1. Anhte yawng hta gara myit jasat nga ai kun?

NANG hte hku hkau nna, nang hkungga ai wa gaw na amying hpe n chye sai (sh) nang hpe pyi n matsing mat sai nga yang, gara hku hkamsha na kun? Grai myit n pyaw na re. Hpa majaw kun? Anhte yawng gaw, kaga ni a hkap la ai lam hpe lu mayu ga ai. Anhte kadai re ai hpe chye ai daram hte sha anhte myit n dik shi ai. Anhte gaw kaning re ai masha re ai hte anhte ngut kre awng dang wa ai lam ni hpe chye shangun mayu ai.​—⁠Bu Hkawm 11:16; Yoba 31:6.

2, 3. Kaga ni kaw nna myi man lu mayu ai anhte a myit jasat gaw gara hku byin wa chye ai kun? (Sumhpa shawng na sumla hpe yu u.)

² Anhte n sadi ai nga yang, myi man lu mayu ai myit gaw n htap htuk ai hku rai wa na re. Satan a mungkan gaw, anhte hpe mying gumhkawng nna ahkyak ai masha byin mayu wa hkra shadut nga ai. Dai hku byin wa yang, Yehowa Karai Kasang lu  ging ai shagrau sha-a ai lam hte nawku dawjau ai lam hpe, anhte n lu jaw mat na re.​—⁠Shingran 4:11.

³ Yesu aten hta, nawku htung ningbaw nkau mi gaw, n htap htuk ai hku myi man lu mayu ma ai. Yesu gaw shi a sape ni hpe ndai hku sadi jaw ai: “Laika ka ai sara ni hpe sadi nga mu: shanhte palawng galu bu hpun let hkawm sa mayu nna, gat hkan shachyen ai hte, tara jawng hkan na reng grau ai tingnyang ni, poi hkan na reng grau ai dung shara ni hta dung na sharawng ai.” Dai majaw shanhte gaw, “dawdan kau ai grau nna hkrum na ma ra ai” ngu nna Yesu matut tsun ai. (Luka 20:46, 47) Magri dingsen lap lahkawng sha bang ai matsan ai gaida jan hpe kadai mung n sadi hkrup na zawn raitim, Yesu sadi hkrup nna shakawn wa ai. (Luka 21:1-4) Myi man lu ai hte seng nna, Yesu a ningmu gaw kaga ni hte grai shai nga ai. Yehowa gaw myi man lu mayu ai hte seng nna anhte hpe jaw ai ningmu nga shangun mayu ai. Dai ningmu matut nga hkra ndai sumhpa gaw karum ya na re.

4. Kaja htum myi man lu ai lam gaw hpa rai kun? Hpa majaw kun?

⁴ Kaja htum myi man lu ai lam gaw hpa rai kun? Madang tsaw hpaji, awng dang ai hpaga hte shangwi shapyaw ai lam hta mying gumhkawng ai majaw lu la ai myi man lu ai lam n re. Kaja htum myi man lu ai lam hpe, Pawlu ndai hku sang lang dan wa ai: “Ya gaw, nanhte Karai Kasang hpe chye wa sai. Karai Kasang mung nanhte hpe chye sai. Raitim, akyu n nga, asung n shang ai lam ni hpang de bai nhtang wa nna hpa majaw mayam hkam mayu ai kun?” (Galati 4:9, NW) Ninggawn tawa uphkang madu ‘Karai Kasang anhte hpe chye’ ai ngu ai gaw, laksan ahkaw ahkang re. Yehowa gaw anhte hpe chye nna, tsawra ai. Anhte hte hku hkau mayu ai. Shi hte manang byin lu hkra, anhte hpe hpan da ai.​—⁠Hpaji 12:13, 14.

5. Yehowa a myi man lu na matu hpa galaw ra na kun?

⁵ Mawshe gaw Yehowa a manang langai re. Yehowa hpe shi ndai hku akyu hpyi ai: “Na a lam ngai hpe madun ya e.” Yehowa ndai hku bai tsun ai: “Nang nye a man e myi man pa nit dai hte nang hpe na amying hte ngai chye de ai majaw, ya nang tsun ai hku mung ngai hkan galaw na nngai.” (Pru Mat 33:12-17) Yehowa gaw anhte langai hpra hpe atsawm chye ai. Yehowa hte manang byin hkra anhte hpa galaw ra na kun? Shi hpe tsawra ra nna, anhte a prat hpe shi hpang apnawng ra ai.​—⁠1 Korinhtu 8:3 hpe hti u.

6, 7. Yehowa hte anhte a hku hkau lam hpe, gara gaw htenza shangun chye ai kun?

