1. Kasa Petru a hpang jahtum sak hkrung ten hta Yehowa hpa lit kahtap jaw wa ai kun?

 KASA Petru gaw shaning law law sadi dung let magam gun wa ai. Yesu hte rau hkaw tsun wa ai. Maigan amyu ni hpe hkaw tsun na matu lam hpaw ya wa ai. Hpang e, uphkang hpung shang langai byin wa ai. Shi si ra sana hpe chye ai A. D. 62-64 daram hta, Yehowa kaw na lit kahtap lu ai. Dai gaw, Langai Petru hte Lahkawng Petru Laika hpe ka na matu re. Petru gaw shi si ai hpang, ndai laika 2 gaw Hkristan ni hpe madi shadaw ya lu na hpe myit mada da ai.—2 Pe 1:12-15.

2. Petru a laika ni gaw hpa majaw aten hkrak rai kun?

² Dai laika 2 hpe Petru ka ai aten a lam myit yu u. Hpunau nauna ni “gung lau amyu myu” hkrum nga ai. (1 Pe 1:7) Shut ai sharin achyin lam ni, n san seng ai arawn alai ni, nawku hpung kata de du wa hkra nhkru ai masha ni galaw nga ai. (2 Pe 2:1, 2, 14) Dai hta n-ga, Yerusalem na Hkristan ni gaw “arai yawng mayawng htum mat na aten” hpe hkrum ra sana re. Dai gaw, Yerusalem mare hta Yuda uphkang lam hpe Roma hpyen dap ni jahten kau sana aten re. (1 Pe 4:7) Ya aten na chyam dinglik lam ni hpe hkamjan lu hkra, htawm hpang hta hkrum na chyam dinglik lam ni a matu jin jin rai nga hkra, hpa galaw ra na hpe chye na matu Petru a laika ni gaw Hkristan ni hpe karum ya na re. b

3. Petru a laika ni hpe hpa majaw sawn dinglik ging ai kun?

³ Tsaban langai na Hkristan ni hpang de Petru ka wa ai laika ni hpe, Chyum Laika hta Yehowa bang da ai. Anhte sharin la lu na matu re. (Rom 15:4) N san seng ai akyang lailen law la nga ai mungkan hta, anhte asak hkrung nga ra ai majaw Yehowa a  magam gun hpai na matu yak chye ai. Dai sha n-ga, Yuda uphkang lam hpe jahtum kau ai masa hta na grau sawng ai lam, kade n nga yang anhte hkrum ra sana re. Raitim, Petru a laika lahkawng yan hta lawm ai sadi jaw ga ni gaw, Yehowa a nhtoi kaba hpe matut myit mada nga na matu, masha hkrit ai myit hpe ninghkap na matu, shada da tsawra ai myit makyit rawng nga na matu karum ya na re. Dai sadi jaw ga ni gaw, sagu hpung hpe gara hku yu lanu lahku ra na hpe, myitsu salang ni chye na hkra mung karum ya na re.

4. 2 Petru 3:3, 4 hku nga yang, anhte a makam masham hpe hpa gaw gawng kya shangun chye ai kun?

⁴ Chyum myihtoi ga ni hpe n kam ai ni a lapran hta anhte asak hkrung ra ai. Jahtum du wa sana ngu tsun nga ai gaw, shaning grai na sai majaw Yehowa a nhtoi kaba galoi mung du wa na n re ngu tsun ma ai. (2 Petru 3:3, 4 hpe hti u.) Hkaw tsun bungli hta hkrum ai ni, bungli manang ni, nta masha ni kaw nna dai zawn ga ni na ai shaloi, anhte a makam masham gawng kya wa chye ai. Dai hku n byin na matu, hpa gaw karum ya lu ai hpe Petru tsun dan da ai.

