1, 2. 2018 hta gara mabyin gaw anhte hpe laklai ai hku kahkyin gumdin ya na kun? Hpa majaw kun? (Ndai sumhpa shawng na sumla hpe yu u.)

MUNGKAN ting na wan hku law ai masha ni gaw 2018, March 31 hta laning mi kalang galaw ai lamang langai hpe sa lung na re. Jan shang ngut ai hpang, Yehowa Sakse ni hte kaga masha ni gaw, anhte a matu jaw wa ai Yesu a shagu hkungga hpe myit dum na matu arau hkrum zup na re. Myit Dum Poi galaw ai shaning shagu gaw, mungkan ting na kaga poi ni hta grau nna masha ni hpe mauhpa lam hku kahkyin gumdin ya ai.

² Wan hku law ai masha ni gaw mungkan ting hta dai laklai ai lamang hpe galaw nga ai majaw, Yehowa hte Yesu gaw grai kabu na re. Chyum Laika hta ndai hku ka da ai: “Masha mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na mung, kadai ndang hti lu ai wunawng wuwa kaba” gaw “tingnyang hta dung nga ai anhte a Karai Kasang hte Sagu Kasha gaw, hkye hkrang la ai lam rai nga ai law, nga nna nsen kaba hte jahtau ma ai.” (Shingran 7:9, 10) Yehowa hte Yesu galaw ya ai lam ni hpe, masha law law gaw  hkungga ai lam madun ai majaw, Myit Dum Poi shagu gaw grai mau na zawn rai nga ai.

3. Ndai sumhpa hta gara ga san ni a mahtai hpe mu lu na kun?

³ Ndai sumhpa hta ndai ga san mali a mahtai hpe mu lu na re: (1) Myit Dum Poi kaw nna gaja wa akyu lu na matu gara hku hkyen lajang ra ai kun? (2) Myit Dum Poi gaw Karai a masha ni yawng hpe gara lam hku nna kahkyin gumdin ya ai kun? (3) Karai a masha ni a lapran kahkyin gumdin lam grau nna rawt jat hkra ngai hpa galaw lu ai kun? (4) Hpang jahtum galaw na Myit Dum Poi nga na kun? Nga yang galoi kun?

4. Myit Dum Poi lung na matu hpa majaw ahkyak ai kun?

⁴ Anhte myit Dum Poi lung na matu hpa majaw ahkyak ai kun? Zuphpawng ni lung ai gaw Yehowa hpe nawku dawjau ai lam langai re. Laning mi laman galaw ai zuphpawng ni kaw nna, ahkyak dik htum zuphpawng hpe shakut nna sa lung ai masha langai hpra hpe Yehowa hte Yesu mu na gaw teng sha re. Myit Dum Poi lung na matu, tsep kawp n mai byin ai masa hta lai nna, anhte dai kaw du nga ai hpe Yehowa hte Yesu hpe mu shangun mayu ai. Zuphpawng ni gaw anhte a matu grai ahkyak ai hpe madun ai nga yang, Yehowa a “jahpan laika” hta anhte a amying matut nna nga na matu anhte shi hpe jahpan jaw nga ai re. Dai jahpan laika hpe “asak laika” nga nna mung shaga ai. Yehowa htani htana asak jaw mayu ai ni yawng a amying, dai asak laika hta lawm ai.—Malahki 3:16; Shingran 20:15.

5. Myit Dum Poi n du shi ai bat ni hta, gara hku nna “makam masham hta de nga myit dai kun, tinang dai chyam yu” mai na kun?

⁵ Myit Dum Poi n du shi ai bat ni hta, anhte gaw aten la nna akyu hpyi ai hte Yehowa hte hku hkau lam gara hku ngang kang hkra galaw mai ai lam hpe atsawm sumru mai ai. (2 Korinhtu 13:5 hpe hti u.) Kasa Pawlu gaw Hkristan ni hpe ndai hku tsun ai: “Makam masham hta de nga myit dai kun, tinang dai chyam yu mu.” Anhte gara hku galaw na kun? Tinang hkum tinang ndai hku san mai ai: ‘Yehowa gaw, shi a yaw shada lam hpe galaw na matu lata da ai uhpung gaw ndai hpung sha re ai hpe ngai teng sha kam ai kun? Kabu gara shiga hpe kaja dik ai lam hku ngai hkaw tsun nna sharin ya nga ai kun? Satan uphkang ai aten htum wa mahka re ai hpang jahtum na nhtoi hta, anhte asak hkrung nga ai hpe gaja wa kam ai ngu nye a asak hkrung lam gaw madun nga ai kun? Yehowa hte Yesu hpe ngai shawng nnan nawku wa ai aten na zawn, ya mung naw kam hpa nga ai kun?’ (Mahte 24:14; 2 Timohti 3:1; Hebre 3:14) Dai ga san ni a mahtai hpe myit sumru nga ai gaw, anhte kaning re ai masha re ai hpe matut sakse madun na matu karum ya lu na re.

