NGAI jawng lung ai shaloi, galai shai ai lam ni nau n nga ai. Tsang langai kaw nna jawng ngut ai du hkra, kanawn ai manang gaw n galai shai ai. Mare kaw na masha law malawng hpe ngai chye ai zawn, shanhte mung ngai hpe chye ai.

Liberty mare hpe nsi naisi sun ni hte shinggrup da ai. Hkainu hpe gaw madung hku nna hkai ai. Ngai shangai ai shaloi, Wa gaw hkai lu hkai sha bungli galaw ai. Ngai ramma aten hta, na htu jak gau sharin la nna, kaga ni a hkauna hta bungli galaw ai.

Awa gaw asak kaba sai. Ngai hpe shangai ai shaloi pyi, asak 56 rai nna, Anu gaw 35 re. Raitim, Awa gaw n-gun ja nna hkam kaja ai. Shi gaw bungli grai shakut ai. Ma ni yawng hpe mung bungli shakut na matu sharin ya ai. Gumhpraw grai law hkra shi n lu tam tim, nga na shara, bu hpun palawng hte malu masha ni law hkra lajang ya ai. Anhte yawng hpe mung aten jaw ai. Awa si ai shaloi asak 93 rai sai. Anu gaw asak 86 hta n nga mat ai. Nu yan Wa gaw Yehowa hpe n nawku wa ai. Ngai na kahpu langai chyawm gaw, 1972 kaw nna myitsu salang galaw nga sai.

Anu gaw makam masham grai kaba ai. Laban shani shagu annau ni hpe Hkalup hpung nawku jawng de woi sa ai. Ngai asak 12 ning hta, Masum raitim langai Karai a lam, shawng nnan hku nna na wa ai. Dai majaw Nu hpe ngai ndai hku san ai: “Yesu gaw Kasha mung rai nna, Kawa mung re ai kun?” Nu ndai hku  mahtai jaw ai hpe ngai naw dum ai: “Nu sha, dai gaw chye na yak ai lam re. Anu ni n chye na lu ai.” Ngai na matu mung chye na yak ai lam re. Ngai asak 14 hta, hkashi langai kaw hkalup hkam la ai. Shanhte gaw ngai hpe hka hta masum lang dip bang ai. Langai gaw Kawa a matu, langai gaw Kasha a matu, langai gaw chyoi pra ai wenyi a matu re.

Ngai dakkasu lung ai shaloi, htwi shingjawng ai manang langai hte hkau wa ai. Ngai hpe mung ginsup na matu shi saw shaga ai. Ngai mung ginsup wa nna, Golden Gloves htwi shingjawng uhpung a hpung shang masha byin wa ai. Ginsup ai lam hta ngai nau n byin ai. Dai majaw, shingjawng poi loi mi ginsup ngut ai hpang, hkring kau ai. Hpang hta, U.S. hpyen la galaw na matu saw shaga hkrum nna, Germany de sa kau hkrum ai. Dai kaw magam gun nga ai laman, ngai na lahta na masha kaba gaw, hpyen hpaji jawng ngai hpe lung shangun ai. Ningbaw kaja langai byin wa na re ngu ngai hpe shi myit mada ai majaw re. Shanhte gaw, ngai hpe matut nna hpyen magam gun shangun mayu ai. Raitim, ngai gaw hpyen magam n kam gun sai. Dai majaw, magam gun nna lahkawng ning na ai hpang, 1956 hta hpyen dap kaw nna pru mat ai. Dai hpang kade nna yang, ngai magam gun wa ai hpyen dap hte grai shai ai Karai a magam hpe gun hpai wa ai.

Teng man lam hpe ngai n hkaja shi ai shaloi, la ngu ai gaw gara hku rai ra ai hte seng nna shut ai ningmu nga wa ai. Ngai yu ai sumla hkrung hte makau grup yin na masha ni a majaw rai nga ai. Chyum Laika lam tsun ai la ni gaw, la tang n du ai ni re ngu ngai sawn la ai. Raitim, ngai na prat hpe galai shai shangun ai lam hpe ngai sharin la wa ai. Lani mi hta, grai tsawm ai ngai na mawdaw ahkyeng hte mare hpe lai nna gau taw nga ai shaloi, num lahkawng gaw shan yan hpang de sa wa na matu shaga ai. Shan yan gaw nye kana a kaning yan rai ma ai. Shan yan gaw Yehowa Sakse Ni rai nga ai. Shan yan kaw nna Sin Langchyi hte Dum Hprang! hpe ngai lu ga ai. Raitim, Sin Langchyi hta lawm ai lam ni gaw, loi chye na yak ai ngu ngai hkamsha wa ai. Ndai kalang gaw, shan a nta hta galaw ai Chyum Laika hkaja bawng ban ai zuphpawng kaji re ai, Hpung Laika Buk hkaja hpawng sa lung na matu ngai hpe saw shaga ai. Sa na matu ngai myit yu na ngu tsun dat ai. Shan gaw mani nna, “Gaja wa kun?” “Gaja wa” ngu ngai bai tsun dat ai.

