1. Yehowa a uhpung hta shang lawm lu ai majaw, hpa shaman chyeju ni lu ai kun?

 MAYAK mahkak law ai ndai hpang jahtum nhtoi hta, Karai a uhpung kaw shang lawm lu ai gaw shaman chyeju re. Mungkan a masa lam ni grau sawng wa tim, kahkyin gumdin ai mungkan grup hpunau nauna hpung hpe Yehowa jaw da ai. (Shk 133:1) Dinghku ngwi pyaw na matu karum ya ai. (Ehp 5:33–6:1) Myit simsa lam lu na matu, ra nga ai nyan hpaji hpe mung jaw da ai.

2. Hpa galaw na matu ra ai kun? Hpa majaw kun?

² Shaman chyeju law law nga tim, sadi dung let Karai a magam hpe matut gun hpai lu hkra shakut ra ai. Hpa majaw kun? Kaga masha ni tsun ai, galaw ai lam a majaw kalang lang myit hkra machyi chye ai. Shut ai lam galaw hkrup yang (sh) shut ai lam langai hpe sha kahtap htap galaw hkrup yang, tinang hkum tinang myit htum wa chye ai majaw re. (1) Hpunau nauna langai a majaw, (2) ningrum ningtau a majaw, (3) tinang nan a majaw myit htum ai aten ni hta, sadi dung let Karai a magam hpe matut gun hpai ra ai. Dai masa langai hpra hpe ndai sumhpa hta bawngban na re. Sadi dung ai Chyum Laika kasi ningli ni a lam hpe mung bawngban mat na re.

HPUNAU NAUNA LANGAI A MAJAW MYIT HTUM AI SHALOI

3. Karai a masha ni hpa mayak mahkak hkrum ai kun?

³ Mayak mahkak. Hpunau nauna nkau hta, myit shanut hpa akyang lailen ni nga chye ai. Nkau mi gaw, anhte hpe myit hkra machyi hkra tsun hkrup, galaw hkrup chye ai. Myitsu salang ni  mung shut chye ai. Dai zawn masa ni hkrum ai shaloi, ndai gaw Karai a uhpung gaw re ai kun? ngu ntsen ai myit shang wa chye ai. Yehowa hpe hpunau nauna ni hte rau, “myit langai sha hte” nawku na malai, myit htum hkra galaw ai hpunau nauna ni hpe koi yen wa chye ai. Zuphpawng ni hpe n lung mat ai baw pyi byin chye ai. (Zep 3:9) Dai gaw hpaji rawng ai lam rai kun? Dai zawn masa hte hkrum wa ai Chyum Laika kasi ningli langai hpe yu yu ga.

4. Kasa Pawlu hpa mayak mahkak ni hkrum ai kun?

⁴ Chyum Laika kasi ningli. Hpunau nauna ni n hkum tsup ai lam kasa Pawlu chye ai. Ga shadawn, Yerusalem nawku hpung hte nnan kanawn mazum ai shaloi, hpunau nauna nkau gaw Pawlu hpe ntsen ai myit nga ai. (Kas 9:26) Hpang de, Pawlu a lam shatan ma ai. (2 Ko 10:10) Kaga ni hpe ahtu kataw shangun na lam hpe myitsu salang langai galaw nga ai hpe Pawlu mu ai. (Gal 2:11, 12) Grai hkau ai manang Marku a majaw grai myit htum wa ai. (Kas 15:37, 38) Tinang hpe myit htum hkra galaw ai ni hte Pawlu matut n kanawn tim mai ai. Raitim, shanhte a kaja ai lam ni hpe tam ai. Myit rawt let Karai a magam hta matut shang lawm ai. Pawlu hpe hpa gaw karum ya ai kun?

5. Hpunau nauna ni hpe Pawlu hpa majaw mara raw ya lu wa ai kun? (Kolose 3:13, 14) (Sumla hpe mung yu u.)

⁵ Hpunau nauna ni hpe Pawlu tsawra ai. Dai majaw, n kaja ai lam ni hpe n re ai sha, kaja ai lam ni hpe myit maju jung lu ai re. Ngut nna, Kolose 3:13, 14 hta tsun da ai hte maren, kaga ni hpe mara raw ya lu ai re. (Hti u.) Marku hpe Pawlu gara hku mara raw ya wa ai hpe yu yu u. Nambat 1 sasana hkrun lam hta, tinang hpe Marku kau da mat tim, myit hta n matsing da ai. Hpang de, Kolose nawku hpung de ka ai laika hta, “n-gun jaw madi shadaw” ya ai wa, ngu nna Marku hpe shakawn da ai. (Kol 4:10, 11, NWT) Roma mare hta htawng hkrat nga ai shaloi, sa karum ya na matu, Marku hpe laksan hpyi shawn ai. (2 Tm 4:11) Pawlu mara raw ya ai gaw dan dawng nga ai. Hpa sharin la lu ai kun?

