1. Yehowa a lam myit dat yang, myit hta hpa pru wa ai kun?

 YEHOWA gaw kaning re ai Karai re ai hpe myit yu ga ai kun? Akyu hpyi ai shaloi myit hta hpa pru wa ai kun? Yehowa hpe myi hte n mu lu tim, Chyum Laika hta amyu myu hkrang shapraw da ai. “Jan hte n-gang,” “hkru wa ai wan” ngu shaga da ai. (Shk 84:11; Heb 12:29) Nila lung seng zawn nsam nga ai, kung (nhprang) zawn tu ala ai, htoi tu nga ai n-goilatum hte bung ai ngu tsun da ai. (Eze 1:26-28) Yehowa hte seng nna dai zawn tsun da ai majaw mau mat chye ai. Shing nrai, hkrit mat chye ai.

2. Yehowa tsawra ai hpe nkau hpa majaw kam na matu yak chye ai kun?

² Karai Kasang hpe n mu lu ai majaw, tinang hpe Karai Kasang tsawra ai hpe kam na matu yak chye ai. Lai wa sai aten na mabyin ni a majaw, tinang hpe Yehowa tsawra na kun? ngu nna pyi myit chye ai. Shing nrai, kawa a tsawra myit hpe n hkamsha ga ai majaw byin chye ai. Hpa majaw re ai, gara hku hkamsha ai hpe Yehowa chye na ai. Tinang gaw gara zawn Karai re ai hpe Chyum Laika kaw na tsun dan ai.

3. Yehowa a tsawra myit a lam hpa majaw ahkri ahkrai hkaja ging ai kun?

³ Yehowa a lam tsun dan na matu kaja htum ga si gaw, tsawra myit re. (1 Yh 4:8) Yehowa gaw tsawra myit re. Galaw ai lam yawng tsawra myit lawm ai. Tinang hpe n tsawra ai ni hpe pyi tsawra lu ai du hkra tsawra myit kaba ai. (Mat 5:44, 45) Ndai sumhpa hta, Yehowa Karai Kasang a lam, Karai a tsawra myit a lam hkaja na re. Karai a lam grau chye magang, tsawra magang rai na re.

Anhte Hpe Yehowa Grai Tsawra

4. Yehowa tsawra ai majaw nang gara hku hkamsha ai kun? (Sumla hpe mung yu u.)

⁴ “Yehowa gaw n-gaw nwai ai myit hte tsawra . . . myit kaba ai.” (Yak 5:11, NWT) Chyum Laika hta, Yehowa gaw, tsawra  myit hte lanu lahku chye ai kanu hte shi hkum shi shingdaw da ai. (Esa 66:12, 13) Tsawra let ma woi nga ai kanu hpe shingran yu u. Ma hpe lahpyen hta pawn nna shala chyai nga ai. Ga ngwi ga pyaw hte asawng nga ai. Ma hkrap yang, machyi yang, hpa majaw re ai hpe chye hkra galaw ai. Galaw ra ai ni hpe galaw ya ai. Anhte mung, myit ru myit tsang hkrum ai aten hta pyi, Yehowa anhte hpe tsawra ai lam kam mai ai. “Nye a kraw lawang na myit law ai shaloi e, Nang shakawp ya nna, nye a myit masin hpe kabu shangun ya nngai” ngu shakawn kungdawn sara tsun ai.—Shk 94:19.

5. Yehowa a tsawra myit ngang kang ai majaw nang hpa akyu lu ai kun?

⁵ Yehowa a tsawra myit gaw ngang kang ai. (Shk 103:8) Anhte shut ai lam galaw hkrup tim, matut tsawra nga ai. Ga shadawn, Yehowa myit daw hkra Israela ni chyahkring hkring galaw ai. Raitim, myit malai lu ai shaloi, tsawra myit matut madun ai. “Nang gaw nye a man e ging dan nna, arawng sadang lu ai hte, ngai nang hpe tsaw ra nngai” ngu tsun ai. (Esa 43:4, 5) Anhte hpe mung, dai zawn tsawra myit hte tsawra ai. Dai hpe galoi mung kam mai ai. Mara kaba galaw hkrup tim, matut tsawra nga ai. Myit malai lu nna bai wa ai shaloi, matut tsawra nga ai hpe mu lu na. “Yubak hpe htum hkra raw dat kau ya na” ngu ga sadi jaw da ai. (Esa 55:7) Dai zawn mara raw hkrum ai gaw, “[Yehowa] kaw na ngwi pyaw ai aten ladaw du” mat ai zawn re ngu Chyum Laika hta tsun da ai.—Kas 3:19.

