MYIT TSANG lam grai law ai mungkan hta asak hkrung nga ai majaw, ngwi pyaw lam lu la na matu grai yak ai. Ngwi pyaw lam nkau anhte hta nga da yang pyi, aloi sha mat mat chye ai. Jet ai ngwi pyaw lam lu la na matu, Chyum Laika hta hpa tsun da ai kun? Kaga masha ni mung dai hpe lu la hkra gara hku karum ya mai na kun?

Jet ai ngwi pyaw lam lu na matu, shim lum nna makawp maga hkrum ai ngu hkamsha ra ai. Anhte yawng hta manang kaja nga ra ai. Grau nna gaw, Karai Kasang hte hku hkau ra ai. Gara hku galaw mai na kun?

Yehowa a matsun ga ni hte npawt tara ni gaw anhte a matu grai akyu rawng ai. Anhte madat mara ai nga yang, Yehowa hpe kamhpa ai lam madun ai rai nna, shi hte hku hkau lam kaja mayu ai ngu madun ai re. (Yeremia 17:7, 8; Yaku 2:22, 23) Rai yang, Yehowa gaw anhte hpang de sit sa wa nna, myit simsa lam jaw na re. Esaia 32:17 hta ndai hku tsun ai: “Ding hpring ai gaw, ngwi pyaw ai shabyin na ra ai: ding hpring ai a akyu gaw, htani htana ngwi pyaw ai hte myit maju jung ai, tai na ra ai.” Sharawng awng let Yehowa hpe madat mara ai nga yang, jet ai ngwi pyaw lam lu la na re.​—⁠Esaia 48:18, 19.

Ngwi pyaw lam agrin nga na matu, karum ya lu ai manu dan kumhpa hpe Yehowa jaw da ai. Dai gaw, chyoi pra ai wenyi re.​—⁠Kasa 9:31.

Ngwi pyaw ai ngu ai gaw, “wenyi a asi” langai re ngu kasa Pawlu tsun ai. (Galati 5:22, 23) Chyoi pra ai wenyi gaw, ngwi pyaw lam shabyin ya lu ai majaw, ngwi pyaw lam lu mayu yang, chyoi pra ai wenyi a lam matsun hpe anhte hkam la ra na re. Gara hku galaw mai na kun?

Langai, Karai a Mungga hpe ayan hti ra ai. (Shakawn 1:2, 3) Anhte hti ai lam hpe atsawm myit sumru yang, masa lam ni hte seng nna Yehowa  gara hku myit ai hpe chye wa hkra, chyoi pra ai wenyi gaw karum ya na re. Ga shadawn, ngwi pyaw lam gaw Yehowa a matu hpa majaw grai ahkyak nna, ngwi pyaw lam matut nga hkra shi gara hku galaw ai hpe sharin la ra ai. Chyum Laika kaw nna chye wa ai lam ni hpe, tatut hkan sa ai nga yang, anhte a prat gaw grau nna ngwi pyaw wa na re.​—⁠Ga Shagawp 3:1, 2.

Lahkawng, chyoi pra ai wenyi lu na matu akyu hpyi ra ai. (Luka 11:13) Karum hpyi ai ni hpe Yehowa ndai hku ga sadi jaw da ai: “Chye chyang ai nyan yawng hta grau lai ai Karai Kasang a ngwi pyaw ai gaw, nanhte a myit masin hte nanhte a myit mang ai hpe, Hkristu Yesu hta e bau sin na ra ai.” (Hpilipi 4:6, 7) Yehowa hpang anhte sit shang nna chyoi pra ai wenyi hpe kamhpa na nga yang, ngwi pyaw simsa lu hkra Yehowa karum ya na re.​—⁠Roma 15:13.

Yehowa hte hku hkau lam kaja wa hkra, kaga ni hte simsa wa hkra, tinang nan ngwi pyaw simsa lam hkamsha lu hkra, masha law law hpe Chyum Laika gaw galai shai ya wa sai. Shanhte gara hku galai shai wa ai kun?

Teng man lam hpe n chye shi yang, hpunau nauna nkau gaw, grai masin pawt ja nna dawsa ai lam ni pyi galaw wa ai. Raitim, galai shai lu hkra shakut wa ai majaw, ya nga yang grau nna tsawra chye nna, myit galu kaba wa sai. * Kaga ni hte mung simsa let kanawn chye wa sai. (Ga Shagawp 29:22) Hpunau Debit hte nauna Rechel gaw, shanhte a akyang lailen hte seng nna gara hku galai shai wa ai hpe yu yu ga.

Teng man lam hpe Debit n chye shi ai shaloi, jahte tam chye nna, grai mazut ai ga hte nta masha ni hpe tsun shaga ai. Hpang hta gaw, galai shai ra ai hpe chye wa ai. Ngwi pyaw simsa lam hpe shi gara hku lu la wa ai kun? Debit ndai hku tsun ai: “Chyum Laika npawt tara ni hpe tatut hkan sa ai shaloi, tinang nan mung, dinghku hta mung hkungga ai lam nga wa ai.”

Makau grup-yin a shingkang ka-up ai lam hpe nauna Rechel hkrum wa ai. Shi ndai hku sanglang  dan ai: “Masin pawt ja ai dinghku hta nga kaba wa ai majaw, ya du hkra masin pawt ja nga ai.” Ngwi pyaw simsa lam hpe shi gara hku lu la wa ai kun? “Yehowa hpe kamhpa nna akyu hpyi wa ai” ngu shi tsun dan ai.