6-7. N hkum tsup ai hpunau nauna ni hpe gara hku matut tsawra lu ai kun? (1 Yh 4:7)

⁶ Sharin la lu ai lam. Yehowa gaw hpunau nauna ni hpe matut tsawra shangun mayu ai. (1 Yawhan 4:7 hpe hti u.) Anhte hpe myit hkra machyi hkra marai langai ngai galaw yang pyi, dingsang galaw ai gaw n rai na re. Shi mung Karai a man hta jaw ai hpe galaw mayu na re ngu myit ya mai ai. (Gsh 12:18) Sadi dung ai mayam ni hta, n hkum tsup ai lam  ni nga tim, Karai Kasang tsawra ai. Anhte shut ai lam ni galaw hkrup tim, shi anhte hpe matut hku hkau nga ai. Anhte hpe masin n pawt nga ai. (Shk 103:9) Mara raw ya chye ai Kawa hpe anhte kasi la ging ai.—Ehp 4:32–5:1.

⁷ Jahtum ni sai hte maren, hpunau nauna ni hte hku hkau nga ra ai. Zingri zingrat lam ni grau sawng wa na re. Makam masham a majaw htawng pyi hkrat chye ai. Dai majaw, hpunau nauna ni hpe grau ra wa chye ai. (Gsh 17:17) Saping mungdan kaw na myitsu salang Josep a gaw lapran nga ai majaw, kaga hpunau ni hte rau htawng hkrat mat ai. “Htawng kaw rau nga ra ai majaw, shada da a lam grau chye wa ai. Dai majaw, myit htum hpa lam ni mung hkrum ai. Grai hkam sharang ra ai. Mara raw ya ra ai. Dai zawn galaw ai majaw, matut kahkyin gumdin lu ai, shada da makawp maga ya lu ai re. Htawng kaw mung n kamsham ai masha ni hkrai re. Kalang mi hta, ngai lata machyi mat ai majaw, hpa n lu galaw mat ai. Dai majaw, hpunau langai gaw rai ni hkrut ya ai. Kaga ra ai lam ni galaw ya ai. Grai ra ai aten hta tsawra myit madun hkrum ai” ngu tsun ai. Shada da n htuk ai lam nga yang, ya kaw nna hparan da ging ai hpe madun nga ai.

NINGRUM NINGTAU A MAJAW MYIT HTUM AI SHALOI

8. Dinghku de ai ni gaw hpa mayak mahkak hkrum ai kun?

⁸ Mayak mahkak. Manghkang n nga ai dinghku ngu ai gaw n nga ai. Dinghku de ai ni gaw, “hkum shan hta e nni nkri hkrum na” ngu Chyum Laika hta tsun da ai. (1 Ko 7:28) Hpa majaw kun? Dinghku ngu ai gaw, akyang lailen, ra sharawng ai lam n bung ai n hkum tsup ai marai lahkawng hte pawng hpawn da ai re. Htung hking, shingdu labau n bung ai pyi byin chye ai. Hkungran ngut yang she kaga akyang lailen ni hpe grau chye wa chye ai. De a majaw, manghkang byin wa chye ai. Tinang shut ai hpe yin la nna, hparan na malai, ningrum ningtau hpe mara shagun hkrup chye ai. Garan nga na matu, hka na matu myit wa chye ai. Raitim, dai gaw manghkang hparan ai ladat rai kun? b Dinghku ngwi pyaw ai lam n nga tim, dinghku ngang grin hkra shakut wa ai Chyum Laika kasi ningli langai hpe yu yu ga.

9. Abigela hpa mayak mahkak ni hkrum ai kun?

⁹ Chyum Laika kasi ningli. Abigela a madu wa Nabala gaw, grai mazut nna nhkru ai. (1 Sa 25:3) Dai zawn masha hte rau nga ra ai gaw, Abigela a matu grai yak na re. Nabala grai zai ai hku tsun ai majaw, Israela hkawhkam byin wa na Dawi hte shi a masha ni gaw, Nabala hpe sat na matu sa wa ai. (1 Sa 25:9-13) Abigela lawt lam tam mayu yang dai gaw ahkaw ahkang re. Dawi a lata hta Nabala hpa byin yang byin ngu nna kabai da tim mai ai. Raitim, shi dai hku n galaw wa ai. Nabala hpe asak shalawt ya na matu Dawi hpe hpyi nem ai. (1 Sa 25:23-27) Hpa majaw dai hku galaw wa ai kun?