6. Yehowa a lam Zehkaria 2:8 kaw na hpa chye lu ai kun?

⁶ Zehkaria 2:8 hpe hti u. Anhte hpe Karai Kasang grai tsawra ai majaw, hpa hkamsha taw ai hpe kalang ta chye ai. Makawp maga ya mayu ai. Anhte hkra machyi yang, Karai Kasang mung myit n pyaw ai. Dai majaw, “myi sha hpe yu ai zawn ngai hpe yu yu” u ngu gwi gwi akyu hpyi mai ai. (Shk 17:9) Myi gaw grai hkalung nna, hkum hkrang a hkra n hkam ai, manu dan ai adaw achyen re. Dai majaw, anhte hpe myi sha hte Karai Kasang shingdaw da ai gaw, “nanhte hpe hkra gwi yang hkra yu u. Nanhte hpe hkra ai wa gaw, ngai manu shadan ai lam hpe hkra ai wa re” ngu tsun dat ai zawn re.

7. Yehowa tsawra ai hpe kam na matu hpa majaw ra chye ai kun?

⁷ Tsawra ai ngu nang hpe Yehowa hkamsha shangun mayu ai. Moi na mabyin ni a majaw,  Karai Kasang tsawra na kun? ngu hkamsha nga ai lam chye ai. Shing nrai, Yehowa tsawra ai kun? ngu ntsen ai myit nga wa shangun ai mabyin ni hkrum taw ai rai na re. Yehowa tsawra ai hpe hpa gaw kam shangun ai kun? Yehowa gaw, Yesu, namman chya hkam ai ni hte anhte yawng hpe tsawra ai lam, gara hku madun ai hpe hkaja ai shaloi, kam ai myit nga wa na re.

Yehowa Tsawra Myit Madun Ai Lam

8. Kawa tsawra ai hpe Yesu hpa majaw kam ai kun?

⁸ Shaning law law gawgap wa ai Yehowa hte Kasha a tsawra myit makyit sumri gaw grai ngang kang ai. Ninggawn tawa hta, aten na dik htum makyit sumri re. Yesu hpe tsawra ai ngu Yehowa asan sha tsun da ai hpe Mahte 17:5 hta mu lu ai. ‘Ndai wa gaw ngai sharawng awng ai wa’ ngu tsun tim mai ai. Raitim, Yesu hpe grai tsawra ai lam anhte hpe chye shangun mayu ai majaw, “ngai tsaw ra ai ngai Sha rai nga ai” ngu tsun ai. Yesu a matu Yehowa grai arawng la ai. Laksan hku nna, kade n na yang, asak jaw sana re ai majaw arawng la ai. (Ehp 1:7) Tinang hpe Kawa tsawra ai lam ntsen ai myit n nga ai. Tsep kawp kam ai. Dai majaw mung, tinang hpe Kawa tsawra ai lam, kam ai myit hte chyahkring hkring tsun ai.—Yhn 3:35; 10:17; 17:24.

