1948, Naijiriya mungdan sinna dingda maga na kahtawng langai hta ngai shangai wa ai. Dai aten hta, wa a kanau Musatahpa hte nye hpu ba Wahabi gaw, hkalup hkam da chyalu Yehowa Sakse ni rai taw sai. Ngai asak 9 ning hta, awa si mat ai majaw grai yawn ai. Awa hte bai hkrum na re ngu Wahabi tsun ai. Myit pyaw shangun ai dai lam a majaw, Chyum Laika hkaja byin mat ai. 1963 hta hkalup hkam ai. Nye kahpu lahkawng hte kanau langai mung hkalup hkam ai.

1965 hta Legot mare na, hpu Wisan hte sa nga ai. Ibobi nawku hpung na aten galu ningshawng ni hte tsawmra kanawn byin ai. Shanhte pyaw taw ai, myit rawt ai lam ni hpe yu nna n-gun lu wa ai majaw, 1968, January hta ningshawng galaw hpang ai.

Behtela hta magam gun nga ai hpunau Ebat Olubebi gaw, anhte ramma ni hpe kahkyin nna laksan zuphpawng galaw ai. Naijiriya dingdung maga hta laksan ningshawng ni ra taw ai da. “Hpunau ni a ramma n-gun, aten ni hpe Yehowa a matu lang mu. Galaw ra ai ni grai law ai” ngu hpunau Olubebi n-gun jaw ai hpe naw dum nga ai. Myihtoi Esaia zawn, Yehowa sa shangun mayu ai gara shara de raitim, sa na ngu myit nna laika mara dat ai.—Esa 6:8.

 1968 May shata hta, Naijiriya dingdung na Kano mare hta, laksan ningshawng hku nna lit ang ai. Biyahpran Majan (1967-1970) byin nga ai aten re. Majan a majaw, dingdung maga hta agrawp hten za mat ai majaw, sinpraw maga de majan wan kap wa nga sai. Dingdung maga de n sa na matu, hpunau langai tsawra myit hte hkum pat ai. “Myit tsang ya ai majaw chyeju dum ai. Raitim, dai kaw Yehowa magam gun shangun mayu ai majaw, ngai hte rau Yehowa nga nga na gaw teng sha re” ngu tsun dat ai.

Kano mare a masa hpe mu dat ai majaw, myit grai n pyaw mat ai. Mare ting la hpa n nga ai. Majan laman, masha ni sat hkrum ai majaw lam hkan mang ni sumpum nga ai hpe, hkaw tsun sa let mu ai. Kano mare hta nawku hpung law ai. Raitim, hpunau law malawng hprawng ra taw ai. Ngam nga ai masha gaw marai 15 pyi n hpring ai. Ngam nga ai masha ni mung, grai hkrit nna myit daw nga ai. Anhte laksan ningshawng marai 6 du mat ai shaloi, shanhte grai kabu ai. Anhte yawng jawm n-gun jaw ai. Zuphpawng ni, hkaw tsun bungli ni bai shajin ai. Ginjaw garan rung de hkaw tsun jahpan ni sa ai. Laili laika ni htet ai.

Anhte laksan ningshawng ni gaw, Hasa ga sharin la hpang ai. Shanhte na ga hte Mungdan shiga tsun dan ai shaloi, buga masha law law madat ai. Raitim, dai mare hta grai shingkang ka-up ai nawku htung langai nga ai. Dai hpung shang masha ni gaw, anhte tsun ai hpe n ra ai. Dai majaw, grai sadi ra ai. Kalang mi hta, masha langai nhtu hte hkan shachyut ai majaw, ngai hte nye manang grai kagat kau ra ai. Gat chyang ai majaw sha naw tsamai ai. Shoihpa law tim, Yehowa gaw “shimlum let shanu nga shangun” ai. Hkaw tsun masha jat wa ai. (Shk 4:8, NWT) Ya Kano mare hta, nawku hpung 11 hte hkaw tsun masha 500 jan nga nga sai.

Kano hta shata loi mi nga ngut ai hpang, 1968, Auguest shata hta Naija mungdan a mare kaba re ai Niyame de, laksan ningshawng 2 hte rau sa  hkrum ai. Sinna Ahprika, Naija gaw mungkan hta kahtet dik htum ginra re ai hpe tatut hkamsha lu dat ai. Kahtet ai shara kaw lu nga hkra shakut let, madung amyu ga re ai Pyintit ga hpe sharin la ai. Mayak mahkak ni nga tim Yehowa hpe kamhpa let, dai kaw na hkaw tsun masha loi mi hte ginrun nna mare hta hkaw tsun hpang ai. Dai hku nna, Htani Htana Asak De Lam Woi Ya Ai Teng Man Lam laika buk gaw, Niyame mare na laika chye hti ai masha shagu hpang de aten kadun laman du mat ai. Nkau nga yang, anhte hpe hkan tam nna pyi hpyi la ai.

