1. Malahki 3:16 hku nga yang, gara laika hpe Yehowa ka nga ai kun? Hpa ni lawm ai kun?

 LAKSAN laika langai hpe Yehowa ka ai shaning hkying hku na sai. Dai laika hta mying ni lawm ai. Shawng nnan, sadi dung ai sakse Abela a mying kaw na hpang ai. * (Luk 11:50, 51) Shaning ni laman, dai laika hta mying ni Yehowa kahtap nna bai bang nga ai. Ya nga yang, mying wan hku law nga sai. Chyum Laika hta, dai laika hpe, ‘matsing na matu, jahpan laika’ “asak laika,” ngu nna tsun da ai. Ndai sumhpa hta gaw, “asak laika” ngu nna tsun mat na re.​—Malahki 3:16 hpe hti u; Shr 3:5; 17:8.

2. Asak laika hta kadai ni a mying lawm ai kun? Gara lam hku nna anhte a mying lawm lu na kun?

² Yehowa hpe hkrit hkungga ai myit hte nawku ai wa, mying ningsang hpe manu shadan ai ni yawng a mying dai laksan laika hta lawm ai. Shanhte gaw htani htana asak lu na re. Anhte mung, Kasha Yesu Hkristu a shagu hkungga hpe madung tawn nna, Yehowa hte kaja ai hku hkau ai lam nga na matu, shakut na nga yang, mying ka matsing hkrum na re. (Yhn 3:16, 36) Sumsing myit mada lam nga ai raitim, ginding aga myit mada lam nga ai raitim, dai laika hta mying lawm mayu na gaw teng sha re.

3-4. (a) Ya aten hta, asak laika hta mying ka matsing hkrum ai majaw htani htana asak lu la na kun? Sanglang dan u. (b) Ndai sumhpa hte hpang na sumhpa hta hpa lam bawngban na kun?

³ Dai laika hta mying lawm ai ni yawng htani htana asak lu na ngu ai lachyum kun? Pru Mat 32:33 hta Mawshe hpe  tsun ai Yehowa a ga ni hta mahtai lawm ai. “Kadai wa ngai hpe shut yang, nye a laika hta na dai wa hpe ngai arut kau na we ai” ngu Yehowa tsun ai. Dai majaw, hketan hte ka da ai zawn laika hta, ya ka matsing da ai mying ni hpe arut kau mai ai (sh) shaw kau mai ai. (Shr 3:5) Grin mat hkra tsi hte ka matsing na aten du hkra, laika hta tinang a mying nga na matu shakut ra ai.

⁴ Ga san nkau pru wa ai. Ga shadawn, asak laika hta mying ka matsing hkrum ai ni, n hkrum ai ni a lam Chyum Laika hta hpa tsun da ai kun? Dai laika hta, mying ka matsing hkrum ai ni htani htana asak hpe gara aten hta lu na kun? Yehowa a lam chye na ahkang n lu ai sha si mat ai ni gaw gara hku kun? Dai laika hta mying ka matsing hkrum na matu byin mai na kun? Ndai sumhpa hte hpang na sumhpa hta bawngban mat na re.

Asak Laika Hta Kadai Ni Mying Ka Matsing Hkrum Ai Kun?

5-6. (a) Hpilipi 4:3 hku nga yang, asak laika hta kadai ni mying ka matsing hkrum ai kun? (b) Gara aten hta asak laika kaw mying grin mat na kun?

⁵ Asak laika hta, kadai ni mying ka matsing hkrum ai kun? Mahtai lu na matu, hpung 5 a lam hpe hkaja na re. Nkau gaw mying ka matsing ai hpung, nkau gaw n ka matsing hkrum ai hpung re.

⁶ Nambat 1 hpung gaw, sumsing lamu hta, Yesu hte rau uphkang na matu lata hkrum ai ni re. Asak laika hta shanhte a mying nga taw sai kun? Nga taw sai. Hpilipi mare kaw na “shingdep shingtau” ni hpang de kasa Pawlu ka ai laika hku nga yang, Yesu hte rau uphkang na matu, saw shaga hkrum ai namman chya hkam ai ni gaw asak laika hta mying ka matsing hkrum ai. (Hpilipi 4:3 hpe hti u.) Raitim, mying matut nga na  matu matut sadi dung ra ai. Shanhte n si shi yang (sh) ru tsang kaba n hpang shi yang, hpang jahtum dazik shakap ai aten hta, asak laika kaw mying grin mat na re.​—Shr 7:2, 3.

7. Shingran 7:16, 17 hku nga yang, sagu kaga re ai wunawng wuwa kaba gaw gara aten hta asak laika kaw mying grin mat na kun?