⁶ Anhte hte Yehowa a hku hkau lam, matut nna ngang kang nga ra ai. Galati kaw nna Hkristan ni zawn, “akyu n nga, asung n shang ai lam ni” re ai, ndai mungkan a awng dang ai lam, mying gumhkawng ai lam ni lu na matu shakut ai hpe hkring kau ra ai. (Galati 4:9) Galati kaw nna Hkristan ni gaw, Karai Kasang hpe chye wa nna, Karai Kasang mung shanhte hpe chye sai. Raitim, dai hpunau ni gaw, kaman lila lam ni a matu “bai nhtang wa” ai ngu Pawlu tsun ai. Maga mi hku tsun na nga yang, ‘akyu n nga ai, asung n shang ai lam ni a matu, hpa majaw bai mayam hkam nga a ta?’ ngu Pawlu san nga ai re.

⁷ Anhte mung dai zawn byin chye ai kun? Byin chye ai. Pawlu zawn anhte mung, teng man ai lam hpe chye wa ai shaloi,  Satan mungkan a awng dang ai lam hte gumhkawng ai lam ni hpe kau da wa na re. (Hpilipi 3:7, 8 hpe hti u.) Hpaji sharin kumhpa, bungli kaja hte gumhpraw law law lu ai ahkaw ahkang ni hpe, anhte asum hkam kau ai rai na re. Yungwi (sh) ginsup ai lam hta ningtawn ai majaw, gumhkawng nna lusu wa na ahkaw ahkang nga yang nga wa na re. Raitim, dai lam ni yawng hpe anhte asum hkam wa ai. (Hebre 11:24-27) Dai lam ni hpe asum n hkam wa yang, anhte a prat grau kaja na re ngu nna myit ai gaw, hpaji n rawng ai lam re. Dai zawn myit ai gaw, “akyu n nga, asung n shang ai lam ni” ngu, anhte dawdan da ai lam ni hpang de bai hkan na matu byin wa shangun ai.

8. Yehowa a myi man lu mayu ai myit rawt jat wa hkra, gara gaw anhte hpe n-gun jaw ai kun?

⁸ Mungkan kaw nna jaw ai myi man hpe n re ai sha, Yehowa a myi man lu mayu ai myit grau rawt jat wa hkra, gara hku galaw na kun? Ahkyak ai lam lahkawng hpe myit maju jung ai hku nna re. Langai, Yehowa gaw, shi hpe sadi dung let nawku ai ni hpe, galoi mung myi man jaw ai. (Hebre 6:10 hpe hti u; 11:6) Sadi dung let nawku ai ni yawng hpe, Yehowa manu shadan ai. Dai majaw, sadi dung ai ni hpe malap kau yang, “n ding n hpring” ai ngu shi hkam la ai. Yehowa gaw, “shi hte seng ai ni hpe” chye ai. (2 Timohti 2:19) “Ding hpring ai ni a lam hpe Yehowa chye” nna, shanhte hpe gara hku hkye la na hpe mung chye ai.​—⁠Shakawn 1:6; 2 Petru 2:9.

9. Yehowa gaw, shi a amyu masha ni hpe myi man jaw wa ai ga shadawn ni tsun dan u.

⁹ Yehowa gaw, shi a amyu masha ni hpe laksan hku nna myi man jaw wa ai lam ni nga ai. (2 Hkawhkam Labau 20:20, 29) Ga shadawn, shi a amyu masha ni hpe, Hpara-u a hpyen dap hkan shachyut ai shaloi, Nawng Hkyeng Hka hta shi gara hku hkye la wa ai hpe myit yu u. (Pru Mat 14:21-30; Shakawn 106:9-11) Ndai mabyin gaw, mauhpa lam rai nna shaning 40 na ai hpang pyi, masha ni dai lam naw jahta nga ai. (Yawshu 2:9-11) Magoga masha Goga gaw, kade n na yang anhte hpe sa gasat na re. Dai majaw, Yehowa gaw shi a amyu masha ni hpe tsawra nna, shi a atsam hte hkye la wa ai lam chye lu ai gaw, anhte hpe n-gun lu shangun ai. (Ezekela 38:8-12) Dai hku sa gasat ai shaloi, ndai mungkan kaw nna n re ai sha, Yehowa jaw ai myi man hpe lu la na re ai majaw, anhte grai kabu na re.

