1. Lamu kasa hpa tsun ai kun? Anhte gara hku hkamsha ging ai kun?

 LAMU kasa langai tinang hpe ga wa shaga ai nga yang madat na kun? Dai ni, “amyu baw shagu, baw lakung shagu, ga amyu shagu” na masha ni hpe lamu kasa ga shaga nga ai. Hpa tsun ai kun? “Karai Kasang hpe hkrit hkungga mu, shi a hpung shingkang shagrau mu; . . . sumsing lamu hte ginding aga . . . hpe hpan tawn da ai wa hpe naw ku nga mu” ngu tsun ai. (Shr 14:6, 7) Yehowa gaw, nawku dawjau lam hpe lu ging ai, langai sha re ai tengman ai Karai re. Dai zawn Karai hpe hkik hkam ai ga shadawn nawku htingnu hta nawku lu ai gaw chyeju dum hpa re.

2. Yehowa a ga shadawn nawku htingnu ngu ai gaw hpa rai kun? (“ Ga Shadawn Nawku Htingnu Gaw Hpa N Re Ai Kun” ngu ai lawk hpe yu u.)

² Ga shadawn nawku htingnu ngu ai gaw hpa rai kun? Htingnu hte seng ai ahkri ahkrai lam hpe gara kaw tam mai na kun? Ga shadawn nawku htingnu ngu ai gaw, gaja wa nga ai htingnu n re. Yesu a gawng malai hkungga hta madung nna, Karai Kasang ra sharawng ai lam hte nawku lu hkra, lajang da ai lamang re. Yuda mung hta nga ai, tsa ban langai na Hebre Hkristan ni hpe kasa Pawlu laika ka ai shaloi, dai lam sanglang dan ai. b

3-4. Hebre Hkristan ni hte seng nna Pawlu hpa hpe myit tsang ai kun? Gara hku karum ya ai kun?

³ Yuda mung na Hebre Hkristan ni hpe, Pawlu hpa majaw laika ka ai kun? Lam lahkawng a majaw mai byin ai. Langai,  n-gun jaw mayu ai majaw re. Hkristan law law gaw, moi aten hta Yuda nawku htung kaw na ni re. Hkristan byin mat ai majaw, Yuda nawku htung ningbaw ni, shanhte hpe jahpoi asawng chye ai. Hpa majaw kun? Hkristan ni hta nawku htingnu n nga ai. Hkungga nawng na hkungri n nga ai. Hkungga nawng ya na hkinjawng mung n nga ai. Dai majaw, Hkistan ni myit kaji wa chye ai. Makam masham yawm wa chye ai. (Heb 2:1; 3:12, 14) Yuda nawku htung de bai shang na matu pyi, nkau myit chye ai.

⁴ Lahkawng, “ja ai shahpa” hte bung ai Chyum Laika sharin achyin lam ni, sung htum ai Chyum Laika sharin achyin lam ni hpe chye na na matu, Hebre Hkristan ni n shakut ai ngu Pawlu tsun ai. (Heb 5:11-14) Nkau nga yang, Mawshe a Tara hpe naw hkan sa taw ai. Jep Ai Tara hta hpyi shawn da ai shagu hkungga ni gaw, yubak mara hpe tsep kawp n raw kau ya lu ai majaw, Jep Ai Tara “yeng kau hkrum” ai lam, Pawlu sanglang dan ai. Dai hpang, sung htum ai Chyum Laika tengman lam nkau sharin ya ai. Yesu a shagu hkungga hpe madung ai, “grau kaja ai myit mada shara” a lam tsun dan ai. Dai shagu hkungga sha, “Karai Kasang hpang de sit shang lu” shangun ai.—Heb 7:18, 19.

