1, 2. Yehowa hpe mada yu ai ngu ai lachyum gaw hpa rai kun?

ANHTE gaw “yak la ai aten” hta asak hkrung nga ai. (2 Timohti 3:1) Jet ai ngwi pyaw lam nga wa hkra, ndai nhkru ai mungkan hpe Yehowa n jahten dingsa, masa ni gaw grau nna yak wa na re. Dai majaw, anhte hkum anhte ndai hku san ra ai: ‘Karum shingtau lam hte lam matsun lu na matu ngai kadai hpe mada yu na kun?’ “Yehowa” ngu nna anhte kalang ta htai na re. Dai gaw kaja htum mahtai re.

² Yehowa hpe mada yu ai ngu ai lachyum gaw hpa rai a ta? Anhte manghkang hkrum ai shaloi, shi hpe matut nna gara hku mada yu lu na kun? Anhte karum shingtau lam ra ai shaloi, Yehowa hpe mada yu ra ai lam Shakawn Kungdawn sara langai sang lang dan wa ai. (Shakawn 123:1-4 hpe hti u.) Anhte Yehowa hpe mada yu ai shaloi, mayam langai gaw shi a madu hpe mada yu ai hte bung ai ngu shi tsun ai. Gara hku nna kun? Mayam langai gaw, malu masha lu na matu, makawp maga hkrum  na matu, shi a madu hpe kamhpa nna mada yu ai. Dai hta n-ga, shi a madu shi hpe hpa galaw shangun mayu ai lam chye hkra galaw ra nna, chye wa ai hte maren hkan galaw ra ai. Dai hte maren, Yehowa anhte hpe galaw shangun mayu ai lam hpe chye lu hkra Chyum Laika shani shagu hkaja ra nna hkan sa ra ai. Anhte dai hku galaw yang she, karum shingtau lam ra ai shaloi, Yehowa karum ya na re.​—⁠Ehpesu 5:17.

3. Yehowa hpe n mada yu mat hkra anhte hpe hpa gaw myit bra shangun chye ai kun?

³ Yehowa hpe anhte ayan na mada yu nga ra na hpe chye tim pyi, kalang lang myit bra wa chye ai. Yesu a manang Marhta dai hku byin wa ai. Shi gaw “galaw jaw ai amu law law a majaw myit kyin dum nga ai.” (Luka 10:40-42) Marhta zawn sadi dung ai masha pyi, Yesu makau hta nga ninglen myit bra ai nga yang, anhte mung dai hku byin wa chye ai. Yehowa hpe mada yu ai kaw nna anhte hpe hpa gaw myit bra shangun ai kun? Ndai sumhpa hta, kaga ni a majaw anhte gara hku myit bra chye ai lam hpe hkaja na re. Yehowa hpe gara hku matut nna mada yu lu na lam hpe mung sharin la lu na re.

4. Ga Sadi Tawn Da Ai Mungdan de Mawshe n shang lu ai gaw hpa majaw mauhpa rai kun?

⁴ Mawshe gaw, lam matsun ni a matu Yehowa hpe mada yu ai. Chyum Laika hta ndai hku tsun da ai: ‘Myi hte n mu lu ai wa hpe mu lu ai zawn, shakut sharang nga ai.’ (Hebre 11:24-27 hpe hti u.) “Yehowa hte tinang hkum nan myi man chyaw hkrum lu ai myihtoi Mawshe zawn re ai gaw, Israela amyu hta htawm hpang e langai mi muk paw pru yu ai n rai” nga nna mung tsun da ai. (Tara Jahprang 34:12) Mawshe gaw Yehowa a jinghku raitim pyi, Ga Sadi Tawn Da Ai Mungdan De n shang lu mat ai. (Bu Hkawm 20:12) Hpa majaw rai na kun?

5-7. Israela ni Egutu mung kaw nna pru wa ai hpang kade n na yang hpa manghkang byin wa ai kun? Mawshe hpa galaw wa ai kun?

⁵ Egutu mung kaw nna Israela ni pru wa nna shata lahkawng daram na ai hpang, Sina Bum de garai n du shi yang, manghkang kaba byin wa ai. Masha ni gaw, hka n nga ai majaw aput angun tsun wa ai. Mawshe hpe mara tam nna grai pawt ma ai. Dai majaw, “Mawshe gaw Yehowa hpe jahtau nna, Ndai amyu hpe ngai kaning di na ma we ta? ngai hpe nlung hte kabai sat magang wa da mi ai” ngu nna tsun ai. (Pru Mat 17:4) Yehowa gaw Mawshe hpe lam matsun jaw ai. Horeb bum na lunghkrung hpe dawhkrawng hte kayat na matu Mawshe hpe tsun ai. Chyum Laika hta ndai hku tsun ai: “Mawshe mung lsraela a agyi salang ni a man e shing di galaw wu ai.” Dai hpang, hka pru wa nna, Israela masha ni gaw lu na hka law law lu mat nna, manghkang hpe hparan lu wa ai.​—⁠Pru Mat 17:5, 6.