Dai zawn ga sadi jaw dat ai hpe ngai myit malai lu tim, ga sadi gaw dung ra ai ngu hkamsha wa ai. Dai majaw, dai shana hta ngai zuphpawng sa lung ai. Ma ni a majaw ngai grai yu kaba mat ai. Chyum Laika a lam, ma ni dai daram chye na ngu ngai n shadu wa ai. Bat shagu, Anu hte nawku jawng sa tim, Chyum Laika hte seng nna gaw kachyi mi sha ngai chye ai. Ya gaw, Chyum Laika hte seng nna grau hkaja mayu wa ai. Dai majaw, Chyum Laika hkaja na matu myit hkrum wa ai. Chyahtum Chyalai N-gun Rawng Ai Karai Kasang a amying gaw Yehowa re ai lam ngai chye wa ai. Yehowa Sakse ni hte seng nna Anu hpe moi aten hta san yu ai shaloi, shi ndai hku tsun ai: “Shanhte gaw Yehowa ngu amying nga ai dingla langai hpe nawku ai.” Raitim, ya gaw ngai myi hpaw wa sai ngu hkamsha ai.

Teng man lam hpe ngai mu sai ngu ngai chye ai majaw, grai lawan ai hku rawt jat wa ai. Zuphpawng lung hpang nna, shata jahku na ai hpang, 1957 March shata hta ngai hkalup hkam la ai. Ngai na myit masa gaw galai shai mat ai. La ngu ai gaw gara baw masha re ai hpe Chyum Laika hta na sharin la lu ai majaw grai kabu ai. Yesu gaw hkum tsup ai la re. Kaga la yawng hta na n-gun atsam grau nga ai wa re. Raitim, htwi hkat ai hta n lawm wa ai. De a malai, tau hkrau tsun da ai hte maren “nni nkri hkrum” hkam wa ai. (Esaia 53:2, 7) Yesu hpang hkan ai ni gaw, ‘yawng mayawng  a man e sumnung shingdi’ ra ai hpe chye wa ai.​​—⁠⁠2 Timohti 2:24.

Hpang na shaning re ai 1958 hta ningshawng galaw hpang ai. Raitim, kade nna shi yang, bai hkring mat ai. Hpa majaw nga yang, ngai hpe hpung laika buk hkaja hpawng sa lung na matu saw shaga ai num lahkawng kaw nna langai re ai Gloria hte dinghku de na matu dawdan wa ai majaw re. Dai hku dawdan wa ai majaw, galoi mung myit malai n lu ai. Gloria gaw dai aten hta manu dan ai sutgan rai nna ya du hkra mung dai zawn sha re. Ngai na matu gaw, manu dan dik ai sut rai yawng hta na grau manu dan ai. Shi hpe hkungran la lu ai majaw, grai kabu ai. Ya, shi a lam kachyi mi shi tsun u ga:

“Annau ni yawng marai 17 re. Anu gaw sadi dung ai Sakse Hkam langai re. Ngai asak 14 hta, Anu n nga mat ai. Dai hpang Awa gaw, Chyum Laika hkaja hpang ai. Anu n nga mat sai majaw, Awa gaw jawng up hte bawng ban nna, lamang langai lajang ya ai. Ashawng gaw, lahta tsang jawng hpang jahtum shaning rai nna, shi hte ngai lani mi din, kahti galai jawng lung na matu Awa hpyi shawn ai. Dai hku galaw na nga yang, ashawng hte ngai, marai langai ngai gaw, kanau ni hpe yu lakawn na matu aten lu na re. Awa bungli kaw nna bai wa ai shaloi mung, nta masha ni hte arau shana shat sha na matu an shajin ya lu na re. Jawng up gaw myit hkrum ai majaw, ashawng jawng ngut ai aten du hkra dai hku sha galaw wa ai. Sakse Hkam dinghku lahkawng hte anhte arau hkaja nna annau ni marai 11 gaw Yehowa Sakse byin wa ai. Ngai gaw kaya chye ai wa raitim, hkaw tsun bungli hta grai pyaw ai. Ngai na ningrum ningtau gaw, ngai hpe grai karum ya ai.”

