1, 2. (a) Yesu n si shi ai shana hta shi a sape ni hte hpa lam tsun jahta wa ai kun? (Ndai sumhpa shawng na sumla hpe yu u.) (b) Hpa a majaw anhte hkaw tsun nga ai hpe dum na matu, hpa majaw ahkyak ai kun? (c) Hpa lam ni hkaja na kun?

YESU n si shi ai shana hta, shi a kasa ni hte grai na hkra ga shaga wa ai. Shanhte hpe shi grai tsawra ai lam chye shangun ai. Shawng na sumhpa hta anhte hkaja wa ai tsabyi ru ga shadawn hpe, shanhte hpe tsun dan wa ai. Yesu gaw shi a sape ni hpe, Karai mungdan shiga hpe hkaw tsun ai lam re ai, “asi law law si” ai lam hta matut nna hkam sharang let galaw na matu n-gun jaw wa ai.​​—⁠⁠Yawhan 15:8.

² Yesu gaw shi a sape ni hpe, hpa galaw ra ai lam hpe sha n-ga, hpa majaw dai hpe galaw ra ai lam mung tsun dan ai. Shanhte hpa majaw matut hkaw tsun ra na lam ni hpe mung shi tsun dan ai. Anhte mung, hpa majaw matut hkaw tsun ra ai hpe dum na matu ahkyak ai. Hpa majaw hkaw tsun ra na hpe ayan dum nga ai gaw, “amyu baw shagu a matu mara sakse tai lu” hkra, shakut sharang let hkaw tsun na matu shadut ya ai. (Mahte 24:13, 14) Ndai sumhpa hta, anhte hpa majaw hkaw tsun ra na hte seng nna, Chyum Laika hta tsun da ai lam mali hpe hkaja mat na re.  Anhte matut nna asi si lu na matu, Yehowa jaw ai kumhpa mali hpe mung hkaja mat na re.

3. (a) Anhte hpa majaw hkaw tsun ra na hte seng ai ahkyak htum lam hpe, Yawhan 15:8 hta gara hku tsun da ai kun? (b) Yesu a ga shadawn kaw nna tsabyi si gaw hpa hpe malai tsun ai rai nna, dai gaw hpa majaw htap htuk ai kun?

³ Anhte hpa majaw hkaw tsun ra na hte seng ai ahkyak htum lam gaw, Yehowa hpe anhte shagrau mayu nna, shi a amying ningsang hpe chyoi pra shangun mayu ai majaw re. (Yawhan 15:1, 8 hpe hti u.) Yesu gaw, tsabyi ru ga shadawn hpe tsun wa ai shaloi, Yehowa hpe sun madu (sh) tsabyi sun hkai ai wa hte shingdaw da ai. Yesu gaw tsabyi ru rai nna, shi hpang hkan ai ni gaw lakung lakying ni re ai lam shi tsun ai. (Yawhan 15:5) Ndai ga shadawn hta, tsabyi si ni gaw Yesu a sape ni si shapraw ai asi ni (sh) shanhte galaw ai hkaw tsun bungli hpe tsun ai re. Yesu gaw kasa ni hpe ndai hku tsun ai: ‘Nanhte asi law law si wa ai a majaw, nye Wa a hpung shingkang dan hkung wa na.’ Tsabyi ru gaw kaja ai asi law law si shapraw yang, tsabyi sun hkai ai wa gaw shagrau hkrum na re. Dai hte maren, Mungdan shiga hkaw tsun ai lam hpe kaja htum galaw yang, Yehowa hpe shagrau lu na re.​​—⁠⁠Mahte 25:20-23.

4. (a) Karai Kasang a amying hpe anhte gara hku shachyoi shapra lu na kun? (b) Karai a amying hpe shachyoi shapra lu ai ahkang hpe nang gara hku hkamsha ai kun?

