1-2. Hkalup n hkam shi yang hpa galaw ra ai kun?

 LAI wa sai 5 ning laman, masha wan mi gaw, Yehowa Sakse hku nna hkalup hkam wa ai. Shanhte kaw na law malawng gaw, tsa ban 1 na sape Timohti zawn “ma kaji prat” kaw na tengman lam hpe sharin la wa ai. (2 Tm 3:14, 15) Nkau gaw, asak ram wa yang she, nkau gaw asak grai kaba yang she, Yehowa a lam chye wa ai. Yehowa Sakse ni hte Chyum Laika rau hkaja ai num langai gaw, asak 97 ning hta she hkalup hkam la ai.

² Nang gaw, Chyum Laika sharin nga ai wa (sh) Yehowa Sakse kun dinghku kaw na rai yang, hkalup hkam na matu myit nga ai kun? Dai gaw grai kaja ai bandung re. Raitim, hkalup n hkam shi yang, Yehowa kaw tinang hkum tinang apnawng ra ai. Apnawng ai hta hpa ni lawm ai lam, apnawng hkalup hkam na matu nang jin jin rai sai nga yang, hpa majaw n htingnut ging ai lam, ndai sumhpa hta chye lu na re.

APNAWNG AI NGU AI GAW HPA RAI KUN?

3. Yehowa kaw apnawng da ai masha nkau mi a lam tsun dan u.

³ Chyum Laika hta, Yehowa kaw apnawng ai ngu ai gaw, laksan yaw shada lam a matu lata da ai hpe tsun mayu ai re. Israela ni gaw, Yehowa kaw apnawng da ai amyu re. Raitim, shanhte kaw na nkau mi gaw, Yehowa kaw laksan hku nna apnawng da ma ai. Ga shadawn, Arun gaw, shi a bunghkaw man maga hta, “ap nawng ai chyoi pra masat kumla” re ai ja htanbam bam da ai. Dai ja htanbam gaw, Israela ni a hkinjawng agyi hku nna, laksan magam gun na matu, Yehowa lata da ai  lam madun ai re. (Jaw 8:9, JCLB) Nazari masha ni mung, laksan hku nna Yehowa kaw apnawng da ai ni re. “Nazari” ngu ai gaw, nazar ngu ai Hebre ga kaw na yu hkrat wa ai. “San Tawn Da Hkrum Ai Wa” (sh) “Apnawng Da Ai Wa” ngu lachyum nga ai. Nazari masha ni laksan hkan sa ra na lam ni Mawshe A Tara hta lawm ai.—Bhk 6:2-8.

4. (a) Yehowa hpe tinang hkum tinang apnawng ai gaw, hpa galaw na matu lata dat ai rai kun? (b) “Tinang a hkum hpe nyet kau” ai ngu ai gaw hpa lachyum rai kun? (Sumla hpe mung yu u.)

⁴ Yehowa kaw tinang hkum tinang apnawng ai shaloi, Karai a myit ra ai lam hpe prat hta ahkyak shatai galaw na matu, Yesu Hkristu a sape byin na matu nang lata dat ai re. Hkristan apnawng ai lam hta hpa lawm ai kun? “Ngai hpang de sa wa mayu ai wa kadai rai ti mung, tinang a hkum hpe nyet kau” ra ai ngu Yesu tsun wa ai. (Mat 16:24) Dai majaw, Yehowa kaw apnawng da ai mayam ni gaw, shi n ra ai lam yawng hpe nyet kau ra ai. (2 Ko 5:14, 15) Dai hta, ngang akyang hten ai zawn re ai “hkum shan a bungli” yawng hpe nyet kau ai lam lawm ai. (Gal 5:19-21; 1 Ko 6:18) Dai tara ni hpe hkan sa ai gaw, na a prat hpe yak shangun ai kun? Yehowa hpe tsawra ai, dai tara ni gaw na a prat hpe kaja shangun ai hpe kam yang loi na re. (Shk 119:97; Esa 48:17, 18) Hpunau Nikolat ndai hku tsun ai, “Yehowa a tsang madang ni hpe, nang galaw mayu ai lam hpe n lu galaw hkra hkum pat da ai htawng shadaw ni zawn mu ai (sh) hkanghkyi a shoihpa kaw na makawp maga ya ai hkanghkyi lawng a shadaw ni zawn mu ai rai na re.”

