1, 2. (a) Yehowa maga de tsap ai gaw hpa majaw hpaji rawng ai lam rai kun? (b) Ndai sumhpa hta hpa lam hpe hkaja mat na kun?

YEHOWA hte ni htep hkra nga ai gaw hpaji rawng ai lam re. Kadai mung Yehowa daram n-gun atsam, nyan hpaji hte tsawra myit n nga ai. Dai majaw, anhte gaw galoi mung shi a maga de tsap nga nna shi hpe sadi dung mayu ai. (Shakawn 96:4-6) Raitim, Karai hpe nawku wa ai nkau mi gaw dai hku n galaw wa ai.

² Ndai sumhpa hta Yehowa maga de tsap nga ai ngu tsun nna, Yehowa nju ai hpe mung galaw nga ai masha nkau mi a lam hpe hkaja mat na re. Yehowa hpe matut sadi dung lu hkra, shanhte a mabyin ni kaw nna sharin la lu na re.

3. Yehowa gaw hpa majaw Ka-in hpe karum ya mayu ai kun? Yehowa hpa tsun wa ai kun?

³ Ka-in a mabyin hpe myit yu u. Hpara shaje ni hpe shi n nawku tim, shi a nawku dawjau lam hpe Yehowa n hkap la ai. Hpa majaw rai na kun? Ka-in a myit masin hta n hkru ai lam galaw mayu ai myit nga ai hpe mu ai majaw re. (1 Yawhan 3:12) Ka-in hpe Yehowa ndai hku sadi jaw ai: “Nang kaja ai galaw yang gaw, myi  man hpaw lu na n rai ni? N kaja ai nang galaw yang chyawm gaw, yubak gaw chyinghka makau e makun hpum nga ai: dai gaw nang kaw kanan mayu nga ai; rai ti mung, dai hpe nang up lu na rai ndai.” (Ningpawt 4:6, 7) Ka-in myit malai la nna Yehowa a maga de nga na nga yang, Yehowa mung Ka-in maga de nga na ngu tsun mayu ai re.

4. Yehowa maga de nga na matu ahkaw ahkang nga tim, Ka-in hpa galaw wa ai kun?

⁴ Ka-in gaw myit jasat hpe galai shai na nga yang, shi a nawku dawjau ai lam hpe Yehowa bai hkap la na re. Raitim, Ka-in gaw Karai a ga n madat wa ai. Shut ai myit jasat hte tingkyeng myit gaw, mara galaw na matu shi hpe shadut ya wa ai. (Yaku 1:14, 15) Ka-in naw kaji ai shaloi, shi Yehowa hpe gumlau hkrup na ngu nna kalang pyi myit ga na n re. Ya gaw, Karai a sadi jaw ga hpe nyet kau ai. Shi a kanau hpe sat kau ai hku nna, Karai Kasang hpe gumlau wa ai.

5. Gara myit mang ai lam gaw, Yehowa a myi man sum mat chye ai kun?

⁵ Hkristan langai gaw, Ka-in zawn sha Yehowa hpe nawku nga ai ngu tsun nga tim, Yehowa nju ai lam ni hpe galaw nga chye ai. (Yuda 11) Shi gaw, hkaw tsun bungli hta mung shang lawm nna, zuphpawng ni mung ayan lung nga na re. Raitim, akyang htenza ai lam ni, lawhpa ai lam ni (sh) nju ndawng ai lam ni hpe myit nga chye ai. (1 Yawhan 2:15-17; 3:15) Dai zawn myit mang ai gaw, mara galaw hkrup hkra shadut ya chye ai. Kaga masha ni gaw, anhte a myit mang ai lam hte galaw ai lam hpe n chye tim, Yehowa gaw chye ai. Shi a maga de, tsep kawp n tsap ai hpe mung chye ai.​—⁠Yeremia 17:9, 10 hpe hti u.