⁴ Karai Kasang a amying gaw chyoi pra ngut chyalu re. Dai majaw, grau nna chyoi pra wa hkra anhte hpa mung n lu galaw ai. Rai yang, anhte hkaw tsun ai shaloi, shi a amying chyoi pra hkra gara hku galaw lu na kun? Myihtoi Esaia ndai hku tsun ai: “Zaw nawng zaw wa up ai Yehowa langai sha, chyoi pra nga ai hpe adum nga u.” (Esaia 8:13, NW) Yehowa a amying gaw amying yawng hta grau ai ngu anhte mu mada nna, chyoi pra ai ngu kaga ni hpe chye na hkra karum ya ai gaw, Karai Kasang a amying hpe anhte shachyoi shapra nga ai re. (Mahte 6:9) Ga shadawn, masha ni hpe Yehowa a mai kaja ai atsam ningja ni hte shinggyim masha ni a matu hparadisu galaw ya na ngu ai shi a yaw shada lam hpe tsun dan mai ai. Dai hku tsun dan ai shaloi, Yehowa hte seng nna Satan tsun ai ga ni gaw masu ga ni re ai lam, masha ni chye hkra karum ya nga ai re. (Ningpawt 3:1-5) Yehowa gaw, “hpung shingkang, arawng sadang hte hpung dagu lu la na ging dan” ai hpe masha ni chye hkra anhte karum ya ai shaloi, Karai Kasang a amying hpe chyoi pra hkra galaw nga ai re. (Shingran 4:11) Ningshawng galaw nga ai 16 ning rai sai Run ndai hku tsun ai: “Ngai gaw ninggawn tawa uphkang madu a matu sakse hkam ya nga ai ngu chye lu ai majaw, Yehowa hpe ngai grai chyeju dum ai. Dai gaw ngai hpe matut nna hkaw tsun na matu karum ya ai.”

5. (a) Yawhan 15:9, 10 hta, hpa majaw anhte hkaw tsun ging ai hte seng nna gara lam hpe madun da ai kun? (b) Sape ni hkam sharang ra na ngu ai hpe chye na na matu, Yesu gara hku karum ya ai kun?

⁵ Yawhan 15:9, 10 hpe hti u. Mungdan kabu gara shiga hpe anhte hkaw tsun ra ai lahkawng ngu na lam gaw, Yehowa hte Yesu hpe anhte tsawra ai majaw re. (Marku 12:30; Yawhan 14:15) Yesu gaw sape ni hpe, shi  a tsawra myit hta a nga nga na matu sha n-ga, ‘maju jung’ nga na matu tsun ai. Yesu hpa majaw dai hku tsun ai kun? Jet ai Hkristan hku asak hkrung na matu, shi a sape ni hkam sharang ra na hpe Yesu chye ai majaw re. Dai hpe shi a sape ni chye na na matu Yesu gaw, Yawhan 15:4-10 hta, “maju jung” ngu ai ga si hpe law law lang tsun wa ai hpe mu lu ai.

6. Yesu a tsawra myit hta gara hku maju jung nga lu na kun?

⁶ Yesu a tsawra myit hta maju jung nna, shi a ra sharawng ai lam hpe lu mayu ai lam, gara hku madun na kun? Shi hpe madat mara ai hku nna re. Yesu gaw shi nan galaw wa ai lam ni hpe sha, galaw na matu hpyi shawn ai. Shi ndai hku tsun ai: “Ngai gaw nye Wa a ga matsun hkan shatup nna, shi a tsaw ra ai hta maju jung nga” ai. Yesu gaw anhte a matu, kasi kaja madun wa ai.​​—⁠⁠Yawhan 13:15.

7. Madat mara ai lam gaw, tsawra myit hte gara hku matut mahkai nga a ta?

⁷ Madat mara ai lam gaw, tsawra myit hte matut mahkai nga ai lam, Yesu ndai hku tsun ai: “Nye a ga matsun lu la nna hkan shatup ai wa gaw, ngai hpe tsaw ra ai wa rai nga ai.” (Yawhan 14:21) Yesu a lam matsun gaw Yehowa kaw nna sa ai. Dai majaw, hkaw tsun u ngu ai Yesu a lam matsun hpe anhte hkan sa yang, Yehowa hpe tsawra ai lam madun ai re. (Mahte 17:5; Yawhan 8:28) Yehowa hte Yesu hpe tsawra ai lam anhte madun ai nga yang, shan a tsawra myit hpe lu na re.

8, 9. (a) Anhte hkaw tsun ra ai masum ngu na lam gaw hpa rai a ta? (b)  Ezekela 3:18, 19 hte 18:23 hta lawm ai Yehowa a ga ni gaw, matut nna hkaw tsun na matu gara hku shadut ya ai kun?