5. Ndai nhkru ai mungkan a jahtum hte seng nna jaw ai ningmu nga na matu hpa gaw karum ya lu ai kun? (2 Petru 3:8, 9)

⁵ Ndai nhkru ai mungkan hpe jahtum kau na matu, Yehowa lanyan nga ai zawn rai nga chye ai. Raitim, Petru a ga ni gaw anhte hpe jaw ai ningmu nga shangun ai. Aten hte seng nna shinggyim masha ni a ningmu hte Yehowa a ningmu n bung ai ngu sadi jaw da ai. (2 Petru 3:8, 9 hpe hti u.) Shinggyim masha ni a matu shaning hkying mi gaw, Yehowa a matu lani mi sha re. Kadai mung jahten n hkrum hkra, Yehowa myit galu ya nga ai. Masat da ai nhtoi du yang, ndai nhkru ai mungkan htum mat na re. Ngam nga ai aten laman, mungkan ting na masha ni tengman lam chye wa hkra, karum ya lu ai gaw laksan ahkaw ahkang re.

6. Yehowa a nhtoi hpe gara hku nna “myit marit” nga lu ai kun? (2 Petru 3:11, 12)

⁶ Yehowa a nhtoi hpe “myit marit nga” na matu Petru n-gun jaw ai. (2 Petru 3:11, 12 hpe hti u.) Gara hku nna myit marit nga lu ai kun? Mungkan nnan hta lu wa na shaman chyeju ni hpe, shani shagu myit u. San seng ai nbung hpe marawp lu ai, n-gun rawng shangun ai malu masha ni sha lu ai, asak bai hkrung wa ai tsawra ai ni hpe hkap tau la lu ai, Chyum myihtoi ga ni hpring tsup wa ai hpe moi prat na masha ni hpe sanglang dan nga ai ngu myit yu u. Dai zawn myit ai gaw, dai aten hpe grai myit mada let la nga na matu karum ya ai. Kade n na yang, jahtum du wa na hpe kam shangun ai. Htawm hpang hte seng ai lam hpe tau hkrau chye da ai majaw, hpyi hpun ai sara ni kaw lawm mat sana n re.—2 Pe 3:17.

7. Masha hpe hkrit yang hpa byin chye ai kun?

⁷ Yehowa a nhtoi kade n nga yang du wa sana hpe chye ai majaw, kaga masha ni hpe dang lu ai made anhte kabu gara shiga hkaw tsun ai. Raitim, kalang lang n tsun gwi ai baw byin chye ai. Hpa majaw kun? Masha hkrit ai myit a majaw re. Ga shadawn, Petru mung Yesu rim hkrum ai shana hta, tinang gaw Yesu a sape re ai ngu n tsun gwi ai. Yesu hpe n chye ai ngu nna pyi, chyahkring hkring tsun wa ai. (Mat 26:69-75) Raitim, hkrit myit hpe lu ninghkap wa nna, “shanhte a jahkrit ai hpe mung, hkum hkrit nga myit” ngu nna pyi lu tsun wa ai. (1 Pe 3:14) Masha hkrit ai myit hpe ninghkap lu ai lam, Petru a ga ni gaw sakse madun nga ai.

8. Masha hkrit ai myit hpe ninghkap lu na matu hpa gaw karum ya lu ai kun? (1 Petru 3:15)

⁸ Masha hkrit ai myit hpe ninghkap na matu hpa gaw karum ya lu ai kun? “Dai Madu hpe  madu a shatai nga na matu, nanhte a myit masin hta e Hkristu hpe san da nga mu” ngu Petru tsun ai. (1 Petru 3:15 hpe hti u.) Hpa hpe tsun mayu ai kun? Yesu Hkristu Hkawhkam byin nga sai, hpung dagu ahkang aya lu da sai ngu ai hpe dum nga na matu tsun nga ai re. Kabu gara shiga hkaw tsun na matu ahkaw ahkang lu tim, n tsun gwi ai, hkrit ai rai yang Hkawhkam Yesu hpe dum dat u. Yesu gaw sumsing lamu hta, lamu kasa sen wan hku shing grup nna, hkaw dung nga ai hpe shingran yu dat u. “Sumsing lamu hta e mung, ginding aga hta e mung, up hkang na ahkang nlang” lu da ai, “lamu ga aprat htum hkra” anhte hte rau “dinggrin anga nga na” ngu ai hpe mung myit yu u. (Mat 28:18-20) Tinang a makam masham hpe sanglang dan na matu “tut e ajin nga mu” ngu nna mung Petru n-gun jaw ai. Jawng hta, bungli hta, gara shara hta mi rai rai, ahkaw ahkang lu shagu sakse hkam mayu ai kun? Rai yang, gara aten hta sakse hkam ra na lam hpe myit yu u. Hpa tsun na hpe tau hkrau shajin da u. Nden marai nga na matu akyu hpyi u. Masha hkrit ai myit hpe ninghkap lu hkra Yehowa karum ya na hpe kam u.—Kas 4:29.