6. (a) Gara lam hku nna sha anhte htani htana asak lu na kun? (b) Myitsu salang langai gaw shaning shagu Myit Dum Poi a matu gara hku hkyen lajang ai kun? Nang mung dai zawn gara hku hkyen lajang mai na kun?

⁶ Myit Dum Poi gaw hpa majaw grai ahkyak ai lam hpe sanglang da ai sumhpa ni hpe hti nna sumru ai gaw, Myit Dum Poi a matu hkyen lajang mai ai lam langai re. (Yawhan 3:16; 17:3 hpe hti u.) Yehowa hpe chye chyang nna shi a Kasha Yesu hpe kam sham ai lam langai hku nna sha htani htana asak lu la na re. Myit Dum Poi hpe hkyen lajang na matu anhte gaw laksan hkaja ai lamang hpe galaw ra ai. Dai  zawn galaw ai gaw Yehowa hte Yesu hpang de, grau ni htep wa hkra karum ya lu ai. Myitsu salang langai gaw dai hku galaw wa ai shaning grai na sai. Yehowa hte Yesu anhte hpe madun wa ai tsawra myit a lam hte Myit Dum Poi a lam lawm ai Sin Langchyi sumhpa ni hpe, shi mahkawng wa ai shaning ni grai na sai. Myit Dum Poi garai n hpang shi ai bat ni hta, shi gaw dai sumhpa ni hpe bai hti nna, dai aten gaw hpa majaw grai ahkyak ai lam hpe atsawm sumru ai. Kalang lang sumhpa nnan langai, lahkawng hpe bai kahtap mahkawng ai. Myit Dum Poi aten hta hti na Chyum Daw ni hpe mung atsawm hti nna sumru ai. Dai hku galaw ai majaw, shaning shagu lam nnan ni bai chye wa ai ngu dai myitsu salang tsun ai. Ahkyak htum gaw, dai hkaja ai lamang a majaw Yehowa hte Yesu hpe shi grau tsawra wa ai. Dai zawn hkaja na nga yang, nang mung Yehowa hte Yesu hpe grau grau tsawra wa na re. Shanhte galaw ya ai lam ni hpe grau chyeju dum wa nna Myit Dum Poi kaw nna akyu ni mung grau lu wa na re.

7. (a) Madu A Shana Shat Sha Poi nnan galaw ai shana hta Yesu gara hku akyu hpyi wa ai kun? (b) Yesu a akyu hpyi ga hpe Yehowa mahtai jaw ai lam hpa gaw madun nga ai kun?

⁷ Madu A Shana Shat Sha Poi nnan galaw ai shana hta, Yesu gaw laksan akyu hpyi ga langai hpyi wa ai. Shi hte shi a Kawa hta nga ai manu dan ai kahkyin gumdin lam hte seng nna akyu hpyi wa ai. Shi a sape ni yawng, dai zawn kahkyin gumdin lam nga na matu mung Yesu akyu hpyi wa ai. (Yawhan 17:20, 21 hpe hti u.) Yehowa gaw shi tsawra ai Kasha a akyu hpyi ga hpe teng sha mahtai jaw wa ai. Kaga zuphpawng ni hta grau nna, Myit Dum Poi gaw Yehowa Sakse ni hpe kahkyin gumdin ya ai lam asan sha mu lu ai. Mungkan ting hta, mungdan n bung ai, hpraw nsam n bung ai wan hku law ai masha ni gaw dai shani hta arau zuphpawng ma ai. Yehowa gaw shi a Kasha hpe shangun dat ai lam shanhte kam ai hpe madun nga ai re. Shara nkau mi hta rai yang, amyu bawsang n bung ai ni, makam masham zuphpawng hta arau zuphpawng ai gaw grai laklai ai lam langai re. Dai hku galaw na nga yang, masha ni gaw n htap htuk ai ngu hkamsha ma ai. Raitim, Yehowa hte Yesu gaw dai hku n hkamsha ai. Myit Dum Poi hta anhte kahkyin gumdin nga ai gaw, shan hpe ngwi pyaw shangun ai.

