INDO-NISHA mungdan, Sanga Basa zunlawng hta anhte grai tsawra ai nauna 3 nga ai. Chyum Laika chye na hkra karum ya ai ni ngu mying lu da ai. Lai wa sai shaning loi mi daram hta, dai zunlawng de sa chyai yang, hka hkingau hta shanhte 3 hpe mu yang mu na. Hkaw tsun bungli n re ai sha, kaga bungli galaw nga ai hpe mu na re.

Shanhte ni panglai de yu nna, nlung kaba ni hpe kawng ntsa de yak yak hkak hkak hpai wa ma ai. Nlung nkau nga yang, gawdin daram nga ai. Dai hpang, hpun dunghkum kaw dung nna, nlung ni hpe sumdu hte adup ga nga ai. Udi hta pyi grau kaji hkra ga ai. Dai hpang nlung ni hpe palasatit pung hta bang nna, shanhte nga ai shara de du hkra, lakang ni lung nna hpai mat ai. Dai de du ai shaloi, nlung ni hpe palasatit buk kaba ni de bai htawt bang ai. Dai hpang, lam galaw ai shara hta lang na matu, mawdaw kaba ntsa de mara ya ai.

Dai 3 kaw na langai gaw Huda re. Shi a masa gaw, kaga ni hta na ndai bungli hta grau nna aten jaw lu ai. Shawoi nga yang, lu ai gumhpraw yawng gaw nta a matu re. Ya chyawm gaw, lu mayu ai langai mi nga taw ai. JW Library app lang lu na matu, tablet langai lu mayu taw ai. Chyum Laika hkaja ai shaloi, kaga ni hpe hkaw tsun ai shaloi, dai app hta nga ai video ni, laili laika ni gaw akyu rawng na ngu ai hpe chye ai majaw re.

Dai majaw, nlung adup ga nna mawdaw ntsa mara ya ai bungli hpe, jahpawt shagu lani mi hkyinghkum 2 galaw ai. Shata mi chyen daram na ai hpang, tablet mari na gumhpraw lu mat ai.

“Tablet nnan lang lu ai majaw, nlung ga ra nna ba ai, makret machyi ai lam ni yawng mai mat sai. Tablet nga ai majaw, hkaw tsun bungli hta grau tang du hkra galaw lu wa ai. Zuphpawng a matu hkyen lajang ai shaloi grau loi wa ai” ngu tsun ai. Kap bra ana hpang nna, zuphpawng ni, hkaw tsun magam lamang ni yawng hpe video matut mahkai nna galaw ai shaloi, tablet nga ai majaw grai kaja mat ai ngu nna mung tsun ai. Huda a myit mada lam hpring tsup mat sai majaw, anhte mung grai kabu ai.