Gloria hte ngai gaw, 1959 February hta hkungran ai. An ningshawng arau galaw ai. Dai shaning na July shata hta, Behtela hta magam gun na matu tang shawn ai. Ginjaw rung hta an magam gun mayu ai. Hpunau Simon Kraka gaw, an hpe hkrum san shaga ai. Dai aten hta dinghku nga ai ni hpe Behtela hta n hkap la ai lam shi tsun ai. Behtela hta magam gun mayu ai myit gaw matut nna naw nga ai. Raitim, shaning grai na yang she, Behtela de du ai.

Hkaw tsun masha grau ra ai shara hta an magam gun mayu ai lam, ginjaw rung de laika ka ai. Lata na ahkaw ahkang langai sha jaw ai. Pine Bluff, Arkansas hta re. Dai aten Pine Bluff hta nawku hpung lahkawng sha naw nga ai. Langai gaw shan hpraw hkaw tsun masha ni rai nna, kaga langai gaw shan chyang hkaw tsun masha ni re. An hpe gaw hkaw tsun masha 14 sha nga ai, shan chyang nawku hpung de sa kau ai.

Yehowa Sakse ni hpa majaw shan hpraw shan chyang ginhka da ai hpe nang mau na re. Dai aten hta lata na lam n nga wa ai. Amyu n bung ai ni hpe arau nga shangun ai gaw, tara tawt lai ai rai nna, dawsa ai lam ni mung byin wa chye ai. Shara law law hta, shan hpraw shan chyang ni arau nawku nga ai hpe mu yang, Nawku Htingnu jahten kau hkrum na hpe hpunau ni hkrit ma ai. Gaja wa mung byin ga ai. Shan chyang Sakse Hkam ni nta langai hpang langai hkaw tsun ai shaloi, shan hpraw ni a nta de shang hkrup yang, nta madu ni gaw rim nna kayat shangun ai. Hkaw tsun bungli hpe ngut kre lu na matu, tara upadi ni hpe anhte madat mara nna, masa lam ni grau kaja wa na re ngu myit mada wa ai.

Hkaw tsun magam gaw ayan na n loi ai. Shan chyang ni nga ai magam lawk hta hkaw tsun ai shaloi, kalang lang shan hpraw ni a nta de mung shang hkrup ai. Dai shaloi, Chyum Laika lam hpe kadun ai hku tsun na kun? Hpyi nem nna kaga nta de sa na kun? ngu ai hpe alawan dawdan ra ai. Dai aten hta dai hku sha galaw ra ai.

Ningshawng magam gun lu na matu, gumhpraw mung ra ai. Anhte a bungli law malawng gaw, lani mi hta gumhpraw kachyi mi sha lu ai. Gloria gaw, nta gawn lajang ai bungli galaw ai. Shi hpe karum na matu, nta madu gaw ngai hpe ahkang jaw ai majaw, shi a bungli hpe jau nna ngut lu ai. Nta madu ni gaw an hpe shani shat jaw sha ai. An arau sha ai. Bat shagu, Gloria gaw dinghku langai a matu, bu hpun palawng ni hpe wan dem ya ai. Ngai gaw nampan sun hta bungli galaw ya nna, hkuwawt hku ni hpe kashin ya ai, nta grup yin hpe jasan jaseng ya ai. Shan hpraw nta langai na hkuwawt hku ni hpe mung an kashin ya ai. Gloria gaw nta kata hta kashin ya nna, ngai gaw nta shinggan hta kashin ya ai. Shani ting bungli galaw ai majaw, shani shat jaw sha ai. Gloria gaw nta kata kaw, shat sha ai raitim, nta madu ni hte arau gaw n re. Ngai gaw nta madu ni a mawdaw tawn ai shara hta sha ai. Ngai na matu gaw hpa n byin ai. Grai sha mu ai shani shat rai nga ai. Shanhte gaw grai kaja ai dinghku re. Raitim, makau grup yin na masha ni a shingkang ka-up ai lam hkrum nga ai. Mawdaw sau bang ai shara na mabyin hpe ngai naw dum ai. Mawdaw sau bang ngut ai hpang, nye madu jan namdum  sa mai na kun? ngu mawdaw sau bang ya ai shan hpraw shangun ma hpe san ai. “Zaw la da ai” ngu grai pawt let ngai hpe tsun ai.

