1, 2. (a) Kanu kawa nkau mi gaw, shanhte a kasha ni hkalup hkam mayu ai shaloi, gara hku hkamsha chye ai kun? (b) Hkalup hkam mayu ai ni gaw, shanhte hkum shanhte Yehowa hpang ap nawng ai nga yang, hpa majaw ga san san hkrum ai kun? (Ndai sumhpa shawng na sumla hpe yu u.)

MARIYA a kanu yan kawa gaw, hkalup hkam na ni hte rau tsap nga ai shan a kasha hpe yu nga ma ai. Mungga htawn ai wa gaw, ga san lahkawng san ai. Mariya gaw, nsen ja ja hte mahtai jaw ai. Dai hpang, shi hkalup hkam ai.

² Mariya a kanu yan kawa gaw, shan a kasha Yehowa hpang ap nawng nna, hkalup hkam ai hpe grai arawng la nga ma ai. Raitim, Mariya hkalup n hkam shi yang, shi a kanu gaw loi mi myit tsang wa ai. Shi ndai hku tsun ai: ‘Mariya gaw hkalup hkam na matu grai naw kaji ai kun? Yehowa hpang tinang hkum tinang ap nawng ai gaw kade daram ahkyak ai hpe shi gaja wa chye na ai kun? Shi hkalup hkam na matu naw la ging ai kun?’ Tsawra myit rawng ai kanu kawa ni gaw, shanhte a kasha ni hkalup hkam mayu ai ngu tsun wa ai shaloi, dai zawn ga san ni  hpe shanhte hkum shanhte san chye ai. (Hpaji 5:5) Anhte yawng galaw lu ai ahkyak htum dawdan lam gaw, tinang hkum tinang Yehowa hpang ap nawng nna hkalup hkam ai lam re.​—⁠“ Yehowa Hpang, Na Hkum Nang Ap Nawng Sai Kun?” ngu ai lawk hpe yu u.

3, 4. (a) Hkalup hkam ai gaw grai ahkyak ai lam kasa Petru gara hku sharin ya wa ai kun? (b) Petru gaw, hkalup hkam ai lam hpe Noa sanghpaw li gap ai lam hte hpa majaw shing daw wa ai kun?

³ Kasa Petru gaw, hkalup hkam ai lam hpe Noa sanghpaw li gap ai lam hte shing daw da ai. Shi ndai hku tsun ai: “Baptisma ngu ai kumla gaw, nanhte hpe hkye hkrang la lu nga ai.” (1 Petru 3:20, 21 hpe hti u.) Noa gaw, Karai a myit ra ai lam hpe myit masin mahkra hte galaw mayu ai lam, dai sanghpaw li gaw kaga masha ni hpe sakse madun nga ai. Noa gaw, Yehowa galaw shangun ai lam hpe sadi dung let galaw wa ai. Noa a makam masham a majaw, Yehowa gaw shi hte shi a nta masha ni hpe Hka Sha-u Ing ai kaw nna hkye la wa ai. Petru gaw anhte hpe hpa sharin ya mayu ai kun?

⁴ Sanghpaw li hpe masha ni mu ai shaloi, Noa gaw Karai Kasang hpe kam sham ai lam chye lu ai. Marai langai hkalup hkam ai hpe masha ni mu ai shaloi, Hkristu hkrung rawt wa ai hpe shi kam sham ai majaw, Karai Kasang hpang shi a prat hpe ap nawng ai lam shanhte chye lu ai. Hkalup hkam ai ni gaw, Noa zawn Karai Kasang hpe madat mara nna, shi galaw shangun ai lit ni hpe gun hpai ma ai. Hka Sha-u Ing ai shaloi, Noa hpe Yehowa hkye la wa ai zawn, hkalup hkam da sai sadi dung ai mayam ni hpe mung, ndai mungkan hpe jahten kau ai shaloi hkye la na re. (Marku 13:10; Shingran 7:9, 10) Dai majaw, anhte a prat hpe Yehowa hpang ap nawng nna hkalup hkam na matu grai ahkyak ai. Marai langai gaw hkalup hkam na matu hting nut taw ai nga yang, htani htana  asak hkrung lu ai ahkaw ahkang hpe sum mat chye ai.

