1-2. Hkalup hkam ngut ai hpang hpa shaman chyeju ni lu ai kun?

 HKALUP hkam ai shaloi, Karai a nta masha byin wa ai majaw anhte grai kabu ai. Yehowa hte dai zawn hku hkau lam nga ai gaw, laksan ahkaw ahkang re. Shakawn kungdawn sara Dawi tsun ai zawn, “na a wing hta e, nang hte ani sha nga lu hkra, Nang [Yehowa] san da ai wa gaw, a nga ai.”—Shk 65:4.

² Yehowa gaw, shi a wing de masha shagu hpe n lau la ai. Shawng na sumhpa hta chye wa sai hte maren, shi hte hku hkau mayu ai lam madun ai ni hpe sha lau la ai re. (Yak 4:8) Apnawng nna hkalup hkam ai shaloi, nang hte Yehowa gaw laksan hku nna hku hkau wa ai. Hkalup hkam ngut ai hpang, Yehowa gaw “n dang hkap la lu hkra, . . . shaman ai chyeju ru bun na.”—Mal 3:10; Yer 17:7, 8.

3. Apnawng nna hkalup hkam da ai Hkristan ni hta gara ahkyak ai lit nga ai kun? (Hpaji 5:4, 5)

³ Hkalup hkam ai gaw, nnan hpang ai sha naw re. Apnawng ga sadi grin na matu, Yehowa hpe sadi dung na matu, matut shakut mayu na re. Laksan hku nna, mayak mahkak ni, chyam dinglik ai lam ni hkrum ai aten hta re. (Hpaji 5:4, 5 hpe hti u.) Yesu a sape langai hku nna shi hpe kasi la ra ai. Shi htet da ai ga ni hpe htep lahti hkan sa ra ai. (Mat 28:19, 20; 1 Pe 2:21) Dai zawn hkan sa lu hkra, ndai sumhpa gaw karum ya na re.

 MAYAK MAHKAK NI, CHYAM DINGLIK AI LAM NI NGA TIM, YESU A HPANG MATUT “HKAN NANG” U

4. Yesu hpang hkan ai ni “wudang” hpai ra na ngu ai gaw hpa hpe tsun mayu ai kun? (Luka 9:23)

⁴ Hkalup hkam dat ai majaw, prat hta manghkang ni n nga mat ai n re. Shi hpang hkan ai ni “wudang” hpai ra na ngu Yesu asan sha tsun da ai. “Shani shagu” pyi hpai ra na re. (Luka 9:23 hpe hti u.) Aten tup jamjau hkrum na ngu tsun mayu ai kun? N re. Hkalup hkam ai majaw, shaman chyeju ni lu ai zawn, mayak mahkak ni mung hkrum chye ai ngu tsun mayu ai re. Mayak mahkak nkau gaw, grai hkamsha yak ai.—2 Tm 3:12.

5. Sak jaw wa ai ni hpe hpa shaman chyeju jaw na ngu Yesu ga sadi jaw ai kun?

⁵ Nang gaw nta masha ni a ninghkap ai hpe hkrum wa ai, Karai a Mungdan hpe shawng tawn ai majaw, ja gumhpraw arung arai ni kau da wa ai rai na re. (Mat 6:33) Na a sak jaw ai lam yawng hpe Yehowa chye ai. (Heb 6:10) “Nye a matu mara hte, dai kabu gara shi ga a matu mara, nta, kahpu kanau, kajan, kanu kawa, kashu kasha hte yi hkauna hte hpe kau da ai wa kadai rai ti mung, zingri zingrat hkrum ai hte hpawn, ndai aprat hta e nta, kahpu kanau, kajan, kanu, kashu kasha hte yi hkauna hte hpe htam latsa dang, n lu la na wa, n nga ai: htawm hpang prat e gaw n htum n wai asak lu la na ra ai” ngu ai Yesu a ga jaw ai hpe, nang nan hkrum wa na re. (Mrk 10:29, 30) Kau da wa ai ni hta na lu wa ai shaman chyeju ni gaw grau law ai n re i?—Shk 37:4.