5. (a) Yehowa kaw tinang hkum tinang gara hku apnawng na kun? (b) Apnawng ai hte hkalup hkam ai gaw gara hku shai ai kun? (Sumla hpe mung yu u.)

⁵ Yehowa kaw gara hku apnawng ra na kun? Shi hpe sha nawku na, shi a myit ra ai lam hpe  sha shawng tawn na, ngu akyu hpyi ga sadi jaw ra ai. Dai gaw, Yehowa hpe “na a myit kraw lawang mahkra hte, na a myit masin mahkra hte, na a myit mang mahkra hte, na a n-gun lagaw mahkra hte, nang tsaw ra” na ngu, ga sadi jaw dat ai re. (Mrk 12:30) Apnawng ai ngu ai gaw, nang hte Yehowa a lapran na ga sadi re. Hkalup hkam ai gaw, nang apnawng da sai lam hpe shawa man hta madun dan ai re. Na a apnawng ai lam gaw, grai ahkyak ai ga sadi re. Dai ga sadi matut grin hkra shakut ra ai. Dai hku galaw na matu mung, Yehowa myit mada ai.—Hpj 5:4, 5.

YEHOWA KAW HPA MAJAW APNAWNG AI KUN?

6. Yehowa kaw tinang hkum tinang apnawng ai a madung lam gaw hpa rai kun?

⁶ Yehowa kaw tinang hkum tinang apnawng ai a madung lam gaw, shi hpe tsawra ai majaw re. Dai tsawra myit gaw, hkamsha lam hta sha madung ai n re. Yehowa a lam, shi a yaw shada lam hpe “tup hkrak tengman ai hku chye chyang” ai lam hta mung madung ai. (Kol 1:9, NWT) Nang Chyum Laika hkaja ai shaloi, (1) Yehowa gaw gaja wa nga ai, (2) Chyum Laika gaw shi a Mungga re ai, (3) shi a myit ra ai lam ngut kre na matu uhpung hpe jailang nga ai ngu ai lam ni hpe chye wa ai.

7. Karai Kasang kaw tinang hkum tinang n apnawng shi yang hpa galaw ging ai kun?

⁷ Yehowa kaw tinang hkum tinang apnawng ai ni gaw, Karai a Mungga hta lawm ai madung sharin achyin ai lam ni hpe chye da ging ai. Dai tsang madang ni hte maren asak hkrung ging ai. Chye wa ai lam ni hpe, kaga ni hpe dang lu ai made tsun dan ai. (Mat 28: 19, 20) Yehowa hpe grau tsawra wa yang, shi hpe sha nawku mayu ai myit  grau nga wa na re. Nang mung Karai Kasang hpe tsawra ai kun? Tsawra yang, nang hpe chyum ga sharin ya ai wa (sh) kanu kawa ni a majaw, manaw manang ni zawn galaw mayu ai majaw, apnawng nna hkalup hkam ai baw galaw na n re.

8. Chyeju dum myit gaw, Yehowa kaw tinang hkum tinang apnawng na matu gara hku karum ya ai kun? (Shakawn 116:12-14)

⁸ Na a matu Yehowa galaw ya wa ai lam ni hpe myit yu ai shaloi, shi kaw tinang hkum tinang apnawng mayu wa na re. (Shakawn 116:12-14 hpe hti u.) Chyum Laika hta Yehowa hpe “kaja ai kumhpaw nlang hte hte, hkum hkum re ai kumhpa yawng” Jaw Ai Wa re ngu tsun da ai. (Yak 1:17) Manu kaba dik htum kumhpa gaw, Kasha Yesu a gawng malai jahpu re. Gawng malai jahpu a majaw sha, Yehowa hte hku hkau lu ai. Dai sha n-ga, htani htana asak hkrung na myit mada lam mung Karai Kasang jaw da ai. (1 Yhn 4:9, 10, 19) Shaman chyeju yawng hte gawng malai jahpu a matu, chyeju dum ai lam madun lu ai kaja htum lam gaw, Karai Kasang kaw tinang hkum tinang apnawng ai re. (Trj 16:17; 2 Ko 5:15) Htani Htana Ngwi Pyaw Ai Prat! laika buk a daw 46, nambat 4 hta lawm ai Karai Kasang Hpe Na A Kumhpa Ni Sak Jaw U ngu ai minit 3 na ai video hta dai lam tsun da ai.

