Chyum Jawngma ni grau kahkyin gumdin wa na matu, uhpung gaw dai shaning laman galai shai lam nkau galaw wa ai. Bat shagu, Akyu Hpyi Shakawn Hpawng ni hta bawngban wa ai chyum daw sanglang dan ai lam ni hpe Sin Langchyi hta bang ya hpang wa ai. Zuphpawng hta, bat shagu bawngban na chyum daw ni, tinang hkrai hkaja ai lam, dinghku nawku hta mahkawn na, shani shagu a matu mahkawn ni hpe madun da ai ladaw shanan hpe shapraw ai.

Zuphpawng ni hta “sakse hkam ai” daw lawm ai. Nkau gaw, hkaw tsun magam mahkrum madup, Yehowa hpe chyeju dum ai lam lama ma tsun dan ai. Nkau gaw mahkawn hkawn dan ai. Akyu rawt hpyi ai ni pyi nga ai. “Sakse hkam mayu ai nga yang, rawt tsap nna ‘Madu a mai kaja ai lam a matu chyeju dum ga tsun mayu ai’ ngu tsun hpang ra ai” ngu nna 1923, asak 15 ning hta hkalup hkam wa ai, nauna Eba Bani tsun dan ai. Sakse hkam ai hpe grai ra ai hpunau ni mung nga ai. “Hpunau Gatwin nga yang, Madu hpe chyeju shakawn na lam grai law ai. Zuphpawng woi awn ai hpunau myit n galu wa sai zawn byin wa ai hpe madu jan sadi hkrup nna, palawng hpe gang dat ai shaloi she, hpunau Gatwin dung mat ai” ngu nauna Bani tsun ai.

Nawku hpung shagu hta, shata mi kalang laksan Akyu hpyi Shakawn Sakse Hkam ai Zuphpawng galaw ai. Dai zuphpawng ni hte seng nna, 1923, April 1 Sin Langchyi hta ndai hku ka da ai: “Nawku zuphpawng aten kaang hkup daram gaw, hkaw tsun magam mahkrum madup ni tsun na matu, rau galaw ai manang ni hpe n-gun jaw na matu re. . . . N-gun lu hpa ndai zuphpawng ni a majaw, hpunau nauna ni grau hku hkau wa na ngu myit mada ai.”

Kaneda mungdan, Bankuba mare na asak 19 ning re ai nawku hpung hkaw tsun masha Chya Matin gaw, ndai zawn zuphpawng ni kaw na akyu grai lu wa ai. “Nta langai hpang langai hkaw tsun sa yang, hpa tsun ra na hpe ndai zuphpawng ni kaw na, shawng nnan chye wa ai. Hpa majaw nga yang, nta langai hpang langai sa let hkrum wa ai mahkrum madup ni tsun dan ai hpe chyahkring hkring na lu ai. Dai hku nna, hpa tsun ra na, ninghkap ai lam ni hpe gara hku bai htang ra na ngu ai hpe chye wa ai” ngu Matin tsun ai.

“Hkaw tsun shani ni” a majaw mung, grau kahkyin gumdin wa ai. 1923, April 1 Sin Langchyi hta,  ndai ndau shana ai lam lawm ai: “Bungli langai hpe sha kahkyin gumdin let jawm galaw na ngu ai yaw shada lam hte . . . 1923, May 1, Bat Lahkawng Ya shani hpe yawng jawm magam gun ai shani hku nna masat kau ai. . . . Hpang e, shata shagu a shawng na bat, Bat Lahkawng Ya shani hpe hkaw tsun shani hku nna masat mat wa na re. . . . Nawku hpung shagu kaw na hkaw tsun masha yawng myit rawt let shang lawm ging ai.”

