1-2. Chyum Laika kaw lawm ai lam ni hpe atsawm sha chye hkra gara hku galaw ra na? Ga shadawn jaw u.

 NTA mari na matu myit taw ai ngu saga. Mari na matu n dawdan shi yang, hpa ni hpe yu mayu na kun? Nta man hpe sha i? Dai hte sha myit dik na n re. Nta shinggan grup grup hpe yu na. Kata de mung gawk ni yawng hpe atsawm sha yu na re. Tinang a htawm hpang nta hpe, kaji kajaw lam ni hte hpawn yawng hpe yu mayu na re.

² Chyum Laika hti hkaja ai shaloi hta mung dai hku galaw mai ai. Chyum Laika gaw, “npawt hpe sung sung htu jahkrat nna gap da ai, htap grai law ai nta kaba hte bung ai” ngu chyum hpaji du langai tsun ai. Rai yang, Chyum Laika kaw lawm ai lam yawng hpe, atsawm sha chye hkra gara hku galaw na? Ntsa lam sha hti mat yang, “Karai Kasang a mung ga hta na shawng na ga kanu” ni daram sha chye na re. (Heb 5:12) Mari na nta de shang yu ai zawn, Chyum Laika hpe tup hkrak chye na na matu, “sung sung” hkaja ra ai. Kaja ai hkaja ladat langai gaw, Chyum Laika daw langai hte langai gara hku matut mahkai nga ai hpe, chye hkra galaw ai ladat re. Tinang hpa hpe kam ai ngu ai daram sha n re, hpa majaw kam ai hpe chye na hkra galaw u.

3. Hpa galaw na matu kasa Pawlu n-gun jaw ai kun? Hpa majaw kun? (Ehpesu 3:14-19)

³ Chyum Laika hpe lam amyu myu hku tup hkrak chye na na matu, lachyum sung ai Chyum Laika tengman lam ni hpe hkaja ra ai. Tengman ai lam a, “Nda de, dingdung de, tsaw de, sung de” tup hkrak chye na lu hkra, Chyum Laika hpe shakut shaja hkaja na matu, Hkristan hpunau nauna ni hpe kasa Pawlu n-gun jaw ai. Rai yang she, “ru jung nna, pawt gaw da” lu wa  na re. (Ehpesu 3:14-19 hpe hti u.) Anhte mung dai zawn hkaja ra ai. Chyum Laika hpe lachyum tup hkrak chye na na matu, gara hku hkaja ra na hpe bawngban yu ga.

4. Yehowa hte grau hku hkau wa na matu hpa galaw lu ai kun? Ga shadawn jaw u.

⁴ Anhte gaw, Chyum Laika hpe ntsa lam chye na ai daram hte sha myit dik nga na n re. Chyoi pra ai wenyi a karum shingtau hte “Karai Kasang a sung htum ai” lam ni hpe pyi hkaja mayu ai. (1 Ko 2:9, 10) Yehowa hte grau hku hkau mayu ai majaw re. Rai yang, gara lam kaw na hkaja hpang na kun? Ga shadawn, moi prat na mayam ni hpe Karai Kasang tsawra myit gara hku madun ai, dai gaw nang hpe Karai Kasang tsawra ai ngu ai hpe gara hku sakse madun ai ngu ai hpe hkaja u. Moi na Israela ni a nawku daw jau lamang hte ya na Hkristan ni a nawku daw jau lamang hpe shingdaw yu u. Yesu a mungkan ga asak aprat hte shi a magam bungli hta hpring tsup wa ai myihtoi ga ni hpe ahkri ahkrai san jep u.

5. Laksan hkaja mayu ai sung htum ai Chyum Laika lam nga ai kun?

⁵ Chyum Laika hta laksan hkaja mayu ai sung htum ai lam ni nga ai kun? ngu nna Chyum jawngma nkau hpe san yu ai. Shanhte hkaja mayu ai ngu tsun ai lam nkau hpe “ Tinang Hkrai Hkaja Lamang A Matu Ginlam Ni” ngu ai lawk hta madun da ai. Yehowa Sakse Ni A Matu Hkaja Lam Matsun laika buk lang nna, dai ginlam ni hkaja ai gaw pyaw hpa re. Makam masham ngang kang wa na. “Karai Kasang hpe chye chyang ai nyan mu lu na.” (Gsh 2:4, 5) Htu shaw la lu ai sung htum ai Chyum Laika tengman lam nkau hpe bawngban yu ga.

