KABU gara shiga gara hku hkaw tsun na hte seng nna sape ni hpe Yesu sharin ya ai shaloi, masha ni ayan madat na gaw n re ai lam sadi jaw wa ai. (Luka 10:3, 5, 6) Dai ni aten hta mung dai lam gaw teng nga ai. Masha nkau mi nga yang, grai zai ai (sh) ga law saw ai ni pyi nga chye ai. Dai lam ni hpe anhte hkrum ai shaloi, matsan dum myit madun nna matut hkaw tsun na matu yak chye ai.

Matsan dum myit nga ai wa gaw, kaga masha ni manghkang hkrum nna karum shingtau lam ra ai shaloi, shanhte hpe myit tsang ya nna karum ya mayu ai. Hkaw tsun magam hta hkrum ai masha ni hpe matsan n dum yang hpa byin wa na kun? Shanhte hpe shakut shaja let hkaw tsun mayu ai myit mat mat nna, n kam karum ya mayu mat na re. Shakut shaja ai myit hpe wan hte shing daw mai ai. Wan matut grung nga na matu, hpun bang ra ai. Dai hte maren, matut nna shakut shaja myit nga na matu, matsan dum myit nga ra ai.​—⁠1 Htesaloni 5:19.

Matsan dum myit madun na matu yak tim, grau nna madun lu na matu gara hku sharin la lu na kun? Yehowa, Yesu hte kasa Pawlu a kasi ningli kaw nna sharin la lu na re.

Masha ni gaw Yehowa hte seng nna masu wa ai gaw, shaning hkying hku rai wa sai. Raitim, Yehowa gaw, “chyeju malap kau ai ni hte, nhkru nhkra re ai ni hpe matsan dum myit madun ai.” (Luka 6:35, NW) Matsan dum myit hpe shi gara hku madun ai kun? Yawng mayawng hpe myit galu ya ai. “Masha yawng mayawng hkye hkrang la ai hkrum” na hpe shi ra sharawng ai. (1 Timohti 2:3, 4) Nhkru nhkra lam hpe Yehowa nju ndawng tim, shi a matu shinggyim masha ni gaw manu dan nna kadai hpe mung n si shangun mayu ai.​—⁠2 Petru 3:9.

Masu ai hpe masha ni kam wa hkra galaw ai hta, Satan grai byin ai hpe Yehowa chye ai. (2 Korinhtu 4:3, 4) Masha law malawng gaw, ma prat kaw nna Karai hte seng ai lam hpe n jaw ai hku sharin la hkrum ai. Dai majaw, shanhte a myit mang ai lam hte hkamsha lam gaw, teng man ai lam hpe hkap la na matu yak shangun chye ai. Raitim, shanhte hpe karum na matu, Yehowa gaw myit rawt nga ai. Gara hku nna anhte chye lu ai kun?

Ga shadawn, Ninewe mare masha ni hte seng nna Yehowa gara hku hkamsha ai kun? Shanhte gaw nhkru ai ni raitim, Yehowa gaw Yona hpe ndai hku tsun ai: “Tinang a hkra lata hte pai lata hpe pyi n chye ginhka ai, masha sen me mun lahkawng rawng ai, mare kaba Ninewe hpe, ngai lahpawt dum mai nga ai n rai ni?” (Yona 4:11) Yehowa gaw, shi hte seng nna teng man lam hpe n chye ai shanhte hpe matsan dum wa ai. Dai majaw, sadi jaw na matu Yona hpe shangun dat ai.

Masha ni hte seng nna Yehowa dai hku hkamsha ai zawn, anhte mung hkamsha ging ai. Shanhte gaw manu dan ai ni re. Teng man lam hpe shanhte hkap la na masa n nga tim pyi, teng man lam hpe shanhte chye wa hkra karum ya na matu, Yehowa zawn sha anhte myit rawt ging ai.

 Anhte hkaw tsun ai shiga hpe masha ni n hkap la ai shaloi, hpa majaw shanhte dai hku bai htang ai hpe anhte chye na ra ai. Hkristan ni ngu hkam la da ai masha nkau gaw, nshawp nkap ai amu galaw ai majaw, Hkristan ni hte seng nna (sh) Chyum Laika hte seng nna shut ai ningmu shanhte hta nga ai rai na re. Anhte a makam masham hte seng nna, masu magaw ga ni hpe na da ai mung rai chye ai. Anhte hte tsun shaga yang, shanhte a jinghku ni, manaw manang ni jahpoi asawng na hpe hkrit ai mung rai chye ai.

Masha nkau mi gaw, grai hkra machyi shangun ai hkrit hpa lam ni hkrum wa ai mung rai chye ai. Hkaw tsun lawk hta sasana nauna Kim hkrum ai masha law malawng gaw, majan a majaw lu malu mahkra sum mat ai ni re ngu shi tsun ai. Htawm hpang hte seng nna shanhte hta myit mada lam n nga ai. Myit daw hten nga nna kadai hpe mung shanhte n kam ai. Dai lawk hta nga ai masha ni gaw, hkaw tsun bungli hpe pyi jahkring kau na matu shakut ai. Kalang mi hta, Kim hkaw tsun sa nga ai shaloi, gasat hkrum ai.