Hpunau nauna ni hte ngwi pyaw let kanawn mazum lu wa nna, hkaw tsun bungli hpe mung an ra sharawng ai. Pine Bluff de shawng nnan du ai shaloi, dai aten hta hpung woi salang re ai hpunau langai a nta hta an nga ai. Hpunau a ningrum ningtau gaw Sakse Hkam n rai shi ai majaw, Gloria gaw shi hpe Chyum Laika sharin ya ai. Ngai mung, shi a kasha hte kahkri hpe Chyum Laika sharin ya ai. Hpunau a ningrum ningtau hte kasha gaw, Yehowa hpe nawku na matu dawdan nna hkalup hkam la ai.

An hta shan hpraw nawku hpung kaw nna grai hkau ai manang ni nga ai. Shanhte gaw shana shat sa sha na matu an hpe saw shaga ai. Raitim, nsin sin yang she, shanhte kaw sa ai. Rai yang she, anhte arau kanawn mazum ai hpe kadai mung mu sana n re. Ku Klak Klan (KKK) ngu ai gaw, amyu lachyen lahka na matu shadut ya ai grai myit rawt ai uhpung re. Halowin poi shana hta, la langai gaw grai arawng la let KKK ni hpun ai zawn palawng ahpraw hpe hpun, baw magap hpe magap nna shi nta shawng hta dung nga ai hpe ngai mu ai. N kaja ai mahkrum madup ni hkrum tim, hpunau ni gaw shanhte hpe matut nna tsawra myit madun ai. Kalang mi na ginhtawng ta hta, ginwang zuphpawng sa na matu an gumhpraw ra nga ai. Hpunau langai gaw 1950 hta shapraw ai an a mawdaw hpe mari na matu myit hkrum wa ai. Shata mi na ai hpang, grai kahtet ai aten hta hkaw tsun bungli hte Chyum ga sharin ni galaw nna grai ba let nta de bai wa ai. Nta de du ai shaloi an grai mau mat ai. An a mawdaw, nta shawng kaw du taw nga ai. Laika kadun hpe mung ka da ya ai: “Nan a mawdaw hpe ngai kumhpa hku nna bai jaw ai re. Na a hpunau.”

Matsan dum myit madun ai kaga lam langai hpe mung, ya du hkra naw dum ai. 1962, South Lansing, New York hta galaw ai Mungdan Magam Jawng hpe lung na matu ngai saw shaga hkrum ai. Shata mi tup, ginwang hpung kawan hpunau ni, ninghtawn hpung kawan hpunau ni hte nawku hpung woi awn ai salang ni a sharin achyin ya ai lam hpe hkam la lu na re. Dai aten hta ngai bungli n nga ai majaw, gumhpraw mung nau n nga ai. Raitim, Pine Bluff hta nga ai telehpone company langai gaw bungli a matu ngai hpe hkrum san shaga ai. Shanhte ngai hpe bungli jaw na nga yang, dai company hta bungli galaw lu ai shawng nnan na shan chyang bungli masha rai na re. Shanhte gaw ngai hpe bungli galaw shangun na ngu tsun ai. Ngai gara hku galaw na kun? New York de sa na matu ngai hta gumhpraw n nga ai. Jawng lung na matu saw shaga ai hpe n hkap la ai sha, bungli galaw na matu, ngai myit wa ai. Ngai n lu sa sai lam, Behtela de laika ka nna shana na matu shajin nga ai shaloi, ngai galoi mung n malap lu ai lam langai byin wa ai.

Anhte a nawku hpung hta na, madu wa Sakse Hkam n re ai nauna langai gaw, jahpawt jau jau chyinghka sa akawk nna laika sumbu langai sa jaw ai. Dai sumbu hta gumhpraw hpring tup re. Dai nauna hte shi a ma ni gaw, jahpawt jau jau pasi sun de sa nna tsing magang ai. Ngai New York de sa na matu ra ai gumhpraw lu hkra, shanhte dai hku galaw wa ai re. Nauna ndai hku tsun ai: “Jawng lung nna, nang dang lu ai daram sharin la u yaw. Bai wa nna anhte hpe bai sharin ya u.” Bat manga na ai hpang she, bungli shang mai na kun? ngu nna telephone company hpe  ngai san ai. Shanhte gaw, “tsep kawp n mai ai” ngu tsun ai. Raitim hpa n ra ai. Ngai dawdan ngut sai. Dai bungli hpe n galaw wa ai majaw ngai grai kabu ai.