9. Kalang mi hta Petru tsawra myit madun na matu gara hku hprai wa ai kun? (Sumla hpe mung yu u.)

⁹ “Nanhte shada da tsaw ra nga mu, ngu nna tara ningnan ngai nanhte hpe jaw da ma de ai:  ngai nanhte hpe tsaw ra ma de ai zawn, nanhte mung shada da tsaw ra nga na rai myit dai” ngu Yesu tsun ai shaloi Petru nga ai. (Yhn 13:34) Dai majaw, kaga ni hpe tsawra myit gara hku madun ra na hpe chye ai. Raitim pyi, masha hpe hkrit ai myit a majaw, maigan amyu hpunau nauna ni hte n lu n sha gwi mat ai. Dai hpe “hpyi hpun” ai lailen re ngu kasa Pawlu tsun ai. (Gal 2:11-14) Pawlu sharin shaga ai hpe Petru hkap la ai. Shut ai lam kaw na sharin la wa ai. Petru a laika 2 yan hta, hpunau nauna ni hpe tsawra ai myit nga ai daram sha n-ga, tsawra ai lam madun ra ai ngu n-gun jaw da ai.

10. Kadai ni sha “kahpu kanau ni hpe . . . tsaw ra” ai zawn tsawra myit madun lu ai kun? (1 Petru 1:22)

¹⁰ Hpunau nauna ni hpe “myit ting hte shada da tsaw ra nga mu” ngu Petru tsun ai. (1 Petru 1:22 hpe hti u.) “Ding man ai ga [tengman ai tara, NWT] hpe madat mara” ai wa sha, dai zawn tsawra myit nga lu ai. Dai tengman ai tara hta “Karai Kasang masha myi man n tau ai” ngu ai sharin achyin lam mung lawm ai. (Kas 10:34, 35) Nawku hpung hta hpunau nauna nkau mi hpe sha tsawra myit madun ai gaw, shada da tsawra mu ngu ai Yesu a matsun ga hpe n hkan sa ai lam re. Anhte grau hkau ai, grau tsawra ai ni nga ai gaw n shut ai. Yesu hta mung grau tsawra ai sape nga wa ai. (Yhn 13:23; 20:2) Raitim, hpunau nauna yawng hpe “kahpu kanau ni hpe . . . tsaw ra” ai zawn tsawra na matu shakut ging ai ngu Petru sadi jaw ai. Anhte gaw mungkan grup nta masha ni rai nga ai majaw re.—1 Pe 2:17.

11. “Myit ting hte shada da tsaw ra” ai ngu ai gaw hpa hpe tsun mayu ai kun?

¹¹ “Myit ting hte shada da tsaw ra nga mu” ngu Petru n-gun jaw ai. Lawu lahta ga ni hpe hti yu yang, tsawra na zawn n rai yang pyi, shakut nna “myit ting” hte tsawra na matu tsun nga ai re. Ga shadawn, hpunau nauna langai anhte hpe masin pawt hkra, myit machyi hkra galaw ai ngu saga. Teng sha nga yang, tsawra na matu hkum tsun, matai pyi htang hkrup chye ai. Raitim, Yehowa gaw matai htang ai hpe n ra ai lam, Yesu kaw na Petru sharin la wa ai. (Yhn 18:10, 11) “N hkru ai a matu n hkru ai bai n tai na hte, roi rip ai a matu roi rip ai bai n tai ai sha, shaman ya na mahtang gaw, a daw nga mu” ngu Petru tsun ai. (1 Pe 3:9) Anhte hta tsawra ai myit makyit rawng yang, tinang hpe myit machyi hkra galaw ai ni hpe pyi, matsan dum na myit tau ya na re.

