1. Sadi dung ai Karai a mayam nkau gara hku myit hkrup chye ai kun?

 “YEHOWA gaw shi a amyu hta, awng nga ai” ngu Chyum Laika hta tsun da ai. (Shk 149:4) Yehowa gaw shi a amyu hpe, uhpung nawng sharawng awng ai ngu ai hpe chye lu ai gaw kabu hpa re. Raitim, langai hpra hpe gaw sharawng awng nga ai kun? ngu myit nna nkau mi myit daw wa chye ai. Chyum Laika hta lawm ai Karai a sadi dung ai mayam law law mung, dai zawn myit daw ai aten ni nga ai.—1 Sa 1:6-10; Yob 29:2, 4; Shk 51:11.

2. Kadai ni hpe Yehowa sharawng awng ai kun?

² N hkum tsup ai ni gaw, Karai a sharawng awng ai lam lu mai ai ngu, Chyum Laika hta tsun da ai. Sharawng awng ai lam lu na matu hpa galaw ra ai kun? Yesu Hkristu hpe kamsham nna hkalup hkam ra ai. (Yhn 3:16) Dai gaw mara ni a matu myit malai la ngut sai lam, Karai a myit ra ai lam galaw na matu Karai hpe ga sadi jaw ngut sai lam, shawa man hta madun dan ai re. (Kas 2:38; 3:19, 20) Yehowa gaw shi hte hku hkau mayu ai lam, dai zawn madun dan ai shaloi grai kabu ai. Apnawng ga sadi grin na matu dang lu ai made shakut nga dingsa sharawng awng ai. Jinghku ngu nna masat ai.—Shk 25:14.

3. Gara ga san ni hpe bawngban na kun?

³ Karai Kasang n tsawra ai ngu nkau hpa majaw hkamsha chye ai kun? Sharawng awng ai lam Karai Kasang gara hku madun ai kun? Karai a sharawng awng ai lam lu da ai hpe gara hku kam mai na kun?

KARAI KASANG N TSAWRA AI NGU NKAU HKAMSHA AI LAM

4-5. Akyu n rawng ai, manu n dan ai ngu ai hkamsha nga yang pyi hpa hpe kam mai ai kun?

⁴ Akyu n rawng ai, manu n dan ai ngu ai hkamsha let nga kaba wa ai ni law law nga ai. (Shk 88:15) “Tinang hkum tinang  manu n dan ai ngu galoi mung hkamsha ai. Ngai gaw hparadisu de du ging ai wa n re. Nye nta masha ni hpe gaw, hparadisu de du shangun mayu ai ngu, kaji ai aten hta akyu hpyi ai” ngu hpunau Adriyan tsun ai. Sakse Hkam n re ai dinghku kaw na hpunau Toni ndai hku tsun ai: “Tsawra ai, arawng la ai ngu kanu kawa ni kalang mung n tsun ga ai. Ngai hpa galaw tim, nu yan wa n ra sharawng ai.”

⁵ Akyu n rawng ai, manu n dan ai ngu hkamsha wa yang, Yehowa nan tinang hpe lau la da ai hpe dum u. (Yhn 6:44) Tinang hta nga ai kaja ai lam ni hpe tinang n mu tim, Karai Kasang mu ai. Anhte a myit masin hpe mung shi atsawm chye ai. (1 Sa 16:7; 2 Hl 6:30) Karai Kasang gaw anhte hpe manu dan ai ni re ngu tsun wa yang kam mai ai.—1 Yh 3:19, 20.