Ramma Chyum Jawngma ni gaw, ndai bungli hta shang lawm ma ai. Dai aten hta asak 16 ning sha naw re ai, Heze Bahpa ndai hku tsun ai: “Matsing da lu ai bawngban ladat ni (tsun shaga ladat ni hte bung) Bulettin hta lawm ai. a Hkaw tsun magam amyu myu hta ji dwi hte rau myit rawt let shang lawm ai.” Raitim, n shadu da ai marai langai a ninghkap ai hpe hkrum ai. “Kaga ni hpe ngai n hkaw tsun ging ai ngu asak kaba ai hpunau langai aging agang tsun ai. Tsaw Htum Ai Hpan Madu hpe ‘Shabrang ni hte mahkawn ni’ hte hpawn, Chyum Jawngma ni yawng shakawn ging ai hpe, dai aten hta nkau mi n chye na ma ai.” (Shk 148:11, 13) Raitim, nauna Bahpa matut hkaw tsun ai. Hpang de, masat yang lahkawng Gilead Jawng lung nna, Panama hta sasana magam gun ai. Hkaw tsun magam hta, ramma ni shang lawm ai hte seng nna, hpunau ni a myit jasat angwi ngwi galai shai wa ai.

Zuphpawng kaba ni a majaw, grau kahkyin gumdin wa ai. Zuphpawng kaba law malawng hta, lani mi hpe hkaw tsun shani hku nna masat da ai. Ga shadawn, Kaneda mungdan, Winipet mare zuphpawng kaba langai laman, sa lung ai ni yawng March 31 ya shani hta, dai mare hta hkaw tsun na matu saw shaga hkrum ai. Dai zawn laksan hkaw tsun ai shani ni hta, masha law law hte hkrum lu ai majaw, akyu law law lu wa ai. Winipet mare hta sha, zuphpawng kaba langai bai galaw ai shaloi, August 5 ya shani hta marai 7,000 daram sa lung ai. Dai aten hta, Kaneda mungdan kaw galaw ai zuphpawng kaba ni hta sa lung ai masha law htum re.

1923, August 18-26 laman, Kelihponiya, Lawt Enjelit hta galaw ai zuphpawng kaba gaw, Yehowa  a amyu masha ni a matu grai laklai ai zuphpawng kaba re. Zuphpawng kaba n hpang shi ai bat ni hta, zuphpawng kaba a lam shi laika hta bang ai. Garan laika 500,000 jan gam wa ai. Shawa htaw mawdaw ni, tinang a mawdaw ni hta ndau shabra laika ni shakap ma ai.

August 25, Bat Kru Ya shani hta, “Sagu Hte Bainam Ni” ngu ai ga baw hte hpunau Radahpawt mungga htawn ai. Sagu ngu ai gaw, ginding aga hparadisu hta asak hkrung na myit dingman ai ni re ai lam sanglang dan ai. “Sadi Jaw Lam” ngu ai dawdan lam langai hpe hti dan ai. Dai hta, hpyi hpun ai Hkristan gaw hpa re ai hpe madun dan nna, “Galu kaba ai Babelon” kaw na pru na matu, myit dingman ai ni hpe n-gun jaw da ai. (Shr 18:2, 4) Hpang de, dai hte seng nna ka da ai garan laika wan law law hpe, myit rawt ai Chyum Jawngma ni gaw mungkan ting hta garan wa ai.

Zuphpawng kaba hpang jahtum shani hta sa lung ai marai 30,000 jan gaw, “Mungdan Yawng Hara Magedon De Rawt Sa Nga Tim, Ya Asak Hkrung Nga Ai Wan Law Law Gaw Galoi Mung N Si Sai” ngu ai hpunau Radahpawt a mungga hpe madat wa ai. Masha law law sa madat na hpe sawn da chyalu re ai majaw, nnan gap ngut ai Lawt Enjelit ginsup htingnu hpe Chyum Jawngma ni shap da ai. Masah yawng atsawm na lu hkra, nsen htawn jak ni hpe lang wa ai. Dai aten hta nga yang gaw, madang tsaw ai jak rai ni re. Radio kaw na madat ai ni mung grai law ai.

1923 hta, Ahprika, Uyawpa, Indiya hte Dingda Amerika ni hta hkaw tsun bungli grai maden jat wa ai. Indiya mungdan kaw na, A. J. Josep gaw, madu jan hte kasha 6 hpe bau maka let, maga mi hta Hindi, Temme, Telagu, Urdu ga ni hte laili laika ni shapraw na matu karum ya ai.