⁸ Anhte hkaw tsun ra ai masum ngu na lam gaw, du wa na Yehowa a nhtoi a lam, masha ni hpe sadi jaw mayu ai majaw re. Chyum Laika hta Noa hpe “tara hkaw dan ai sara” ngu tsun da ai. (2 Petru 2:5 hpe hti u.) Hka sha-u garai n ing shi yang, masha ni hpe Noa tsun ai tara hta, jahten hkrum na lam hte seng ai sadi jaw ga lawm na re. Hpa majaw dai hku lu tsun a ta? Yesu ndai hku tsun wa ai majaw re: “Dai sha-u garai n ing yang na masha ni gaw Noa shanghpaw li kata de shang wa ai nhtoi du hkra, lu lu sha sha, num la num ya rai nga ma ai rai nna, dai sha-u ing wa ai hte nlang hte hpe magawn mat wa ai du hkra, shanhte n dum shami * nga nga ma ai hte maren, dai Masha Kasha a bai sa du ai hta mung, rai wa na ra ai.” (Mahte 24:38, 39) Masha law malawng shi tsun ai hpe n hkap la ai raitim, Noa gaw Yehowa shi hpe tsun shangun da ai sadi jaw ga hpe matut tsun ai.

⁹ Dai ni na aten hta mung, shinggyim masha ni a matu Karai Kasang galaw ya na  lam ni hpe chye lu hkra, mungdan shiga hpe anhte hkaw tsun nga ga ai. Yehowa ra sharawng ai hte maren, anhte mung masha ni dai shiga hpe hkap la nna asak “hkrung” shangun mayu ga ai. (Ezekela 18:23) Nta langai hpang langai hte shawa hpawng hta anhte hkaw tsun ai shaloi, Karai a mungdan du wa nna, ndai nhkru ai mungkan hpe jahten kau sana lam, dang lu ai made sadi jaw nga ga ai.​​—⁠⁠Ezekela 3:18, 19; Daniela 2:44; Shingran 14:6, 7.

10. (a) Mahte 22:39 hta anhte hkaw tsun ra ai gara lam hpe tsun da ai kun? (b) Pawlu yan Sila gaw Hpilipi kaw nna htawng agyi hpe gara hku karum ya wa ai kun?

¹⁰ Anhte hkaw tsun ra ai mali ngu na lam gaw, masha ni hpe tsawra ai majaw re. (Mahte 22:39) Masha ni gaw shanhte a masa ni galai shai mat ai shaloi, myit jasat mung galai shai wa chye ai hpe anhte chye ai majaw, tsawra myit gaw matut nna hkaw tsun na matu shadut ya ai. Ga shadawn, ninghkap ai ni gaw Hpilipi mare hta Pawlu yan Sila hpe htawng jahkrat kau ai. Raitim, shana yup tung hta, nnang nawn wa nna, htawng chyinghka ni hpaw malang mat ai. Htawng agyi gaw, htawng rawng nga ai ni hprawng mat sai ngu shadu nna, sat si na matu shakut wa ai. Raitim, Pawlu gaw “na hkum hpe hkum shaza et” ngu shi hpe tsun nna hkum pat dat ai. Htawng agyi gaw, “ngai hkye hkrang la ai kaw du lu hkra, kaning rai na rai ta?” ngu nna san ai. Pawlu yan Sila gaw, ‘Madu Yesu hpe kam sham u; shaloi nang hkye hkrang la ai kaw du na re’ ngu tsun ai.​​—⁠⁠Kasa 16:25-34.

11, 12. (a) Htawng agyi wa a lam gaw, hkaw tsun bungli hte seng nna anhte hpe hpa sharin ya ai kun? (b) Hpa majaw, anhte matut nna hkaw tsun mayu ai kun?

¹¹ Htawng agyi wa a lam gaw, hkaw tsun bungli hte seng nna anhte hpe hpa sharin ya nga ai kun? Nnang nawn byin ngut ai hpang she, htawng agyi wa a myit jasat galai shai nna karum hpyi wa ai. Dai zawn sha, Chyum Laika shiga hpe n hkap la wa ai ni gaw, shanhte a prat hta mayak mahkak ni hkrum wa ai hpang, myit masa galai shai nna karum hpyi wa chye ai. Ga shadawn, masha nkau gaw, dinghku hka bra mat ai majaw (sh) bungli n nga mat ai majaw, grai myit tsang mat na re. Nkau gaw, grai machyi sawng mat ai majaw, tsawra ai marai langai ngai si mat ai majaw, grai yawn nga na re. Dai zawn masa ni hte hkrum wa ai shaloi, shanhte n myit ga ai prat hte seng ai ga sa ni san wa chye ai. ‘Hkye hkrang la hkrum na matu ngai hpa galaw ra na kun?’ ngu nna myit wa chye ai. Prat hta shawng nnan hku nna, anhte a shiga hpe madat mayu wa chye ai.