8. Yehowa gaw Ezekela hpe hpa shiga tsun ai kun?

⁸ Yehowa a masha ni re ai anhte ni gaw ndai lam hku nna kahkyin gumdin nga ai hpe n mau ga ai. Yehowa gaw dai hku byin wa na lam Ezekela hku nna tsun da ai. Ezekela hpe hpun chyen lahkawng la na matu tsun ai. Langai gaw “Yuda” a matu hte langai gaw “Yosep” a matu re. Dai lahkawng hpe la nna arau tawn da yang langai sha byin wa na re nga nna Ezekela hpe Yehowa tsun ai. (Ezekela 37:15-17 hpe hti u.) 2016, July Sin Langchyi a “Laika Hti Ai Ni Hpang De Na Ga San” hta ndai hku sanglang da ai: “Shi a amyu sha ni gaw Ga Sadi Tawn Da Ai Mungdan de bai wa nna amyu sha langai hku kahkyin gumdin na ngu myihtoi Ezekela hku nna myihtoi htoi da ai. Hpang jahtum na nhtoi hta Karai Kasang hpe nawku ai ni gaw amyu sha langai hku nna kahkyin gumdin na re ai hpe mung dai myihtoi ga gaw tsun nga ai.”

9. Myit Dum Poi shagu hta, Ezekela myihtoi htoi da ai hte maren kahkyin gumdin ai lam hpe gara hku mu lu ai kun?

⁹ 1919 nnan hpang ai aten hta, Yehowa gaw namman chya hkrum ai ni hpe bai kahkyin gumdin ya nna bai ninghtan shinggyin na matu galaw wa ai. Shanhte gaw “Yuda” a matu hpun chyen hte bung ai. Dai hpang, mungkan ga hta htani htana asak hkrung na myit mada lam nga ai ni gaw, namman chya hkrum ai ni hte matut mahkai ai lam lani hte lani law wa ai. Mungkan ga hpe myit mada nga ai ni gaw, “Yosep” a matu hpun chyen hte bung ai.  Yehowa gaw dai hpun chyen lahkawng hpe shi a lata hta “langai sha shatai na” ngu ga sadi jaw da ai. (Ezekela 37:19) Shi gaw namman chya hkrum ai ni hte “sagu kaga” hpe “sagu hpung langai” byin hkra galaw ai. (Yawhan 10:16; Zahkaria 8:23) Dai ni na aten hta, dai hpung lahkawng gaw kahkyin gumdin let Yehowa hpe arau nawku nga ai. Ezekela myihtoi ga hta tsun da ai Karai a “shangun ma Dawi” ngu ai gaw Yesu Hkristu hpe tsun ai re. Shi gaw dai hpung lahkawng a Hkawhkam re. (Ezekela 37:24, 25) Myit Dum Poi galaw ai shaning shagu hta, Yesu si ai hpe myit dum na matu anhte hkrum zup ai shaloi, Ezekela hku nna myihtoi htoi da ai hte maren dai hpung lahkawng gaw kahkyin gumdin nga ai hpe mu lu ai. Raitim, Karai a masha ni a kahkyin gumdin lam hpe grau nna rawt jat na matu, anhte langai hpra gaw gara hku galaw mai ai kun?

10. Karai Kasang a masha ni a lapran kahkyin gumdin ai lam rawt jat hkra anhte gara hku galaw lu ai kun?

¹⁰ Karai a masha ni a lapran kahkyin gumdim lam rawt jat na matu galaw mai ai shawng nnan na ladat gaw hpa rai a ta? Shagrit shanem ai myit nga hkra shakut ai re. Mungkan ntsa hta Yesu nga ai shaloi, sape ni hpe myit shagrit shanem na matu tsun wa ai. (Mahte 23:12) Mungkan hta nga ai masha ni gaw, shanhte hkum shanhte kaga ni hta grau nna ahkyak ai ngu shadu chye ai. Raitim, anhte hta shagrit shanem ai myit nga yang, hpung hpe woi awn nga ai hpunau ni hpe hkungga nna shanhte matsun ai lam ni hpe anhte hkan sa na re. Dai hku galaw ai hku nna sha, hpung hpe kahkyin gumdin lu ai. Ahkyak htum gaw, anhte shagrit shanem let nga yang Karai Kasang ra sharawng  na re. Shi gaw “gumrawng ai ni hpe shadang da timung, myit gyip ai ni hpe chyeju jaw” ai majaw re.—1 Petru 5:5.

11. Myit Dum Poi hta lang ai muk hte tsabyi jahku a lam myit ai gaw, kahkyin gumdin lam rawt jat na matu anhte hpe gara hku karum ya ai kun?