12. (a) Shada da tsawra ai myit makyit rawng yang hpa galaw na matu shadut ya ai kun? (b) Manu Dan Ai Kahkyin Gumdin Lam Shaman Chyeju Hpe Matut Nga Hkra Galaw U video hta madun da ai hte maren hpa galaw na matu nang shakut mayu ai kun?

¹² “Shada da tsaw ra ai myit makyit rawng” nga yang, mara langai, lahkawng hpe sha n-ga, “yubak mara law law” hpe pyi raw kau ya lu na ngu Petru tsun ai. (1 Pe 4:8) Mara raw ai lam hte seng nna, lai wa sai shaning loi mi hta Yesu sharin ya wa ai hpe bai dum mat ai rai na re. Hpunau wa hpe “sanit lang du hkra” mara raw ya ra na ngu tsun ai shaloi, shi hkum shi shawang myit grai kaba ai ngu Petru sawn la wa na masa nga ai. Raitim, “sanit shi e htam sanit lang” ngu ai shaloi, kade lang ngu masat da ai lam n nga ai sha, mara raw ya na matu Yesu sharin ya ai. Dai gaw anhte sharin la ra na lam re. (Mat 18:21, 22) Yesu mara raw shangun ai zawn, mara raw ya na matu yak taw ai nga yang, myit hkum daw. N hkum tsup ai ni re ai majaw, mara raw na matu yak ai aten ni nga chye ai. Raitim, mara raw na matu, bai htuk hkra galaw na matu grai ahkyak ai. c

13. Hpunau nauna ni hpe n-gun jaw na matu myitsu salang ni hpa majaw aten n nga chye ai kun?

¹³ Yesu bai hkrung rawt wa ai hpang, “nye a sagu ni hpe rem nga u” ngu htet wa ai hpe Petru galoi n malap ai. (Yhn 21:16) Nang gaw myitsu salang rai yang, dai htet da ai ga gaw nang hte mung seng ai. Raitim, aten n nga ai majaw, sagu rem ai lit hpe kangka hkra galaw na matu yak chye ai. Myitsu salang ni gaw, shawng nnan hku nna tinang a dinghku a matu malu masha, nga shara, nawku dawjau lam ni hpe lanu lahku ra ai. Hkaw tsun bungli hta tinang nan myit rawt let woi awn ra ai. Nawku zuphpawng ni, zuphpawng kaba lit ni a matu hkyen lajang ra ai, shang lawm ra ai. Nkau nga yang, Tsi Rung Matut Mahkai Komiti, Buga Gawgap Bungli Dap ni hta lit lu ai. Gaja nan bungli law ai.

14. Sagu hpung hpe rem ai hta myitsu salang ni hpe gara lam gaw n-gun lu shangun ai kun? (1 Petru 5:1-4)

¹⁴ Petru gaw “Karai Kasang a sagu hpung hpe a rem nga mu” ngu myitsu salang manang ni hpe n-gun jaw ai. (1 Petru 5:1-4 hpe hti u.) Myitsu salang ni e, hpunau nauna ni hpe nanhte tsawra ai, lanu lahku mayu ai hpe anhte chye ai. Raitim, bungli grai law ai majaw, grai pu ba ai majaw lit hpe kangka hkra n lu galaw ai ngu kalang lang hkamsha chye ai. Hpa galaw lu ai kun? Tinang a hkamsha lam hpe Yehowa kaw hpaw tsun dan u. “Langai ngai galaw daw nga a yang gaw, Karai Kasang jaw da ai n-gun lagaw hte maren, galaw daw nga u ga” ngu Petru tsun ai. (1 Pe 4:11) Hpunau nauna ni hkrum nga ai mayak mahkak ni gaw, ndai nhkru ai mungkan hta gara hku mung n lu hparan ai lam ni byin chye ai. Nang karum ya lu ai hta na, “hpung rem agyi” Yesu Hkristu grau karum ya lu ai hpe dum u. Ya mung, mungkan nnan hta mung karum ya lu ai. Hpunau nauna ni hpe tsawra na matu, lanu lahku na matu, “hpung hta lawm ai ni a man e ningli npawt tai nga” na matu sha, nang hpe Yehowa hpyi shawn ai re.