⁶ Mawshe gaw dai shara hpe “chyam dinglik yu ai” ngu lachyum nga ai Masa hte “ndang kalang hkat ai” ngu lachyum nga ai “Meriba” nga nna amying jaw ai. Hpa majaw kun? ‘Yehowa anhte hte nga ai kun? N nga ai kun? nga nna Yehowa hpe chyam dinglik yu ai hte ndang kalang hkat ai lam a majaw re.’​—⁠Pru Mat 17:7.

⁷ Meriba kaw byin wa ai hte seng nna Yehowa gara hku hkamsha ai kun? Mawshe hpe sha n-ga, shi hte shi a ahkang aya hpe gumlau ai ngu hkamsha ai. (Shakawn 95:8, 9 hpe hti u.) Israela ni grai shut hpyit mat masai. Raitim, Mawshe gaw teng man ai hku  galaw wa ai. Yehowa hpe mada yu nna shi a lam matsun hpe atsawm hkan sa wa ai.

8. Israela ni a nam maling hkrun lam htum na mahka aten hta hpa byin wa ai kun?

⁸ Shaning 40 daram na ai hpang, dai zawn manghkang kalang bai byin wa ai. Israela ni a nam maling hkrun lam htum na mahka aten hta re. Ga Sadi Tawn Da Ai Mungdan a lamu ga jarit hte ni ai Kadesha makau de shanhte du wa ai. Ndai shara hpe mung, Meriba ngu nna chye wa ma ai. * Hpa majaw kun? Hka n nga ai majaw, Israela ni bai aput angun tsun ai majaw re. (Bu Hkawm 20:1-5) Ndai kalang gaw, Mawshe mara kaba galaw wa ai.

9. Yehowa gaw Mawshe hpe hpa lam matsun jaw ai kun? Mawshe hpa galaw wa ai kun? (Sumhpa shawng na sumla hpe yu u.)

⁹ Israela ni gumlau ai shaloi, Mawshe hpa galaw wa ai kun? Yehowa a lam matsun hpe matut nna hkan sa ai. Raitim, ndai kalang hta gaw, lunghkrung hpe kayat na matu Mawshe hpe Yehowa n tsun ai. Yehowa gaw Mawshe hpe dawhkrawng la wa shangun ai. Masha ni hpe mung lunghkrung makau de sa wa shangun nna, lunghkrung hpe ga shaga na matu tsun ai. (Bu Hkawm 20:6-8) Mawshe dai hku galaw wa ai kun? N galaw wa ai. Shi grai pawt nna ndai hku marawn ai: “Gumlau masha ni e, madat mu: an nanhte a matu dai nlung hta na ntsin shapraw jaw na rai nga ga ni?” Dai hpang, nlung hpe kalang sha n rai, lahkawng lang pyi kayat dat ai.​—⁠Bu Hkawm 20:10, 11.

10. Yehowa gaw Mawshe hpe hpa majaw pawt wa ai kun?

¹⁰ Yehowa gaw Mawshe hpe grai masin pawt ai. (Tara Jahprang 1:37; 3:26) Hpa majaw kun? Mai byin ai lam langai gaw, Yehowa jaw ai lam matsun nnan hpe Mawshe n hkan sa ai majaw re.

11. Lunghkrung hpe Mawshe kayat ai gaw, Yehowa a mauhpa lam n re ai ngu hpa majaw shadu mat shangun ai kun?

¹¹ Yehowa hpa majaw masin pawt ai lam langai naw nga ai. Shawng na Meriba hta nga ai lunghkrung gaw grai ja ai. Dai lunghkrung grai ja ai majaw, kade daram mi kayat tim, hka pru wa na ngu kadai mung shadu na n re. Raitim, nam bat lahkawng na Meriba kaw nga ai lunghkrung gaw dai hte grai shai ai. Dai kaw na lunghkrung law malawng gaw, namhtun lunghkrung ni re. Namhtun lunghkrung gaw kya nna, lunghkrung kata hta hka mahkawng nga chye ai. Masha ni gaw lunghkrung hpe hku shawaw nna hka lu la hkra galaw lu ai. Dai majaw, Mawshe gaw lunghkrung hpe ga shaga na malai, kayat kau ai shaloi, hka pru wa ai gaw Yehowa mauhpa lam hku galaw ai majaw n re ai sha, shi hkrai shi pru wa ai ngu Israela ni sawn la mat ai kun? * Hkrak gaw n lu tsun ai.