6. Hkalup hkam ngut ai hpang hta pyi, “hkum shan kayut ai lam” hpe hpa majaw matut gasat nga ra ai kun?

⁶ Hkalup hkam ngut ai hpang hta pyi, “hkum shan kayut ai lam” hpe matut ninghkap ra ai. (1 Yh 2:16) N hkum tsup ai shinggyim masha ni naw rai nga ai majaw re. Kalang lang, nang mung kasa Pawlu zawn hkamsha chye ai. Shi ndai hku tsun ai: “Nye kraw lawang myit hte Karai Kasang a tara hta e ngai kabu gara nga nngai; rai ti mung, nye a daw shan ni hta e tara kaga gaw, nye myit mang hta rawng ai tara hte gasat hkat nga ai rai nna, nye daw shan ni hta e rawng ai yubak a tara hta e ngai hpe bawng dung shangun nngai, ngai mu ni ai.” (Rom 7:22, 23) Hkum shan ra marin ai myit hpe gasat nga ra ai majaw, myit daw wa chye ai. Raitim, apnawng ga sadi jaw wa ai aten hpe myit sawn sumru ai gaw, chyam dinglik ai lam ni hpe gasat na ngu ai dawdan lam hpe grau ngang kang shangun ai. Gaja nga yang, apnawng ga sadi gaw, chyam dinglik hkrum ai shaloi karum ya lu na re. Gara hku nna kun?

7. Yehowa kaw apnawng ai gaw shi hpe matut sadi dung na matu gara hku karum ya ai kun?

⁷ Yehowa kaw apnawng ai gaw, tinang hkum hpe nyet kau ai re. Yehowa n ra sharawng ai hkum shan ra marin ai lam ni, bandung ni hpe nyet kau na matu dawdan ai hpe tsun mayu ai re. (Mat 16:24) Rai yang, chyam dinglik ai lam ni, mayak mahkak ni hkrum ai shaloi, hpa galaw ra na hpe aten la nna n myit ra sai. Yehowa hpe sadi dung na matu, shi ra sharawng ai hpe galaw na matu, dawdan da ngut chyalu byin nga na. Grai sawng ai chyam dinglik ai lam ni hkrum tim pyi, “nye myit tsup ai hpe ngai nyet kau na n rai” ngu tsun ai Yoba zawn sadi dung lu na re.—Yob 27:5.

8. Apnawng ga sadi hpe bai myit yu ai gaw chyam dinglik ai lam ni hpe ninghkap na matu gara hku karum ya lu ai kun?

⁸ Apnawng ga sadi hpe bai myit yu ai gaw, chyam dinglik ai lam ni hpe ninghkap na matu n-gun lu shangun ai. Ga shadawn, dinghku nga ai marai langai ngai hte sawse lawklek na kun? Dai zawn galoi n galaw na ngu Karai Kasang hpe ga sadi jaw ngut chyalu re. “Tara n lang ai ni a lam” hpe “koi kau” na re. (Gsh 4: 14, 15) Nnan kaw nna, n htap htuk ai ra marin ai lam ni hpe ru jung na ahkang n jaw da yang, hpang she ru hte nawng baw kau ra ai baw byin sana n re.

9. Apnawng ga sadi hpe bai myit yu ai gaw, nawku dawjau lam hpe shawng tawn na matu gara hku karum ya lu ai kun?

⁹ Zuphpawng ayan lung na matu yak shangun ai bungli lu wa yang gara hku galaw na kun? Bungli garai n lu shi ai aten kaw na, dai zawn bungli hpe nyet kau na ngu dawdan da ngut chyalu re. Rai yang, zuphpawng ayan n lu lung na bungli re ai hpe chye nga ninglen, hkap la ngut yang she, zuphpawng ayan lu lung hkra bai shakut ra ai baw n byin sai. Kawa myit pyaw hkra galaw na matu dawdan da ai Yesu a kasi ningli hpe myit yu ai mung, karum shingtau lam lu shangun ai. Yesu zawn, tinang apnawng da ai Kawa n ra sharawng na lam yawng hpe nyet kau na matu dawdan da u.—Mat 4:10; Yhn 8:29.

10. Hkalup hkam ngut ai hpang Yesu kaw matut “hkan nang” lu hkra Yehowa gara hku karum ya na kun?

¹⁰ Mayak mahkak ni, chyam dinglik ai lam ni gaw, Yesu hpang matut “hkan nang” mayu ai lam sakse madun na matu ahkaw ahkang re. Yesu hpang matut hkan nang lu hkra Yehowa karum ya na re. “Karai Kasang mung sadi sahka nga ai rai nna, nanhte n jan lu ai agung alau hkrum na ahkang n jaw nga ai sha, nanhte jan lu myit ga, dai agung alau hte rau pru wa na hkat shi hkat da na ru ai.”—1 Ko 10:13.