6. Galaw hkrup wa ai mara ni a matu kasa Pawlu gara hku hkamsha ai kun?

⁶ Tengman lam n chye shi ai shaloi galaw hkrup wa ai ni a matu, mara nga ai ngu nkau mi hkamsha nga dingyang re. (1 Pe 4:3) Sadi dung ai Hkristan ni pyi gawngkya lam ni hpe naw gasat nga ra ai. Tinang hpe Yehowa mara raw ya lu na n re ngu hkamsha ai kun? Rai yang, Yehowa a sadi dung ai kaga mayam ni mung dai zawn hkamsha nga ai hpe nang chye yang, shalan shabran lam lu na re. Ga shadawn, Pawlu gaw shi galaw wa ai mara ni hpe bai myit hkrup ai shaloi, grai sawng ai ngu hkamsha ai. (Rom 7:24) Gaja nga yang, mara a matu myit malai la ngut sai, hkalup hkam ngut sai. Raitim, “kasa ni hta kaji htum ai wa,” “yubak kaba htum ai wa” ngu tinang hkum tinang hkam la da ai.—1 Ko 15:9; 1 Tm 1:15, 16.

7. Galaw hkrup ai mara ni hte seng nna hpa hpe kam ging ai kun?

⁷ Myit malai lu yang mara raw ya na ngu Sumsing Kawa ga sadi jaw da ai. (Shk 86:5) Dai majaw, galaw hkrup wa ai mara ni a matu gaja wa myit malai lu yang, Yehowa mara raw ya ai ngu ai hpe kam u. Mara raw ya na ngu tsun da ngut chyalu re. we are.—Kol 2:13, 14.

8-9. Karai Kasang a sharawng awng ai lam lu na matu, tang du hkra n lu galaw ai ngu hkamsha nga yang hpa galaw lu ai kun?

⁸ Yehowa a magam hta, anhte yawng hpring tup shang lawm mayu ai. Raitim, Karai Kasang a sharawng awng ai lam lu na matu, tang du hkra n lu galaw ai ngu nkau hkamsha chye ai. “Ya galaw nga ai hta na grau jat galaw yang she, Yehowa hpe kaja htum sak jaw ai hte bung na ngu ngai myit hkrup ai. Dai majaw, ngai galaw lu ai hta na grau galaw na matu shakut ai. Sawn da ai daram n lu galaw ai shaloi, tinang hkum tinang myit daw ai zawn, Yehowa mung myit daw na re” ngu nauna Amenda tsun ai.

⁹ Karai a sharawng awng ai lam lu na matu, tang du hkra n lu galaw ai ngu hkamsha nga yang hpa galaw lu ai kun? Yehowa gaw rap ra ai lam nga ai hpe dum u. Anhte dang di lu ai hta na grau galaw na matu, galoi mung n hpyi shawn ai. Anhte dang lu ai made sak jaw ai lam yawng hpe shi manu shadan ai. Yehowa hpe myit masin mahkra hte sak jaw wa ai Chyum Laika kasi ningli ni a lam hpe mung myit yu u. Ga shadawn, Pawlu gaw shaning law law myit rawt let magam gun ai. Deng hkying hku hkrun lam hkawm ai, nawku hpung law law hpe hpawng de wa ai. Raitim, masa ni galai shai mat ai majaw shawoi na daram n lu hkaw tsun ai shaloi, Karai a sharawng awng ai lam sum mat ai kun? N sum ai. Dang lu ai made shi matut galaw ai majaw, Yehowa shaman chyeju jaw ai. (Kas 28:30, 31) Dai hte maren anhte mung sak jaw lu ai lam ni galai shai mat chye ai. Raitim, Yehowa a matu ahkyak htum gaw anhte a myit jasat re. Anhte hpe Yehowa sharawng awng ai lam madun ai lam nkau hpe yu yu ga.

 YEHOWA SHARAWNG AWNG AI LAM GARA HKU MADUN AI KUN?