5. Ndai sumhpa hta anhte hpa lam hkaja na kun?

⁵ Hkalup hkam ai gaw grai ahkyak ai hpe anhte chye lu ai. Dai hte seng nna lawu na ga san masum a mahtai hpe anhte chye ra ai. Hkalup hkam ai hte seng nna Chyum Laika hta hpa tsun da ai kun? Marai langai hkalup n hkam shi yang hpa galaw ra ai kun? Anhte a kasha ni hte Chyum ga sharin ni hpe sharin ya ai shaloi, hkalup hkam ai gaw kade daram ahkyak ai hpe anhte hpa majaw myit dum ging ai kun?

6, 7. (a) Yawhan a hkalup gaw hpa lachyum rai kun? (b) Kadai na hkalup hkam ai lam gaw kaga ni hte shai ai kun? Hpa majaw kun?

⁶ Kaga masha ni hpe hkalup hkam ya ai shawng nnan na masha gaw, Baptisma Sara Yawhan re ai lam Chyum Laika hta mu lu ai. (Mahte 3:1-6) Masha ni gaw hkalup hkam na matu shi hpang de hpa majaw sa ma ai kun? Shanhte gaw, Mawshe a Tara ni hpe tawt lai wa ai majaw, grai yawn nna shanhte a yubak ni hpe myit malai lu ai lam madun na matu, hkalup hkam la ai re. Raitim, myit malai lu ai lam hte n seng ai, ahkyak htum ai hkalup hpe Yawhan jaw wa ai. Karai Kasang a hkum tsup ai kasha re ai Yesu hpe hkalup jaw ai lam re. (Mahte 3:13-17) Yesu gaw galoi mung mara n galaw ai. Dai majaw, shi myit malai lu na matu n ra ai. (1 Petru 2:22) Rai yang, Yesu hpa majaw hkalup hkam ai kun? Karai Kasang a myit ra ai lam galaw lu hkra, shi a prat hpe akyu jashawn na matu jin jin re ai lam madun na matu re.​—⁠Hebre 10:7.

⁷ Yesu shawng nnan hkaw tsun ngut ai hpang, shi a sape ni gaw kaga ni hpe hkalup hkam ya wa ai. (Yawhan 3:22; 4:1, 2) Dai masha ni mung, Mawshe a Tara hpe tawt lai wa nna myit malai lu ai majaw, hkalup hkam la ma ai. Raitim, Yesu si nna bai hkrung rawt ai hpang, Yesu a sape byin mayu ai ni gaw, kaga lam langai a majaw, hkalup hkam ra ai.

8. (a) Yesu gaw shi hkrung rawt ngut ai hpang hpa lam hpe matsun wa ai kun? (b) Hkristan ni gaw hpa majaw hkalup hkam ra ai kun?