6. N kaja ai ra marin ai lam ni hpe tawt lai lu hkra Yehowa gara hku karum ya ai kun?

⁶ Anhte mara galaw ai raitim pyi, Yehowa gaw anhte hpe kalang ta asum n hkam kau ai. Lam shai wa sai nga yang, Yehowa ndai hku saw shaga ai: “Ngai hpang de nhtang wa ma rit, shaloi ngai nanhte hpang de nhtang wa na nngai.” (Malahki 3:7) Anhte a gawng kya lam ni hte anhte gasat nga ra ai hpe, Yehowa chye na ya ai. Dai majaw, matut ngang ngang kang kang tsap nna, n kaja ai lam ni hpe ningdang kau shangun mayu ai. (Esaia 55:7) Anhte shakut na nga yang, n kaja ai ra marin ai lam ni hpe tawt lai lu hkra, anhte hpe n-gun jaw nna karum ya na ngu ga sadi jaw da ai.​—⁠Ningpawt 4:7.

7. Shawlumon gaw Yehowa hte hku hkau lam gara hku sum mat ai kun?

⁷ Shawlumon gaw, asak naw kaji ai shaloi Yehowa hte hku hkau lam kaja wa ai. Yehowa gaw, shi hpe nyan hpaji grai rawng hkra shaman chyeju jaw nna, Yerusalem hta grai tsawm htap ai nawku htingnu gawgap na matu lit jaw wa ai. Raitim, hpang hta Shawlumon gaw Yehowa hte hku hkau lam n nga mat ai. (1 Hkawhkam 3:12; 11:1, 2) Hkawhkam ni hkan sa ra na tara hte seng nna Karai Kasang ndai hku matsun da ai: “Shi a myit masin lam n dam lu ga, num law law mung la tawn lu na n rai.” (Tara Jahprang 17:17) Ndai tara hpe Shawlumon n madat wa ai. Madu jan 700 hte lashi num 300 la wa ai. (1 Hkawhkam 11:3) Dai num law malawng gaw maigan shayi sha ni rai nna, hpara shaje ni hpe nawku ai. Maigan num ni hpe n mai la ai ngu ai Karai a tara hpe mung Shawlumon n madat wa ai.​—⁠Tara Jahprang 7:3, 4.

8. Yehowa hpe Shawlumon gara hku shut hpyi wa ai kun?

⁸ Yehowa a tara ni hpe tsawra ai myit, Shawlumon hta n nga mat ai. Grai nhkru ai lam ni hpe shi galaw wa ai. Ashtoret hpara hte Hkemosha hpara a matu tawn hkungri ni  gawgap ya wa nna, madu jan ni hte arau dai hpara ni hpe nawku wa ai. Yehowa a nawku htingnu nga ai Yerusalem mare a shawng na bum hta pyi, dai tawn hkungri ni hpe shi gawgap ya wa ai. (1 Hkawhkam 11:5-8; 2 Hkawhkam 23:13) Nawku htingnu hta matut nna hkungga nawng nga ai nga yang, shi galaw ai n kaja ai amu yawng hpe Yehowa malap kau ya na ngu, shi hkum shi hkalem wa ai mai byin ai.

9. Karai Kasang a sadi jaw ai lam hpe Shawlumon n madat ai majaw hpa byin wa ai kun?

⁹ Raitim, Yehowa gaw mara hpe galoi mung ahpa atang n sawn la wa ai. Chyum Laika hta ndai hku tsun da ai: ‘lsraela Karai Kasang Yehowa kaw na yit mat wa ai majaw, Yehowa shi hpe pawt bu nga ai.’ Karai Kasang gaw Shawlumon hpe karum na matu shakut ai. Yehowa gaw, “hpara tsasam ni hpe n hkan nang na nga, nga nna lahkawng lang shi kaw dan pru ai hte aga htet da ai.” Raitim, shi gaw “Yehowa a htet da ai ga n hkan shatup wu ai.” Dai majaw, Karai Kasang a myi man hte madi shadaw ya ai lam shi sum mat ai. Shawlumon a aru arat gaw, Israela mung ting hpe uphkang na matu Yehowa ahkang n jaw wa ai. Shaning tsa lam hku shanhte manghkang hkrum wa ai.​—⁠1 Hkawhkam 11:9-13.