APNAWNG NNA HKALUP HKAM NA MATU JIN SAI KUN?

9. Apnawng na matu hpa majaw n tin ging ai kun?

⁹ Apnawng nna hkalup hkam na matu, n jin shi ai ngu hkamsha chye ai. Yehowa a tsang madang ni hpe hkan sa na matu naw galai shai ra ai, makam masham grau ngang hkra aten naw la ra ai ngu hkamsha chye ai. (Kol 2:6, 7) Chyum ga sharin ni gaw, langai hte langai rawt jat ai madang n bung ai. Ramma langai hte langai mung, apnawng hkalup hkam na matu jin ai asak n bung ma ai. Tinang galaw lu ai hta hkan nna sha, rawt jat ai lam hpe jep yu u. Kaga ni hte hkum shingdaw.—Gal 6:4, 5.

10. Apnawng hkalup hkam na matu n jin shi yang pyi hpa galaw lu ai kun? (“ Sakse Hkam Kun Dinghku Hta Nga Kaba Wa Ai Ni A Matu” lawk hpe mung yu u.)

¹⁰ Apnawng na matu n jin shi yang pyi, bandung matut tawn da u. Ra ang ai galai shai lam ni galaw lu hkra, karum ya na matu, Yehowa kaw akyu hpyi u. (Hpl 2:13; 3:16) Na a akyu hpyi ga hpe Karai Kasang na nna karum ya na ngu ai hpe kam u.—1 Yh 5:14.

NKAU HPA MAJAW HTINGNUT NGA AI KUN?

11. Matut sadi dung lu hkra Yehowa gara hku karum ya na kun?

¹¹ Nkau gaw, apnawng hkalup hkam na matu jin sai raitim, htingnut nga ai. ‘Hkalup hkam ngut ai hpang mara kaba galaw hkrup nna, shapraw hkrum yang gara hku galaw na?’ ngu myit nna hkrit ai rai chye ai. Rai yang, ‘Karai Kasang a myit ra ai hku asak hkrung lu nna, shi a sharawng awng ai lam hpe tut nawng e hkan sa galaw lu’ hkra, ra ai lam yawng Yehowa jaw na hpe kam u. (Kol 1:10, JCLB) Jaw ai hpe galaw lu ai atsam mung jaw na re. Dai hku galaw lu hkra mung, masha law law hpe shi karum ya wa sai. (1 Ko 10:13) Dai majaw, nawku hpung kaw na shapraw hkrum ai masha nau n nga ai. Yehowa gaw shi a masha ni matut sadi dung lu hkra karum ya ai.

12. Shut ai lam galaw mayu ai myit nga wa yang, gara hku hkang lu ai kun?

¹² N hkum tsup ai ni re ai majaw, shut ai hpe galaw mayu wa chye ai. (Yak 1:14) Raitim, shut ai lam galaw mayu ai myit nga wa ai shaloi, galaw na, n galaw na hpe tinang nan lata mai ai. Gara hku asak hkrung na ngu ai gaw, tinang hte sha seng ai. Myit mang ai lam ni,  galaw ai lam ni hpe n lu hkang ai ngu, nkau mi tsun tim, hkang lu ai. Shut ai lam galaw mayu ai myit nga wa yang, dai hpe hkang lu na matu, shani shagu akyu hpyi u. Chyum Laika ayan hkaja u. Zuphpawng lung u. Kaga ni hpe tinang a makam masham lam tsun dan u. Rai yang, apnawng ga sadi grin lu na re. Grin lu hkra mung Yehowa karum ya na re.—Gal 5:16.

13. Yosep gara hku kasi kaja madun wa ai kun?

¹³ Chyam dinglik n hkrum shi ai kaw na, hpa galaw na hpe tau hkrau dawdan da yang, apnawng ga sadi hte maren, nga na matu loi na re. N hkum tsup tim, dai zawn galaw lu wa ai ni a lam Chyum Laika hta lawm ai. Ga shadawn, Yosep gaw Hputihpa a madu jan gunglau ai hpe, shani shagu hkrum wa ai. Raitim, gara hku galaw ra na hpe shi chye da ai. “N hkru ai amu kaba hte Karai Kasang a man e ngai kaning rai shut hpyit lu na rai ta?” ngu tsun nna, gunglau ai lam hpe nyet kau ai. (Nin 39:8-10) Gara hku bai htang ra na hpe gunglau n hkrum shi ai kaw na, Yosep dawdan da ai gaw dan dawng nga ai. Dai majaw, gunglau hkrum ai shaloi, jaw ai hpe galaw na matu loi mat ai.