10. Yakhkak ai dinghku hta matut hkam sharang na matu Abigela hpe hpa gaw karum ya ai rai na kun?

¹⁰ Yehowa hpe Abigela tsawra ai. Dinghku hte seng ai Karai a tsang madang ni hpe hkungga ai. Adam yan Ewa hpe Karai Kasang hkungran ya ai shaloi, hpa tsun wa ai hpe chye da na re. (Nin 2:24) Dinghku hpe chyoi pra ai lamang hku nna Karai Kasang mu mada ai lam Abigela chye ai. Karai hpe myit pyaw shangun  mayu ai majaw, madu wa hte hpawn, nta masha yawng asak lawt hkra, galaw lu ai lam yawng hpe galaw wa ai. Nabala hpe Dawi n sat hkrup na matu kalang ta sa hpyi nem ai. Tinang n galaw ai mara a matu sharawng awng let hpyi nem ai. Nden marai rawng nna, tingkyeng myit n nga ai Abigela hpe Yehowa grai tsawra na re. Abigela kaw na madu jan madu wa ni hpa sharin la lu ai kun?

11. (a) Dinghku num, la ni hpe Yehowa hpa lam matsun da ai kun? (Ehpesu 5:33) (b) Nauna Kaman kaw na hpa sharin la lu ai kun? (Sumla hpe mung yu u.)

¹¹ Sharin la lu ai lam. Ningrum ningtau gaw grai kanawn yak tim pyi, dinghku ngang grin hkra galaw na matu Yehowa lam matsun da ai. Manghkang ni hpe shakut nna rau hparan nga ai, tingkyeng akyu n tam ai tsawra myit madun ai, hkungga ai lam madun nga ai hpe Yehowa mu ai shaloi grai pyaw na re. (Ehpesu 5:33 hpe hti u.) Nauna Kaman gaw, dinghku de nna 6 ning daram na ai shaloi, Yehowa Sakse ni hte Chyum Laika hkaja hpang ai. Dai hpang, hkalup hkam ai. “Nye a dawdan lam hpe nye madu wa n ra ai. Yehowa hpe shi manawn taw ai. Shi ngai hpe grai mazut ai hku tsun ai. Tawn kau da na ngu nna pyi jahkrit ai” ngu shi tsun dan ai. Raitim, dinghku ngang grin hkra shakut ai. Dinghku prat 50 ning rai sai. Madu wa hpe tsawra ai, hkungga ai lam madun na matu shakut ai. “Shaning ni na wa ai hte maren, nye madu wa a hkamsha lam hpe chye na ya lu wa ai. Tsawra myit hte tsun shaga na matu ahkyak ai hpe chye wa ai. Dinghku gaw chyoi pra ai ngu ai hpe chye da ai majaw, Yehowa hpe tsawra ai majaw, dinghku ngang grin hkra dang lu ai made shakut ai” ngu tsun ai. c Dinghku hta mayak mahkak ni nga tim pyi, dinghku ngang grin hkra Yehowa madi shadaw ya na hpe kam mai ai.

TINANG HKUM TINANG MYIT HTUM AI SHALOI

12. Mara kaba galaw hkrup yang hpa mayak mahkak hkrum chye ai kun?

¹² Mayak mahkak. Mara kaba galaw hkrup ai shaloi, la hpa n nga sai ngu hkamsha chye ai. “Gawng run nna htum mat ai myit” pyi byin wa chye ai ngu Chyum Laika hta tsun da ai. (Shk 51:17) Magam tau hku nna atsam hpring na matu shaning law law shakut wa ai hpunau Robat a lam myit yu ga. Mara kaba galaw hkrup ai majaw, Yehowa hpe sadi run hkrup sai ngu hkamsha ai. “Nye a myit nsam gaw ngai hpe dingbai dingna jaw wa ai. Grai hkrit wa ai. Ngai hkrap let Yehowa kaw akyu hpyi ai. Raitim, ngai shi hpe myit htum hkra galaw da  ai majaw, nye akyu hpyi ga hpe shi madat ya sana n re” ngu tsun ai. Anhte mung mara kaba galaw hkrup ai shaloi asum jaw mayu wa chye ai. Tinang hpe Yehowa kau da mat sai, Karai a magam hpe n mai gun sai ngu myit wa chye ai. (Shk 38:4) Nang mung dai zawn hkamsha yang, mara kaba galaw hkrup tim, matut magam gun wa ai Chyum Laika kasi ningli langai hpe yu yu u.