6. (a) Lamang hte yaw shada lam hpa shai ai kun? (b) Shinggyim masha, mungkan ga hte seng ai Yehowa a yaw shada lam gaw hpa majaw “htani htana” re ai kun? (Ehpesu 3:11)

⁶ Lamang nga ai hte yaw shada lam nga ai gaw grai shai ai. Lamang ngu ai gaw, du mayu  ai shara de du hkra, gara lam hku sa na ngu nna masat da ai hte bung ai. Hkrun lam hta pat shingdang ai lam lama ma nga yang, lamang hten sai. Yaw shada lam gaw, du mayu ai shara hpe nan tsun mayu ai. Du mayu ai shara hpe tup hkrak masat da ai. Gara lam hku sa na ngu nna n masat da ai. Hkrun lam hpe ra ang ai hku galai shai mai ai. Rai yang, Karai a yaw shada lam hte seng nna, Chyum Laika hta hpa tsun da ai kun? “Htani htana yaw shada lam” hpe Yehowa tsang hte tsang madun da ai. Karai Kasang gaw, langai ngai hpe yaw shada da yang, “yaw shada lam hpring tsup wa na matu lam yawng hpe galaw” da ai majaw, hpring tsup wa na lam amyu myu nga ai majaw, galoi mung awng dang ai. (Gsh 16:4) Awng dang wa ai lam shagu htani htana grin ai. Rai yang, Yehowa a yaw shada lam gaw hpa rai kun? Yaw shada lam awng dang na matu hpa galai shai lam ni galaw ai kun?

7. Adam hte Ewa gumlau ai shaloi yaw shada lam awng dang na matu Yehowa gara hku galai shai wa ai kun? (Mahte 25:34)

⁷ “Nan kashu kasha shaprat nna mayat maya wa mu; ga ting hpe jahpring nna dai hpe up nga lu mu: . . . nsoi nsa rawng ai . . . baw mahkra a ntsa e mung a up nga mu” ngu nna tinang a yaw shada lam hte seng nna, Adam yan Ewa hpe Karai Kasang tsun ai. (Nin 1:28) Shan gumlau ai majaw, shinggyim masha ni kaw yubak mara shang wa ai raitim, Yehowa gaw shi a yaw shada lam hpe hten na ahkang n jaw wa ai. Yaw shada lam hpring tsup na kaga ladat hpe lata wa ai. Shinggyim masha hte mungkan ga a matu, shawng na yaw shada lam awng dang hkra, sumsing lamu hta mungdan langai gawde na matu kalang ta dawdan kau ai. (Mahte 25:34 hpe hti u.) Aten du yang, mungdan a lam masha ni hpe tsun dan na matu, yubak mara hte si hkrung si htan kaw na shaw la na matu, kasha alat hpe mungkan ga de tsawra myit hte dat wa ai. Dai hpang, Yesu hpe asak jahkrung ya wa nna, sumsing lamu hta Karai Kasang a mungdan hkawhkam hku nna uphkang shangun ai. Raitim, Karai Kasang yaw shada da ai gaw dai daram sha n re.

8. (a) Chyum Laika a madung lam gaw hpa rai kun? (b) Ehpesu 1:8-11 hta sanglang da ai hte maren Yehowa a kaba dik htum yaw shada lam gaw hpa rai kun? (Makawp sumla hpe yu u.)

⁸ Hkristu uphkang ai Mungdan hku nna mungkan ga a matu yaw shada lam hpe hpring tsup shangun ai aten hta, mying ningsang hpe Karai Kasang san seng chyoi pra shangun na re. Dai gaw Chyum Laika a madung lam re. Yehowa a yaw shada lam gaw n galai shai ai. Awng dang hkra galaw na ngu ama hkam da ai. (Esa 46:10, 11; Heb 6:17, 18) Aten du yang, mungkan ga gaw tsawm htap ai hparadisu byin wa na. Adam yan Ewa a kashu kasha ni hkum tsup wa na. Prat gaw “tut nawng” ngwi pyaw lu na re. (Shk 22:26) Raitim, Yehowa hta grai kaba ai yaw shada lam naw nga ai. Sumsing lamu hte ga ntsa na hkrung mahkrung yawng, kahkyin gumdin wa na matu re. Dai aten hta asak hkrung nga ai ni yawng, Yehowa hpe Awmdawm Uphkang Madu hku nna npu taw na re. (Ehpesu 1:8-11 hpe hti u.) Yaw shada lam hpring tsup wa na matu, Yehowa akyu jashawn ai ladat hpe nang n mau ai i?