12. Kaga gara lam a majaw mung, Mawshe yan Arun hpe Yehowa masin pawt ai kun?

¹² Mawshe yan Arun hpe Yehowa hpa majaw masin pawt ai hte seng nna, kaga lam langai naw nga ai. Mawshe gaw masha ni hpe ndai hku tsun ai: “An nanhte a matu dai nlung hta na ntsin shapraw jaw na rai nga ga ni?” “An” ngu nna Mawshe tsun ai shaloi, shi hkum shi hte Arun hpe tsun mayu ai rai na re. Mawshe dai hku tsun ai gaw, Yehowa hpe n hkungga ai lam re. Hpa majaw nga yang, mauhpa lam galaw ya ai Yehowa hpe n shagrau ai majaw re. Shakawn Kungdawn 106:32, 33 hta ndai hku tsun ai: “Meriba makau e, shanhte gumlau nna, Shanhte a majaw Mawshe mung, ra rawng mat ai. Kaning rai nme law, shi a wenyi hpe shanhte shatsang ya nna, Shi gaw shi a n-gup hte ga shut kau wu ai.” * (Bu Hkawm 27:14) Yehowa sha lu ging ai shagrau ai lam hpe Mawshe n jaw wa ai. Yehowa gaw Mawshe yan Arun hpe ndai hku tsun ai: “Nan nye a ga hpe nhtan jashai myit dai.” (Bu Hkawm 20:24) Dai gaw mara kaba re.

13. Mawshe hpe Yehowa ari jaw ai gaw hpa majaw tara rap ra ai kun?

¹³ Mawshe yan Arun gaw Yehowa a masha ni hpe woi awn ai majaw, Yehowa gaw shan yan hpe grai myit mada da ai. (Luka 12:48) Gumlau ai Israela ni hpe Ga Sadi Tawn Da Ai Mungdan de shang na ahkang Yehowa n jaw wa ai. (Bu Hkawm 14:26-30, 34) Dai majaw, Mawshe gumlau ai shaloi mung, Yehowa shi hpe dai zawn sha ari jaw ai gaw tara rap ra ai. Gumlau ai kaga masha ni zawn sha, Mawshe mung Ga Sadi Tawn Da Ai Mungdan de n shang lu mat ai.

14, 15. Mawshe gaw Yehowa hpe hpa majaw gumlau hkrup mat ai kun?

¹⁴ Hpa a majaw Yehowa hpe Mawshe gumlau hkrup mat ai kun? Shakawn Kungdawn 106:32, 33 hta ndai hku tsun da ai hpe bai sadi yu u: “Meriba makau e, shanhte gumlau nna, Shanhte a majaw Mawshe mung, ra rawng mat ai. Kaning rai nme law, shi a wenyi hpe shanhte shatsang ya nna, Shi gaw shi a n-gup hte ga shut kau wu ai.” Israela ni gaw Yehowa hpe gumlau ai raitim, masin pawt wa ai gaw Mawshe mahtang rai mat ai. Shi gaw tinang hkum tinang n hkang lu nna, byin wa na akyu hpe n myit yu ai sha tsun shaga wa ai.

¹⁵ Mawshe gaw kaga ni a majaw myit bra mat nna lam matsun a matu Yehowa hpe n mada yu mat sai. Hka hte seng nna masha ni shawng nnan lang aput angun tsun ai shaloi, Mawshe jaw ai hpe galaw wa ai. (Pru Mat 7:6) Raitim, Israela ni gaw shaning law law gumlau wa ai majaw, shi pu ba wa nna myit shuk wa ai rai na re. Mawshe gaw Yehowa hpe gara hku shagrau na ngu ai hpe n re ai sha, shi a hkamsha lam hpe sha myit maju jung ai majaw mung rai na re.

16. Mawshe a lam hpe anhte hpa majaw myit sumru ra ai kun?

¹⁶ Sadi dung ai myihtoi Mawshe pyi myit bra nna mara galaw wa ai nga yang, anhte mung dai zawn aloi sha byin wa chye ai.  Mawshe gaw Ga Sadi Tawn Da Ai Mungdan de shang na mahka hta mara galaw hkrup wa ai. Anhte mung, mungkan nnan de shang na hkyen sai. (2 Petru 3:13) Grai kaja ai dai ahkaw ahkang hpe anhte n sum mayu ga ai. Raitim, mungkan nnan de shang na matu, Yehowa hpe ayan mada yu ra nna, shi a ga madat ra ai. (1 Yawhan 2:17) Mawshe a mabyin kaw nna anhte hpa sharin la lu ai kun?

