1. Nga law law lu rim hkra mauhpa amu hte Yesu karum ya wa ai shaloi Petru gara hku hkamsha ai kun?

 PETRU shana tup nga hkwi tim, langai mi mung n lu ai. Raitim, “hka sung ai shara de naw sit nna, nga ja na matu nanhte a sumgawn ni hpe jahkrat mu” ngu Yesu tsun ai. (Luk 5:4) Nga lu na ngu n shadu tim, Yesu tsun ai hte maren sumgawn jahkrat ai. Dai majaw, sumgawn pyi je na daram lu rim ai. Yesu mauhpa amu galaw dan ai hpe chye nna, Petru hte manang ni “mau mahka mat ma ai.” Dai majaw, “Madu e, ngai kaw na wa mat u; ngai gaw yubak kap ai masha rai nga nngai” ngu Petru kalang ta tsun ai. (Luk 5:6-9) Yesu a makau hta nga na matu pyi n ging dan ai ngu hkamsha mat ai rai na re.

2. Petru a lam hkaja ai gaw hpa majaw akyu nga ai kun?

² “Yubak kap ai masha” ngu Petru tinang hkum tinang tsun ai gaw jaw ai. Myit malai lu na lam ni kalang lang tsun hkrup, galaw hkrup wa ai ngu Chyum Laika hta tsun da ai. Na a masa mung Petru hte bung nga ai kun? Aten ni na mat ai pyi, kaja ai akyang langai nga wa na matu, n kaja ai akyang langai hpe shamat na matu tsam mari naw shakut nga ra ai kun? Rai yang, ndai lam hpe myit yu u: Petru a shut ai lam ni hpe Chyum Laika hta Yehowa n ka shalawm da ya tim mai ai. Raitim, anhte sharin la lu na matu ka shalawm da ya ai. (2 Tm 3:16, 17) Anhte zawn gawng kya lam, hkamsha lam nga ai Petru a lam hkaja ai shaloi, anhte hkum tsup na matu Yehowa n myit mada ai hpe chye na wa na re. Gawng kya ai lam nga tim, asum n jaw  ai sha matut shakut na matu Yehowa myit mada ai lam hpe mung chye na wa na re.

3. Hpa majaw asum n jaw ai sha matut shakut ging ai kun?

³ Asum n jaw ai sha matut shakut na matu hpa majaw ahkyak ai kun? Matut shakut yang, rawt jat wa chye ai majaw re. Ga shadawn, masha langai tingse atsawm chye dum na matu shaning hku na chye ai. Dai laman, chyahkring hkring shut chye ai. Raitim, matut shaman mat yang rawt jat wa na re. Kung mat yang pyi shut ai aten ni gaw naw nga na re. Raitim, asum n jaw ai sha grau grau chye hkra shaman ai. Anhte mung gawng kya ai lam langai hpe shamat lu sai ngu shadu tim, kahtap nna naw galaw hkrup chye ai. Myit malai lu na lam ni tsun hkrup, galaw hkrup chye ai. Raitim, asum n jaw yang, grau grau rawt jat wa hkra Yehowa karum ya na re. (1 Pe 5:10) Ya, asum n jaw ai sha matut shakut wa ai Petru a lam hpe bawngban yu ga. Petru shut ai lam ni galaw hkrup tim, Yesu matsan dum myit madun ai lam gaw, Karai a magam matut gun na matu anhte hpe shadut ya lu ai.

4. Luka 5:5-10 hta, tinang a lam Petru gara hku tsun dan ai kun? Yesu gara hku shalan shabran ya ai kun?

⁴ “Yubak kap ai masha” ngu Petru hpa majaw tsun ai, hpa mara ni galaw hkrup da ai hpe gaw Chyum Laika hta n tsun da ai. (Luka 5:5-10 hpe hti u.) Mara kaba ni galaw hkrup da ai majaw rai na re. ‘Ngai dai daram kaja ai masha mung n re ai wa’ ngu Petru myit tsang nga ai hpe Yesu chye ai. Raitim, sadi dung na masha rai na hpe mung chye ai. Dai majaw, “hkum hkrit” ngu tsawra myit hte tsun dat ai. Yesu kam ya ai majaw Petru a prat galai shai mat ai. Hpang de, Petru hte kanau Andre gaw, nga hkwi ai bungli hpe kau da nna Yesu a hpang hkan ma ai. Karai a shaman chyeju hpe lam amyu myu hte hkamsha lu ai.—Mrk 1:16-18.