5. Hebre Chyum Laika kaw na hpa lam hpe chye na ra ai kun? Hpa majaw kun?

⁵ Yuda nawku htung lai hta na, Hkristan nawku htung lai gaw hpa majaw grau ai lam, Hebre Hkristan ni hpe Pawlu matut sanglang dan ai. Yuda nawku htung lai gaw, “du na ra ai lam a shingna hkrai rai nga ai; dai hkum hkrang chyawm gaw, Hkristu a rai nga ai.” (Kol 2:17) Shingna ngu ai gaw, kaning re ai hkrang nga ai hpe, dan dan leng leng n mu lu ai. Dai hte maren, Yuda nawku htung lai gaw shingna sha re. Dai hta grau kaja ai nawku htung lai du wa na. Yubak mara ni raw dat hkrum na matu, Yehowa lajang da ya ai lamang hpe chye na ra ai. Rai yang she, anhte a nawku dawjau lam hpe Karai hkap la na re. “Shingna” (Yuda nawku htung lai) hte “hkum hkrang” (Hkristan nawku htung lai) a lam, Hebre Laika hta sanglang da ai hpe hkaja yu ga. Ga shadawn nawku htingnu a lam, anhte hte gara hku seng ang ai lam grau chye wa na re.

6. Sumpan sum hpe gara hku akyu jashawn ma ai kun?

⁶ Shingna. B.C 1512 hta Mawshe gap wa ai sumpan sum hpe madung nna Pawlu sanglang dan ai. (“Shingna—Hkum hkrang” chyarang hpe yu u.) “Shawa sum” hta Israela ni nawku  zuphpawng ma ai. Hkungga ni hpe nawng jau ai. (Pru 29:43-46) Nam hta shara mi kaw na shara mi htawt shagu sumpan sum hpe la mat ai. Yerusalem mare hta nawku htingnu n nga shi ai aten du hkra shaning 500 daram, sumpan sum hpe akyu jashawn wa ai. (Pru 25:8, 9; Bhk 9:22) Sumpan sum gaw, Hkristan ni lu wa na grau kaja ai lam hpe malai madun ai.

7. Ga shadawn nawku htingnu gara aten hta nga hpang wa ai kun?

⁷ Hkum hkrang. Sumpan sum gaw, ‘sumsing lamu na arai ni a shingna’ re. Yehowa a grau htum ai ga shadawn nawku htingnu hpe malai tsun ai re. Dai sum gaw, “ndai prat na matu kasi kanan rai nga ai” ngu Pawlu tsun ai. (Heb 8:5; 9:9) Dai majaw, Hebre Hkristan ni hpe Pawlu laika ka ai aten hta, ga shadawn nawku htingnu nga nga sai. A.D. 29 hta nga hpang wa ai. Dai shaning hta Yesu hkalup hkam ai. Chyoi pra ai wenyi hte namman chya hkrum ai. Ga shadawn nawku htingnu hta “hkinjawng agyi kaba” hku nna, magam gun hpang ai. c—Heb 4:14; Kas 10:37, 38.

8-9. Hebre 7:23-27 hku nga yang, Israela hkinjawng agyi ni hte Grau Htum Ai Hkinjawng Agyi Yesu a shai ai lam gaw hpa rai kun?

⁸ Shingna. Hkinjawng agyi gaw, Karai a man hta masha law law a malai galaw ya ai wa re. Sumpan sum apnawng ai aten hta, shawng nnan Israela hkinjawng hku nna, Arun hpe Yehowa aya tang ai. Raitim, “shanhte gaw si hkrung si htan e numdan ai hte n grin lu ma ai majaw, hkinjawng aya hkam la ai ni marai law law wa rai wa ma ai” ngu Pawlu tsun ai. d (Hebre 7:23-27 hpe hti u.) Hkinjawng agyi ni gaw, n hkum tsup ai majaw, tinang nan a mara ni a matu mung hkungga nawng ra ai. Israela hkinjawng agyi ni hte grau htum ai Hkinjawng Agyi Yesu Hkristu a shai ai lam gaw dai re.