9. Chyum Laika hkaja ai hku nna htawm hpang a lam kade daram chye lu ai kun?

⁹ Shaning hkying hku na ai hpang byin wa na mabyin ni a lam, Edin sun hta Yehowa tau hkrau tsun wa ai. (Nin 3:15) b Karai a yaw shada lam hpring tsup wa shangun na mabyin ni re. Ga shadawn, Abraham a amyu matu kaw na Hkristu paw pru wa na. (Nin 22:15-18)  Amyu matu a lahtin hpe lapu achye na. A. D. 33 hta, myihtoi ga a dai daw hpring tsup wa ai. (Kas 3:13-15) Satan a baw hpe “amyu matu” abrep na ngu ai hpang jahtum daw gaw, shaning 1,000 jan na ai hpang she hpring tsup wa na. (Shr 20:7-10) Satan mungkan hte Yehowa a uhpung lapran hta nga ai manghkang gaw, sawng dik htum masa de du wa ai shaloi, hpa byin na ngu ai hpe mung Chyum Laika hta tsun dan da ai.

10. (a) Htawm hpang hta hpa ni byin wa na kun? (b) Myit hpe gara hku hkyen da mai ai kun? (Lawu matsing hpe yu u.)

¹⁰ Chyum Laika hta tau hkrau tsun da ai hkrit hpa mabyin ni hpe myit yu u. Langai, “ngwi pyaw ai hte asan apan rai nga ai” ngu mungdan ni ndau shana na re. (1 Ht 5:2, 3) Shut shai ai nawku htung hpe mungdan ni gasat ai shaloi, ru tsang kaba “akajawng sha” byin hpang wa na. (Shr 17:16) “Masha Kasha gaw daru magam hte hpung shingkang kaba hte nawng lamu a sumwi hta du sa” ai hpe, shingra tara hta jan lai ai mabyin ni mu lu na re. (Mat 24:30) Sagu hte bainam garan na re. (Mat 25:31-33, 46) Satan gaw loi loi hte asum hkam na n re. Yehowa a masha ni hpe grai nju ai majaw mungdan ga daga hpe gunglau nna gasat shangun na re. Dai mugdan ga daga hpe Magoga mung na Goga ngu Chyum Laika hta shaga da ai. (Eze 38:2, 10, 11) Dai laman, aten langai ngai hta mungkan ga na ngam nga ai namman chya hkam ai ni gaw, Hkristu, lamu kasa ni hte rau jawm galaw na matu sumsing lamu de shaga la hkrum na re. Ru tsang kaba a sawng htum re ai, Hara Magedon majan hta shang lawm gasat na re. c (Mat 24:31; Shr 16:14, 16) Dai hpang, mungkan ntsa hta Hkristu A Shaning Hkying Mi Uphkang Ai Lam hpang na re.—Shr 20:6.

11. Htani htana asak aprat gaw nang hte Yehowa a hku hkau lam a matu hpa lachyum nga ai kun? (Sumla hpe mung yu u.)

¹¹ Htawm hpang shaning 1,000 daram du hkra tau hkrau myit yu u. Hpan Madu gaw, anhte a myit hta “htani htana prat dingsa nga nga na marit shangun” ai. (Hpj 3:11) Dai gaw, nang hte Yehowa a hku hkau lam a matu hpa  lachyum nga ai kun? Yehowa Hte Ni Htep Hkra Nga U (Myen) laika buk a laika man 319 hta ndai hku tsun da ai: “Shaning tsa lam, hkying lam, wan hku law ai sha n-ga, wan hkying hku asak hkrung ngut ai hpang, Yehowa a lam ya anhte chye da ai hta na grau naw chye wa na re. Raitim, n dang hti hkra law ai sharin la na mauhpa lam law law naw nga ai ngu anhte naw hkamsha nga na re. . . . Htani htana asak gaw, n dang myit lu hkra lachyum rawng nna, mahkrum madup amyu myu nga na re. Yehowa hpang sit sa ai mung ayan na shaman chyeju hpring dik htum rai nga na re.” Kabu hpa re. Yehowa a lam ndai hta grau chye wa na. Ya mung hpa ni naw chye lu na kun?