⁷ Nambat 2 hpung gaw, sagu kaga re ai wunawng wuwa kaba re. Asak laika hta, shanhte a mying nga taw sai kun? Nga taw sai. Hara Magedon kaw na lawt wa ai hpang hta gaw, mying matut nga taw na kun? Nga taw na re. (Shr 7:14) Sagu zawn re ai masha ni, “n htum n wai” asak lu na ngu Yesu tsun ai. (Mat 25:46) Raitim, Hara Magedon kaw na lawt wa ai ni htani htana asak kalang ta n lu ai. Asak laika hta, shanhte a mying gaw, hketan hte ka matsing da ai majaw, matut nga nga na re. Shaning 1,000 uphkang ai laman, Yesu gaw “shanhte a sagu rem ai wa tai na ra ai rai nna, asak hka hpawk du hkra shanhte hpe lam woi madun na ra ai.” Hpang jahtum hta, Hkristu a ga madat ai ni, Yehowa hpe sadi dung ai ni hku nna tara dawdan hkrum ai ni gaw, asak laika hta shanhte a mying galoi mung grin mat na re.​—Shingran 7:16, 17 hpe hti u.

8. Asak laika hta mying n lawm ai ni gaw kadai ni kun? Shanhte hpa byin mat na kun?

⁸ Nambat 3 hpung gaw Hara Magedon hta, jahten hkrum na bainam zawn re ai masha ni re. Asak laika hta shanhte a mying n lawm ai. “N htum n wai ari de shang wa na ma ra ai” ngu Yesu tsun ai. (Mat 25:46) Shanhte gaw, “htani htana hten nan ai ari ahpri hkrum na ma ra ai” ngu Pawlu mung tsun ai. (2 Ht 1:10; 2 Pe 2:9) Labau hta, chyoi pra ai wenyi hpe dingsang n gawn n sawn galaw ai ni yawng mung, htani htana jahten hkrum na re. Htani htana asak n lu ai. Hkrung rawt ai lam n nga ai. (Mat 12:32; Mrk 3:28, 29; Heb 6:4-6) Mungkan ga hta hkrung rawt wa na hpung lahkawng a lam hpe matut hkaja yu ga.

Hkrung Rawt Wa Na Ni

9. Kasa 24:15 hku nga yang, gara hpung 2 ginding aga kaw hkrung rawt wa na kun? Hpa shai ai kun?

⁹ “Ding man ai ni” hte “n ding n man ai ni” ngu ai ginding aga hta htani htana asak hkrung na matu hkrung rawt wa na hpung lahkawng a lam Chyum Laika hta tsun da ai. (Kasa 24:15 hpe hti u.) “Ding man ai ni” ngu ai gaw, asak hkrung ai laman, Yehowa hpe sadi dung let nawku dawjau wa ai ni re. “N ding n man ai ni” ngu ai gaw, Yehowa hpe sadi dung let n nawku wa ai ni re. Shanhte law malawng a akyang lailen ni gaw n dingman ai. Hpung lahkawng yan hkrung rawt wa na re ai majaw, asak laika hta, shanhte a mying nga ai kun? Mahtai hpe chye na matu, hpung langai hpra a lam hpe bawngban yu ga.

10. “Ding man ai ni” hpa majaw, hkrung rawt wa na kun? Nkau gara ahkaw ahkang lu na kun? (Ginding aga hta hkrung rawt ai hte seng nna, ndai sumhpa hta lawm ai “Laika Hti Ai Ni Hpang Na Ga San” hpe mung yu u.)

¹⁰ Nambat 4 ngu na hpung gaw “Ding man ai ni” re. Shanhte n si shi ai shaloi, asak laika hta, mying ka matsing hkrum da ai. Si mat ai aten hta, asak laika kaw na mying shaprai hkrum ai kun? N re. Yehowa a matsing nyan hta, shanhte asak “hkrung nga ai.” Yehowa gaw, “si nga ai ni a Karai Kasang n rai, hkrung nga ai ni a Karai Kasang she rai nga ai: yawng mayawng hte gaw, shi a man e hkrung nga ma ai.” (Luk 20:38) Dingman ai ni ginding aga de hkrung rawt  wa ai shaloi, asak laika hta, shanhte a mying gaw “hketan” hte ka matsing da ai hte maren nga nga na re. (Luk 14:14) Hkrung rawt wa na nkau gaw, “aga ting a ntsa e, du salang” ni hku nna magam gun na ahkang lu na re.​—Shk 45:16, JCLB.

11. “N ding n man ai ni” asak laika hta mying ka matsing hkrum na matu hpa galaw ra ai kun?