Nyu Yawk, Brukalin mungkan ginjaw rung de, Siera Leyun mungdan kaw na Chyum Jawngma, Ehparet Josep hte Lannet Blekmen gaw, laika ka nna karum hpyi ai. 1923, April 14 hta, shanhte hpyi da ai karum shingtau hpe lu wa ai. “Bat Kru Ya shana maga hta n myit mada da ai sha phone shang wa ai” ngu Ehparet tsun ai. “Hkaw tsun na masha ni dat ya na matu, Sin Langchyi Hpung de laika ka wa ai gaw nang kun?” ngu ai nsen kaba hpe phone kaw na na dat ai. “Re ai” ngu bai htai dat ai shaloi, “ngai gaw shanhte dat dat ai wa re” da. Phone shaga ai wa gaw, Hpunau Brawng re. Dai shani hta sha, madu jan Anhtoniya, kasha numsha Luwit, Lusi ni hte Karebiyan zunlawng kaw na du wa ai. Hpunau Brawng a dinghku hpe hkrum na matu hpunau ni nau n la dat ra ai.

 “Hpang jahpawt, Lannet hte ngai shawoi na bat ni zawn, Chyum Laika bawngban nga ai shaloi, galu kaba re ai la langai chyinghka kaw du wa ai. Wiliyam R. Brawng re. Tengman ai tara a matu grai myit rawt taw ai. Hpang shani kalang ta pyi mungga jaw mayu taw ai” ngu Ehparet tsun ai. La sa wa ai laili laika yawng mung, shata mi pyi n hpring shi yang, hpunau Brawng garan shama kau ai. Laika buk 5,000 bai htet ai. Nau n na yang laika buk ni bai ra wa ai. Raitim, laika buk hkan dut ai wa ngu hpunau Brawng mying n pru ai. Chyum Laika Brawng ngu nna sha mying pru mat ai. Yehowa a matu shakut shaja let magam gun ai prat ting hta, shi a mungga ni kaw, Chyum Laika hpe chyahkring hkring lang ai majaw re.

Dai laman, Jamani mungdan, Bamen mare na ginjaw garan rung hta, masha law wa ai majaw mung, mare kata de Pyintit hpyen dap ni shang wa na ngu ai hpe na ai majaw mung, shara htawt na matu dawdan kau ai. Laika dip shabra bungli a matu, htap htuk ai nta langai hpe Mekdibak mare kaw tam mu mat ai. June 19 ya hta laika dip jak ni, nta arung arai ni hpe ngut hkra shajin nna, Mekdibak mare na Behtela nnan de htawt ai. Htawt ngut sai lam ginjaw rung de shana ngut nna, hpang shani hta sha, Bamen mare hpe Pyintit ni zing la kau sai lam shiga hta lawm wa ai. Yehowa makawp maga ya ai hpe hpunau ni grai chyeju dum ai.

Brazi mungdan hta, kabu gara shiga chyam bra na matu, hpunau Jawt Yan grai bu hkawm wa ai. Ginjaw garan rung nnan hpaw ai. Potugi amyu ga hte Sin Langchyi shapraw hpang ai. Shata loi mi laman, laili laika 7,000 jan garan ai. Brazi de hpunau Yan du wa ai gaw, nauna Sera Hpagusan a matu shaman chyeju re. Nauna gaw, 1899 kaw nna Sin Langchyi ni hti hpang ai. Apnawng da sai raitim, hkalup hkam na ahkaw ahkang n lu wa ai. Raitim, hpunau Yan du wa nna shata loi mi na ai hpang, nauna Hpagusan hte kasha 4 hkalup hkam lu wa ai.

Galai shai lam ni galaw dat ai majaw, Chyum Jawngma ni grau kahkyin gumdin wa ai lam, 1923, December 15 Sin Langchyi hta ndai hku tsun ai: “Nawku hpung ni makam masham ngang kang wa ai hpe dan dan leng leng mu lu ai. . . . 1924 hta la nga ai bungli ni a matu shajin da ga. Kabu gara let shawng de rawt ga.”

1924 ning mung, Chyum Jawngma ni a matu myit kahpra hpa shaning re. Brukalin ginjaw rung kaw na chyahkring sha sa ra ai, Satetin Ailen mare kaw na wang hta gawgap bungli langai hpe, Behtela kaw na hpunau ni shata hku galaw ma ai. 1924 ning a shaning nnan hta sha, htingnu nnan ni gap ngut mat ai. Kalang mi hte mung n bung hkra hpunau ni grau kahkyin gumdin wa ai. Kabu gara shiga grau chyam bra wa ai.