10. Gara lam hpe mung anhte myit maju jung ra na kun?

¹⁰ Myit maju jung ra na lahkawng ngu na lam gaw, Yehowa gaw anhte n myit mada da ai lam hku myi man jaw ai ngu ai lam re. Kaga ni shakawn na hpe ra ai majaw sha, kaja ai amu galaw ai ni hpe, Yehowa kumhpa jaw na n re. Hpa majaw kun? Yesu tsun wa ai zawn, kaga ni shanhte hpe shakawn ai gaw, shanhte a matu kumhpa re. (Mahte 6:1-5 hpe hti u.) Kaga ni a matu kaja ai amu galaw nna shakawn n hkrum tim, “n dan n leng ai shara hpe mu lu ai” Yehowa gaw chye ai.  Dai hpe shi sadi hkrup nna, shanhte hpe shaman chyeju jaw ai. Kalang lang, Yehowa gaw shi a mayam ni hpe, n myit mada da ai lam hku kumhpa jaw ai. Ga shadawn nkau hpe hkaja yu ga.

11. Yehowa gaw Mari hpe gara hku myi man jaw wa ai kun?

¹¹ Yesu a kanu byin na matu shagrit shanem ai Mari hpe Yehowa lata ai. Mari gaw, nawku htingnu nga ai Yerusalem hte grai tsan ai Nazaret mare kaji hta nga ai. (Luka 1:26-33 hpe hti u.) Yehowa gaw Mari hpe hpa majaw lata ai kun? Lamu kasa Gabriela gaw shi hpe “Karai Kasang a man e myi man pa nit dai” nga nna tsun ai. Shi gaw Yehowa hte grai hku hkau ai lam hpe shi a jinghku Elisabet hpe tsun ai ga hta mu lu ai. (Luka 1:46-55) Yehowa gaw Mari hpe yu nga nna, sadi dung ai hpe mu ai majaw, shi n myit mada da ai lam hku shaman chyeju jaw wa ai.

12, 13. Yesu shangai nna nhtoi 40 ya na ai hpang, nawku htingnu de Mari woi sa ai shaloi, Yesu gara hku shagrau hkrum ai kun?

¹² Yesu shangai wa ai lam hpe Yehowa gaw kadai ni hpe tsun dan ai kun? Yerusalem hte Betlehem kaw nga ai ahkang aya nga ai ni hpe n re. Betlehem mare shinggan hta sagu rem nga ai shagrit shanem ai sagu rem ni hpe re. (Luka 2:8-14) Dai sagu rem ni gaw ma chyangai Yesu hpang de sa chyai ai. (Luka 2:15-17) Yesu dai zawn shagrau hkrum ai hpe Mari yan Yosep grai mau mat na re. Yehowa galaw ai lam ni gaw, Satan galaw ai lam ni hte grai shai ai. Yesu hte shi kanu yan kawa hpang de sa chyai na matu, Satan gaw gumhpan hpaji sara ni hpe shangun dat ai. Yerusalem hta nga ai ni yawng gaw, Yesu shangai wa ai lam hpe chye nna, manghkang kaba byin wa ai. (Mahte 2:3) Mara n nga ai ma law law sat hkrum ai.​—⁠Mahte 2:16.

¹³ Israela ni hpe Yehowa jaw ai tara hta, shadang sha shangai ngut nna nhtoi 40 ya na yang, kanu gaw kasha hpe Yehowa kaw apnawng ra ai ngu ai lam lawm ai. Dai majaw,  Mari gaw Yosep yan Yesu hte arau, deng 6 daram tsan ai Yerusalem hta nga ai nawku htingnu de sa ai. (Luka 2:22-24) Yesu hpe hkingjawng ni laksan hku nna gara hku shagrau na hpe Mari myit nga na re. Mari n myit mada da ai lam hku Yesu shagrau hkrum ai. Yehowa gaw “ding hpring ai hte tara hkungga” ai Simun hte asak 84 ning re ai gaida jan myihtoi Anna hpe lata nna, Yesu gaw Meshia (sh) Hkristu byin wa na lam hpe shana shangun dat ai.​—⁠Luka 2:25-38.

14. Yehowa gaw Mari hpe gara hku kumhpa jaw wa ai kun?

¹⁴ Mari gaw Yesu hpe sadi dung let lanu lahku ai majaw, Yehowa gaw Mari hpe matut nna myi man jaw ai. Mari galaw wa ai lam hte tsun ai lam ni kaw nna nkau mi hpe Chyum Laika hta ka shalawm ai hku nna re. Mari gaw Yesu hkaw tsun bungli galaw ai masum ning chyen laman, Yesu hte arau n hkan lu ai. Shi gaw gaida re ai majaw, Nazaret mare kaw sha nga nga ra ai rai na re. Dai majaw, grai kaja ai mahkrum madup ni hpe lu la wa na n re. Raitim, Yesu si ai shaloi chyawm gaw makau hta shi nga ai. (Yawhan 19:26) Hpang e, Pentekoti hta sape ni chyoi pra ai wenyi n lu shi yang, Yerusalem hta shanhte hte arau Mari nga nga ai. (Kasa 1:13, 14) Shi gaw kaga sape ni hte arau namman chya hkrum wa ai rai na re. Rai yang, Yesu hte arau sumsing lamu hta htani htana nga lu na re. Dai gaw sadi dung let shi galaw wa ai lam a akyu re.