⁸ A.D. 33 hta, Yesu hkrung rawt wa ai hpang, Yesu gaw, ma ni hte hpawn anum, ala marai 500 jan a man hta hkum shadan dan wa ai. Dai aten hta ndai ga ni hpe shi tsun wa ai rai na re: “Dai majaw nanhte pru sa nna, masha amyu baw shagu hpe sape shatai let, Kawa a, Kasha a, chyoi pra ai Wenyi a amying nsang hta, shanhte hpe baptisma jaw nhtawm, ngai nanhte hpe hkangda mada yawng hte hpe hkan shadik lu mu ga, shanhte hpe sharin shaga ya mu.” (Mahte 28:19, 20; 1 Korinhtu 15:6) Yesu gaw, sape shatai na matu, shi hpang hkan ai ni hpe matsun wa ai. Shi a sape byin mayu ai (sh) shi a “kandang” hpe hpai mayu ai ni gaw, hkalup hkam la ra ai. (Mahte 11:29, 30) Karai Kasang gaw, shi a yaw shada lam teng sha byin wa na matu Yesu Hkristu hpe akyu jashawn ai. Masha langai gaw, dai hpe hkap la yang she, Karai Kasang ra sharawng ai hku nawku dawjau lu na re. Rai yang, Karai Kasang ra sharawng ai hte maren hkalup hkam la mai sai. Yesu a shawng nnan na sape ni gaw, hkalup hkam na matu kade daram ahkyak ai hpe chye ai lam Chyum Laika hta tsun da ai. Shanhte gaw hkalup hkam na matu aten naw la ra ai, hpang de she hkam na nga nna n myit ma ai.​—⁠Kasa 2:41; 9:18; 16:14, 15, 32, 33.

9, 10. Ehtiopi masha hte Shawlu kaw nna, hkalup hkam ai hte seng nna anhte hpa sharin la lu ai kun?

⁹ Kasa 8:35, 36 hpe hti u. Ga shadawn  langai hpe yu yu ga. Yuda makam masham hpe hkap la da ai Ehtiopi masha langai gaw, Yerusalem na nawku htingnu hta nawku dawjau ngut ai hpang nta de wa ai lam kaw rai nga ai. Dai shaloi, Yehowa a lamu kasa gaw shi hpe hkaw tsun na matu Hpilip hpe shangun dat ai. Hpilip gaw “Yesu hte seng ai kabu gara shiga” hpe tsun dan ai. Ehtiopi masha gaw gara hku bai htang wa ai kun? Yesu hpe Madu hku nna hkap la na matu kade daram ahkyak ai hpe chye na wa ai. Hkristan ni hpe Yehowa hpyi shawn da ai lam hpe shi galaw mayu wa ai. Dai majaw, shi gaw n htingnut ai sha hkalup hkam wa ai.

¹⁰ Kaga ga shadawn langai gaw Yuda masha Shawlu re. Yuda amyu masha yawng gaw, Karai Kasang hpe ap nawng da ai ni re. Raitim, shanhte gaw ga n madat ai majaw, shanhte hpe Yehowa nyet kau ai. Yuda masha ni gaw Karai Kasang hpe teng man ai lam hku matut nawku nga ai ngu Shawlu kam ai majaw, Hkristan ni hpe zingri wa ai. Raitim, lani mi hta, si mat sai ngu Shawlu shadu da ai Yesu gaw, lamu kaw nna Shawlu hpe ga shaga wa ai. Shawlu gara hku bai htang wa ai kun? Sape langai re ai Anani kaw nna karum shingtau ya ai lam hpe kabu gara let hkap la wa ai. Chyum Laika hta ndai hku tsun da ai: “Shi rawt nna, baptisma hkam la wu ai.” (Kasa 9:17, 18; Galati 1:14) Shi hpe hpang de kasa Pawlu hku nna chye wa ma ai. Karai Kasang gaw, shi myit ra ai hpe galaw na matu Yesu hpe akyu jashawn ai lam, shi chye ai hte kalang ta, n htingnut ai sha hkalup hkam la ai.​—⁠Kasa 22:12-16 hpe hti u.

11. (a) Chyum ga sharin ni hkalup hkam mayu wa hkra hpa gaw shadut ya ai kun? (b) Marai langai hkalup hkam ai shaloi, anhte gara hku hkamsha ai kun?