⁹ Hkum hkrang. Grau htum ai Hkinjawng Agyi Yesu Hkristu gaw, “masha e n gap ai, dai Madu she gap tawn da ai naw ku sum majing hte seng ai amu gunhpai ai wa, tai nga ai.” (Heb 8:1, 2) “[Yesu] chyawm gaw, htani htana agrin nga ai majaw, shi a hkinjawng aya galai mat chye ai n rai” ngu Pawlu sanglang dan ai. “Chyoi pra ai, san seng ai, ra n rawng ai hte yubak kap ai ni hte ran ai wa” re ai majaw, Israela hkinjawng agyi ni zawn, “tinang yubak a matu . . . shani shagu hkungga nawng ya ra ai n rai.” Yuda nawku htung lai hta lawm ai hkungri hte hkungga ni, Hkristan nawku htung lai hta lawm ai hkungri hte hkungga ni gaw hpa shai ai hpe hkaja mat wa ga.

10. Magri hkungri hta shagu hkungga ni ayan na nawng taw ra ai gaw hpa hpe madun ai kun?

¹⁰ Shingna. Sumpan sum chyinghka shinggan hta, dusat hkungga ni nawng na matu, magri hkungri nga ai. (Pru 27:1, 2; 40:29) Raitim, dai hkungga ni gaw, masha ni a yubak mara ni hpe tsep kawp n raw kau ya lu ai. (Heb 10:1-4) Sumpan sum hta dusat shagu hkungga ni hpe ayan hkungga nawng taw ra ai gaw, masha ni a yubak mara hpe tsai hkra shaprai ya lu ai shagu hkungga langai ra nga ai lam hpe madun nga ai.

11. Gara hkungri hta Yesu shi hkum shi hkungga nawng wa ai kun? (Hebre 10:5-7, 10)

¹¹ Hkum hkrang. Shingyim masha ni a matu, gawng malai hkungga hku nna asak apnawng na matu, mungkan ga de Yehowa shangun dat ai hpe Yesu chye ai. (Mat 20:28) Dai majaw, Yehowa a myit ra ai hte maren galaw na matu hkalup hkam ai shaloi, tinang hkum tinang sak jaw ai. (Yhn 6:38; Gal 1:4) Ga  shadawn hkungri ntsa tinang hkum tinang hkungga nawng ai. Ga shadawn hkungri gaw, hkum tsup ai masha asak hpe hkungga nawng na matu ngu ai, Karai a “myit ra” ai lam hpe malai tsun ai re. Tinang hpe kamsham ai masha shagu gaw, mara ni tsep kawp shaprai kau hkrum na matu, tinang asak hpe “lang lata sha” Yesu hkungga nawng kau ai. (Hebre 10:5-7, 10 hpe hti u.) Ya, sumpan sum a kata hta nga ai arai ni gaw, hpa hpe malai tsun ai lam hkaja yu ga.

12. Chyoi pra ai shara de kadai shang na ahkang nga ai kun? Chyoi pra htum ai shara de kadai shang na ahkang nga ai kun?

¹² Shingna. Sumpan sum hte hpang e Yerusalem hta gap ai nawku htingnu a kata maga gaw grai bung ai. “Chyoi pra ai shara” hte “Chyoi pra htum ai shara” ngu ai gawk lahkawng nga nna, nba grang hte garan da ai. (Heb 9:2-5; Pru 26:31-33) Chyoi pra ai shara hta ja pyengdin shadun, manam pyaw ai baw nat nawng na hkungri hte madun dan ai muk ku nga ai. ‘Namman chya hkam la ai hkinjawng ni’ sha, “hkinjawng amu” galaw na matu, Chyoi pra ai shara de shang na ahkang nga ai. (Bhk 3:3, 7, 10) Chyoi pra htum ai shara hta, ja hkawp da ai ga shaka sumpu nga ai. Yehowa du nga ai hpe malai madun ai. (Pru 25:21, 22) Laning mi hta kalang, htingrai htingrat ai shani hta, hkinjawng agyi ni sha nba grang hpe lai nna, Chyoi pra htum ai shara de shang na ahkang nga ai. (Jaw 16:2, 17) Tinang hte Israela amyu ting a yubak mara hpe, htingrai htingrat ya na matu, dusat sai hpe la nna shaning shagu  shang ra ai. Ndai lam ni gaw, hpa hpe malai madun ai lam, chyoi pra ai wenyi hku nna Yehowa tsun dan ai.—Heb 9:6-8.

