Chyum Laika mahtai hpe myit yu ga.

“Ding man ai ni hte n ding n man ai ni a matu, bai hkrung rawt wa na lam nga ai” ngu Kasa 24:15 hta tsun da ai. Ding man ai ni gaw n si shi yang, Karai Kasang hpe madat mara wa ai ni re. Shanhte gaw asak laika hta mying ka matsing hkrum da ai. (Mal 3:16) N ding n man ai ni gaw, Yehowa a lam sharin la na matu, ahkaw ahkang n lu mat ai sha, si mat ai ni re. Shanhte gaw asak laika hta mying n matsing hkrum ai ni re.

Kasa 24:15 hta lawm ai hpung lahkawng hpe sha Yawhan 5:28, 29 hta mung tsun da ai. “Kaja ai lam hkan galaw ai” ni gaw, “asak hkrung ai a bai rawt ai de, n shawp ai lam hkan galaw ai ni gaw, tara daw dan hkrum ai a bai rawt ai de” hkrung rawt wa na ngu Yesu tsun ai. Ding man ai ni gaw, n si shi yang kaja ai amu galaw wa ai. Asak laika hta shanhte a mying ka matsing hkrum ai majaw, asak hkrung na matu hkrung rawt wa na re. N ding man ai ni chyawm gaw, n si shi yang n hkru ai amu galaw wa ai. Tara dawdan hkrum na matu hkrung rawt wa na re. Asak laika hta shanhte mying ka matsing n hkrum shi ai. Naw la yu hkrum na ni re. Dai laman, Yehowa a lam sharin la na matu, asak laika hta mying ka matsing hkrum na matu ahkaw ahkang lu na re.

Shingran 20:12, 13 hku nga yang, hkrung rawt wa ai ni yawng “laika ni hta ka da ai” ga ni, mungkan nnan hta Karai Kasang jaw na tara nnan ni hpe hkan sa ra ai. N hkan sa ai ni yeng seng hkrum na re.​—Esa 65:20.

Daniela 12:2 hku nga yang, nkau gaw “htani htana asak lu Ia nna, nkau mi gaw htani htana kaya kahpa hte arawng hpoi ai hkrum na ma ra ai.” Hkrung rawt wa ai ni gaw, “htani htana asak lu” na kun? “Htani htana kaya kahpa hte arawng hpoi ai hkrum na” kun? ngu ai hpang jahtum tara dawdan ai lam hpe tsun nga ai re. Shaning 1,000 htum ai aten hta, nkau gaw htani htana asak lu na re. Nkau gaw htani htana jahten hkrum na re.​—Shr 20:15; 21:3, 4.

Ga shadawn langai hpe yu yu ga. Hkrung rawt wa na hpung 2 yan gaw, kaga mungdan hta nga mayu ai maigan masha ni hte bung ai. Ding man ai ni gaw, bungli bisa (sh) nga na bisa lu da ai majaw, hkap la hkrum nna, wanglu wanglang ram daw hkawm sa lu ai ni hte bung ai. N ding n man ai ni gaw, chyahkring chyahkra nga na bisa (sh) bu hkawm bisa lu da ai maigan masha ni hte bung ai. Maigan masha ni gaw, mungdan nnan hta matut nga mayu yang, nga ging ai ni re ai lam sakse madun ra ai. Dai zawn sha, hkrung rawt wa ai n ding n man ai ni gaw, Yehowa a tara ni hpe hkan sa ra ai. Hparadisu hta matut nga ging ai dingman ai masha re ai hpe shanhte sakse madun ra ai. Gara bisa hte mi raitim, mungdan nnan de shang wa ai ni kaw na nkau gaw, hpang hta, mung masha hku nna hkap la hkrum na re. Nkau gaw, mungdan kaw na gau kau hkrum na re. Mungdan nnan hta madun ai shanhte a myit jasat, nga sat nga sa ni hpe yu nna, dawdan hkrum na re. Mungkan nnan hta hkrung rawt wa ai ni yawng mung, sadi dung ai lam, nga sat nga sa lam ni hpe yu nna dawdan hkrum na re.

Yehowa gaw, tsawra myit nga ai Karai re ai sha n-ga, tara rap ra ai Karai mung re. (Trj 32:4; Shk 33:5) Ding man ai ni hpe mung, n ding n man ai ni hpe mung hkrung rawt ya ai hku nna tsawra myit madun na re. Raitim, akyang lailen hte seng ai Shi a tsang madang ni hpe mung matut jahkrat da na re. Shi hpe tsawra ai ni, Shi a tsang madang hte maren asak hkrung ai ni hpe sha, mungkan nnan hta matut nga na ahkang jaw na re.