9. Namman chya hkam ai ni hpe Yehowa tsawra ai lam gara ga si ni gaw madun dan ai kun? Sanglang dan u. (Roma 5:5)

⁹ Namman chya hkam ai ni hpe tsawra ai lam mung Yehowa madun ai. (Roma 5:5 hpe hti u.) “Ru bang ya ma ni ai” ngu ai ga si hpe sadi yu u. “Hka shi zawn lwi hkrat wa ai” ngu, lakap da ai laika buk langai hta tsun da ai. Namman chya hkam ai ni a ntsa, Yehowa a tsawra myit hpring kabrat nga ai hpe dan leng hkra hkrang shapraw da ai re. Namman chya hkam ai ni gaw, shanhte hpe ‘Karai Kasang tsaw ra’ ai lam chye ai. (Yud 1) “Yu mu, Karai Kasang a kashu kasha ni anhte hpe ngu shamying mi ai majaw, dai Kawa gaw anhte hpe kade wa tsaw ra da mi hka: shi a kashu kasha ni mung anhte rai nga ga ai” ngu nna namman chya hkam ai ni a hkamsha lam hpe kasa Yawhan tsun ai. (1 Yh 3:1) Namman chya hkam ai ni hpe sha Yehowa tsawra ai kun? N re. Anhte yawng hpe tsawra ai.

10. Nang hpe Yehowa kam ai lam grai kaja ai sakse gaw hpa rai kun?

¹⁰ Anhte hpe Yehowa tsawra ai lam, kaja htum sakse gaw hpa rai kun? Gawng malai jahpu re. Ninggawn tawa hta, kadai mung dai zawn n lu tsawra ai. (Yhn 3:16; Rom 5:8) Anhte mara raw hkrum na matu, Karai hte jinghku byin lu na matu, manu dan ai Kasha hpe si hkam shangun ai. (1 Yh 4:10) Yehowa hte Yesu sak jaw wa ai lam ni hpe myit yu magang, anhte langai hpra hpe kade daram tsawra ai lam chye na wa magang re. (Gal 2:20) Karai a tara rap ra ai tsang madang hku nna, gawng malai jahpu jaw yang she mai na re ai majaw sha jaw ai n re. Tsawra ai majaw jaw ai re. Grai manu shadan ai Yesu hpe nni nkri hkrum let si hkam shangun ai hku nna anhte hpe tsawra ai lam Yehowa sakse madun ai.

11. Yeremia 31:3 kaw na hpa chye lu ai kun?

¹¹ Chye wa sai hte maren, anhte hpe Yehowa lagu nna n tsawra ai. Tsawra ai ngu tsun ai. Tsawra ai lam madun ai. (Yeremia 31:3 hpe hti u.) Tsawra ai majaw, tinang hpang de lau la ai. (Tara Jahprang 7:7, 8 hte shingdaw yu u.) Karai a tsawra myit n lu hkamsha hkra, hpa mung, kadai mung n lu pat shingdang ai. (Rom 8:38, 39) Karai Kasang tsawra ai majaw, nang gara hku hkamsha ai kun? Shakawn 23 hpe hti yu u. Yehowa tsawra ai majaw, Dawi gara hku hkamsha ai kun? Anhte mung gara hku hkamsha ai hpe sadi yu u.

 Yehowa Tsawra Ai Majaw Nang Gara Hku Hkamsha Ai Kun?

12. Shakawn 23 hpe kadun dawk tsun dan u.

¹² Shakawn 23:1-6 hpe hti u. Anhte hpe Yehowa tsawra ai hpe kam mai ai lam Shakawn 23 hta Dawi mahkawn ka da ai. Sagu rem Yehowa hte tinang a ngang kang ai makyit sumri a lam ka da ai re. Yehowa woi awn ai hpang hkan nang mat ai majaw, tsep kawp kam ai majaw, shim lum ai ngu hkamsha ai. Karai a tsawra myit prat tup hkamsha lu na hpe kam ai. Hpa majaw dai daram kam ai kun?

13. Yehowa lanu lahku na hpe Dawi hpa majaw kam ai kun?

¹³ “Ngai hpa mung n ra nngai.” Ra n rawng hkra hkum tsup ai ngu Dawi hkamsha ai. Ra ai lam yawng hpe Karai Kasang galoi mung jahpring shatsup ya ai majaw, Karai hte hku hkau lam nga ai majaw, Karai a myiman lu da ai majaw re. Dai majaw mung, hpa mi hkrum tim, ra ai lam yawng hpe Yehowa matut jahpring shatsup ya na hpe kam ai re. Dai zawn kam ai majaw, myit tsang ai lam ni hkoi mat nna, ngwi pyaw myit dik nga ai.—Shk 16:11.