13. Chyoi pra ai shara hte Chyoi pra htum ai shara gaw hpa hpe malai tsun ai kun?

¹³ Hkum hkrang. Masat da ai 144,000 re ai, Hkristu a hpang hkan ai ni gaw, chyoi pra ai wenyi hte namman chya hkam nna, Yehowa hte laksan hku hkau lam nga wa ai. Yesu hte rau sumsing lamu hta hkinjawng ni hku nna magum gun ra na. (Shr 1:6; 14:1) Mungkan ntsa hta naw nga taw ai raitim, Karai a kasha ni hku nna bau la hkrum ai masa hpe sumpan sum a Chyoi pra ai shara gaw malai madun ai. (Rom 8:15-17) Yehowa shanu ai sumsing lamu hpe Chyoi pra htum ai shara gaw malai madun ai. Chyoi pra ai shara hte Chyoi pra htum ai shara hpe “nba grang” gaw garan da ai zawn, sumsing lamu de n lu lung hkra, Yesu a hkum shan hte asai gaw pat shingdang da ai. Hkum shan hte asai hpe kau da ai hpang she, ga shadawn nawku htingnu hta grau htum ai hkinjawng agyi hku nna, sumsing lamu de lu lung mat ai. Namman chya hkam ai Hkristan yawng, sumsing lamu de lung na matu lam hpaw mat ai. Namman chya hkam ai ni mung, sumsing lamu kumhpa hpe lu na matu, hkum shan hte asai hpe kau da ra ai. (Heb 10:19, 20; 1 Ko 15:50) Yesu hkrung rawt ngut ai hpang, ga shadawn nawku htingnu a Chyoi pra htum ai shara de shang mat ai. Dai hta, namman chya hkam ai ni yawng, Yesu hte sa hkrum na re.

14. Hebre 9:12, 24-26 hku nga yang, Yehowa a ga shadawn nawku htingnu na nawku dawjau lamang gaw moi Israela ni a nawku dawjau lamang hta na hpa majaw grau ai kun?

¹⁴ Yesu Hkristu a gawng malai hkungga, hkinjawng agyi hku nna magam gun nga ai lam gaw, chyoi pra ai nawku dawjau lam a madung lam re. Yehowa a dai lamang gaw, hpa majaw grau kaja ai hpe asan sha mu lu ai. Israela hkinjawng agyi gaw, dusat sai hpe la nna shinggyim masha ni gap da ai, Chyoi pra htum ai shara de shang ai. Yesu chyawm gaw, Chyoi pra dik htum shara re ai “sumsing lamu kata de nan shang wa sai.” Yehowa a man de du ai shaloi, hkum tsup ai shinggyim asak manu hpe sak jaw ai. Hkum tsup ai shinggyim asak manu ngu ai gaw, mungkan ga ntsa hta hkum tsup ai shinggyim masha langai hku nna, nga lu ai ahkang hpe tsun ai re. Raitim, anhte a “yubak hpe yeng seng kau na matu” dai ahkaw ahkang hpe Yesu asum hkam kau ai. (Hebre 9:12, 24-26 hpe hti u.) Yesu a gawng malai jahpu a majaw, anhte a yubak mara ni tsai hkra raw dat hkrum ai. Sumsing lamu myit mada lam nga ai wa raitim, mungkan ga myit mada lam nga ai wa raitim, Yehowa a ga shadawn nawku htingnu hta nawku lu ai. De a lam matut hkaja yu ga.