Masha ni shi hpe mazut ai hku bai htang tim, Kim gara hku nna matsan dum myit madun lu ai kun? Chyum Laika hta tsun da ai ndai lam hpe shi adum nga na matu shakut ai: “Hpaji rawng ai wa gaw, masin pawt ai lam hpe hkang lu ai.” (Ga Shagawp 19:11, NW) Shi a hkaw tsun lawk hta nga ai masha ni gara hku hkrum sha wa ai hpe shi myit ai gaw, shanhte ntsa myit tau ya na matu shi hpe karum ya wa ai. Shi hte hkrum ai masha law malawng gaw, shi ntsa kaja ai ni n re. Raitim, dai lawk kaw sha, bai kawan ai lam nkau lu la wa ai.

Anhte mung tinang hkum tinang ndai hku san mai ai: ‘Ngai gaw teng man ai tara hpe n chye ai nga yang, Yehowa Sakse ni nye nta sa ai shaloi, ngai gara hku bai htang na kun?’ Ga shadawn, Yehowa Sakse ni hte seng nna n teng n man ai lam ni hpe na da ai ngu saga. Anhte mung, n kaja ai lam hku shanhte hpe bai htang chye ai. Dai shaloi, matsan dum myit madun ai hpe ra na re. Tinang kanawn mazum hkrum mayu ai hku, kaga ni hpe kanawn mazum ra ai ngu Yesu tsun wa ai. Dai majaw, yak tim pyi, kaga ni a hkamsha lam hpe chye na hkra shakut ra nna, myit galu ra ai.​—⁠Mahte 7:12.

Pawlu gaw, shi a ntsa masha ni n kaja tim, shanhte hpe matsan dum myit matut nna madun wa ai. Hpa majaw kun? Moi na shi a prat hpe dum ai majaw re. Shi ndai hku tsun ai: “Ngai chyawm gaw, shawng e shatan nhkan ai, zingri zingrat ai hte sheng mareng re ai wa rai nga nngai rai ti mung, n chye n chyang ai hte kam sham ai myit n rawng ai sha dai hpe galaw nngai majaw, matsan dum la ai ngai hkrum nngai.” (1 Timohti 1:13) Yehowa hte Yesu gaw shi hpe matsan dum myit madun ai hpe Pawlu chye ai. Hkaw tsun bungli hpe pat shingdang ai ni hpe shi chye na ya ai. Hpa majaw nga yang, shi mung moi shanhte zawn sha hkamsha wa ai majaw re.

Shut shai ai sharin achyin lam hpe hkap la da ai ni hte mung Pawlu hkrum ai. Shi gara hku hkamsha ai  kun? Ahten mare hta shi du nga ai shaloi, “dai mare ting Hpara sumla hkrai hpring chyat nga ai hpe mu nna, shi a myit shanut shanat byin wa ai.” (Kasa 17:16, NW) Raitim, shi hpe myit shanut shangun ai lam hpe sha akyu jashawn nna, Ahten mare masha ni hpe hkaw tsun wa ai. (Kasa 17:22, 23) Hkaw tsun ladat hpe ra ang ai hku shi galai shai ai. “Lam langai ngai hte hkye hkrang la lu hkra,” masha amyu myu hpe, ladat amyu myu hte shi hkaw tsun wa ai.​—⁠1 Korinhtu 9:20-23.

Anhte hpe n kaja ai hku bai htang ai masha ni (sh) shut shai ai makam masham nga ai ni hte anhte hkrum ai shaloi, Pawlu zawn galaw mai ai. “Kaja ai shi ga” hpe chye na wa hkra, shanhte chye da ai lam hpe akyu jashawn nna karum ya mai ai. (Esaia 52:7) Nauna Dorati ndai hku tsun ai: “Karai Kasang gaw grai mazut nna tara ja ai wa re ngu nna, nye a hkaw tsun lawk hta nga ai masha ni sharin la hkrum ai. Karai Kasang ntsa makam masham nga ai hte seng nna, shanhte hpe ngai shawng shakawn ya ai. Ngut yang, Chyum Laika hta tsun da ai Yehowa a mai kaja ai atsam ningja ni hpe tsun dan ai. Yehowa galaw ya na, htawm hpang shaman chyeju ni hpe mung tsun dan ai.”

Hkaw tsun sa ai shaloi, kaga hpunau nauna ni hpe mung, n-gun jaw na matu shakut ging ai. N kaja ai mahkrum madup hpe, hpunau nauna langai ngai hkrum wa ai shaloi, dai hpe myit maju n jung na matu shakut ai ngu nauna Jesika tsun ai. N kaja ai lam ni hkrum wa tim, hkaw tsun bungli hta lu la ai kaja ai akyu ni hpe sha shi tsun jahta ai.

Kalang lang rai yang, hkaw tsun na matu grai yak ai hpe Yehowa chye na ya ai. Yehowa a matsan dum myit hpe anhte kasi la na nga yang, shi grai kabu na re. (Luka 6:36) Raitim, Yehowa gaw ndai mungkan hta nga ai masha ni hpe, htani htana myit galu let matsan dum myit madun na gaw n re. Jahtum nhtoi gaw Yehowa masat da ai aten hta du wa na hpe anhte kam ai. Jahtum nhtoi n du dingsa, hkaw tsun bungli gaw hkyak hkyak galaw ra na lam re. (2 Timohti 4:2) Dai majaw, “masha yawng mayawng” hpe matsan dum myit madun ai hku nna, shakut shaja let matut hkaw tsun nga ga.