YESU A HPANG MATUT HKAN NANG LU AI LAM

11. Yesu a hpang matut hkan nga ai lam madun lu ai kaja htum ladat gaw hpa rai kun? (Sumla hpe mung yu u.)

¹¹ Yehowa ra sharawng ai hpe myit masin mahkra hte Yesu galaw ai. Akyu hpyi nna Yehowa hte matut hku hkau hkra galaw ai. (Luk 6:12) Dai majaw, anhte mung hkalup hkam ngut ai hpang, Yehowa hte hku hkau shangun  ai lam ni hpe matut galaw ra ai. Dai gaw, Yesu a hpang matut hkan nang lu ai kaja htum lam langai re. “Ya dep madep hte hte maren, dai arawn alai hta anhte hkawm nga ga” ngu Chyum Laika hta tsun da ai. (Hpl 3:16) Karai a magam hta grau shang lawm na matu dawdan da ai hpunau nauna ni a mahkrum madup ni hpe na ga na re. Shanhte gaw, Kabu Gara Shiga Hkaw Tsun Ai Ni A Matu Jawng lung ai (sh) grau ra ai shara de htawt ai rai na re. Nang mung, mai byin yang, bandung tawn mai ai. Yehowa a masha ni gaw, shi a magam grau gun lu na ladat ni hpe tam ai. (Kas 16:9) Raitim, nang n lu galaw shi ai nga yang gaw taw? Myit hkum kaji. Hkamjan lu ai atsam gaw ahkyak htum re. (Mat 10:22) Yesu a hpang matut hkan nga ai lam madun ai re. Tinang a masa, galaw lu ai atsam hte maren galaw ai shaloi, Karai ra sharawng ai.—Shk 26:1.

12-13. Na a myit rawt ai lam yawm wa yang hpa galaw lu ai kun? (1 Korinhtu 9:16, 17) (“ Gat Shingjawng Poi Hta Matut Gat U” ngu ai lawk hpe mung yu u.)

¹² Hkalup hkam ngut ai hpang, moi na zawn myit rawt let akyu n hpyi sai, hkaw tsun magam hta n pyaw sai, Chyum Laika hti ai lam n sharawng sai nga yang gara hku kun? Nang dai zawn hkamsha ai rai yang, chyoi pra ai wenyi n lu mat sai ngu hkum sawn la. N hkum tsup ai ni re ai majaw, dai zawn hkamsha lam ni pru wa chye ai. Myit rawt ai lam yawm wa yang, kasa Pawlu a lam hpe myit yu u. Yesu hpe kasi la ai raitim, galaw ging ai hpe galaw na matu myit n lawm ai aten ni nga chye ai lam Pawlu chye ai. (1 Korinhtu 9:16, 17 hpe hti u.) Shi ndai hku tsun ai: “Nye a myit hte n galaw nga n yang gaw, kunhting aya hta san da ai sha rai nga nngai.” Pawlu hta gara zawn hkamsha lam mi nga ai raitim, shi lu ai magam lit hpe ngut hkra galaw na matu dawdan da ai lachyum re.

 ¹³ Nang mung, hkamsha lam hta madung nna dawdan lam ni hkum jahkrat. Myit hkamsha lam gara hku mi rai nga tim, jaw ai hpe galaw na matu dawdan da u. Galaw ra ai hpe matut galaw yang, myit hkamsha lam kaja wa chye ai. Chyum Laika hkaja ai, akyu hpyi ai, zuphpawng lung ai, hkaw tsun ai ni hpe matut galaw u. Dai gaw Yesu a hpang matut hkan nga ai lam madun ai re. Na a hkamjan ai atsam hpe mu ai shaloi, hpunau nauna ni n-gun lu la na re.—1 Ht 5:11.

“CHYAM YU MU . . . DINGLIK YU MU”

14. Tinang hkum tinang ayan gara hku dinglik yu ra ai kun? Hpa majaw kun? (2 Korinhtu 13:5)

¹⁴ Hkalup hkam ngut yang mung, tinang hkum tinang ayan dinglik yu nga na matu ahkyak ai. (2 Korinhtu 13:5 hpe hti u.) Shani shagu akyu hpyi ai, Chyum Laika hti ai, hkaja ai lam ni galaw ai kun? Zuphpawng hte hkaw tsun bungli hta ayan shang lawm nga ai kun? ngu chyahkring hkring dinglik yu u. Dai lam ni kaw na akyu grau lu shangun ai lam ni hpe tam u. Ga shadawn, tinang hkum tinang san yu u: ‘Kaga masha ni hpe Chyum Laika madung sharin achyin ya ai lam ni ngai lu sanglang dan ai kun? Hkaw tsun bungli hta grau pyaw shangun na lam ni nga ai kun? Ga baw dat nna akyu hpyi ai kun? Akyu hpyi ai lam ni gaw, Yehowa hpe tsep kawp kamhpa ai lam madun ai kun? Zuphpawng ni hpe ayan lung ai kun? Zuphpawng hta grau myit maju jung na matu, grau shang lawm na matu hpa galaw mai ai kun?’