13. Kasa Petru gaw hpa mara kaba galaw hkrup wa ai kun? Shawng de mung gara zawn shut ai lam ni galaw wa ai kun?

¹³ Chyum Laika kasi ningli. Yesu n sat hkrum shi ai shana hta, kasa Petru gaw shut ai lam law law galaw hkrup ai. De a majaw, mara kaba pyi galaw hkrup wa ai. Langai, Petru gaw tinang hkum tinang ladu lai kam ai majaw, kaga kasa ni Yesu hpe kau da mat tim, shi n kau da ai ngu tsun ai. (Mrk 14:27-29) Lahkawng, Getsemane sun hta sadi maja let n lu la wa ai. (Mrk 14:32, 37-41) Masum, Yesu hpe rim na matu shawa hpawng sa wa ai shaloi, Yesu hpe kau da nna hprawng mat ai. (Mrk 14:50) Hpang jahtum, Yesu hpe n chye ai ngu masum lang ting dagam nna nyet kau ai. (Mrk 14:66-71) Shi mara kaba galaw hkrup ai hpe chye dat ai shaloi hpa galaw ai kun? Grai yawn nna hkrap ai. Mara kaba galaw hkrup ai majaw, grai myit daw mat ai rai na re. (Mrk 14:72) Yesu sat hkrum ai aten hta, Petru kade daram nni nkri hkamsha na hpe shingran yu u. Manu n dan ai ngu hkamsha na re.

14. Petru hpa majaw matut magam gun lu wa ai kun? (sumla hpe yu u.)

¹⁴ Petru gaw, lam law law a majaw Yehowa a magam hpe matut gun hpai lu wa ai. Shi hkrai san san n nga wa ai sha, kaga kasa ni hpang de sa ai majaw, shalan shabran lam lu wa ai. (Luk 24:33) Hkrung rawt wa ai Yesu mung, Petru hpe hkum shadan dan nna n-gun jaw wa ai. (Luk 24:34; 1 Ko 15:5) Yesu gaw Petru hpe mara shagun na malai, lit kaba ni kahtap jaw wa ai. (Yhn 21:15-17) Petru gaw mara kaba ni galaw wa tim, jaw ai hpe galaw na matu shakut wa ai. Hpa majaw kun? Shi hpe Yesu naw tsawra nga ai lam kam ai majaw re. Kaga sape ni mung, matut madi shadaw ya ai. Petru kaw na hpa sharin la mai ai kun?

15. Anhte hpe Yehowa hpa hpe kam shangun mayu ai kun? (Shakawn 86:5; Roma 8:38, 39) (Sumla hpe mung yu u.)

¹⁵ Sharin la lu ai lam. Yehowa gaw, anhte hpe tsawra ai, mara raw ya ai ngu ai hpe kam shangun mayu ai. (Shakawn 86:5; Roma 8:38, 39 hpe hti u.) Mara galaw yang, mara nga ai ngu hkamsha ai. Dai hku mung hkamsha  ging ai. Raitim, tsawra n hkrum ging ai, mara raw n hkrum ging ai ngu nna gaw n hkamsha ging ai. De a malai, karum shingtau alawan la ging ai. Shawng hta lawm ai Robat ndai hku tsun ai: “Chyam dinglik ai lam ni hpe tinang hkrai ninghkap nga ai majaw, mara galaw hkrup mat ai re. Myitsu salang ni hpe karum hpyi ra ai lam chye mat ai. Yehowa ngai hpe naw tsawra ai, n kau da mat ai ngu ai hpe kam hkra myitsu salang ni karum ya ai. Shanhte mung ngai hpe matut tsawra nga ai” ngu Robat tsun ai. Anhte mung mara ni a matu myit malai la na, karum hpyi na, mara ni hpe bai n galaw hkrup hkra shakut na nga yang, Yehowa matut tsawra na, mara raw ya na ngu ai hpe kam mai ai. (1 Yh 1:8, 9) Dai hpe kam yang, ahtu kataw ai shaloi, tinang hkum tinang asum jaw sana n re.

16. Karai a magam hpe matut gun hpai na matu nang hpa majaw dawdan da ai kun?

¹⁶ Yakhkak ai hpang jahtum nhtoi ni laman, anhte shakut shaja let shi a magam gun nga ai hpe Yehowa grai manu shadan ai. Myit htum hpa lam ni nga tim, Yehowa a karum shingtau lam hte matut magam gun lu ai. Hpunau nauna ni myit hkra machyi hkra galaw yang pyi matut tsawra lu ai. Dinghku hta, manghkang ni hpe dang lu ai made hparan ai hku nna, Yehowa hpe tsawra ai lam, dinghku lamang hpe hkungga ai lam madun mai ai. Mara galaw hkrup ai shaloi, Karai Kasang kaw karum shingtau tam mai ai. Karai a mara raw ya ai lam lu mai ai. Karai a tsawra myit matut hkamsha lu ai. “Kaja ai amu galaw na, anhte n hki n sang” ai nga yang, shaman chyeju ni nhpaw n-ya lu la na re.—Gal 6:9.