10. Yehowa gaw anhte hpe sharawng awng ai ngu tsun ai hpe gara hku na lu ai kun? (Yawhan 16:27)

¹⁰ Chyum Laika hku nna madun ai. Yehowa gaw shi tsawra ai ni hpe sharawng awng ai lam madun ai. Yesu gaw tinang tsawra ai kasha re ai lam, Yehowa lahkawng lang tsun ai hpe Chyum Laika hta ka da ai. (Mat 3:17; 17:5) Nang hpe sharawng awng ai ngu, Yehowa tsun ai hpe na mayu ai kun? Sumsing lamu kaw na dingtawk n tsun tim, Chyum Laika kaw na tsun ai. Kabu Gara Shiga Laika 4 kaw na Yesu a ga ni hpe hti ai shaloi, tsawra myit lawm ai Yehowa a ga ni hpe “na” lu na re. (Yawhan 16:27 hpe hti u.) Yesu gaw Kawa a atsam ningja ni hpe hkum tsup ai hku kasi la ai wa re. N hkum tsup tim, sadi dung ai sape ni hpe tsawra ai lam Yesu tsun ai hpe lu hti ai shaloi, tinang hpe Yehowa tsun nga ai zawn shingran yu mai ai.—Yhn 15:9, 15.

11. Jamjau hkrum ai gaw Karai a sharawng awng ai lam sum mat ai lachyum n re ai ngu hpa majaw lu tsun ai kun? (Yaku 1:12)

¹¹ Galaw ai lam hte madun ai. Anhte ra kadawn ai ni hpe madi shadaw ya ai hku nna, Yehowa grai karum ya mayu ai lam madun ai. Kalang lang, ding hpring ai Yoba a masa zawn jamjau hkrum na matu ahkang jaw chye ai. (Yob 1:8-11) Jamjau hkrum ai gaw, Karai a sharawng awng ai lam sum mat ai n re. Karai Kasang hpe kade daram tsawra ai, kade daram kamhpa ai ngu ai hpe madun na matu, tinang hpe Karai Kasang sharawng awng ai, ngang ngang tsap na matu karum ya ai ngu ai hpe mu hkra ahkaw ahkang pyi lu ai.—Yaku 1:12 hpe hti u.

12. Dimitri a mahkrum madup kaw na hpa chye lu ai kun?

¹² Asha Dan kaw nga ai hpunau Dimitri a lam hpe myit yu ga. Shi bungli n lu mat ai. Shata law law bungli tam n lu ai. Raitim, Yehowa hpe kamhpa ai lam madun ai hku nna, hkaw tsun magam hta grau shang lawm na matu dawdan kau ai. Shata law law na mat tim, bungli tam n mu shi ai. Ngut nna hkam n kaja ai majaw, yup-ra kaw taw mat ai. Kaja ai madu wa, kaja ai kawa n re ai ngu hkamsha wa ai. Karai a sharawng awng ai lam sum mat ai majaw kun? ngu ntsen ai myit ni shang wa ai. Lana mi hta, Esaia 30:15 kaw na Chyum ga ni re ai “Asim sha nga let kam sham ai hte nanhte n-gun lagaw lu la na myit dai” ngu nna ka da ai laika pa hpe shi kasha la wa ai. “Wa, myit n pyaw byin ai aten ni hta, ndai Chyum daw hpe dum u yaw” ngu tsun nna yup-ra makau  kaw tawn da ya ai. Bai myit dat ai shaloi, Karai a chyeju majaw dinghku hta, lu na, sha na, bu hpun na, nga na shara naw nga nga ai hpe, Dimitri chye na mat ai. “Asim sha nga na matu, Karai Kasang hpe matut kamhpa na matu sha ra ai” ngu tsun ai. Nang mung jamjau hkrum nga yang, Yehowa nang hpe lanu lahku na, matut hkamjan lu hkra karum ya na ngu ai hpe kam mai ai.

