masha kachyi mi sha Chyum Laika hkaja mayu ma ai. Raitim, kaga mungdan de lit ap hkrum ai shan yan a Gilat jawng yu manang ni gaw, shanhte hta rawt jat nga ai Chyum ga sharin law law nga ai lam tsun dan ai. Shan yan a hkaw tsun lawk hta rawt jat ai lam nau n nga tim, magam bungli hpe matut nna galaw ma ai. Matsat ning na ai hpang she, shanhte a Chyum ga sharin kachyi mi kaw na marai langai hkalup hkam wa ai majaw grai kabu ma ai. Moi aten hte ya aten na kasi ningli ni gaw anhte hpe hpa sharin ya ai kun? Dai sadi dung ai ni gaw, myit n daw ai (sh) nli gat ai hpe n jahkring kau ai majaw, Yehowa gaw shanhte a myit galu ai lam hpe shaman chyeju jaw wa ai. Anhte mung “ga ndat ni a sali wunli hkam la lu ai ni a hkan sharau ai ni tai” nga ga.​—Heb 6:10-12.

15. Matut nna hkaw tsun na ngu ai anhte a dawdan lam hpe shangang shakang ya lu ai lam langai gaw hpa rai kun?

¹⁵ Anhte hkaw tsun nga ai shiga hpe anhte nan kam na nga yang, masha law law hpe hkaw tsun mayu wa na re. Chyum Laika hta mu lu ai Karai a ga sadi ni hpe mung anhte kam ai. (Shk 119:42; Esa 40:8) Dai ni aten hta Chyum Laika myihtoi ga ni hpring tsup nga ai hpe mung mu lu nga ai. Chyum Laika lam matsun ni hpe hkan sa nna, prat hpe galai shai wa ai masha ni hpe mung mu lu nga ai. Masha yawng a matu ahkyak ai shiga gaw Mungdan kabu gara shiga re ai hpe dai madi madun lam ni gaw anhte a makam masham hpe grau shangang shakang ya ai.

16. Shakawn 46:1-3 hku nga yang Yehowa hte Yesu hpe kam ai makam masham gaw hkaw tsun na ngu ai anhte a dawdan lam hpe gara hku shangang shakang ya ai kun?

¹⁶ Anhte hkaw tsun nga ai shiga a npawt gaw Yehowa kaw na re ai lam, Yesu gaw Mungdan a Hkawhkam hku nna uphkang nga sai lam hpe kam ra ai. (Yhn 14:1) Gara masa mi hkrum tim, Yehowa gaw anhte a shingbyi shara hte n-gun atsam jaw ai wa hku nna galoi mung nga nga na re. (Shakawn 46:1-3 hpe hti u.) Yesu gaw Yehowa shi hpe jaw da ai n-gun atsam hte ahkang aya hpe akyu jashawn nna hkaw tsun bungli hpe sumsing lamu kaw na lam matsun ya nga ai hpe mung anhte kam ai.​—Mat 28:18-20.

17. Hpa majaw matut hkaw tsun ra ai hpe ga shadawn langai tsun dan u.

¹⁷ Makam masham gaw anhte a kam ai myit hpe shangang shakang ya ai. Anhte shakut shaja yang, n myit mada ai hku nna Yehowa shaman chyeju jaw na hpe mung kam shangun ai. (Hpj 11:6) Ga shadawn, leng ni hta mara da ai anhte a laili laika ni hpe hkying hku law ai masha ni gaw shani shagu mu taw nga ai. Ndai  hkaw tsun ladat gaw akyu nga ai kun? Nga ai. 2014, November Anhte A Mungdan Magam hta Yehowa Sakse ni a lam hpe ka mayu ai dakkasu jawng ma langai a lam hpe ka da ai. Dai numsha gaw, Nawku Htingnu hpe n mu tam tim, dakkasu wang hta madun da ai laili laika ni hpe tam mu nna, shi ka na sumhpa a matu ra ai lam hpe tam mu wa ai. Hpang hta shi gaw Yehowa Sakse byin wa nna, ya nga yang aten galu ningshawng hku nna magam gun nga sai. Dai mahkrum madup ni gaw, matut hkaw tsun na matu shadut ya ai. Hpa majaw nga yang, Mungdan shiga hpe na la ra ai ni naw nga ai hpe mu lu ai.

18. Mungdan shiga hkaw tsun ai bungli gaw Yehowa masat da ai nhtoi hta ngut mat na hpe anhte hpa majaw kam ai kun?

¹⁸ Mungdan shiga hkaw tsun ai bungli gaw masat da ai aten hta ngut kre mat na hpe anhte kam ai. Noa aten hta byin wa ai lam hpe yu yu ga. Yehowa gaw kaja htum aten hpe masat ai wa re ai hpe sakse madun wa ai. Hka Sha-u garai n ing shi ai shaning 120 daram kaw nna Yehowa gaw byin wa na aten hpe masat da ngut sai. Shaning law law na ai hpang, Yehowa gaw Noa hpe sanghpaw gap na matu tsun ai. Hka Sha-u garai n ing shi ai shaning 40 (sh) 50 daram kaw nna Noa gaw bungli grai shakut ai. Masha ni kadai n madat tim, sanghpaw kata de dusat ni hpe jashawn na matu Yehowa tsun ai aten du hkra, sadi jaw ai shiga hpe shi hkaw tsun wa ai. Masat da ai aten hta “Yehowa gaw chyinghka hpe la kau ai.”​—Nin 6:3; 7:1, 2, 16, NW.

19. Hkaw tsun bungli hpe matut nna galaw na nga yang gara myit mada lam lu la na kun?

¹⁹ Nau n na yang, Yehowa gaw Mungdan shiga hkaw tsun ai hpe shangut kau sana re. Dai hpang, Satan a mungkan hpe jahten kau nna, Karai Kasang hpe madat mara ai ni gaw, mungkan nnan hta nga lu na re. Dai aten du hkra, Noa, Habaku hte nli n gat ai sha n nga wa ai masha ni hpe kasi la nga ga. Hkaw tsun bungli hpe myit maju jung nga ga, myit galu nga ga, Yehowa hte shi a ga sadi ni hpe matut kamsham nga ga.