Yehowa Sakse ni hpe ahkang aya nga ai ni n ra sharawng ai lam, kade n na yang chye dat ai. 1969, July hta Naija mungdan a shawng nnan na ninghtawn zuphpawng hpe marai 20 daram hte galaw wa ai. Hkaw tsun masha 2 hkalup hkam na re. Raitim, shawng shani hta sha pyada ni du wa nna zuphpawng hpe hkring kau ra ai. Laksan ningshawng ni hte hpung kawan hpe pyada dap de shaga mat nna san jep ai. Hpang shani bai sa nna, tang shawn na matu tsun ai. Manghkang tam hkrum sana hpe chye ai majaw, hpunau nauna langai a nta kaw hkalup mungga jaw nna, kadai n chye hkra hka nu kaw sha hkalup jaw wa ai.

Bat loi mi na ai hpang, ngai hte laksan ningshawng marai 5 hpe asuya gaw gau shale kau ai. Hkying hkum 48 laman, tinang a lamang hte tinang pru mat na matu tsun ai. Dai majaw, Naijiriya ginjaw garan rung de sa ai. Dai kaw lit nnan lu ai.

Orisanbare ngu ai Naijiriya kahtawng hta anhte lit ang ai. Dai kaw, hkaw tsun masha hpung kaji hte rau magam gun ai. Chyum ga sharin ni galaw ai, grai pyaw ai. Raitim, shata 6 na ai hpang ginjaw garan rung gaw, Naija de langai hkrai sha bai sa shangun ai. Dai hpe na dat ai shaloi grai mau mat ai. Chye mung n chye na ai. Raitim, Naija kaw na hpunau ni hte bai hkrum lu sana re ai majaw myit kahpra ai.

Niyame de bai du wa ai. Hpang shani hta sha, ngai Sakse Hkam re ai hpe hpaga la langai chye mat nna, Chyum Laika ga san ni san ai. Dai hku nna shi hte Chyum Laika hkaja hpang ai. Hkayawm dawn kau ai, tsa chyaru ladu lai n lu sai, hkalup hkam ai. Hpang de, Naija mungdan kaw na ginra law law hta ngai magam gun ai. Hkaw tsun bungli angwi ngwi rawt jat wa ai hpe mu lu ai majaw grai pyaw ai. Ngai du ai shaloi, Sakse Hkam 31 sha nga ai. Raitim, ngai htawt mat ai shaloi, marai 69 nga nga sai.

1977, December hta Naijiriya kaw sharin jawng bai wa lung ai. Bat masum lung ngut ai hpang, Siera Leyun ginjaw garan rung kaw na laika langai hpe, Ginjaw Garan Rung bawng jahkrup hpunau Mekam Biko hti shangun ai. Gini mungdan  hta, hpung kawan hku nna magam gun na matu, Inglik ga hte Pyintit ga chye tsun nna, hkam kaja ai, dinghku n nga ai hpunau hpe tam nga ai da! Dai lit a matu ngai hpe shaman ya nga ai re ai lam, loi na n re ai lam, hpunau Biko asan sha tsun dan ai. “Atsawm myit yu nna sha hkap la u” ngu hpaji jaw ai. “Yehowa dat ai she re. Sa na re” ngu, ngai kalang ta tsun dat ai.

Dai hku nna Siera Leyun mungdan de sa mat ai. Ginjaw garan rung kaw na hpunau ni hte hkrum ai. “Gini kaw na Hkaw Tsun Bungli masa hpe anhte nau n chye ai” ngu Ginjaw Garan Rung Komiti hpung shang langai tsun ai. Jinghku mungdan Gini a hkaw tsun bungli hpe, Siera Leyun ginjaw garan rung kaw na lit la da tim, Gini hta, mung masa n kaja ai majaw, hkaw tsun masha ni hpe n mai matut mahkai taw ai. Hpunau langai hpe dat na matu, chyahkring hkring lajang tim n mai byin taw ai. Dai majaw, nga na ahkang lu hkra shawk shawn na matu, ngai hpe Gini mungdan a mare kaba Kanahkari de sa shangun ai.

Kanahkari kaw du ai shaloi, maigan mungdan dat kasa salang rung de sa nna, lit hkam salang hte hkrum ai. Gini hta hkaw tsun mayu ai lam shi hpe tsun dan ai. Dai kaw rim hkrum chye ai, hkala nba ni hkrum chye ai ngu, dat kasa salang tsun ai. “Naijiriya de wa nna she hkaw tsun u” ngu tsun ai shaloi, “ndai kaw nga na matu dawdan ngut sai” ngu bai tsun dat ai. Dai majaw, ngai hpe karum ya na matu laika ka ya ai majaw, Gini a hkring mang langai ngai hpe grai karum ya wa ai.