17. Anhte masin pawt ai shaloi, tinang hkum tinang hkang lu ai atsam n mat hkra gara hku galaw na kun?

¹⁷ Nang masin pawt ai shaloi, tinang hkum tinang hkang lu ai atsam hpe hkum shamat kau u. Kalang lang, anhte gaw manghkang langai hpe sha chyahkring hkring hkrum chye ai. Chyum Laika hta ndai hku tsun da ai: “Kaja ai amu galaw ai hta asum n jaw ga. Rai yang, aten du ai shaloi, anhte dan la lu na rai nga ai.” (Galati 6:9, NW; 2 Htesaloni 3:13) Lama ma (sh) marai langai ngai gaw anhte hpe chyahkring hkring masin pawt shangun ai nga yang, n myit yu ai sha bai tsun dat na kun? Masin pawt ai hpe hkang na kun? (Ga Shagawp 10:19; 17:27; Mahte 5:22) Kaga ni anhte hpe jahte tam ai shaloi, “Karai Kasang a pawt sindawng na hpe ala nga” na matu anhte sharin la ra ai. (Roma 12:17-21 hpe hti u.) Dai lachyum gaw hpa rai kun? Masin pawt na malai, anhte  a manghkang hte seng nna, ra ang ai hku Yehowa lama ma galaw ya na hpe myit galu let la ra ai. Yehowa hpe anhte mada yu na malai, matai htang na nga yang, shi hpe n hkungga ai hte bung mat na re.

18. Lam matsun ni hpe hkan sa ai hte seng nna anhte hpa hpe myit dum ra ai kun?

¹⁸ Hpang jahtum lam matsun ni hte maren hkan sa ra ai. Yehowa anhte hpe jaw ai hpang jahtum lam matsun ni hpe anhte sadi dung let hkan sa nga ai kun? Lai wa sai aten hta galaw awng dang wa ai ladat zawn sha matut nna n galaw ging ai. De a malai, uhpung kaw nna jaw ai Yehowa a lam matsun nnan ni hpe alawan hkan sa ra ai. (Hebre 13:17) ‘Ka da nga ai hte maren anhte n lai’ na matu mung sadi ra ai. (1 Korinhtu 4:6) Yehowa a lam matsun ni hpe anhte atsawm hkan sa ai nga yang, shi hpe matut nna mada yu nga ai re.

19. Kaga ni galaw ai mara a majaw, Yehowa hte na a hku hkau lam n htenza mat hkra gara hku koi na kun?

¹⁹ Kaga ni galaw ai mara a majaw, Yehowa hte na a hku hkau lam htenza mat na matu ahkang hkum jaw. Yehowa hpe anhte matut nna mada yu yang, kaga ni a majaw anhte masin pawt na n re. Yehowa hte hku hkau lam mung htenza mat na n re. Mawshe zawn, Karai a uhpung hta anhte lit kaba lu da yang, grau nna sadi ra ai. Anhte hkye la hkrum na matu shakut ra nna, Yehowa a ga madat ra ai. (Hpilipi 2:12) Anhte hta lit grau nga magang, Yehowa gaw anhte hpe grau nna myit mada magang re. (Luka 12:48) Yehowa hpe anhte teng sha tsawra na nga yang, shi a tsawra myit hte hka mat na matu (sh) ahtu kataw mat na matu hpa mung galaw lu na n re.​—⁠Shakawn 119:165; Roma 8:37-39.

20. Hpa galaw na matu myit dawdan da ra ai kun?

²⁰ Anhte gaw yak la ai aten hta asak hkrung nga ai. Dai majaw, “sumsing lamu hta e dung nga ai” Yehowa hpe matut nna mada yu ra ai. Rai yang, shi galaw shangun mayu ai lam ni hpe chye na wa na re. Kaga ni galaw ai mara a majaw, Yehowa hte anhte a hku hkau lam hpe hkum htenza shangun u. Mawshe a mabyin gaw anhte hpe grai ahkyak ai lam sharin ya ai. Kaga ni mara galaw ai shaloi, matai htang na malai, “Karai Kasang Yehowa anhte hpe myi man n jaw dingsa, anhte a myi shi hpe mada yu nga ga.”​—⁠Shakawn 123:1, 2, NW.