1-2. Samson a lam hpa majaw hkaja ging ai kun?

 SAMSON ngu na dat ai shaloi hpa hpe myit hkrup ai kun? Grai n-gun ja ai wa re ngu myit hkrup na re. Samson gaw hkra machyi lam ni byin shangun ai dawdan lam ni hpe jahkrat wa ai wa mung re. Yehowa gaw, Samson a sadi dung ai lam hpe myit maju jung wa nna, anhte akyu lu na matu Chyum Laika hta shi a lam hpe ka shalawm da ya ai.

² Yehowa gaw Israela amyu hpe karum na matu, mauhpa lam ni ngut kre awng dang lu hkra Samson hpe akyu jashawn wa ai. Samson si nna shaning law law na ai hpang, Yehowa gaw ngang kang ai makam masham nga ai ni a jahpan hta, Samson a mying hpe ka shalawm na matu kasa Pawlu hpe shatsam ya wa ai. (Heb 11:32-34) Samson a kasi ningli gaw anhte hpe n-gun jaw ya lu ai. Yakhkak ai masa ni hta pyi, Yehowa hpe shi kamhpa wa ai. Ndai sumhpa hta, Samson kaw na sharin la lu ai lam, shi a kasi ningli gaw anhte hpe n-gun jaw ya lu ai lam ni hpe bawngban na re.

3. Samson gara lit lu ai kun?

³ Samson shangai ai aten hta Israela ni hpe Hpilisti ni uphkang ai, shanhte hpe adip arip galaw ai. (Trg 13:1) Hpilisti ni grai mazut ai hku uphkang ai majaw, Israela ni yakhkak hkrum wa ai. Yehowa gaw “Israela hpe Hpilisti masha ni a lata na hkye la” na matu Samson hpe lata ai. (Trg 13:5) Grai yak ai bungli re. Dai lit hpe ngut kre lu na matu, Samson gaw Yehowa hpe kamhpa ra na re.

4. Hpilisti ni a lata kaw na Samson lawt hkra Yehowa gara hku karum ya ai kun? (Tara Agyi 15:14-16)

 ⁴ Yehowa hpe kam ai lam, shi madi shadaw ya na ngu ai hpe kam ai lam madun ai Samson a mabyin langai hpe yu ga. Kalang mi hta, Hpilisti hpyen hpung gaw Samson hpe rim na matu Lehi shara de sa wa ai. Dai shara gaw, Yuda ginwang hta rai na re. Yuda masha ni hkrit ai majaw, Samson hpe hpyen ni a lata de ap kau ai. Samson hpe sumri nnan lahkawng hte gyit nna Hpilisti ni hpang de shaga sa ai. (Trg 15:9-13) Raitim, “Yehowa a wenyi shi kaw aja awa du nna,” gyit da ai sumri ni di mat ai. Dai hpang, shi gaw “lawze shakap katsing mu hkrup” ai majaw hta la nna, Hpilisti masha 1, 000 hpe kayat sat kau ai.—Tara Agyi 15:14-16 hpe hti u.

5. Yehowa hpe kamhpa ai lam Samson gara hku madun ai kun?

⁵ Lawze shakap katsing hpe Samson hpa majaw lang wa ai kun? Dai gaw gasat ai shaloi lang chye ai laknak gaw n re. Shi gara laknak hpe lang ai raitim, Yehowa hpe kamhpa yang awng dang na hpe chye ai. Dai majaw, Yehowa hpe kamhpa nna, lu ai laknak hte gasat kau ai re. Yehowa mung, Samson dang hkra karum ya ai.

6. Lit ni lu ai shaloi Samson a mabyin kaw na hpa sharin la lu ai kun?

⁶ Yehowa jaw ai lit gaw, kade daram yak ai zawn raitim, anhte gun hpai lu hkra shi n-gun jaw na re. N shadu da ai ladat ni hte pyi karum ya lu ai. Dai majaw, Karai Kasang hpe matut kamhpa u. Samson hpe n-gun jaw ya ai Yehowa gaw nang hpe mung jaw ya lu ai.—Gsh 16:3.