10. Yehowa hte anhte a hku hkau lam hpe gara lam gaw htenza shangun chye ai kun?

¹⁰ Karai Kasang a tsang madang ni hpe n hkungga ai (sh) n chye na ai ni hte kanawn na nga yang, anhte a myit mang ai lam hpe shanhte shingkang ka-up lu nna, Yehowa hte hku hkau lam mung htenza mat chye ai. Dai n kaja ai manang ni hta, nawku hpung hta  nga ai raitim, Yehowa hte hku hkau lam n kaja ai ni lawm ai. Yehowa hpe n nawku ai jinghku ni, htingbu ni, bungli manang ni, jawng manang ni mung lawm ai. Yehowa a tsang madang ni hte maren n nga ai ni hte kanawn na nga yang, Yehowa hte anhte a hku hkau lam htenza mat hkra, shanhte shingkang ka-up lu ai.

11. Manang lata ai hte seng nna hpa gaw anhte hpe karum ya lu ai kun?

¹¹ 1 Korinhtu 15:33 hpe hti u. Masha law malawng hta kaja ai atsam ningja ni nga ai. Yehowa hpe n nawku tim, n kaja ai hpe koi ai ni nga ai. Dai zawn re ai masha nkau mi hpe, nang chye na re. Rai yang, shanhte gaw na a matu manang kaja ni mai byin na kun? Ndai ga san ni hpe myit yu ga: Shanhte gaw Yehowa hte na a hku hkau lam hpe grau kaja shangun ai kun? Karai Kasang hte grau ni htep wa hkra nang hpe karum ya lu ai kun? Shanhte ahkyak shatai ai lam ni gaw hpa ni rai kun? Hpa lam hte seng nna shanhte tsun jahta ai kun? Ja gumhpraw, computer, phone, tablet, shangwi shapyaw lam zawn re ai ni hpe sha tsun jahta ai kun? Kaga ni hpe sha mara tam nga ai kun? Nse nsa lam ni hpe mani hpa shatai nna tsun ai kun? Yesu ndai hku sadi jaw ai: “Kraw hta hpring chyat nga ai kaw na, n-gup de tsun nga ai.” (Mahte 12:34) Na a manang ni gaw, Yehowa hte na a hku hkau lam hpe htenza shangun nga ai rai yang, shanhte hte kanawn ai aten hpe shayawm kau u. Ra ang yang, kanawn ai lam hpe jahkring kau u.​—⁠Ga Shagawp 13:20.

12. (a) Egutu mung kaw nna pru wa ai hpang kade n na yang, Israela ni hpe Yehowa hpa tsun wa ai kun? (b) Sadi dung na matu Yehowa tsun ai shaloi Israela ni gara hku mahtai jaw ai kun?

¹² Israela ni hpe Egutu mung kaw nna Yehowa shalawt ya ngut ai hpang byin wa ai mabyin kaw nna mung, anhte sharin la lu ai. Israela ni Sina Bum a shawng hta du nga ai shaloi, Yehowa gaw mauhpa lam ni madun wa ai. Sin mak nga ai sumwi, myihprap hte wan hkut ni hpe shanhte mu nna, mu ngoi ai nsen hte grai ja ai pahtau nsen hpe na ai. (Pru Mat 19:16-19) Dai hpang, Yehowa gaw shi langai hpe sha nawku na matu hpyi shawn wa ai. Shi hpe tsawra nna shi a ga madat na nga yang, shi mung shanhte a ntsa sadi dung na ngu ga sadi jaw wa ai. (Pru Mat 20:1-6 hpe hti u.) Israela ni gaw shi a maga de tsap na nga yang, shi mung shanhte maga de tsap na ngu Yehowa tsun wa ai. Dai shawa hpawng hta nang mung lawm ai nga yang, Yehowa tsun ai dai ga ni hpe nang na ai shaloi, gara hku hkamsha na kun? Israela ni zawn sha, nang mung ndai hku tsun na re: “Yehowa tsun matsun mahkra anhte hkan galaw na ga ai.” (Pru Mat 24:3) Dai hpang kade n na yang, Karai Kasang hpe sadi dung na lam hte seng nna Israela ni chyam dinglik hkrum wa ai. Gara lam rai na kun?