15. Yesu mungkan ntsa nga ai shaloi Yehowa gaw shi hpe gara hku myi man jaw wa ai kun?

¹⁵ Yesu gaw, mung masa ningbaw ni hte nawku htung ningbaw ni kaw nna shagrau ai lam n lu mayu ai. Yehowa gaw sumsing lamu kaw nna shi Kasha hpe tsawra ai lam masum lang tsun wa ai. Dai gaw Yesu hpe grai n-gun lu shangun na re. Yawdan Hka kaw hkalup hkam ngut ai hpang, Yehowa ndai hku tsun wa ai: “Ndai wa gaw ngai sharawng awng nga ai, ngai tsaw ra ai Kasha rai nga li ai.” (Mahte 3:17) Hkalup sara Yawhan gaw, dai ga ni hpe na wa ai. Dai hpang, Yesu n si shi ai laning mi daram hta, Yesu hpe Yehowa ndai hku  tsun ai hpe kasa masum na wa ai: “Ndai wa gaw ngai sharawng awng ai, ngai tsawra ai ngai Sha rai nga ai: shi a ga madat mara mu.” (Mahte 17:5) Yesu garai n si shi ai nhtoi loi mi daram hta, Yehowa gaw shi Kasha hpe sumsing lamu kaw nna kalang bai ga shaga ai.​—⁠Yawhan 12:28.

16, 17. Yehowa gaw Yesu n myit mada da ai gara lam hku shagrau wa ai kun?

¹⁶ Karai Kasang hpe jahpoi ai wa ngu shaga hkrum nna, kaya kahpa hkrum let si ra na hpe Yesu chye ai. Shi a myit ra ai hku n re ai sha, Karai a myit ra ai hku sha rai na matu akyu hpyi ai. (Mahte 26:39, 42) Mungkan kaw na jaw ai arawng sadang hpe n re ai sha, shi Kawa a myi man lu mayu ai majaw, “kaya kahpa hkrum ai hpe hpa zawn n nawn ai sha, wudang lam hpe hkam nu ai.” (Hebre 12:2) Yehowa gaw Yesu hpe gara hku myi man jaw ai kun?

¹⁷ Yesu mungkan ntsa nga ai shaloi, moi sumsing lamu hta shi lu da ai hpung shingkang hpe bai lu mayu ai lam akyu hpyi ai. (Yawhan 17:5) Shi lu ga ai hta grau nna lu mayu ai lam Chyum Laika hta n tsun da ai. Mungkan ntsa Yehowa a myit ra ai lam galaw ai majaw, laksan kumhpa lu na matu shi n myit mada ai. Raitim, Yehowa hpa galaw wa ai kun? Yesu n myit mada da ai hku shagrau wa ai. Yehowa gaw Yesu hpe bai jahkrung ya nna, sumsing lamu kaw, moi na hta “grau ai shara” jaw wa ai. Yesu hpe moi kadai hpe mung n jaw ga ai, n si lu ai wenyi asak jaw wa ai. * (Hpilipi 2:9, NW; 1 Timohti 6:16) Yesu sadi dung let magam gun wa ai majaw, mauhpa lam hku Yehowa jaw wa ai kumhpa re.

18. Ndai mungkan a myi man lu na matu n re ai sha, Yehowa kaw nna myi man lu na matu anhte hpe hpa gaw karum ya na kun?

¹⁸ Ndai mungkan a myi man lu na matu n re ai sha, Yehowa kaw nna myi man lu na matu anhte hpe hpa gaw karum ya na kun? Yehowa gaw sadi dung ai mayam ni hpe galoi mung myi man jaw nna, shanhte n myit mada da ai hku kumhpa jaw ai lam hpe anhte myit maju jung ra ai. Htawm hpang hta n myit mada da ai shaman chyeju law law lu na re. Ya aten hta gaw mayak mahkak ni hpe hkam sharang lu hkra shakut ra ai. Ndai mungkan anhte hpe jaw lu ai lam ni gaw, chyahkring chyahkra sha re ai hpe dum ra ai. Mungkan kaw nna myi man lu ai lam yawng gaw lai mat na re. (1 Yawhan 2:17) Anhte a Kawa, Yehowa gaw, “n ding n hpring” ai wa n re ai majaw, shi a amying ningsang a matu anhte madun ai tsawra myit hte galaw ai lam ni hpe galoi mung malap kau na n re. (Hebre 6:10) Anhte n myit mada da ai lam hku shi myi man jaw na gaw teng sha re.