7. Yehowa a lam matsun tam na matu ahkyak ai lam madun dan ai ga shadawn langai tsun dan u.

⁷ Uhpung a gawgap bungli ni hta lawm ai ni gaw, Yehowa hpe kamhpa ai lam madun ai. Moi de, hpunau ni gaw Nawku Htingnu ni hte kaga htingnu ni a hkrang hpe sumla soi nna gap ai. Raitim, hkalup hkam ai grai law wa ai majaw, uhpung hta galai shai lam ni galaw ra ai. Yehowa lam matsun ya na matu, woi awn ai hpunau ni akyu hpyi ya ai. Htingnu ni mari la nna, gram lajang ai ladat nnan ni hpe chyam  yu wa ai. “Ladat nnan ni hte maren galaw na matut nnan hta n loi ai” ngu mungkan grup gawgap bungli masing hta shaning law law galaw wa ai hpunau Robat tsun ai. “Shaning law law lang wa ai ladat ni hte grai shai ai. Raitim, hpunau ni hta galai shai ai hte maren galaw mayu ai myit nga ai. Yehowa shaman chyeju jaw nga ai gaw dan dawng ai” ngu tsun ai. Myit ra ai lam ngut kre na matu Karai lam matsun ya nga ai madi madun lam law law naw nga ai. Dai majaw, ‘Yehowa a matu kaja htum ladat hte magam gun lu hkra shi a lam matsun ngai tam ai kun? Tinang gaw galai shai ra ai lam nga yang galai shai ai kun?’ ngu san jep ging ai.

8. Kalang mi hta Samson hka hpang kara ai shaloi hpa galaw ai kun?

⁸ Samson a kaga mauhpa amu ni hpe myit yu u. Langai hkrai sha hkanghkyi langai hpe sat kau ai. Ashkelon mare masha 30 hpe sat ai. (Trg 14:5, 6, 19) Yehowa n karum ya yang, dai hpe n lu galaw ai lam Samson chye ai. Hpilisti masha 1, 000 hpe kayat sat ngut ai hpang, hka hpang gara ai aten Samson galaw wa ai hpe yu yang dai hpe chye lu ai. Shi hpa galaw ai kun? Hka lu na matu shi hkum shi kamhpa na malai, Yehowa kaw karum hpyi ai.—Trg 15:18.

9. Samson hpyi shawn ai shaloi Yehowa hpa galaw ya ai kun? (Tara Agyi 15:19)

⁹ Mauhpa lam hte hka lu hkra galaw ya ai hku nna Samson a akyu hpyi ga hpe Yehowa mahtai jaw ai. Hka lu ngut ai hpang, Samson “nsa awai lu nna bran wa ai.” (Tara Agyi 15:19 hpe hti u.) Shaning law law na ai hpang, Tara Agyi Laika hpe myihtoi Samuela ka ai aten du hkra ndai hka hpawk naw nga ai. Yehowa hpe kamhpa yang, ra nga ai aten hta karum ya na ngu ai hpe Israela ni dai hka hpawk hpe mu shagu dum nga na re.

10. Yehowa kaw na karum shingtau lu mayu yang hpa galaw ra na kun? (Sumla hpe mung yu u.)

¹⁰ Tinang hta hpa atsam mi nga tim, Karai a magam hta hpa hpe mi lu galaw tim, karum shingtau a matu Yehowa hpe matut kamhpa ra ai. Npu taw ra ai. Yehowa hpe kamhpa yang she, jet ai awng dang lam lu na ngu ai hpe hkap la ra ai. Yehowa lajang ya ai hka lu ngut ai hpang, Samson n-gun hpring wa ai zawn, anhte mung Yehowa lajang ya ai wenyi nshat ni kaw na akyu lu hkra galaw ra ai. Rai yang, wenyi lam hta n-gun hpring wa na re.—Mat 11:28.

