Chyum Laika Hkaja Ai Shaloi Grau Akyu Lu Nna Pyaw Hkra Galaw Mai Ai Lam

HPAW

YAWSHU gaw, Israela ni hpe Ga Sadi Tawn Da Ai Mungdan de woi awn sa wa ra na re. Ndai lit gaw shi a matu grai yak na re. Raitim, shi hpe shangang shakang ya nna n-gun jaw na matu, Yehowa ndai hku tsun ai: “N-gun da ting nna, myit nden ja ja shaja u.” Karai a tara ni hpe hti nna hkan sa na nga yang, hpaji rawng ai dawdan lam ni jahkrat lu nna awng dang lu na ngu nna mung Yawshu hpe Yehowa tsun ai.—⁠Yawshu 1:7, 8.

“Yak la ai aten” hta asak hkrung nga ai majaw, anhte a prat hta mayak mahkak ni nga na re. (2 Timohti 3:1) Yawshu zawn, anhte awng dang mayu yang, Yehowa a hpaji jaw ga ni hpe hkan sa ra ai. Hpaji rawng ai dawdan lam ni jahkrat lu hkra, Chyum Laika hpe ayan hti nna, chye wa ai lam ni hpe akyu jashawn ra ai.

Raitim, nkau mi gaw Chyum Laika hpe gara hku hkaja na hpe n chye ai. Nkau mi chyawm gaw, hkaja ai lam hpe n ra sharawng ai rai na re. Tinang hkrai hkaja ai lamang gaw grai ahkyak ai. “ Ndai Lam Ni Hpe Galaw Yu U” ngu ai ga baw npu hta, hkaja ai lamang kaw nna grau akyu lu la na matu hte grau pyaw wa na matu, karum ya ai lam matsun ni hpe mu lu na re.

Shakawn Kungdawn sara ndai hku tsun ai: “Nang htet da ai lam hku e, ngai hpe woi wa e; Dai hta e ngai awng nga na nngai.” (Shakawn 119:35) Karai a Mungga hpe sharawng ai myit hte nang mung hkaja mai ai. Chyum Laika hpe matut hkaja na nga yang, grai manu dan ai hpaji jaw ga ni hpe nang mu tam na re.

Yawshu zawn amyu lakung langai hpe nang woi awn ra na gaw n re. Raitim, na a mayak mahkak ni hpe gaw nang hparan ra na re. Dai majaw, Yawshu zawn Karai a Mungga hpe hkaja nna tatut hkan sa u. Nang dai hku galaw na nga yang, hpaji rawng ai dawdan lam ni jahkrat lu nna awng dang lu na re.

Ndai Lam Ni Hpe Galaw Yu U

Garai n hkaja shi yang akyu hpyi u. Chyum Laika hta Yehowa a myit mang ai lam ni lawm nna, na a akyu matu ka da ya ai re. Dai majaw, Chyum Laika hti ai shaloi, hti ai lam hpe chye na hkra karum ya na matu, matsing na matu hte tatut hkan sa nna hpaji rawng ai dawdan lam ni jahkrat lu na matu Yehowa hpang akyu hpyi u.—⁠Ezra 7:10.
Tinang hkum tinang ga san san u. Ga shadawn, Chyum Laika (sh) Chyum Laika hte seng ai laili laika ni hti ai shaloi, ‘ndai gaw Yehowa hte seng nna hpa chye shangun ai kun? Chyum Laika a madung shiga hte gara hku matut mahkai ai kun? Ndai lam hpe akyu jashawn nna kaga ni hpe gara hku karum ya mai na kun?’ ngu ai ga san ni hpe san u.
Hkaja ai lam hpe myit sawn sumru u. Chyahkring mi hkring nna, hti ai lam hpe sumru yu u. Tinang hkum tinang ndai hku san yu u: ‘Ndai lam gaw ngai hpe gara hku hkamsha shangun ai kun? Hpa majaw dai hku hkamsha ai kun? Lai wa sai aten na nye a mabyin hte gara hku matut mahkai ai kun? Ya aten hte htawm hpang aten a matu gara hku akyu jashawn mai na kun? Ndai npawt tara ni (sh) ndai hpaji jaw ga ni hpe ngai gara hku hkan sa mai na kun?’ (Yoba 23:5; Shakawn 49:3) Yehowa gaw hpa majaw shi a masha ni hpe dai tara ni jaw ai hpe chye na hkra myit sawn sumru u. Nang hti ai Chyum daw hta lawm ai masha a mabyin kaw nna sharin la u.—⁠Tara Jahprang 32:28, 29.
Shingran yu u. Ga shadawn, Yosep a kahpu ni gaw, Yosep hpe Ishmaela masha ni kaw dut kau ai mabyin hpe shingran yu u. (Ningpawt 37:18-28) Nang gara sama lu nna hpa hpe mu ai, hpa hpe na ai kun? Nang hti ai lam hta lawm ai ni a shara hta shang nna hkamsha yu u. Shanhte gara hku myit nga nna, gara hku hkamsha nga na kun? Na a shingran lu ai atsam hpe akyu jashawn na nga yang, hkaja ai lamang kaw nna grau akyu lu wa na re.
Hkaja na matu hkingrai ni hpe akyu jashawn u. Na a hkaja ai lamang hpe grau nna myit lawm hpa byin na matu, uhpung kaw nna hkingrai ni hpe lajang da ya ai. Na a amyu ga hte lu mai ai laili laika ni hpe, gara hku akyu jashawn mai ai lam sharin la u. Dai hkingrai ni hpe atsawm akyu jashawn chye hkra, kaga ni hpe karum hpyi na matu hkum htingnut u. Ga shadawn, Sin Langchyi Laili Laika Matsun (E) hte Yehowa Sakse Ni A Matu Hkaja Matsun (BU) hkingrai ni gaw, shapraw wa ai laili laika ni hpe matsun ya nna, Chyum daw law law hpe mung sang lang da ya ai. Na a amyu ga hte Mungkan Nnan Ga Gale Chyum Laika nga ai nga yang, bung jat daw hpe akyu jashawn mai ai. Dai hta Lamu ga sumla ni, labau hte seng ai lam ni, joi si ni hte seng ai lam ni, shadawn shadang hte seng ai lam ni hte kaga lam law law hpe mung mu lu ai.
Madung lam hpe matsing da u. Dai hku galaw ai gaw, nang hkaja ai lam hpe matsing lu hkra karum ya na re. Nang chye wa ai lam ni hpe kaga ni hpe bai tsun dan u. Hkaw tsun bungli hta mung tsun dan mai ai. Dai lam ni galaw na nga yang, madung lam ni hpe nang matsing lu nna, kaga ni mung akyu hkamsha lu na re.