¹² Dai majaw, anhte sadi dung nna matut hkaw tsun nga yang, shanhte hkap la mayu wa ai shaloi, anhte hkaw tsun lu na re. (Esaia 61:1) Ningshawng galaw ai 38 ning rai sai Shalot ndai hku tsun ai: “Ya prat na masha ni gaw lam dam taw nga ai. Kabu gara shiga hpe na la lu na matu, ahkaw ahkang lu ging ai.” Ningshawng galaw ai 34 ning rai sai Aibyaw ndai hku tsun ai: “Masha ni gaw moi na hta grau nna myit ru myit tsang nga ma ai. Shanhte hpe ngai karum ya mayu ai. Dai gaw hkaw tsun na matu ngai hpe shadut ya ai.” Masha ni hpe tsawra ai myit gaw, matut nna hkaw tsun na matu shadut ya lu ai kaja htum lam re.

13, 14. (a) Yawhan 15:11 hta gara kumhpa a lam tsun da a ta? (b) Yesu hta nga wa ai kabu gara lam, anhte mung gara hku lu la mai na kun? (c) Kabu gara lam gaw hkaw tsun bungli hpe gara hku karum ya ai kun?

¹³ Yesu n si shi ai shana hta, kasa ni matut nna asi si lu na matu karum ya lu na kumhpa ni a lam tsun dan ai. Dai kumhpa ni gaw hpa ni rai a ta? Dai gaw anhte hpe gara hku karum ya lu ai kun?

¹⁴ Kabu gara lu ai kumhpa. Hkaw tsun magam gaw anhte a matu lit li ai kun? N li ai.  Yesu gaw tsabyi ru ga shadawn hpe tsun ngut ai hpang, anhte hkaw tsun ai nga yang, kabu gara lam lu na ngu tsun ai. (Yawhan 15:11 hpe hti u.) Gara hku nna kun? Yesu gaw shi a ga shadawn hta, shi gaw tsabyi ru rai nna, shi a sape ni gaw lakung lakying ni re ngu tsun ai. Lakung lakying ni gaw aru hta manoi nga yang she, hka hte namhpun lu na re. Dai zawn sha, anhte mung Yesu hta manoi nga nna, shi hpang htep lahti hkan sa ai nga yang she, anhte kabu gara lu na re. Karai Kasang a magam gun ai kaw nna, Yesu lu la wa ai kabu gara lam hpe, anhte mung lu la na re. (Yawhan 4:34; 17:13; 1 Petru 2:21) Ningshawng magam gun nga ai shaning 40 jan rai sai Henni ndai hku tsun ai: “Hkaw tsun magam kaw nna lu la wa ai kabu gara lam gaw, Yehowa a magam hpe matut nna gun hpai na matu ngai hpe n-gun lu shangun ai.” Masha law malawng gaw anhte a shiga hpe n madat yang pyi, dai kabu gara lam gaw matut nna hkaw tsun na matu karum ya ai.​​—⁠⁠Mahte 5:10-12.

15. (a) Yawhan 14:27 hta gara kumhpa a lam tsun da ai kun? (b) Matut nna asi si lu na matu, ngwi pyaw lam gaw gara hku karum ya ai kun?

¹⁵ Ngwi pyaw lam ngu ai kumhpa. (Yawhan 14:27 hpe hti u.) Yesu n si shi ai shana daw hta, kasa ni hpe ndai hku tsun ai: “Nye a ngwi pyaw ai nanhte hpe ngai jaw ma de ai.” Yesu a ngwi pyaw lam gaw matut nna hkaw tsun na matu, gara hku karum ya ai kun? Anhte matut nna hkaw tsun yang, Yehowa hte Yesu hpe myit pyaw hkra galaw ya lu ai ngu chye ai majaw, ngwi pyaw lam hkamsha lu ai. (Shakawn 149:4; Roma 5:3, 4; Kolose 3:15) Ningshawng galaw nga ai 45 ning rai sai, Up ndai hku tsun ai: “Hkaw tsun magam a majaw ba ai aten ni nga ai. Raitim, dai gaw jet ai myit dik lam hte lachyum nga ai prat lu shangun ai.” Htani htana grin nga ai ngwi pyaw lam hpe lu la ai majaw, Yehowa hpe anhte grai chyeju dum ga ai.

16. (a) Yawhan 15:15 hta gara kumhpa a lam tsun da ai kun? (b) Kasa ni gaw Yesu a jinghku matut nna gara hku byin mai na kun?