11. Yehowa a karum shingtau hpe gara hku la mai ai kun? Mahkrum madup tsun dan u.

¹¹ Grai zingri zingrat hkrum ai Rasha mungdan kaw na hpunau Aleksi a lam hpe yu yu u. Hkamjan lu hkra hpa gaw karum ya ai kun? Hpunau yanla gaw, nawku dawjau lam, Chyum Laika hkaja ai lam hpe ayan galaw ai. “Tinang hkrai hkaja ai lam galaw na matu, shani shagu Chyum Laika hti na matu ngai shakut ai. Jahpawt shagu, nye madu jan hte shani shagu na Chyum daw hti ai, akyu hpyi ai” ngu tsun ai. Hpa sharin la lu ai kun? Tinang hkum tinang kamhpa na malai, Yehowa hpe kamhpa ra ai. Gara hku nna kun? Makam masham ngang kang hkra galaw ai hku nna re. Hkaw tsun ai, zuphpawng lung ai, akyu hpyi ai, Chyum Laika hkaja ai hpe ayan galaw yang, makam masham ngang wa na re. Yehowa gaw shi hpe matut nawku lu hkra karum ya na re. Samson hpe n-gun jaw wa ai zawn, anhte hpe mung n-gun jaw na re.

12. Samson gara shut ai dawdan lam jahkrat hkrup ai kun? Delila hte hku hkau lam gaw moi na hku hkau lam ni hte gara hku shai ai kun?

¹² Samson mung anhte zawn n hkum tsup ai ai majaw, kalang lang shut ai dawdan lam  ni jahkrat hkrup ai. Dai majaw, grai sawng hkra hkra machyi ai. Tara agyi hku nna aten na na magam gun ngut ai hpang, “Sorek kadit e nga ai, Delila mying ai num langai mi hpe tsaw ra” mat ai. (Trg 16:4) De a shawng hta, Hpilisti numsha hpe hkungran na matu myit ga ai. Raitim, dai aten hta gaw, Hpilisti ni hpe gasat na ahkaw ahkang lu hkra, Yehowa matsun ya ai majaw hkungran ai re. Hpang hta mung, Gaza mare na shawa num a nta hta yup ai. Dai masa hta, Yehowa a karum shingtau lam hte dai mare na Hpilisti ni hpe gasat na matu Samson ahkaw ahkang lu mat ai. (Trg 14:1-4; 16:1-3) Delila chyawm gaw Israela amyu rai na re. Shi hte sa hkau ai majaw, Hpilisti ni hpe gasat na matu ahkaw ahkang lu na n re.

13. N kaja ai masa de du mat hkra Samson hpe Delila hpa galaw wa ai kun?

¹³ Hpilisti ni jaw ai gumhpraw hpe Delila la nna, Samson hpe sadi run kau ai. Delila hpe Samson hpa majaw ntsen ai myit n nga wa ai kun? Delila hpa galaw na ngu ai hpe atsawm n chye ginhka mat ai du hkra grai tsawra mat ai kun? Gara hku mi raitim, Delila shani shagu aput ai majaw, shi hpa majaw n-gun ja ai lam tsun dan kau ai. Yawn hpa re. Dai zawn shut ai lam a majaw, Samson gaw n-gun mung yawm, Karai a myi man mung aten ladaw mi daram sum mat ai.—Trg 16:16-20.

14. Delila hpe kam hkrup mat ai majaw Samson hpa byin mat ai kun?

¹⁴ Yehowa hpe kamhpa na malai, Delila hpe kam hkrup ai majaw, jam jau hkrum ai. Hpilisti ni Samson hpe rim mat nna, myi baw kau ya ai. Gaza mare hta htawng jahkrat kau ai. Moi gaw, Gaza mare chyinghka hpe Samson jahten kau wa ai. Ya gaw, dai mare hta htumrin rin ai bungli galaw ra mat sai. Samson hpe  rim lu ai gaw, Dagon Hpara a majaw ngu nna Hpilisti ni shadu ai. Dai majaw, shanhte a Hpara Dagon a matu poi kaba galaw ya ai. Shanhte hpe “ginsup dan” na matu Samson hpe htawng kaw na woi wa shangun ai. N-gun ja ai Samson gaw kaya hkrum ai.—Trg 16:21-25.