14. Gunglau ai lam hpe nyet kau lu hkra gara hku galaw da mai ai kun?

¹⁴ Yosep hpe gara hku kasi la mai ai kun? Gunglau hkrum yang, gara hku bai htang ra na hpe ya kaw nna dawdan da u. Yehowa nju ndawng ai lam ni hpe kalang ta nyet kau lu hkra galaw da u. Myit pyi hkum myit nga. (Shk 97:10; 119:165) Rai yang, gunglau hkrum ai shaloi, mara galaw hkrup sana n re. Gara hku bai htang ra na hpe chye nga na re.

15. Yehowa hpe “hkan tam” ai lam gara hku madun mai ai kun? (Hebre 11:6)

¹⁵ Tengman lam mu sai hpe nang chye tim, Yehowa hpe myit masin mahkra hte nawku dawjau mayu tim, apnawng nna hkalup hkam na matu, nang htingnut nga chye ai. Rai yang, “Karai Wa e, ngai hpe manaw yu nna, Nye a myit mang ai lam hpe chye ya e; Ngai hpe dinglik yu nna, ngai myit ai hku hpe chye ya e. Yawn mai ai lam de, ngai hkan taw gaw, yu yu u; Htani htana grin nga ai lam de, ngai hpe woi wa e law” ngu, Hkawhkam Dawi zawn akyu hpyi mai ai. (Shk 139:23, 24) Yehowa gaw, shi hpe “hkan tam ai ni” hpe shaman chyeju jaw na re. Apnawng nna hkalup hkam na matu, bandung tawn  nna shakut ai gaw, Karai Kasang hpe hkan tam ai lam madun nga ai re.—Hebre 11:6 hpe hti u.

YEHOWA HTE HKU HKAU HKRA MATUT SHAKUT U

16-17. Sakse Hkam kun dinghku hta nga kaba wa ai ni hpe Yehowa gara hku lau la ai kun? (Yawhan 6:44)

¹⁶ Yehowa lau la da ai majaw, shi a sape byin wa ai ngu Yesu tsun ai. (Yawhan 6:44 hpe hti u.) Dai gaw, anhte hpe grai n-gun lu shangun ai. Langai hpra a kaja ai lam lama ma hpe mu ai majaw, Karai Kasang lau la da ai re. Langai hpra hpe “madu ging ai amyu” ngu nna mu mada ai. (Trj 7:6) Nang hpe mung dai zawn sha mu ai.

¹⁷ Nang gaw Sakse Hkam kun dinghku hta nga kaba wa ai ramma rai yang rai na. Kanu kawa ni a majaw sha Yehowa hpe nawku wa ai re. Yehowa lau la da ai n re ngu hkamsha chye ai. Raitim, “Karai Kasang hpang de sit sa wa mu; shaloi shi nanhte hpang de sit wa na ra ai.” (Yak 4:8; 1 Hl 28:9) Yehowa hte hku hkau hkra nang galaw yang, shi mung nang hte hku hkau hkra galaw na re. Hpung langai hta lawm ai wa hku nna sha n mu ai. Tengman ai lam hta nga kaba wa ai ni hte hpawn, kadai hpe raitim, langai hpra hku nna lau la da ai. Dai majaw, Yehowa hte hku hkau hkra nang galaw yang, shi mung, Yaku 4:8 hta tsun da ai hte maren galaw na re.—2 Htesaloni 2:13 hte shingdaw yu u.

18. Hpang na sumhpa hta hpa lam hkaja lu na kun? (Shakawn 40:8)

¹⁸ Apnawng hkalup hkam ai gaw, Yesu a myit jasat hpe kasi la nga ai re. Shi gaw, kawa hpyi shawn da ai lam yawng hpe galaw na matu, tinang hkum tinang sharawng awng let sak jaw wa ai. (Shakawn 40:8 hpe hti u; Heb 10:7) Hkalup hkam ngut ai hpang, Karai Kasang hpe matut sadi dung lu hkra, galaw lu ai lam ni hpe hpang na sumhpa hta chye lu na re.