¹¹ Kahkyin gumdin ai lam rawt jat na matu nambat lahkawng hku nna anhte galaw lu ai lam gaw hpa rai kun? Muk hte tsabyi jahku a lachyum hpe atsawm myit sumru ai hku nna re. Myit Dum Poi garai n du shi ai aten hte, laksan hku nna dai shana hta anhte sumru ging ai. (1 Korinhtu 11:23-25) Matsi n lawm ai muk gaw, Yesu anhte a matu shagu hkungga hku nna jaw ai hkum tsup ai shi a hkum hpe malai hku nna tsun ai re. Tsabyi jahku gaw shi a asai hpe malai hku nna tsun ai re. Raitim, anhte gaw dai madung lam hpe chye ai daram sha n rai ging ai. Yesu a gawng malai hkungga hta tsawra myit madun ai lam lahkawng lawm ai hpe mung anhte dum ra ai. Yehowa gaw shi a Kasha hpe anhte a matu jaw nna, Yesu mung shi a asak hpe anhte a matu sharawng awng let jaw wa ai. Shan a tsawra myit hpe anhte myit ai shaloi, shan hpe grau tsawra wa ai. Anhte yawng hta nga ai, Yehowa hpe tsawra ai myit gaw, anhte a kahkyin gumdin ai lam hpe ngangkang shangun ai.

12. Hkawhkam wa hte shi a mayam ni a mabyin hku nna, kaga ni a mara hpe Yehowa raw shangun mayu ai lam Yesu gara hku tsun dan wa ai kun?

¹² Kahkyin gumdin ai lam rawt jat na matu, nambat masum hku nna galaw ra ai lam gaw hpa rai kun? Kaga ni a mara hpe tsep kawp raw ya ai hku nna re. Anhte dai hku galaw yang, Yesu a shagu hkungga hku nna anhte a yubak mara ni hpe Yehowa raw kau ya ai hpe chyeju dum ai lam madun ai re. Mara raw ya na matu hpa majaw ahkyak ai hpe chye na hkra, Yesu gaw hkawhkam hte mayam ni a mabyin hpe tsun dan wa ai. Chyeju hte Mahte 18:23-34 hpe hti nna tinang hkum tinang ndai hku san yu u: ‘Yesu sharin ya ai lam hpe hkan galaw na matu ndai Chyum daw gaw ngai hpe shadut ya ai kun? Nye a hpunau nauna ni hpe myit galu let chye na ya ai kun? Ngai hpe hkra machyi hkra galaw ai wa hpe ngai teng sha mara raw ya ai kun?’ Masha nkau mi a mara gaw kaga ni hta na grau kaba ai. N hkum tsup ai masha ni hku nna mara nkau mi hpe raw ya na matu grai yak chye ai. Raitim, Yesu tsun wa ai mabyin gaw, Yehowa anhte hpe galaw shangun mayu ai lam hpe sharin ya ai. (Mahte 18:35 hpe hti u.) Teng sha myit malai lu ai hpunau nauna ni a mara hpe anhte n raw ya ai nga yang, Yehowa gaw anhte a mara hpe n raw ya na lam Yesu danleng hkra tsun dan nga ai. Dai gaw grai ahkyak ai lam re ai majaw atsawm myit sumru ra ai. Manu dan ai kahkyin gumdin lam hpe matut nna nga hkra makawp maga na matu, Yesu sharin ya wa ai hte maren kaga ni hpe anhte mara raw ya ra ai.

13. Kaga ni hte simsa hkra nga yang kahkyin gumdin ai lam hpe gara hku rawt jat wa shangun ai kun?

¹³ Kaga ni hpe mara raw ya yang, anhte gaw hpunau nauna ni hte matut simsa nga na re. Langai hte langai simsa let kahkyin gumdin nga na matu, anhte shakut ra ai nga nna kasa Pawlu tsun ai. (Ehpesu 4:3) Myit Dum Poi garai n du shi ai laman hte laksan hku nna dai shana hta, nang gaw kaga ni hpe gara hku kanawn mazum nga ai hpe atsawm myit yu u. Tinang hkrai ndai hku san u: ‘Ngai hpe shut hpyit ai masha hpe, ngai matut nna masin n pawt nga sai lam kaga ni chye ai kun? Ngai gaw simsa ai lam hte kahkyin gumdin ai lam rawt jat hkra shakut nna galaw nga ai hpe masha ni mu nga ai kun?’ Dai ahkyak ai ga san ni hpe atsawm myit yu u.