15. Myitsu salang langai gaw sagu hpung hpe gara hku rem ai kun? (Sumla hpe mung yu u.)

¹⁵ Sagu hpung hpe rem na matu kade daram ahkyak ai hpe, aten na na magam gun wa ai myitsu salang Wiliyam chye ai. Kobit-19 kap bra ana byin hpang ai shaloi, Wiliyam hte kaga hpunau ni gaw, lit ang ai uhpung kaw na langai hpra hpe bat shagu matut mahkai ai. “Hpunau nauna law law gaw langai hkrai nga ai ni re. Langai hkrai sha re ai majaw, n kaja ai myit mang  lam ni shang wa na matu grai loi ai” ngu tsun ai. Manghkang hkrum nga ai hpunau nauna ni hkamsha lam hpe tsun dan ai shaloi, Wiliyam atsawm madat ya ai. Hpa myit tsang nga ai, hpa ra kadawn nga ai hpe chye hkra galaw ai. Website hta nga ai laili laika ni, video ni tam nna n-gun jaw ai. “Shawoi na hta ya aten gaw hpunau nauna ni hpe grau lanu lahku ra ai. Yehowa a lam chye wa na matu, sagu nnan ni hpe anhte shakut nna tam ai. Dai sha n-ga, nga da sai sagu ni mung tengman lam hta matut nga lu hkra shakut nna lanu lahku ra ai” ngu tsun ai.

16. Petru a laika ni kaw na sharin la lu ai lam ni hpe gara hku tatut hkan sa mai ai kun?

¹⁶ Petru a laika 2 kaw na, sharin la lu ai lam nkau hpe sha anhte bawngban wa ai. Rawt jat ra ai daw langai ngai hpe nang sadi hkrup na re. Ga shadawn, mungkan nnan hta lu na shaman chyeju ni a lam hpe grau myit mayu wa ai kun? Bungli hta, jawng hta, gara shara hta rai rai sakse hkam na matu bandung tawn mayu mat ai kun? Hpunau nauna ni hpe kraw lawang kata na tsawra ai lam madun lu ai ladat ni hpe tam mu ai kun? Myitsu salang ni, Yehowa a sagu ni hpe myit lawm let, myit rawt let lanu lahku na matu dawdan da ai kun? Tinang hkum tinang dingman ai hku san jep yu nna, gawng kya lam ni hpe mu yang myit hkum daw. “Dai madu gaw . . . matsan dum lama ai Madu” re. Anhte hpe karum ya mayu ai. (1 Pe 2:3, JCLB) “Karai Kasang gaw, shi hkum nan, nanhte hpe shakup shatsup na, shangang shakang na hte n-gun sharawng na ma rin dai” ngu Petru hkrak tsun da ai.—1 Pe 5:10.

17. Asum n jaw ai sha matut shakut yang, Yehowa shaman ya ai hpe hkap la yang hpa akyu lu na kun?

¹⁷ Yesu a makau hta nga na matu pyi n ging dan ai ngu Petru hkamsha ga ai. (Luk 5:8) Raitim, “Madu hte hkye hkrang la ai wa Yesu Hkristu a htani htana prat dingsa na mungdan de shang wa lu na” ahkang lu wa ai. (2 Pe 1:11) Laksan ahkaw hkang re. Nang mung Petru zawn asum n jaw ai sha matut shakut na, Yehowa shaman shakyang ya ai hpe hkap la na nga yang, htani htana asak kumhpa lu na re. “Hkye hkrang la lu ai, ngu ai, kam sham ai a akyu hpe hkam la lu” na re.—1 Pe 1:9.