¹¹ Dai ni na aten hta, Chyum Laika sharin nga ai asak kaji, kaba law law mung dai hte maren sha re. Shanhte gaw Chyum Laika tsun ai lam hpe kam nna ra sharawng ai majaw, shanhte a prat hpe Yehowa hpang ap nawng nna hkalup hkam la mayu ma ai. Hkalup mungga gaw, zuphpawng kaba ni hta laksan lamang langai re. Yehowa Sakse ni gaw, Chyum ga sharin ni teng man ai lam hpe hkap la nna, hkalup hkam na matu dawdan ai shaloi grai kabu ma ai. Kanu kawa ni mung, shanhte a ma ni dai zawn dawdan ai shaloi, grai kabu ma ai. 2017 magam shaning hta, masha nnan 284,000 jan gaw, shanhte a prat hpe Yehowa hpang ap nawng ai lam, hkalup hkam nna madun wa ai. (Kasa 13:48) Hkristan ni a matu hkalup hkam ai gaw, galaw nan galaw ra ai lam re ai hpe shanhte chye na ma ai. Raitim, shanhte hkalup n hkam shi yang, hpa galaw ra ai kun?

12. Chyum ga sharin ni gaw, hkalup n hkam shi yang, hpa ni galaw ra ai kun?

¹² Chyum ga sharin ni hkalup n hkam shi yang, shanhte gaw Karai Kasang hte seng ai teng man ai lam, masha ni hte mungkan ga a matu Karai a yaw shada lam hte masha ni hpe hkye la na matu shi galaw wa ai lam ni hpe sharin la ra ai. (1 Timohti 2:3-6) Karai a tara ni hpe hkan sa lu na matu hte Karai Kasang n ju n dawng ai lam ni hpe jahkring kau na matu, makam masham rawt jat ra ai. (Kasa 3:19, 20) Dai gaw ahkyak ai. Yehowa gaw, shi n ju n dawng ai lam ni hpe matut nna galaw nga ai masha ni a ap nawng ai lam hpe n hkap la ai. (1 Korinhtu 6:9, 10) Raitim, dai hta n-ga naw ra ai. Shanhte a  prat hpe Yehowa hpang ap nawng mayu ai ni gaw, zuphpawng ni lung ra ai. Kabu gara shiga hpe ayan hkaw tsun nna kaga ni hpe sharin ya ra ai. Hkristu hpang hkan mayu ai ni yawng galaw ra ai lam re. (Kasa 1:8) Chyum ga sharin ni gaw dai lam yawng hpe shawng galaw ra ai. Dai hpang, shi nan akyu hpyi nna Yehowa hpang ap nawng ra ai. Ngut yang hkalup hkam mai sai.

13. Kaga ni hpe Chyum Laika sharin ya ai shaloi, jet ai Hkristan byin na matu hkalup hkam ra ai lam hpe anhte hpa majaw myit dum ra ai kun?

¹³ Anhte a ma ni hte Chyum ga sharin ni hpe lahta na lam ni galaw lu hkra karum ya ai shaloi, Yesu hpang hkan mayu ai ni gaw hkalup hkam ra ai hpe anhte myit dum ra ai. Rai yang she, ap nawng ai hte hkalup hkam ai lam gaw grai ahkyak ai hpe htap htuk ai aten hta shanhte hpe tsun dan na matu anhte htingnut sana n re. Anhte a ma ni hte Chyum ga sharin ni matut rawt jat wa nna hkalup hkam na matu anhte ra sharawng ga ai.

14. Hkalup hkam na matu kadai hpe mung hpa majaw atik anang n shadut ging ai kun?

¹⁴ Anhte a ma (sh) Chyum ga sharin ni hpe hkalup hkam na matu, atik anang shadut ai baw kadai mung n galaw ging ai. Yehowa gaw, shi hpe nawku dawjau na matu, kadai hpe mung atik anang n shadut ai. (1 Yawhan 4:8) Kaga ni hpe Chyum Laika sharin ya ai shaloi, Yehowa hte shanhte a hku hkau lam rawt jat na matu, kade daram ahkyak ai hpe chye na hkra karum ya ra ai. Chyum ga sharin langai gaw, teng man ai tara chye wa ai majaw chyeju dum nna, jet ai Hkristan ni galaw ra ai lam yawng hpe galaw mayu ai nga yang, shi hkalup hkam mayu wa na re.​—⁠2 Korinhtu 5:14, 15.