15. Yehowa hpe kamhpa ai lam Samson gara hku bai madun ai kun? (Tara Agyi 16:28-30) (Makawp sumla hpe yu u.)

¹⁵ Samson grai shut wa tim, matut n shut hkra shakut ai. Hpilisti ni hpe gasat na ngu ai Karai jaw ai lit hpe ngut kre hkra galaw na matu ahkaw ahkang tam ai. (Tara Agyi 16:28-30 hpe hti u.) “Hpilisti masha ni hpe lang lata mahtai htang lu n ga” ngu Yehowa kaw hpyi shawn ai. Samson a akyu hpyi ga hpe Yehowa mahtai jaw ai. N-gun bai jaw ai. Dai majaw, Hpilisti ni hpe sat kau lu wa ai. Moi sat wa ai hta na, ndai kalang grau law ai.

16. Samson shut ai lam kaw na hpa sharin la mai ai kun?

¹⁶ Shut ai lam a majaw hkra machyi ai lam ni hpe Samson hkamsha ra tim, Yehowa a myit ra ai lam hpe n galaw ai sha n nga ai. Anhte mung shut ai lam ni galaw hkrup ai majaw sharin shaga hkrum ai shaloi, ahkaw ahkang ni sum mat ai shaloi asum n jaw ging ai. Yehowa gaw mara raw ya na matu jin jin re ai hpe dum ra ai. (Shk 103:8-10) Shut ai lam ni galaw ga wa yang pyi, Samson zawn Yehowa a matu asung naw shang ai.

17-18. Maike a mahkrum madup gaw nang hpe hpa majaw n-gun lu shangun ai kun? (Sumla hpe mung yu u.)

¹⁷ Ramma hpunau Maike a lam hpe myit yu u. Aten galu ningshawng mung rai nna, magam tau mung re. Raitim, shut ai lam galaw hkrup ai majaw, nawku hpung kaw ahkaw ahkang ni sum kau ra ai. Shi ndai hku tsun ai: “Yehowa a matu ayan na amu law nga ai re. Ya gaw, galaw na bungli hpa mung n nga mat ai zawn re. Ngai hpe Yehowa kau da sai ngu nna gaw kalang mung n myit ai. Raitim, Karai Kasang hte hku hkau lam naw kaja na kun? Nawku hpung hta shawoi na zawn hpring tup naw lawm lu na kun? ngu ai hpe gaw tsang ai.”

¹⁸ Maike asum n jaw ai. “Karai Kasang hte hku hkau lam bai kaja wa na matu myit maju jung ai. Ayan akyu hpyi ai. Chyum Laika hkaja ai. Myit sawn sumru ai” ngu tsun ai. Aten du ai shaloi, nawku hpung kaw ahkaw ahkang  ni bai lu wa ai. Ya, aten galu ningshawng hte myitsu salang hku nna magam gun nga sai. “Laksan hku nna, myitsu salang ni jaw ai shalan shabran lam gaw, ngai hpe Yehowa tsawra nga ai ngu ai hpe kam shangun ai. San seng ai myit nsam hte magam bai gun lu sai. Jet ai myit malai lu yang, Yehowa mara raw ya ai ngu ai hpe chye mat sai” ngu tsun ai. Anhte mung, shut ai lam ni galaw wa yang pyi, shakut nna sharai na, Yehowa hpe matut kamhpa na nga yang, Yehowa matut akyu jashawn na, shaman chyeju jaw na hpe kam mai ai.—Shk 86:5; Gsh 28:13.

19. Samson a mahkrum madup gaw nang hpe hpa majaw n-gun lu shangun ai kun?

¹⁹ Samson a mabyin nkau hpe ndai sumhpa hta hkaja wa ai. Samson mung n hkum tsup ai wa re. Raitim, shut ai lam galaw hkrup ai hpang, Karai a magam n gun ai sha n nga ai. Asum n jaw ai. Yehowa mung Samson hpe n kau da ai. Hpilisti masha law law hpe sat lu hkra Samson hpe bai lang ai. Laklai ai makam masham nga ai wa hku nna mu ai. Hebre daw kaba 11 hta lawm ai makam masham nga ai kasi ningli ni kaw na langai hku nna ka shalawm shangun ai. Tinang nawku ai Karai gaw gawngkya mat ai aten hta, n-gun jaw mayu ai Karai re ai lam chye lu ai gaw n-gun lu hpa re. Dai majaw, Samson zawn “ngai e dum e law; . . . n-gun shaja e law” ngu nna Yehowa kaw hpyi shawn ga.—Trg 16:28.