12. Matsaw ntsa a lam Chyum Laika hta hpa ni lawm ai kun? Ga shadawn jaw u?

¹² Yehowa shanu nga ai “matsaw ntsang” a lam loi mi tsun dan da ai. (Esa 33:5) Yehowa hte uhpung a sumsing lamu daw hte seng ai mauhpa lam ni mung lawm ai. (Esa 6:1-4; Dan 7:9, 10; Shr 4:1-6) Ga shadawn, ‘sumsing lamu hpaw malang wa nna, Karai Kasang a shingran hpe mu’ lu ai aten hta, Ezekela mu lu ai mauhpa lam ni hte seng nna Chyum Laika hta hti mai ai.—Eze 1:1.

13. Hebre 4:14-16 hku nga yang, sumsing lamu hta Yesu galaw nga ai lam ni hte seng nna nang gara hku hkamsha ai kun?

¹³ Hkawhkam, matsan dum chye ai Hkinjawng Agyi hku nna, sumsing lamu kaw Yesu hpa ni galaw nga ai kun? ngu ai hpe myit yu u. “Chyeju tingnyang” makau de sa nna, Yesu kaw nna akyu hpyi lu ai. “Kyin dut ai aten” hta matsan dum myit hte karum shingtau hpyi mai ai. (Hebre 4:14-16 hpe hti u.) Yehowa hte Yesu sumsing lamu kaw nna, anhte a matu galaw ya wa ai lam ni, galaw ya nga ai lam ni hpe n myit ai sha, lani mi htum mat ai baw hkum galaw. Shan a tsawra myit a lam myit ai  shaloi, nang myit hkra wa na re. Myit rawt let magam gun na matu n-gun lu wa na re.—2 Ko 5:14, 15.

14. Yehowa hte Yesu hpe chyeju dum ai lam madun mai ai kaja htum lam langai gaw hpa rai kun? (Sumla hpe mung yu u.)

¹⁴ Karai Kasang hte kasha hpe, chyeju dum ai lam madun lu ai kaja htum lam langai gaw, Karai a sakse, Yesu a sape byin wa hkra kaga ni hpe karum ya ai lam re. (Mat 28:19, 20) Karai Kasang hte Hkristu hpe chyeju dum ai majaw, hkaw tsun magam hta kasa Pawlu shakut shaja shang lawm wa ai. “Nkau mi hpe lam langai ngai hte hkye hkrang la lu hkra” shakut wa ai. (1 Ko 9:22, 23) Yehowa myit ra ai lam gaw, “masha yawng mayawng hkye hkrang la ai hkrum lu nna, teng man ai lam a chye chyang ai kaw du lu” na matu re ai hpe chye ai majaw re.—1 Tm 2:3, 4.

15. Shakawn 1:2 hku nga yang, hpa gaw ngwi pyaw shangun na kun?

¹⁵ “Yehowa a tara hta awng nga nna, Shi a tara hpe shani shana myit mang ai wa gaw” ngwi pyaw awng dang ai ngu shakawn kungdawn sara tsun ai. (Shk 1:1-3) Masha langai gaw, “sawk sagawn dat, hkaja dat, myit sumru dat rai nna, Karai a lam matsun lu na matu, grai myit katu nga ging ai” ngu dai chyum daw hte seng nna, laika buk langai (Studies in the Psalms) hta Chyum Laika ga gale ai wa Josep Rotaham tsun ai. “Chyum Laika n hti ai sha lani mi htum mat yang, dai lani mi gaw yet mat ai re” ngu nna mung matut tsun ai. Chyum Laika hta lawm ai myit lawm hpa ahkri ahkrai lam ni hpe, dang dep ai daram hkaja ai shaloi, langai hte langai gara hku matut mahkai nga ai hpe chye na wa ai shaloi, Chyum Laika hkaja ai hta pyaw wa na re. Chyum Laika hpe lam amyu myu hku chye na hkra galaw ai gaw, grai pyaw hpa re.

16. Hpang na sumhpa hta hpa lam hkaja na kun?

¹⁶ Chyum Laika kaw nna, Yehowa sharin ya ai tengman lam ni gaw, n chye na lu na daram yak ai n re. Hpang na sumhpa hta, sung htum ai Chyum Laika tengman lam langai hpe bawngban mat na re. Hebre Hkristan ni hpang de ka ai laika hta, Pawlu tsun da ai Yehowa a grau htum ai, ga shadawn htingnu a lam re. Dai lam hpe hkaja let ngwi pyaw lu u ga.