“Hpang chyahtum e, ngai nhtoi n gu ai ma zawn re ai wa kaw mung, shi paw pru dan ni ai” ngu 1 Korinhtu 15:8 hta Pawlu tsun ai. Sumsing lamu de hkrung rawt mat sai Yesu hpe shingran hta mu wa ai shaloi na mahkrum madup hpe tsun nga ai ngu moi sanglang dan wa ai. Wenyi hkum hte hkrung rawt ai lam gaw, htawm hpang tsa ban shaning grai na yang she nnan hpang na raitim, dai mabyin a majaw Pawlu gaw aten jau jau shangai na ahkang (sh) hkrung rawt na ahkang lu la kau ai zawn ngu sanglang dan wa ai. Raitim, dai Chyum daw hpe kahtap nna hkaja ai shaloi, chye na ai lam hpe galai shai na matu ra wa ai.

Tinang hpung galai shang wa ai shaloi na mabyin hpe Pawlu tsun nga ai gaw teng ai. Raitim, “nhtoi n gu ai ma” ngu tsun ai gaw hpa lachyum rai kun? Byin mai ai lam grai law hkra nga ai.

Pawlu a galai shai ai lam gaw akajawng sha re. Mauhpa re. Nhtoi n gu ai sha shangai ai gaw akajawng sha byin chye ai. (Hpang hta Pawlu ngu chye wa ai) Shawlu gaw, Damasku mare na Hkristan ni hpe zingri na matu bu hkawm wa ai. Hkrung rawt mat sai Yesu hpe shingran hta mu na ngu n myit mada da ai. Pawlu a galai shai ai lam gaw, shi a matu sha n ga, dai mare na shi zingri na Hkristan ni a matu mung n myit mada da ai lam re. Dai sha n ga, dai mabyin ni a majaw, grai mau mat nna Pawlu chyahkring mi myi n mu mat ai.​—Kas 9:1-9, 17-19.

Pawlu gaw “aten n du shi yang” galai shai wa ai. “Nhtoi n gu ai ma” ngu ai madung Grik ga si hpe “aten n du shi yang shangai wa ai wa” ngu nna mung ga gale mai ai. “Kadai mung n myit mada da ai aten hta shangai wa ai wa” ngu Jerusalem Chyum Laika hta tsun da ai. Pawlu galai shai wa ai aten hta, Yesu gaw sumsing lamu de du taw sai. Shawng na daw kaji ni hta, Pawlu tsun wa ai ni gaw, hkrung rawt mat sai Yesu hpe sumsing lamu garai n lung shi yang mu lu dat ai. Pawlu gaw n mu dat ai. (1 Ko 15:4-8) Raitim, n myit mada ai sha, Yesu hkum shadan dan ai majaw, Pawlu gaw hkrung rawt mat sai Yesu hpe “aten n du shi yang” mu dat ai.

Pawlu gaw shi a lam hpe shagrit shanem let tsun nga ai re. Chyum hpaji du nkau tsun ai hku nga yang, Pawlu gaw shi a lam hpe grai grit nem ai hku tsun nga ai, kasa pyi n byin ging ai ngu yin la taw ai re. “Kasa ni hta kaji htum ai wa ngai rai nga nngai; Karai Kasang a Hpung hpe zingri zingrat nngai majaw, kasa ngu na pyi ngai n ging n dan nngai. Rai ti mung, ngai rai nga nngai hte maren, Karai Kasang a chyeju majaw ngai rai nga nngai” ngu nna Pawlu matut tsun ai majaw re.​—1 Ko 15:9, 10.

Dai majaw, n myit mada da ai lam hte Yesu akajawng sha hkum shadan dan ai, n myit mada da ai aten hta shi galai shai wa ai, dai zawn shingran mu na ahkang n lu ging ai sha lu dat ai hpe Pawlu tsun mayu ai mai byin ai. Hpa mi raitim, dai mahkrum madup hpe Pawlu manu shadan ai. Yesu si ai kaw na hkrung rawt sai hpe tsep kawp kam mat ai. Yesu a hkrung rawt ai lam kaga ni hpe hkaw tsun ai shaloi, ndai mahkrum madup hpe chyahkring hkring tsun shalawm ai.​—Kas 22:6-11; 26:13-18.