5. Hkrit myit hpe tawt lai nna, Yesu a saw shaga ai lam hpe hkap la ai majaw Petru hpa shaman chyeju ni lu wa ai kun?

⁵ Hkristu a hpang hkan ai majaw, manu n dawdan lu ai mahkrum madup ni Petru lu ai. Machyi masha ni hpe Yesu shamai shatsai ya ai, nhkru ai nat ni hpe shaden kau ai, si mat ai ni hpe pyi bai jahkrung sharawt ya ai hpe mu wa ai. b (Mat 8:14-17; Mrk 5:37, 41, 42) Karai Mungdan a Hkawhkam Yesu hpe mauhpa shingran hte mu wa ai hpe mung Petru galoi malap na n re. (Mrk 9:1-8; 2 Pe 1:16-18) Yesu a hpang n hkan yang, dai lam ni hpe mu lu na  n re. N kaja ai hkamsha lam hpe ninghkap lu wa ai, dai zawn shaman chyeju ni lu wa ai majaw grai kabu na re.

6. Gawng kya lam ni hpe Petru loi loi hte ninghkap lu wa ai kun? Sanglang dan u.

⁶ Dai lam ni hpe mu da, na da tim pyi, gawng kya lam ni hpe Petru matut ninghkap nga ra ai. Ga shadawn nkau mi hpe myit yu u. Chyum myihtoi ga hta tsun da ai hte maren, tinang gara hku jam jau nna si ra na lam Yesu tsun dan ai shaloi, dai zawn hpa majaw tsun ai ngu Yesu hpe mara shagun ai. (Mrk 8:31-33) Kadai gaw grau kaba htum re ai hpe Petru mung, kaga kasa ni mung chyahkring hkring dang rang hkat ma ai. (Mrk 9:33, 34) Yesu n si shi ai shana hta Petru gaw, nhtu hpe alawan la nna kahtam dat ai shaloi marai langai a na di mat ai. (Yhn 18:10) Dai shana hta sha, hkrit ai majaw Petru gaw shi a manang Yesu hpe n chye ai ngu masum lang nyet kau ai. (Mrk 14:66-72) Dai hpang grai yawn let hkrap ai.—Mat 26:75.

7. Yesu hkrung rawt ai hpang Petru hpa ahkaw ahkawng ni lu ai kun?

⁷ Myit daw nga ai kasa hpe Yesu asum n jaw kau ai. Bai hkrung rawt wa ai shaloi, tinang hpe Petru tsawra nga ding yang re ai hpe sakse madun na matu ahkaw ahkang jaw ai. Sagu ni hpe rem na matu lit jaw ai. (Yhn 21:15-17) Jaw ai lit hpe gun hpai na matu Petru jin jin rai nga ai. Dai majaw mung Pentikoti poi hta Yerusalem mare de du nga ai re. Chyoi pra ai wenyi hte namman jaw hkrum ai shawng nnan na hpung hta Petru lawm ai re.

8. Antioki mare hta Petru hpa mara kaba galaw ai kun?

⁸ Namman jaw hkrum ai Hkristan byin ngut ai hpang hta pyi, Petru hta gawng kya ai lam ni naw nga ai. A. D. 36 hta matu n kadoi da ai maigan masha Korneli chyoi pra ai wenyi hte namman jaw hkrum ai shaloi Petru nga nga ai. “Karai Kasang masha myi man n tau” ai lam, maigan amyu ni hpe Hkristan nawku hpung shang byin na ahkang jaw ai lam dan leng ai madi madun lam re. (Kas 10:34, 44, 45) Dai majaw, maigan amyu ni hte kalang mung rau n sha ga wa tim, hpang hta myit asan sha hte lu sha ai. (Gal 2:12) Raitim, Yuda masha hte maigan masha ni rau n sha ging ai ngu Yuda Hkristan nkau hkam la ma ai. Dai zawn Hkristan nkau, Antioki mare de du wa ai shaloi, maigan hpunau ni hte Petru n sha mat sai. Yuda Hkristan ni shi hpe nju mat na tsang ai majaw rai na re. Dai zawn, shawng de amyu mi, hpang de amyu mi galaw ai hpe kasa Pawlu mu ai shaloi, masha ni a man hta Petru hpe sharin shaga dat ai. (Gal 2:13, 14) Shut ai lam galaw hkrup tim, Petru asum n jaw ai sha bai shakut ai. Hpa gaw karum ya ai kun?

9. Yawhan 6:68, 69 gaw Petru sadi dung ai lam gara hku madun ai kun?

⁹ Petru gaw sadi dung ai. Hpa lam a majaw mung Yesu a hpang n hkan ai sha n nga ai. Ga shadawn, kalang mi hta, Yesu tsun ai hpe sape ni n chye na ai. (Yawhan 6:68, 69 hpe hti u.) Bai n san yu ai, sanglang dan na hpe n la ai sha, sape law law Yesu hpe kau da mat ai. Petru gaw, “htani htana asak hte seng ai mungga” ni Yesu kaw sha nga ai hpe hkap la nna matut sadi dung ai.