15, 16. (a) Marai langai hkalup hkam na matu asak hpe masat da ra ai kun? Sang lang dan u. (b) Chyum ga sharin langai gaw, kaga nawku htung hta hkalup hkam la ngut sai raitim, Yehowa Sakse langai hku nna hpa majaw hkalup bai hkam ra ai kun?

 ¹⁵ Marai langai hkalup hkam na matu, asak hpe n masat da ra ai. Langai hte langai gaw rawt jat ai lam hte kung hpan ai madang n bung ai. Asak kaji ai aten hta hkalup hkam wa ai ramma law law gaw, asak kaba wa ai aten du hkra Yehowa hpe matut nna sadi dung ma ai. Kaga ni gaw, asak grai kaba yang she, Chyum Laika sharin la nna hkalup hkam ma ai. Nkau mi nga yang, asak 100 jan pyi rai sai.

¹⁶ Num langai gaw kaga nawku htung law law kaw hkalup hkam la wa nna, ya Chyum Laika sharin nga ai. Dai majaw, Chyum Laika sharin ya ai nauna hpe, shi gaja wa hkalup bai hkam ra na kun? ngu san ai. Chyum Laika sharin ya ai nauna gaw, shi a ga san hpe Chyum daw ni hte mahtai jaw wa ai. Chyum Laika hta tsun da ai hpe shi chye na mat ai hpang, hkalup hkam la ai. Dai Shaloi shi asak 80 daram rai sai. Ndai mabyin kaw nna hpa sharin la lu ai kun? Yehowa gaw shi a myit ra ai lam hte seng ai teng man lam hpe chye nna, hkalup hkam ai hpe sha hkap la na re. Dai majaw, kaga nawku htung hta hkalup hkam la ngut tim, Yehowa Sakse langai hku nna hkalup hkam la na matu naw ra ai.​—⁠Kasa 19:3-5 hpe hti u. 

17. Masha langai gaw shanhte hkalup hkam ai shani hta hpa hpe myit ra ai kun?

¹⁷ Marai langai hkalup hkam la ai shani gaw shi a matu grai pyaw ai shani re. Ap nawng ai hte hkalup hkam ai hta hpa ni lawm ai hte seng nna atsawm myit ra ai aten mung re. Ap nawng da ai hte maren galaw lu na matu grai shakut shaja ra ai. Yesu a sape ni gaw “tinang myit hte n re ai sha, shanhte a matu mara si hkam nna, bai rawt wa ai” Yesu a matu asak hkrung ra ai.​—⁠2 Korinhtu 5:15; Mahte 16:24.

18. Hpang na sumhpa hta hpa ga san ni hpe anhte hkaja mat na kun?

¹⁸ Ndai sumhpa hta anhte hkaja wa sai hte maren, jet ai Hkristan byin na matu dawdan ai gaw grai ahkyak ai lam re. Dai majaw, ndai sumhpa hta shawng nnan tsun wa ai Mariya a kanu gaw shi hkum shi ga san san wa ai. Nang gaw kanu kawa rai yang, nang mung na hkum nang ndai hku san chye na re: ‘Nye a kasha hkalup hkam na matu jin jin rai sai kun? Nye kasha gaw shi hkum shi Yehowa hpang ap nawng na matu Yehowa a lam atsawm chye sai kun? Nye a kasha hkalup n hkam shi yang, hpaji chye na matu hte bungli langai lu na matu shawng galaw ging ai kun? Hkalup hkam ngut ai hpang, nye a kasha mara kaba galaw hkrup yang gara hku kun?’ Hpang na daw hta dai ga san ni hte Hkristan kanu kawa ni gaw, hkalup hkam ai hte seng nna jaw ai hku mu mada lu na lam sharin la lu na re.