14. “Tsawra myit hpe madun nna shada da hkam mana nga mu” ngu ai hpe anhte gara hku madun mai ai kun?

¹⁴ Kahkyin gumdin ai lam hpe rawt jat na matu nambat mali hku nna galaw ra ai lam gaw hpa rai kun? Yehowa madun wa ai tsawra myit hpe kasi la ai hku nna re. (1 Yawhan 4:8) “Hpunau nauna ni hte simsa hkra galaw ra na gaw re. Raitim, shanhte hte hku hkau hkra nga ra na gaw n re le” nga nna anhte galoi mung myit  na n re. Dai hku myit ai nga yang, “tsaw ra myit hpe madun nna shada da hkam mana nga mu” nga nna Pawlu tsun ai ga hpe anhte hkan sa nga ai n re. (Ehpesu 4:2, JCLB) “Shada da hkam mana nga mu” ngu nna sha Pawlu n tsun wa ai. “Tsaw ra myit hpe madun nna” ngu tsun da ai hpe dum u. Tsawra myit lawm ai hte n lawm ai gaw shai nga ai. Anhte a nawku hpung hta masha amyu myu nga tim, shanhte yawng hpe Yehowa lau la ai re. (Yawhan 6:44) Shanhte hpe tsawra na matu kaja ai lam ni nga ai hpe Yehowa mu ai majaw re. Hpunau nauna ni gaw Karai a tsawra myit hpe lu ging ai nga yang, anhte a tsawra myit gaw shanhte hte n gingdan ai ngu gara hku lu tsun na kun? Yehowa anhte hpe tsawra shangun mayu ai hku shanhte hpe sharawng awng let tsawra ging ai.—1 Yawhan 4:20, 21.

15. Hpang jahtum lang na Myit Dum Poi nga na hpe anhte gara hku chye lu na kun?

¹⁵ Lani mi hta, anhte ni gaw hpang jahtum lang galaw na Myit Dum Poi hpe lung ra na re. Anhte gara hku chye lu ai kun? Yesu si ai hpe myit dum ai lam shaning shagu galaw ai hte seng nna, “dai Madu a si hkam ai lam, shi bai du ai du hkra, nanhte tsun shana ya myit” ngu nna namman chya hkrum ai ni hpe Pawlu tsun wa ai. (1 Korinhtu 11:26) Jahtum aten hte seng nna Yesu a myihtoi ga hta, shi “du sa” na lam hte seng nna mung tsun da ai. Ru tsang kaba du wa hkyen ai aten hte seng nna, shi ndai hku tsun wa ai: “Masha Kasha a kumla gaw, sumsing lamu hta e dan pru na ra ai; shaloi jang ga ningtsa na amyu baw shagu ni sharung shayawt let dai Masha Kasha gaw daru magam hte hpung shingkang kaba hte nawng lamu a sumwi hta du sa ai hpe, mu lu na ma ra ai. Shi a lamu kasa ni hpe, pahtau kaba hte shi shangun dat nna, shanhte gaw nbung mali maga na, lamu htum ai de nna lamu htum ai du hkra, shi a lata la sai ni hpe jahpawng la na ma ru ai.” (Mahte 24:29-31) Mungkan ga hta nga ai namman chya hkrum ai Hkristan yawng hpe sumsing lamu de shalun la ai shaloi, Yesu gaw “shi a lata la sai ni hpe jahpawng la na” re. Ru tsang kaba hpang ngut nna, Hara Magedon majan nbyin shi yang, dai lam byin wa na re. Dai majan hta, Yesu gaw 144,000 hte arau ga ningtsa na hkawhkam ni hpe, majan gasat nna awng padang dip la na re. (Shingran 17:12-14) Hpang jahtum ngam ai namman chya hkrum ai wa hpe shaga la na matu, Yesu n du shi ai aten hta galaw na Myit Dum Poi gaw hpang jahtum lang re.

16. Dai ning na Myit Dum Poi lung na matu hpa majaw dawdan da ai kun?

¹⁶ 2018, March 31 hta galaw na Myit Dum Poi lung na matu dawdan da u. Yehowa a masha hku nna matut kahkyin gumdin lu hkra, tinang galaw ra na lit hpe galaw lu hkra, karum ya na matu shi kaw akyu hpyi u. (Shakawn 133:1 hpe hti u.) Lani mi hta, anhte ni gaw hpang jahtum lang na Myit Dum Poi hpe lung ra na re. Shaning shagu galaw ai Myit Dum Poi aten hta nga ai anhte a kahkyin gumdin lam gaw grai manu dan ai hpe, dai shani du hkra, matut nna madun nga ga.