15. Wang shinggan pa hta kadai ni lit gun wa ai kun?

¹⁵ Shingna. Sumpan sum hta wang kum da ai pa langai nga ai. Dai shara kaw hkinjawng ni magam gun ai. Wan nat hkungga nawng na matu, magri hkungri kaba nga ai. Chyoi pra ai hkinjawng magam n gun shi yang, lagaw lata kashin na matu, magri ntsin htung nga ai. (Pru 30:17-20; 40:6-8) Hpang e gap ai nawku htingnu hta gaw, shinggan hta pa langai lawm wa ai. Dai hta, hkinjawng n re ai ni, Yehowa hpe sa nawku lu ai.

16. Ga shadawn nawku htingnu a wang shinggan pa langai hpra hta kadai ni magam gun ai kun?

¹⁶ Hkum hkrang. Sumpan sum hte nawku htingnu hta lang ai magri ntsin htung gaw, akyang lailen hta, wenyi lam hta san seng nga hkra, Hkristan yawng hpe sadi jaw nga ai. Namman chya hkam ai Hkristan ni gaw, Yesu hte rau sumsing lamu hta hkinjawng ni hku nna magam n gun shi yang, mungkan ga hta sadi dung let magam gun ai. Ga shadawn  nawku htingnu a wang kata pa hta magam gun nga ai re. Hkristu a namman chya hkam ai kanau ni hpe, sadi dung let madi shadaw nga ai mungkan ga na, “wunawng wuwa kaba” mung, “tingnyang man e ningngai nga lu” nna, “nawku Htingnu hta shani shana shi hpe daw jau nga ma ai” ngu nna mung, kasa Yawhan tsun ai. Nawku htingnu a gara shara hta kun? Wang shinggan pa hta re. (Shr 7:9, 13-15) Grau htum ai ga shadawn nawku htingnu hta, Yehowa hpe nawku na ahkang lu da ai gaw, chyeju dum hpa re.

17. Yehowa hpang de gara hkungga ni nawng na ahkang lu da ai kun?

¹⁷ Dai ni, Hkristan shagu tinang a aten, n-gun atsam, arung arai ni hte Yehowa hpe hkungga nawng na ahkang lu da ai. “Karai Kasang a mying ningsang kajai tsun hkai nga ai n-gup n-gau” hte galoi mung shakawn mai ai. Dai zawn “shakawn kungdawn hkungga hpe . . . tut nawng e nawng ya” mai ai ngu Hebre Hkristan ni hpe kasa Pawlu tsun ai. (Heb 13:15) Tinang a kaja htum hpe jaw nna, Yehowa hpe nawku lu ai ahkaw ahkang hpe manu shadan ai lam madun mai ai.

18. Hebre 10:22-25 hku nga yang, ahpa atang n galaw ging ai, n malap ging ai lam gaw hpa ni rai kun?

¹⁸ Hebre 10:22-25 hpe hti u. Hebre Hkristan ni hpe ka ai laika jahtum hta, anhte ahpa atang n sawn la ging ai, nawku dawjau lam amyu myu hpe Pawlu tsun da ai. Karai Kasang kaw akyu hpyi ai, tinang a makam masham a lam kaga ni hpe tsun dan ai, zuphpawng hta rau nawku ai, “[Karai Kasang a] nhtoi ni magang ra ai” majaw, shada da n-gun jaw ai lam ni lawm ai. Shingran Laika jahtum hta, “Karai Kasang hpe nawku u” ngu lamu kasa gaw lahkawng lang pyi tsun ai. (Shr 19:10; 22:9) Grau htum ai ga shadawn nawku htingnu hte seng ai sung htum ai Chyum Laika tengman lam ni hpe galoi mung hkum malap. Yehowa hpe nawku lu ai laksan ahkaw ahkang hpe galoi mung manu shadan mat wa ga.