Debit hte Rechel a mabyin gaw, Chyum Laika npawt tara ni hpe hkan sa nna, chyoi pra ai wenyi hpe kam hpa ai majaw, ngwi pyaw simsa lam lu wa ai ga shadawn ni kaw nna nkau re. Masin pawt ja ai mungkan hta anhte asak hkrung nga tim, matut nna ngwi pyaw simsa lu ai. Ngwi pyaw simsa lam nga yang, tinang a nta masha ni hte mung, nawku hpung hta nga ai hpunau nauna ni hte mung grau nna hku hkau wa na re. Raitim, Yehowa gaw “masha nlang hte hte” ngu nna tsun da ai. (Roma 12:18) Dai gaw teng sha mai byin na kun? Kaga ni hte ngwi pyaw simsa na matu, anhte hpa majaw shakut ra ai kun?

Hkaw tsun magam hta, Karai a Mungdan hte seng ai ngwi pyaw simsa ai shiga hpe anhte hkaw tsun ai. (Esaia 9:5, 6; Mahte 24:14) Dai shiga hpe masha law law ra sharawng nna hkap la ai. Akyu hku nna, mungkan hta byin nga ai lam ni a majaw karum shingtau lam n nga sai ngu hkamsha ai lam ni, masin pawt ai lam ni shanhte hta n nga sai. Htawm hpang hte seng nna myit mada lam lu wa nna, “ngwi pyaw ai hpe tam” mayu wa ma ai.​—⁠Shakawn 34:14.

Masha yawng gaw anhte a shiga hpe hkap la ma ai n re. Hkap la ai nkau mi pyi, shawng nnan hkrum ai shaloi kalang ta hkap la ai ni n re. (Yawhan 3:19) Masha ni gara hku bai htang ai raitim, Karai Kasang gaw anhte hpe chyoi pra ai wenyi jaw ai. Dai gaw, anhte hkaw tsun ai shaloi, ngwi pyaw simsa lam hte hkungga lara ai lam matut nga na matu karum ya ai. Dai majaw, Yesu a ndai lam matsun hpe anhte hkan sa ai: “Nta hta shang myit yang gaw, dai ni hpe shachyen ya mu: dai nta hta ging dan nga a yang gaw, nanhte a shaman ai ga shi ntsa e du u ga; ging dan ai wa n rai yang gaw, nanhte a shaman ai ga nanhte hpang de bai nhtang wa u ga.” (Mahte 10:11-13) Anhte hta dai zawn myit jasat nga yang, kaga ni anhte hpe hpa mi tsun ai raitim, matut nna ngwi pyaw simsa lu na re. Dai hta n-ga, htawm hpang hta shanhte hpe karum ya na matu ahkaw ahkang naw nga na hpe myit mada mai ai.

Ahkang aya nga ai ni gaw, anhte a magam hpe pat shingdang ai nga yang pyi, shanhte hte tsun shaga ai shaloi, hkungga ai lam madun ai hku nna ngwi pyaw simsa lam nga hkra galaw lu ai. Ga shadawn, Ahprika mungdan langai hta, Nawku Htingnu gawgap na matu asuya gaw ahkang n jaw ai. Dai manghkang hpe simsa ai lam hku hparan ra ai lam hpunau ni chye ai. Dai mungdan hta sasana magam gun ga ai hpunau langai hpe, Inglan mung, Landan hta nga ai sum tsan dat kasa hte sa jahkrum na matu shangun dat ai. Yehowa Sakse ni gaw shanhte a magam bungli hpe ngwi pyaw simsa ai hku galaw nga ai hpe tsun dan na matu re.

Hpunau ndai hku tsun ai: “Hkap tau la ai shara de du ai shaloi, manam tau numsha a bu hpun palawng hpe yu nna, gara amyu masha re ai hpe ngai chye dat ai. Dai majaw, shi a amyu ga hte shakram dat ai. Shi grai mau mat ai. Ngut nna, ‘hpa lam a majaw ndai de du wa ai kun?’ ngu nna san ai. Sum tsan dat kasa hte hkrum mayu ai lam hpe si mani ai hku tsun dan dat ai. Shi phone shaga ya ai majaw, sum tsan dat kasa wa pru wa nna shanhte a amyu ga hte sa shakram ai. Dai hpang, Yehowa Sakse ni a magam bungli a lam tsun dan ai shaloi, atsawm madat ya ai.”

Hpunau sang lang dan ai hpe shi madat ngut ai hpang, anhte a magam bungli a lam grau chye na mat nna, lachyen lahka ai myit loi yawm mat ai. Dai hpang, dai mungdan asuya gaw, Nawku Htingnu gawgap na matu Yehowa Sakse ni hpe ahkang jaw dat ai. Hpunau ni grai kabu ma ai. Kaga ni hpe hkungga ai hku tsun shaga ai gaw, simsa lam matut nga na matu karum ya ai.

Dai ni na aten hta, Yehowa Sakse ni gaw, Yehowa hpe ngwi pyaw simsa let nawku nga ai majaw, wenyi hparadisu hta nga nga lu ai. Anhte a prat hta, ngwi pyaw lam rawt jat hkra galaw yang, matut nna grau ngwi pyaw lu na re. Yehowa hte mung hku hkau lam nga na re. Mungkan nnan hta mung, htani htana ngwi pyaw lam hkamsha lu na re.​—⁠2 Petru 3:13, 14.