14. Anhte hpe Yehowa gara hku tsawra myit madun nna lanu lahku ai kun?

¹⁴ Laksan hku nna, yawn hpa mabyin ni hkrum ai aten hta, Yehowa tsawra myit madun ai, lanu lahku ya ai. Behtela hta magam gun ai 20 ning jan sai nauna Kalera a a lam myit yu u. Kawa gaw, hkum katsing si mat ai. Kanau gaw shapraw kau hkrum ai. Nta masha ni a hpaga bungli hten mat ai. Nta sum mat ai. Nta masha ni hpe gara hku karum ra na hpe n chye ai majaw, Kalera grai myit tsang ai. Raitim,  Yehowa lanu lahku ya ai hpe shanhte a nta masha ni gara hku hkamsha ai kun? “Nta masha ni hta, lani mi na matu ra ai lam yawng lu la hkra, Yehowa lajang ya ai. Ra ai hta jan nna jaw ai mung chyahkring hkring re. Yehowa a tsawra myit hkamsha lu ai aten ni hpe bai myit ai. Galoi mung n malap ai. Dai majaw mung, mayak mahkak ni nga tim, matut hkawm sa lu ai re” ngu Kalera tsun ai.

15. Dawi hpa majaw shalan shabran lam lu ai ngu hkamsha ai kun? (Sumla hpe mung yu u.)

¹⁵ “Shi shalan shabran ya” ai. Manghkang grai law ai majaw, Dawi kalang lang myit ba wa ai. (Shk 18:4-6) Raitim, Yehowa a tsawra myit, lanu lahku ya ai hpe hkamsha lu ai majaw, shalan shabran lam bai lu wa ai. Pu ba nga ai jinghku Dawi hpe “tsit lali ai udat shara,” “ngwi ai hka kau de” Yehowa woi sa ai. Dawi n-gun bai hpring wa nna, matut hkawm sa lu ai.—Shk 18:28-32.

16. Yehowa a tsawra myit a majaw nang gara hku shalan shabran lam lu ai kun?

¹⁶ Dai ni aten hta mung, manghkang ni hkrum nga tim, “Yehowa a chyeju [ngang kang ai tsawra myit] majaw sha, anhte n htum mat ga ai.” (Shy 3:22; Kol 1:11) Nauna Rechye a lam hpe myit yu u. Kobit-19 kap bra ana laman, madu wa gaw shi hpe mung, Yehowa hpe mung, kau da mat ai majaw grai yawn ai. Yehowa hpa galaw ya wa ai kun? “Tsawra hkrum ai ngu hkamsha hkra, Yehowa galaw ya ai. Manang kaja ni hte shinggrup da ya ai. Manang kaja ni gaw nye makau hta nga ya ai. Malu masha ni la sa ya ai. N-gun lu hpa laika kadun ni, chyum daw ni sa ya ai. Mani dan ai. Ngai hpe Yehowa lanu lahku ya ai hpe tsun dan ai. Dai zawn tsawra myit nga ai dinghku hpe jaw da ai majaw, Yehowa hpe grai chyeju dum ai” ngu Rechye tsun ai.

17. Dawi gaw hpa majaw “aru ara hpe n hkrit” ai kun?

¹⁷ “Nang ngai hte rau nga nga ai majaw, Ngai aru ara hpe n hkrit nngai.” Dawi asak shoihpa chyahkring hkring hkrum ai. N-gun ja ai hpyen ni shinggrup nga ai. Raitim, “hkrit gari ai nlang hte hta na, [Yehowa] ngai hpe mawai la nngai” ngu ka wa ai. (Shk 34:4) Dawi hkrum ai lam shagu hkrit hpa lam ni sha re. Raitim, Yehowa a tsawra myit a majaw, hkrit myit hpe awng dang lu wa ai.