¹¹ Nambat 5 hpung gaw, “N ding n man ai ni” re. Yehowa hpyi shawn ai lam ni hpe n chye ai majaw, dingman ai hku asak n hkrung wa ai ni re. Asak laika hta shanhte a mying n nga taw ai. Raitim, shanhte hpe hkrung rawt ya ai hku nna, asak laika hta, jahpan nga na matu, Karai Kasang ahkaw ahkang jaw na. Dai “n ding n man ai ni” karum shingtau law law ra na re. Nkau gaw n si shi yang, n kaja ai akyang ni galaw wa ai. Dai majaw, Yehowa a dingman ai tsang madang ni hte maren, asak hkrung chye hkra sharin la ra ai. Shanhte hpe sharin ya na matu shinggyin labau hta, kaba dik htum hpaji jaw lamang hpe Karai Mungdan gaw lajang ya na re.

12. (a) N ding n man ai ni hpe kadai ni sharin ya na kun? (b) Sharin ya ai hpe n hkap la ai ni hpa byin mat na kun?

¹² N ding n man ai ni hpe kadai ni sharin ya na kun? Wunawng wuwa kaba hte, bai hkrung rawt wa ai dingman ai ni re. Asak laika hta mying ka matsing hkrum na matu, n ding n man ai ni gaw Yehowa hte hku hkau ai lam nga ra ai. Tinang hkum tinang Karai Kasang kaw ap nawng ra ai. Sharin ya ai hpe n ding n man ai ni gara hku bai htang na hpe, Yesu Hkristu hte namman chya hkam ai ni atsawm yu nga na re. (Shr 20:4) Karum shingtau hpe n hkap la ai ni gaw, asak 100 nga yang pyi, jahten hkrum na re. (Esa 65:20) Masha ni a myit hpe Yehowa hte Yesu mu lu ai. Mungkan nnan hta, jahten sharun na masha kadai hpe mung nga na ahkang jaw na n re.​—Esa 11:9; 60:18; 65:25; Yhn 2:25.

 Asak Hkrung Na Matu Hkrung Rawt Ai, Tara Dawdan Hkrum Na Matu Hkrung Rawt Ai

13-14. (a) Yawhan 5:29 hta lawm ai Yesu a ga ni hpe moi gara hku chye na wa ai kun? (b) Dai ga ni hte seng nna hpa hpe sadi ra ai kun?

¹³ Ginding aga kaw asak hkrung na matu, hkrung rawt wa na ni a lam hpe Yesu ndai hku tsun ai: “Lup ni hta rawng nga ai ni nlang hte gaw shi a nsen na nna, pru lu na ahkying du na ra ai: kaja ai lam hkan galaw ai ni gaw, asak hkrung ai a bai rawt ai de, n shawp ai lam hkan galaw ai ni gaw, tara daw dan hkrum ai a bai rawt ai de, pru lu na ma ra ai.” (Yhn 5:28, 29) Hpa lachyum rai kun?

¹⁴ Hkrung rawt ngut ai hpang galaw ai akyang ni hpe Yesu tsun nga ai. Hkrung rawt wa ai nkau gaw kaja ai akyang galaw na, nkau gaw n kaja ai akyang galaw na ngu moi chye na wa ai. Raitim, lup kaw na pru wa ai ni kaja ai akyang galaw na, n hkru ai akyang galaw na ngu Yesu n tsun ai hpe sadi yu u. Madung Chyum Laika hku nga yang, ‘kaja ai lam hkan galaw wa ai ni’ ‘n shawp ai lam hkan galaw wa ai ni’ ngu tsun nga ai re. Dai majaw, dai akyang ni gaw n si shi yang galaw wa ai akyang ni re. Dai zawn chye na da ai gaw lachyum nga ai n re i? Mungkan nnan hta, kadai mung n kaja ai akyang galaw lu sana n re ai majaw re. N ding n man ai ni gaw, n kaja ai akyang ni hpe, n si shi yang, galaw wa ai rai ra ai. Rai yang, “asak hkrung ai a bai rawt ai de,” “tara daw dan hkrum ai a bai rawt ai de” ngu ai Yesu a ga ni hpe gara hku chye na ra na kun?