¹⁶ Jinghku ngu ai kumhpa. Yesu gaw sape ni hpe ngwi pyaw shangun mayu ai lam tsun ngut ai hpang, tingkyeng akyu n tam ai tsawra myit madun na matu, hpa majaw ahkyak ai lam sanglang dan ai. (Yawhan 15:11-13) Shi ndai hku tsun ai: “Nanhte hpe jinghku she ngai ngu na ma de ai.” Yesu a jinghku byin lu ai gaw ahkaw ahkang kaba langai rai nga ai. Raitim, kasa ni gaw gara hku nna shi a jinghku matut byin lu na kun? Yesu ndai hku tsun ai: ‘Pru sa nna, [matut, NW] asi si u.’ (Yawhan 15:14-16 hpe hti u.) Matut nna hkaw tsun nga u ngu ai lachyum re. De a shawng lahkawng ning hta, Yesu gaw sape ni hpe ndai hku tsun ai: “Pru hkawm wa yang, Sumsing lamu na mungdan gaw ni wa magang ra ai, ngu nna hkaw tsun dan mu.” (Mahte 10:7)  Dai majaw, shi n si shi ai shana hta, hkaw tsun magam hta hkam jan nga na matu, sape ni hpe n-gun jaw ai. (Mahte 24:13; Marku 3:14) Shi a matsun ga hpe hkan sa na matu, loi na n re ai hpe Yesu chye ai. Raitim, shanhte dai hpe galaw lu nna, shi a jinghku matut byin lu ai. Gara hku nna kun? Kaga kumhpa langai a karum shingtau lam lu ai hku nna re.

17, 18. (a) Yawhan 15:7 hta gara kumhpa a lam tsun da ai kun? (b) Dai kumhpa gaw Yesu a sape ni hpe gara hku karum ya wa ai kun? (c) Dai ni na aten hta anhte hpe gara kumhpa ni gaw karum ya nga ai kun?

¹⁷ Akyu hpyi ga a mahtai ngu ai kumhpa. Yesu ndai hku tsun wa ai: “Nanhte hpa hpyi mayu yang hpyi mu, hpyi ai hte maren nanhte e madat ya na ra ai.” (Yawhan 15:7, 16) Yesu a dai ga sadi gaw, kasa ni hpe teng sha n-gun lu shangun wa na re. * Kade n na yang, Yesu si ra na hpe kasa ni n chye ai. Yesu si mat ti mung, shanhte karum shingtau lam n lu mat na gaw n re. Yehowa gaw shanhte a akyu hpyi ga hpe madat ya na rai nna, hkaw tsun bungli hpe karum ya na re. Yehowa shanhte hpe karum ya wa ai. Yesu si mat ai hpang, kasa ni gaw nden marai jaw na matu Yehowa kaw akyu hpyi ai. Yehowa gaw shanhte a akyu hpyi ga ni hpe madat ya ai.​​—⁠⁠Kasa 4:29, 31.

¹⁸ Dai ni na aten hta mung dai zawn sha re. Anhte hkam jan let hkaw tsun nga yang, Yesu a jinghku matut nna byin lu na re. Hkaw tsun magam hta mayak mahkak ni hkrum wa ai shaloi, karum ya na matu anhte akyu hpyi yang, Yehowa teng sha madat ya na hpe kam mai ai. (Hpilipi 4:13) Yesu hte jinghku byin lu nna, Yehowa gaw anhte a akyu hpyi ga ni hpe mahtai jaw ai majaw, anhte grai chyeju dum ga ai. Yehowa kaw nna ndai kumhpa ni gaw, matut nna asi si na matu anhte hpe karum ya ai.​​—⁠⁠Yaku 1:17.

19. (a) Hpa majaw anhte matut nna hkaw tsun ra ai kun? (b) Karai jaw da ai magam lit hpe ngut kre lu na matu hpa gaw karum ya na kun?

¹⁹ Ndai sumhpa hta, hpa majaw anhte hkaw tsun ra ai lam mali hpe hkaja wa sai. Yehowa hpe shagrau nna, shi a amying hpe shachyoi shapra na matu, Yehowa hte Yesu hpe tsawra ai lam madun na matu, masha ni hpe sadi jaw na matu hte tsawra ai lam madun na matu re. Kumhpa mali hpe mung hkaja wa sai. Kabu gara lam, ngwi pyaw lam, jinghku byin ai lam hte anhte a akyu hpyi ga hpe madat ya ai lam ni re. Ndai kumhpa ni gaw, Karai Kasang anhte hpe lit jaw da ai amu ni hpe ngut kre lu na matu karum ya ai. Matut nna “asi law law si” na matu anhte shakut shaja ai hpe Yehowa mu ai shaloi grai kabu na re.