10. Petru hpe kam ai lam Yesu gara hku madun ai kun? (Sumla hpe mung yu u.)

¹⁰ Yesu gaw Petru hpe n kabai da ai. Shi a ginding aga hpang jahtum shana hta, Petru hte kaga kasa ni shi hpe kau da nna hprawng mat na hpe Yesu chye ai. Raitim, Petru myit malai lu nna bai wa na, matut sadi dung na ngu ai hpe kam ai lam tsun ai. (Luk 22:31, 32) Petru a “wenyi gaw let nga ai, hkum shan mahtang  n-gun n ja nga” ai lam chye na ya ai. (Mrk 14:38) Dai majaw mung, tinang hpe n chye ai ngu nyet da ai Petru hpe Yesu matut hkap la wa ai. Hkrung rawt ai hpang, Petru langai sha nga taw ai aten hta hkum shadan dan ai. (Mrk 16:7; Luk 24:34; 1 Ko 15:5) Grai myit daw nga ai Petru n-gun lu mat na re.

11. Yehowa madi shadaw ya na hpe kam hkra Petru hpe Yesu gara hku karum ya wa ai kun?

¹¹ Yehowa lanu lahku ya na hpe kam hkra Petru hpe Yesu karum ya wa ai. Hkrung rawt ai hpang, Petru hte kasa ni hpe mauhpa lam hte nga law law lu hkra karum ya wa ai. (Yhn 21:4-6) Ndai mauhpa amu hpe mu ai shaloi, tinang a ra kadawn ai lam ni hpe Yehowa aloi sha madi shadaw ya lu ai hpe kam mat na re. Dai sha n-ga, “mungdan . . . hpe shawng tam” ai ni hpe Yehowa madi shadaw ya na ngu ai Yesu a ga ni hpe mung dum mat na re. (Mat 6:33) Dai majaw, nga hkwi ai bungli hpe n re ai sha, hkaw tsun bungli hpe prat hta shawng tawn wa ai. A. D. 33 Pentikoti poi shani hta nden marai rawng let sakse hkam ai majaw, hkying hku law ai masha ni kabu gara shiga hkap la wa hkra karum ya lu wa ai. (Kas 2:14, 37-41) Samari hte maigan amyu ni hpe mung Hkristu a sape byin wa hkra karum ya ai. (Kas 8:14-17; 10:44-48) Shingdu labau amyu myu kaw na masha ni nawku hpung de du wa hkra, Petru hpe Yehowa laklai ai hku akyu jashawn wa ai.

12. Gawng kya lam langai hpe matut nna ninghkap ra nga yang, Petru a kasi ningli gaw gara hku karum ya lu ai kun?

¹² Yehowa gaw anhte matut shakut lu hkra karum ya lu ai. Gawng kya ai lam langai hpe aten tup ninghkap nga ai nga yang, shawng de sa na matu yak chye ai. Tinang a gawng kya lam gaw, Petru a gawng kya lam hta na grau yak ai mung rai na re. Raitim, asum n jaw ai sha matut shakut na matu Yehowa n-gun jaw ya lu ai. (Shk 94:17-19) Ga shadawn, hpunau langai gaw, tengman lam n chye shi yang, shaning na na la shada nga sha wa ai. Raitim, prat hpe tsep kawp galai shai nna, Chyum Laika hte maren asak hkrung ai. Kalang lang, n kaja ai ra marin ai myit ni naw pru wa ai. Asum n jaw ai sha matut shakut lu hkra hpa gaw karum ya ai kun? Shi ndai hku tsun ai: “Yehowa n-gun jaw ai. Chyoi pra ai wenyi karum ya yang . . . , tengman lam hta matut hkawm lu ai hpe chye wa ai. . . . Ngai gara zawn masha re ai hpe chye nga ninglen Yehowa akyu jashawn  wa ai. Ya mung, gawng kya lam ni hpe mu tim pyi, matut n-gun jaw nga ai.”

13. Kasa 4:13, 29-31 hku nga yang, Petru hpe gara hku kasi la lu ai kun? (Sumla hpe mung yu u.)

¹³ Chye wa sai hte maren, masha hpe hkrit ai majaw Petru gaw shut ai lam ni hpe kalang sha n-ga galaw hkrup wa ai. Raitim, nden marai lu na matu akyu hpyi ai majaw, nden marai nga wa ai. (Kasa 4:13, 29-31 hpe hti u.) Anhte mung hkrit ai myit hpe tawt lai lu ai. Nambat 2 mungkan majan laman, Jamani hta nga ai ramma hpunau Hot a lam hpe myit yu u. Dai aten hta, “Hai Hitala” ngu shakram ma ai. “Hkye hkrang la ai madu Hitala” ngu lachyum nga ai. Dai zawn shakram ai gaw shut ai hpe Hot chye tim, sara, sarama ni, jawng manang ni hpe hkrit ai majaw, kalang lang shakram hkrup ai. Kanu kawa ni chye mat ai shaloi Hot hpe n pawt ai. De a malai, nden marai jaw na matu Yehowa kaw rau akyu hpyi ya ai. Kanu kawa ni karum ya ai majaw, Yehowa hpe Hot kamhpa ai majaw, ngang ngang tsap lu ai nden marai nga wa ai. “Yehowa galoi n kau da ai” hpe chye wa ai. c