18. Tinang hpe Yehowa tsawra ai lam chye da ai gaw, hkrit wa ai shaloi gara hku n-gun lu shangun chye ai kun?

¹⁸ Tinang hpe Yehowa tsawra ai lam chye ai gaw, hkrit hpa masa ni hkrum ai aten hta,  gara hku n-gun lu shangun ai kun? Tinang hkum tinang sat si mat ai ma a majaw, an la gara hku hkamsha ai hpe ningshawng nauna Suzi ndai hku tsun ai: “Yawn hpa mabyin ni kalang ta hkrum yang, myit ana lu mat chye ai. Karum shingtau n lu mat ai zawn hkamsha nna, dai hta grau sawng ai hpa lam ni naw hkrum na kun? ngu hkrit chye ai. An gaw, Yehowa a tsawra myit a majaw hkam sharang lu ai.” Shawng hta tsun wa ai Rechye mung ndai hku tsun ai: “Lana mi hta, myit tsang hpa lam ni, hkrit hpa lam ni a majaw grai yawn nna, Yehowa kaw marawn nna akyu hpyi ai. Kanu gaw ma hpe ahpum nna shayup ya ai zawn, myit simsa mat hkra Yehowa ngai hpe shalan ya ai ngu hkamsha ai. Dai hpang, yup pyaw mat ai. Dai aten hpe galoi n malap ai.” Hpyen dap de n shang ai majaw, htawng 4 ning hkrat mat ai myitsu salang hpunau Ta Saw a lam hpe mung myit yu u. Yehowa a tsawra myit, lanu lahku ai lam gara hku hkamsha ai kun? “Yehowa mung ra ai lam hta jan nna jahpring shatsup ya ai. Yehowa hpe tsep kawp kam mai ai lam grau kam mat ai. Myit daw hpa lam ni nga ai htawng hta pyi, pyaw nga na matu chyoi pra ai wenyi hku nna karum ya ai. Karai Kasang hte hku hkau nga yang, Karai a tsawra myit galoi mung hkamsha lu na hpe chye na mat ai. Dai majaw, htawng hkrat nga ai shaloi hta sha, ningshawng galaw hpang ai” ngu Ta Saw tsun ai.

Matsan Dum Chye Ai Karai Hte Hku Hkau Hkra Galaw U

19. (a) Tinang hpe Karai Kasang tsawra ai lam chye da yang gara hku akyu hpyi na kun? (b) Yehowa a tsawra myit hpe gara hku hkrang shapraw da yang nang ra ai kun? (“ Yehowa A Tsawra Myit Hpe Chye Na Hkamsha Lu Na Matu Karum Ya Ai Ga Si Ni” lawk hpe yu u.)

¹⁹ Anhte hte rau “tsaw ra myit rawng ai . . . Karai Kasang” nga nga ai lam ndai sumhpa hta lawm ai mahkrum madup ni gaw sakse re. (2 Ko 13:11) Langai hpra hpe Karai Kasang lanu lahku ai. “Chyeju [ngang kang ai tsawra myit] hte kawan da nga mu ai.” (Shk 32:10) Karai a tsawra myit gara hku madun ai hpe myit magang, tinang hpe kade daram lanu lahku ai hpe mu wa magang, Karai hte hku hkau wa magang re. Tinang hpe Karai Kasang chye na ai, karum ya mayu ai hpe kam yang, Karai a tsawra myit kade daram ra ai hpe tsun dan gwi na re. Myit tsang hpa lam ni hpe mung tsun dan gwi na re.—Shk 145:18, 19.

20. Yehowa a tsawra myit gaw shi hte gara hku nihtep shangun ai kun?

²⁰ Nshung ta rai yang, wan htung makau kaw sha nga mayu ai zawn, Yehowa a tsawra myit mung lum ai majaw, Yehowa makau kaw sha nga mayu ai. Yehowa gaw, tsawra myit kaba ai. Matsan dum chye ai. Dai zawn, Karai a tsawra hkrum ai ngu ai myit hte ngwi pyaw nga u. “Yehowa hpe ngai tsawra ai” ngu tsun nna Karai Kasang hpe tsawra myit bai madun u.—Shk 116:1, NWT.