13. Anhte hpe sharawng awng ai lam madun na matu kadai ni hpe Yehowa akyu jashawn chye ai kun? Gara lam hku nna kun?

¹³ Hpunau nauna ni hku nna madun ai. Anhte hpe sharawng awng ai lam madun na matu, hpunau nauna ni hpe Yehowa akyu jashawn ai. Ga shadawn, ra nga ai aten hta n-gun jaw ga tsun na matu, shanhte hpe shadut ya chye ai. Asha Dan kaw na nauna langai dai hpe tatut hkamsha lu wa ai. Shi bungli n lu mat ai. Hkam n kaja ai. Ngut nna, madu wa mung mara kaba galaw ai majaw, myitsu salang lit kaw na hkring kau ra ai. “Hpa majaw dai zawn hkrum ai hpe n chye na ai. Ngai mara langai ngai galaw hkrup ai majaw, Karai a sharawng awng ai lam sum mat ai kun?” ngu tsun ai. Shi gaw, Yehowa tsawra yang tsawra ai lam madun ya rit ngu akyu hpyi dat ai. Yehowa gara hku madun ai kun? “Yehowa ngai hpe tsawra ai lam chye na wa hkra, myitsu salang ni karum ya ai” ngu tsun ai. Dai hpang hta mung, dai hte seng nna akyu bai hpyi ai. “Dai shani hta sha, nawku hpung hta nga ai hpunau nauna ni jawm ka ai laika langai lu la ai. Laika hta lawm ai n-gun jaw ga ni hpe hti lu ai shaloi, nye a akyu hpyi ga hpe Yehowa na ai hpe kam mat ai” ngu tsun ai. Teng ai, tsawra myit lawm ai ga ni hpe tsun na matu, kaga ni hpe shadut ya ai hku nna, anhte hpe sharawng awng ai lam Yehowa madun ai.—Shk 10:17, 18.

14. Anhte hpe sharawng awng ai lam Yehowa madun ai kaga lam langai gaw hpa rai kun?

 ¹⁴ Ra nga ai aten hta, hpaji jaw nna sharin shaga na matu, hpunau nauna ni hpe akyu jashawn ai hku nna mung, anhte hpe sharawng awng ai lam Yehowa madun ai. Ga shadawn, tsa ban 1 na Hkristan ni hpang de laika 14 ka na matu, kasa Pawlu hpe chyoi pra ai wenyi hte lam matsun ya ai. Laika hta lawm ai hpaji jaw sharin shaga ai ga ni gaw, dingtawk tsun ai raitim, tsawra myit lawm ai. Dai zawn hpaji jaw sharin shaga na matu, Pawlu hpe Yehowa hpa majaw lam matsun ai kun? Yehowa gaw, “tsaw ra ai” kasha ni hpe sharin shaga ai, kaja ai Kawa re ai majaw re. (Gsh 3:11, 12) Dai majaw, Chyum Laika hpe madung tawn nna, hpaji jaw sharin shaga hkrum ai gaw, Yehowa a sharawng awng ai lam sum mat ai n re ai sha, sharawng awng ai lam lu la ai lachyum she re. (Heb 12:6) Yehowa a sharawng awng ai lam lu nga ai hpe madun ai kaga hpa lam ni naw nga ai kun?

ANHTE HPE YEHOWA SHARAWNG AWNG AI LAM CHYE LU AI KAGA LAM NI

15. Yehowa gaw kadai ni hpe chyoi pra ai wenyi jaw ai kun? Dai gaw anhte hpe hpa majaw kam ai myit nga shangun ai kun?

¹⁵ Yehowa gaw sharawng awng ai ni hpe chyoi pra ai wenyi jaw ai. (Mat 12:17, 18) ‘Wenyi asi ni hpe ngai lu madun sai kun?’ ngu tinang hkum tinang myit yu u. Tengman lam garai n chye shi ai aten hta na, ya grau myit galu wa sai kun? Wenyi asi ni hpe grau madun lu magang, Karai a sharawng awng ai lam lu nga ai hpe grau kam mai magang re.—“ Wenyi A Asi” ngu ai lawk hpe yu u.