14. Myit daw ai lam hkamsha nga ai ni hpe sagu rem ni gara hku n-gun jaw lu ai kun?

¹⁴ Anhte hpe Yehowa hte Yesu n kau da ai. Yesu hpe nyet kau ai hpang, grai ahkyak ai dawdan lam hpe Petru jahkrat ra wa ai. Hkristu a hpang hkan na, n hkan na ngu ai hpe re. Petru a makam masham n yawm mat hkra Yehowa kaw Yesu akyu hpyi ya ai. Shi dai zawn akyu hpyi da ya ai lam, hpang de mung hpunau ni hpe n-gun jaw ya na hpe kam ai lam Petru hpe Yesu tsun ai. (Luk 22:31, 32) Yesu a ga ni hpe bai myit dum shagu Petru grai n-gun lu na re. Anhte grai ahkyak ai dawdan lam jahkrat ra ai aten hta mung, matut sadi dung lu  hkra, Yehowa gaw shi a sagu rem ni hpe akyu jashawn nna n-gun jaw na re. (Ehp 4:8, 12) Shaning law law myitsu salang galaw wa ai hpunau Paw gaw, dai zawn n-gun jaw na matu shakut ai. Grai myit daw ai ngu hkamsha ai ni hpe, tengman lam de Yehowa gara hku lau la wa ai hpe myit yu na matu hpunau Paw n-gun jaw ai. Yehowa a ngang kang ai tsawra myit a majaw, shanhte hpe galoi n kau da ai lam kam hkra tsun dan ai. “Myit daw ai masha law law hpe Yehowa karum ya ai majaw, asum n jaw ai sha bai shakut wa ai hpe mu ga ai” ngu tsun ai.

15. Mahte 6:33 teng ai lam Petru hte hpunau Hot a mabyin gaw gara hku madun ai kun?

¹⁵ Petru hte kaga kasa ni ra kadawn ai hpe Yehowa madi shadaw ya wa ai. Anhte mung prat hta Karai a magam hpe shawng tawn yang, ra kadawn ai lam ni hpe Yehowa madi shadaw ya na re. (Mat 6:33) Nambat 2 mungkan majan ngut mat ai shaloi, shawng hta tsun wa ai hpunau Hot gaw, ningshawng galaw na matu myit ai. Raitim, ja gumhpraw yakhkak ai majaw, aten hpring magam hta matut shang lawm na matu, tinang hkum tinang lu madi shadaw na kun? ngu ai hpe myit tsang ai. Raitim, Yehowa hpe chyam yu na ngu myit nna, ninghtawn hpung kawan sa kawan ai bat hta bat mi tup hkaw tsun bungli hta shang lawm ai. Bat mi htum na mahka hta mying n tsun dan mayu ai wa kaw na sumbu langai hpe hpung kawan sa jaw ai majaw grai mau mat ai. Dai hta lawm ai gumhpraw gaw shata loi na na ningshawng galaw lu hkra law ai. Dai gaw Yehowa madi shadaw ya na ngu ai hpe kam shangun ai. Dai hku nna shi a prat ting mungdan hpe shawng tawn wa ai.—Mal 3:10.

16. Petru a lam hte Petru a laika ni a lam hpe hpa majaw hkaja ging ai kun?

¹⁶ Pru mat wa na matu hpyi shawn ga tim, tinang kaw na Yesu kalang mung n pru mat ai majaw, Petru grai kabu na re. Petru hpe sadi dung ai kasa byin hkra, Hkristan ni a matu kasi kaja ai wa byin hkra, Yesu shaman shakyang ya wa ai. Dai shaman shakyang ai lam kaw nna, sharin la lu ai lam nkau hpe tsa ban 1 na nawku hpung ni de shagun ai laika 2 hta Petru ka wa ai. Dai laika 2 gaw, Chyum Laika hta lawm ai majaw, anhte mung sharin la lu ai. Kaga hpa ni naw sharin la mai na kun? Gara hku tatut hkan sa mai ai kun? ngu ai hpe hpang na sumhpa hta bawngban na re.