15. Kadai ni gaw “asak hkrung ai a bai rawt ai de” hkrung rawt wa na kun? Hpa majaw kun?

¹⁵ N si shi yang, kaja ai akyang galaw wa ai dingman ai ni gaw “asak hkrung ai a bai rawt ai de” hkrung rawt wa na re. Asak laika hta, shanhte a mying nga ngut chyalu re ai majaw re. Yawhan 5:29 hta lawm ai “kaja ai lam hkan galaw ai ni” a hkrung rawt ai lam gaw Kasa 24:15 hta lawm ai “n ding man ai ni” a hkrung rawt ai lam hte maren sha re. Dai chye na ai lam gaw, Roma 6:6 hta tsun da ai lam hte mung hkrak sha re. “Si mat ai wa gaw yubak hta na lawt pru nga ai.” Dingman ai ni si mat ai shaloi, shanhte galaw wa ai mara ni yeng seng hkrum tim, shanhte sadi dung wa ai jahpan gaw matut nga nga ai. (Heb 6:10) Raitim, hkrung rawt ngut ai hpang, asak laika hta, shanhte mying matut nga na matu, matut sadi dung ra ai.

16. “Tara daw dan hkrum ai a bai rawt ai de” hkrung rawt ai ngu ai gaw hpa rai kun?

¹⁶ N si shi ai shaloi, n kaja ai akyang galaw wa ai ni gaw gara hku kun? Si mat ai shaloi, mara raw hkrum sai raitim, shanhte hta sadi dung ai jahpan n nga wa ai. Asak laika hta, shanhte a mying n nga ai. Dai majaw, “n shawp ai lam hkan galaw ai ni” a hkrung rawt ai lam gaw Kasa 24:15 hta lawm ai “ding man ai ni” a hkrung rawt ai lam hte maren sha re. “Tara daw dan hkrum ai a bai rawt ai de” hkrung rawt ai re. * Shanhte hpe Yesu la yu taw na lachyum re. (Luk 22:30) Asak laika hta mying ka matsing hkrum ging ai wa re ai, n re ai hpe dawdan na matu aten ra ai.  Nhkru ai prat hkrun lam hpe kau da nna, Yehowa hpang ap nawng yang she asak laika hta mying ka matsing hkrum na re.

17-18. Ginding aga hta hkrung rawt wa ai ni yawng hpa galaw ra na kun? Shingran 20:12, 13 hta lawm ai “akyang ni” gaw hpa ni rai kun?

¹⁷ Moi aten hta dingman ai wa byin wa ai raitim, n dingman ai wa byin wa ai raitim, hkrung rawt wa ai ni gaw shaning 1,000 laman hpaw da na laika nnan ni kaw na tara ni hpe hkan sa ra ai. “Si mat wa ai ni mung kaji kaba, dai tingnyang a man e tsap nga ma ai hpe, ngai mu nngai; shaloi laika ni hpe hpaw tawn nga ai: asak laika ngu ai laika kaga hpe mung hpaw tawn nga ai: si mat wa sai ni gaw, tinang a arawn alai hte maren, laika ni hta ka da ai hku hkan nna, tara daw dan ai hkrum ma ai” ngu Yawhan shingran mu wa ai.​—Shr 20:12, 13.

¹⁸ Hkrung rawt wa ai ni gaw gara “akyang ni” hte maren, tara dawdan hkrum na kun? N si shi yang galaw wa ai akyang ni hte maren kun? N re. Si ai aten hta yubak kaw na lawt mat sai hpe dum u. Dai majaw, n si shi yang galaw wa ai akyang ni hpe tsun nga ai n mai byin ai. Mungkan nnan hta, shaman shakyang ya na hpe shanhte gara hku bai htang na, hkan sa na hpe tsun ai re. Mungkan nnan hta Noa, Samuela, Dawi, Daniela ni zawn sadi dung ai ni pyi Yesu Hkristu a lam sharin la nna, gawng malai jahpu hpe kamsham ai lam madun na matu ra yang, n dingman ai ni nga yang grau ra na re.

19. Ahkaw ahkang hpe nyet kau ai ni hpa byin mat na kun?

¹⁹ Dai ahkaw ahkang hpe nyet kau ai ni hpa byin mat na kun? “Asak laika hta amying n lawm ai wa kadai mung, dai wan nawng hta jahkrat bang kau ai hkrum nga ai” ngu Shingran 20:15 hta tsun da ai. Dai majaw, shanhte htani htana jahten hkrum na re. Asak laika hta tinang a mying nga nga na matu, matut nga nga na matu kade daram ahkyak ai kun?

20. Shaning 1,000 uphkang ai aten laman, gara myit kahpra hpa lamang nga na kun? (Makawp sumla hpe yu u.)

²⁰ Shaning 1,000 uphkang ai aten gaw, kaja nan myit kahpra hpa aten rai na re. Masha labau hta kaba dik htum hpaji jaw lamang nga na re. Dingman ai ni mung, n dingman ni mung la yu hkrum na aten re. (Esa 26:9; Kas 17:31) Dai hpaji jaw ai lamang gaw gara hku rai na kun? Dai lamang hpe chye na na matu, manu shadan chye na matu, hpang na sumhpa gaw karum ya na re.