16. Kabu gara shiga hkaw tsun na matu kadai ni hpe Yehowa akyu jashawn ai kun? Dai gaw nang hpe gara hku hkamsha shangun ai kun? (1 Htesaloni 2:4)

¹⁶ Sharawng awng ai ni hpe kabu gara shiga hkaw tsun ai lit Yehowa jaw ai. (1 Htesaloni 2:4 hpe hti u.) Kabu gara shiga hkaw tsun ai a akyu hpe, nauna Jetsalin hkamsha lu wa ai. Lani mi hta, nauna Jetsalin yup rawt wa ai shaloi, grai myit daw ai. “Gara kaw mung akyu n rawng ai ngu hkamsha ai. Raitim, dai aten hta, ngai ningshawng galaw nga ai. Hkaw tsun magam sa ra na shani re ai majaw, akyu hpyi nna sa dat ai” ngu tsun ai. Dai jahpawt hta, tsawra myit nga ai Meri ngu ai num langai hte hkrum ai. Shi gaw chyum ga sharin na matu hkap la ai. Jetsalin chyinghka sa akawk ai aten gaw, karum shingtau lu na matu, Karai Kasang kaw akyu hpyi nga ai aten re ai lam shata loi mi na ai hpang, Meri tsun dan ai. “‘Nang gaw ngai sharawng awng ai nye a kasha’ re ai ngu ngai hpe Yehowa tsun  dat ai zawn re” ngu Jetsalin tsun ai. Masha shagu gaw, anhte hkaw tsun ai shiga hpe atsawm hkap la na n re. Raitim, dang lu ai made shakut nna hkaw tsun ai shaloi Yehowa kabu ai hpe kam u.

17. Gawng malai jahpu hte seng nna Biki a ga kaw na hpa chye lu ai kun? (Shakawn 5:12)

¹⁷ Sharawng awng ai ni a matu, gawng malai jahpu hpe Yehowa akyu jashawn ai. (1 Tm 2:5, 6) Raitim, gawng malai jahpu hpe kamsham nna, hkalup hkam ngut tim pyi, tinang hpe Yehowa sharawng awng ai ngu ai hpe hkap la yak taw yang gaw gara hku kun? Tinang a hkamsha lam hpe ayan na n mai kam ai lam, Yehowa hpe gaw ayan kam mai ai lam dum u. Gawng malai jahpu hpe kamsham ai ni hpe, ding hpring ai ngu Yehowa masat ai. Shaman chyeju jaw na ngu ga sadi jaw ai. (Shakawn 5:12 hpe hti u; Rom 3:26) Gawng malai jahpu a lam myit ai majaw, nauna Biki akyu lu wa ai. Dai hku myit yu ngut ai hpang, “Yehowa nye ntsa grai myit galu ya wa sai. Raitim, ‘ngai zawn masha hpe Karai tsawra lu na n re. Na Kasha a shagu hkungga mung nye mara ni hpe magap ya lu na n re’ ngu Yehowa hpe tsun wa ai hte bung ai” ngu shi tsun ai. Gawng malai jahpu kumhpa a lam myit dat ai shaloi, Yehowa sharawng awng ai ngu ai hpe Biki hkamsha lu wa ai. Anhte mung, gawng malai jahpu a lam myit yang, Yehowa sharawng awng ai ngu ai hpe hkamsha lu na re.

18. Yehowa hpe matut tsawra nga yang hpa hpe kam mai ai kun?

¹⁸ Ndai sumhpa hta lawm ai hpaji jaw ga ni hpe hkan sa yu tim, myit daw ai aten, Karai a sharawng awng ai lam sum mat sai ngu hkamsha ai aten ni kalang lang nga chye ai. “Karai Kasang shi e tsaw ra ai ni hpe” sharawng awng ai ngu ai hpe dum u. (Yak 1:12) Yehowa hte hku hkau hkra matut shakut nga u. Sharawng awng ai ngu ai hpe Karai Kasang madun nga ai lam ni hpe mu hkra yu u. Yehowa gaw, ‘anhte kadai hte mung n tsan nga ai” hpe galoi mung dum nga u.—Kas 17:27.