15-16. Gunglau ai lam hpe ninghkap ai hte seng nna hpunau Robat a mahkrum madup kaw na hpa chye lu ai kun?

¹⁵ Tinang a gawng kya lam hpe chye na matu mung grai ahkyak ai. Hpunau Robat a mahkrum madup hpe yu yu u. “Ngai asak 20 ning hta, aten kadun bungli langai galaw ai. Lani mi hta, bungli yu ai shaloi, nta de hkan wa na matu, bungli manang numsha langai shaga ai. An lahkawng sha re. ‘Grai hkrak ai aten’ re ngu tsun ai. Nnan hta ngai n hkan sai ngu nna gaw tsun ai. Raitim, atsawm n lu dawdan taw ai. Hpang jahtum, n hkan sai ngu asan sha tsun nna, hpa majaw n hkan ai lam sanglang dan ai” ngu Robat tsun ai. Robat gaw, gunglau ai lam hpe ninghkap lu wa ai. Dai gaw shakawn hpa re. Raitim, hpang de dai mabyin hpe bai myit yu ai shaloi, dai hta grau kaja ai hku bai htang wa ging ai ngu hkamsha ai. “Hputihpa a madu jan hpe Yosep nyet kau ai zawn, kalang ta ngai n nyet kau lu wa ai. (Nin 39:7-9) Gunglau ai lam hpe nyet kau na matu, dai daram yak ai lam dai shaloi she ngai chye mat ai. Karai Kasang hte hku hkau lam ngang hkra galaw ra ai hpe dai aten hta chye wa ai” ngu shi tsun ai.

 ¹⁶ Nang mung, Robat zawn tinang hkum tinang dinglik yu ai lam kaw na akyu lu hkra galaw mai ai. Gunglau ai lam hpe nyet kau lu wa ai rai yang pyi, nyet kau na matu aten kade daram la ra wa ai hpe myit yu u. Rawt jat ra ai lam ni nga yang, myit hkum daw. Tinang a gawng kya ai lam hpe chye lu ai majaw kabu u. Gawng kya lam hpe Yehowa kaw akyu hpyi tsun dan u. Karai a tsang madang hte maren asak hkrung na ngu ai dawdan lam ngang kang shangun na lam ni hpe galaw u.—Shk 139:23, 24.

17. Robat a mahkrum madup hta, Yehowa a mying gara hku lawm nga ai kun?

¹⁷ Robat a mahkrum madup kaw na sharin la lu ai lam langai naw nga ai. “Ngai nyet kau dat ai shaloi, ‘Nang hpe ndai zawn chyam yu n mai ai she rai nga’ ngu bungli manang numsha tsun ai. Hpa tsun mayu ai kun? ngu ngai san ai. Shi manang lasha langai gaw, moi de Yehowa Sakse re. Sakse Hkam ramma yawng gaw, shawng hta myu mi, shingdu hta myu mi galaw chye ai ni hkrai re. Ahkaw ahkang lu yang, la na ni hkrai re ngu tsun da ai. Dai majaw, shi tsun ai jaw, n jaw chye hkra ngai hpe chyam yu ai. Yehowa a mying shagrau hkrum hkra galaw lu ai majaw pyaw ai” ngu Robat tsun ai.

18. Hkalup hkam ngut ai hpang hpa galaw na matu dawdan da ra ai kun? (“ Ra Sharawng Na Sumhpa Lahkawng” ngu ai lawk hpe mung yu u.)

¹⁸ Yehowa kaw tinang hkum tinang apnawng nna hkalup hkam ai gaw, gara zawn masa mi hkrum tim, Karai a mying san seng chyoi pra hkra galaw mayu ai lam madun ai re. Gara zawn chyam dinglik lam ni, mayak mahkak ni nang hkrum nga ai hpe Yehowa chye ai. Matut sadi dung na matu nang shakut ai hpe shaman chyeju jaw na re. Sadi dung lu hkra shi a chyoi pra ai wenyi jaw na hpe kam mai ai. (Luk 11:11-13) Yehowa a karum shingtau hte hkalup hkam ngut ai hpang, Yesu a hpang matut hkan lu na re.