Siera Leyun ginjaw garan rung de bai wa nna, hkring mang a dawdan ai lam ni hpe hpunau ni hpe tsun dan ai. Hkrun lam awng dang na matu, Yehowa shaman chyeju jaw ai hpe na ai majaw, grai kabu nna rawt marawn ai. Gini hta nga na ahkang lu mat sai.

1978 kaw nna 1989 du hkra, Siera Leyun hta hpung kawan hku nna, Laiberiya hta ningtau hpung kawan hku nna magam gun ai. Nnan hta chyahkring hkring machyi ai. Kalang lang, mare kaba hte tsan ai shara hta she machyi wa wa re ai. Hpunau ni tsi rung hkan sa ya ai.

Kalang mi hta, hkali bu ai hte hpawn, kan kaw shingtai rawng ai majaw, yup ra kaw taw mat ai. Bai mai wa ai shaloi she chye ai. Ngai hpe gara kaw lup na ngu nna pyi, hpunau ni jahkrum da ngut sai da! Asak shoihpa ni hkrum tim, lit hpe jahkring kau na matu kalang mung n myit ga ai. Ngang grin ai shimlum lam hpe, Karai Kasang lu jaw ai ngu ai hpe kam ai. Si mat tim pyi, bai hkrung hkra galaw ya na le.

Yehowa hpe grai tsawra nna, shagrit shanem ai ningshawng nauna Dokat hte 1988 hta hkrum ai. Hkungran ngut ai hpang, ngai hte rau hpung kawan bungli hta shang lawm ai. Sak jaw mayu ai myit grai nga nna, madi shadaw ya chye ai ningrum ningtau re. Nawku hpung langai hte langai deng 15 (25 km) daram tsan ai shara de,  rai majaw ni hpai nna lam hkawm sa ra ai. Dai hta grau tsan ai nawku hpung ni de rai yang, hkan jawn mai ai kaw jawn nang nna sa ra ai. Lam gaw lagyawk labawng rai nna, hkum pup mung nga ai majaw angwi ngwi sa ra ai.

Dokat gaw grai nden marai nga ai. Ga shadawn, hkangse shoihpa grai nga ai hka nu ni hpe kalang lang rap ra ai. Kalang mi hta nga yang, 5 ya na ai hkrun lam langai hkawm ai shaloi, hpun pyen mahkrai daw nga ai majaw, hpun kawp hka li hte rap ra ai. Hka li kaw na yu na matu tsap dat ai shaloi, Dokat hka de hkrat mat ai. An lahkawng yan hka n chye hpungyawt ai. Hkrat ai mung hkangse nga ai hka nu kaw she hkrat mat ai. Naw tsamai ai. Ramma ni hka hpungyawt nna sa hkye ya ai. Grai na hkra, dai mabyin hpe yup mang naw mu nga ai. Raitim, hpung kawan bungli hta matut shang lawm ai.

1992 shaning nnan daw hta, Dokat ma hkum kap mat ai lam, chye dat ai majaw grai mau mat ai. Aten hpring magam hkring ra sana kun? Hpa mi raitim, “Yehowa jaw ai kumhpa” re ai majaw, ma kaw hpe Ja-gip ngu shamying ya ai. Ja-gip shangai ngut nna, 4 ning daram hta ma gam Erit hpe bai shangai ai. Yehowa jaw ai kumhpa ni re. Kanahkari ga gale rung hta Ja-gip grai na hkra magam gun ai. Erit gaw magam tau re.

Dokat gaw laksan ningshawng magam hpe hkring kau ra tim, ma ni hpe bau maka let aten galu ningshawng matut galaw ai. Yehowa karum ya ai majaw, ngai gaw laksan aten hpring magam hta matut shang lawm lu ai. Ma ni kaba wa ai shaloi, Dokat gaw laksan ningshawng bai galaw ai. Ya, an gaw Kanahkari hta sasana ni hku nna magam gun nga ai.

Yehowa shaga ai shara de ngai galoi mung hkan ai. Karai Kasang makawp maga ya ai ngu, an chyahkring hkring hkamsha lu ai. Arung arai hpe n re ai sha, Yehowa hpe kamhpa ai majaw manghkang nau n nga ai. Nau myit n tsang ai. “Hkye hkrang la ai Karai Kasang” Yehowa sha, jet ai shimlum lam a Npawt re ai hpe tinang nan chye wa ai. (1 Hl 16:35) Shi hpe kamhpa ai ni a asak hpe, “Karai Kasang Yehowa a asak makai hta gyit shangang da” ya na ngu ai hpe, ngai tsep kawp kam ai.—1 Sa 25:29.