13. Israela ni gaw sadi dung ai hte seng nna gara hku chyam dinglik hkrum ai kun?

¹³ Karai Kasang madun ai mauhpa lam ni hpe Israela ni hkrit gari ai majaw, Yehowa hpe ga shaga na matu Mawshe gaw Sina Bum de lung mat wa ai. (Pru Mat 20:18-21) Aten grai na sai raitim, Mawshe gaw bum kaw nna bai n yu wa shi ai. Israela ni gaw ningbaw Mawshe hpe grai kamhpa ai. Woi awn ai wa n nga ai sha, nam maling hta nga ra mat na zawn Israela ni hkamsha ai. Shanhte hpa galaw wa ai kun? Shanhte myit tsang wa nna Arun hpe ndai hku tsun ai: “Anhte a shawng e sa wa na hpara, anhte a matu galaw ya mi: anhte hpe Egutu mung na woi wa ai wa, dai Mawshe hta hpa byin sai gaw, anhte n chye sa ga ai”​—⁠Pru Mat 32:1, 2.

14. Israela ni gaw shanhte hkum shanhte gara hku hkalem wa ai kun? Yehowa gara hku bai htang ai kun?

 ¹⁴ Kaga hpara ni hpe nawku ai gaw shut ai hpe Israela ni chye ai. (Pru Mat 20:3-5) Raitim, ja dumsu kasha hpe shanhte nawku wa ai. Yehowa a ga hpe shanhte tawt lai ai raitim, Yehowa maga de shanhte naw rai nga ai ngu nna, shanhte hkum shanhte hkalem wa ai. Ja dumsu nawku ai hpe, “Yehowa a matu poi” ngu nna pyi Arun tsun ai. Yehowa hpa galaw wa ai kun? Masha ni gaw hten byak mat nna, ‘hkang da ai lam hta na alawan dam mat’ sai ngu Mawshe hpe Yehowa tsun ai. Yehowa gaw grai masin pawt ai majaw, amyu ting hpe jahten kau na matu pyi myit wa ai.​—⁠Pru Mat 32:5-10.

15, 16. Mawshe yan Arun gaw Yehowa a maga de tsap ai lam gara hku madun wa ai kun? (Sumhpa shawng na sumla hpe yu u.)

¹⁵ Yehowa gaw matsan dum myit rawng ai Karai re. Shanhte hpe n jahten na matu dawdan wa ai. Shi a maga de tsap na matu ahkaw ahkang kalang bai jaw wa ai. (Pru Mat 32:14) Masha ni gaw, ja dumsu shawng kaw mahkawn hkawn, marawn nna ka manawt nga ai hpe Mawshe mu ai shaloi, dai ja dumsu hpe agrawp mani kau ai. Ngut nna ndai hku san ai: “Yehowa hpang maga de naw nga ai ni kadai mung, ngai kaw wa ma rit.” Dai shaloi, “Lewi lakung na shadang sha ni nlang shi kaw wa hpawng ma ai.”​—⁠Pru Mat 32:17-20, 26.

¹⁶ Arun gaw ja dumsu galaw wa tim, myit malai lu wa ai. Kaga Lewi ni hte arau Yehowa maga de tsap na matu lata wa ai. Sadi dung ai ni gaw mara galaw ai ni maga de n tsap ai lam madun wa ai. Dai hku dawdan ai gaw hpaji rawng ai lam re. Hpa majaw nga yang, ja dumsu nawku wa ai hkying hku law ai masha ni gaw sat kau hkrum ai. Yehowa maga de tsap ai ni gaw hkye hkrang la hkrum nna, shanhte hpe Yehowa shaman chyeju jaw na ngu nna ga sadi jaw wa ai.​—⁠Pru Mat 32:27-29.

17. Ja dumsu hte seng nna Pawlu tsun ai lam kaw nna anhte hpa sharin la lu ai kun?

¹⁷ Anhte hpa sharin la lu ai kun? “Dai lam hte gaw anhte a matu kasi tai wa masai” majaw, “sumla nawku” ai hpe koi na matu Pawlu tsun wa ai. Dai lam hte seng nna ndai hku kahtap nna sang lang dan ai: “Hpang jahtum nhtoi hta asak hkrung nga ai anhte a matu, sadi jaw ai lam hku nna ka da ai rai nga ai. Dai majaw, tinang gaw sadi dung let tsap nga lu ai ngu shadu yang, n kadawng na matu sadi nga u ga.” (1 Korinhtu 10:6, 7, 11, 12, NW) Yehowa hpe nawku nga ai ni pyi, n kaja ai lam hta shang lawm wa chye ai hpe, Pawlu sadi jaw nga ai re. Shanhte hpe Yehowa naw hkap la nga ai ngu nna pyi sawn la na re. Marai langai gaw, Yehowa a jinghku byin mayu ai (sh) sadi dung mayu ai ngu tsun ai hte sha, shi hpe Yehowa hkap la na ngu n lu tsun ai.​—⁠1 Korinhtu 10:1-5.

18. Gara lam gaw gau ngwi ngwi Yehowa hte tsan gang mat shangun chye ai kun? Hpa ni byin wa chye ai kun?

¹⁸ Israela ni gaw, shanhte myit mada da ai aten hta, Sina bum kaw nna Mawshe n yu wa ai majaw, myit tsang wa ai. Dai hte maren, jahtum nhtoi mung anhte myit mada da aten hta n du wa yang, anhte mung myit tsang wa na re. Yehowa ga sadi jaw da ai htawm hpang prat gaw grai naw tsan ai (sh) grai kaja ai majaw  kam na matu pyi yak ai ngu myit wa yang, Yehowa ra sharawng ai hpe galaw na malai, anhte ra sharawng ai hpe sha myit maju jung wa chye ai. Anhte n sadi yang, gau ngwi ngwi Yehowa hte tsan gang mat chye ai. Anhte galoi mung n myit ga ai lam ni hpe pyi galaw wa chye ai.

19. Hpa hpe anhte myit dum ging ai kun? Hpa majaw kun?

¹⁹ Yehowa gaw, shi langai hpe sha nawku nna shi a ga hpe madat mara na matu hpyi shawn da ai. (Pru Mat 20:5) Hpa majaw dai hku hpyi shawn da ai kun? Anhte hpe tsawra ai majaw re. Lama na, Yehowa myit ra ai hpe anhte n galaw yang, Satan ra sharawng ai hpe galaw hkrup na re. Dai hku galaw ai gaw anhte hpe hkra machyi shangun ai. Pawlu ndai hku tsun ai: “Dai Madu a gawm hte nat ni a gawm hpawn, nanhte lu lu na myit dai n rai; dai Madu a sha ku hte nat ni a sha ku hta rau nanhte shang sha lu na myit dai n rai.”​—⁠1 Korinhtu 10:21.

20. Anhte mara galaw hkrup ai raitim pyi, Yehowa gara hku karum ya na kun?

²⁰ Ka-in, Shawlumon hte Israela ni gaw, shanhte galaw wa ai lam hpe myit malai la na matu ahkaw ahkang nga ai. (Kasa 3:19, 20) Yehowa gaw, shi a masha ni mara galaw ai shaloi, kalang ta asum n hkam kau ai. Arun hpe mara raw ya wa ai. Dai ni na aten hta mung, n kaja ai hpe n galaw hkrup hkra, Yehowa gaw tsawra myit hte anhte hpe sadi jaw nga ai. Chyum Laika, laili laika ni hte Hkristan shada da hpe akyu jashawn ai hku nna re. Yehowa a sadi jaw ai lam hpe madat mara na nga yang, anhte hpe shi matsan dum la na re.

21. Yehowa a ntsa sadi dung ai hte seng nna chyam dinglik hkrum yang hpa galaw ging ai kun?

²¹ Yehowa madun ai tsawra matsan dum myit hta yaw shada lam langai nga ai. (2 Korinhtu 6:1) “Tara n hkungga ai myit hte mungkan ga hpe marin marit ai lam koi kau” na matu anhte hpe ahkaw ahkang jaw da ai. (Titu 2:11-14 hpe hti u.) Yehowa a ntsa sadi n dung mat hkra, mungkan a masa lam ni gaw anhte hpe ayan na chyam dinglik nga ai. Dai majaw, Yehowa maga de tsep kawp nga na matu dawdan da u. “Na a Karai Kasang Yehowa hpe hkrit hkungga nga u; shi a magam gun hpai u: . . . shi a amying ningsang gang u” ngu ai hpe dum nga ga.​—⁠Tara Jahprang 10:20.