Pine Bluff hta na mabyin hpe Gloria ndai hku tsun ai: “Magam lawk hpe ngai grai ra sharawng ai. Ngai hta, Chyum ga sharin 15 kaw nna 20 daram nga ai. Jahpawt daw hta nta langai hpang langai hkaw tsun sa nna shani ting ngu na daram Chyum Laika sharin ai. Kalang lang nga yang, shana hkying 11 du hkra re. Magam gun hpai ai gaw kabu hpa re. Dai shara kaw ngai grai pyaw ai. Gaja wa nga yang, ningshawng magam hpe kau da nna hpung kawan magam hta n shang lawm mayu ai. Raitim, Yehowa gaw an a matu masing langai nga ai.” Dai hte maren Yehowa galaw wa ai.

Pine Bluff hta ningshawng galaw ai shaloi, laksan ningshawng magam gun na matu tang shawn wa ai. An hpe lit shatsam na re ngu myit mada wa ai. Hpa majaw nga yang, ginwang hpung kawan hpunau gaw, an hpe laksan ningshawng hku nna Texas hta nga ai nawku hpung hta, magam gun shangun mayu ai lam, an chye da ai majaw re. An mung magam gun mayu ai. Dai majaw lit shatsam ai laika hpe an myit mada nga ai. Raitim, hpa laika mung n du wa ai. Hpang jahtum hta gaw laika du wa ai. Hpung kawan magam gun na matu lit shatsam ai laika re. 1965, January shata hta re. Ya, Amerikan ginjaw garan rung komiti a bawng jahkrup hpaawn galaw nga ai hpunau Leon Weaver mung, ninghtawn hpung kawan hku nna galaw na matu lit shatsam hkrum ai.

Ninghtawn hpung kawan langai byin wa ai majaw ngai grai myit tsang ai. De a shawng hta ginwang hpung kawan hpunau James A. Thompson, Jr gaw ngai hte seng nna maram yu wa ai. Ninghtawn hpung kawan langai hta nga ra na atsam ningja ni hte ngai rawt jat ra na atsam ningja ni hpe tsun dan wa ai. Ngai hpung kawan magam gun nna kade nna yang, dai hpaji jaw ga ni gaw kade daram ahkyak ai hpe ngai chye wa ai. Lit shatsam hkrum ai hpang, ginwang hpung kawan re ai Hpunau Thompson hte arau magam gun ai. Sadi dung ai dai hpunau kaw nna ngai grai law hkra sharin la lu ai.

Dai aten hta, hpung kawan hpunau ni gaw shaman shakyang lam kachyi mi sha lu la ai. Kaga hpung kawan langai hte arau, nawku hpung langai hpe bat mi kawan nna, shi gara hku galaw wa ai hpe yu wa ai. Dai hpang, kaga nawku hpung hpe ngai kawan nna, ngai gara hku galaw ai hpe shi yu ya ai. Ngai hpe hpaji jaw ga ni hte lam matsun ni jaw ai. Dai hpang, tinang hkrai sha kawan ra sai. Gloria hpe ngai ndai hku tsun ai hpe naw dum ai: “Shi gaja wa, anhte hte arau n hkan sai kun?” Ahkyak ai lama mi hpe ngai chye na wa ai. Nang hpe karum ya na matu, hpunau ni galoi mung nga na re. Raitim, shanhte karum ya na matu, anhte ahkang jaw yang she, anhte hpe karum ya lu na re. Mahkrum madup grai law ai hpung kawan hpunau J. R. Brown hte Behtela nta masha re ai hpunau Fred Rusk zawn re ai ni kaw nna karum shingtau lam ni  hpe ngai grai manu shadan ai.

Dai aten hta, lachyen lahka ai lam ni shara shagu hta nga ai. Tennessee hta anhte kawan ai shaloi, KKK ni gaw mare kata hta shawa n-gun madun nga ai. Hkaw tsun bungli ngut nna, lu sha seng langai hta chyahkring mi hkring la ai shaloi na mabyin hpe naw dum ai. Shinggan pru na matu ngai sa ai shaloi, lachyen lahka ai maksam htu da ai la langai gaw grai pawt let ngai na hpang hkan wa ai. Raitim, hkum kaba ai shan hpraw hpunau langai gaw, shang wa nna, “hpa byin nga ai kun, hpunau Herd?” ngu nna ngai hpe san dat ai. Dai shaloi, dai wa gaw kalang ta pru mat wa ai. Lachyen lahka ai lam byin ai gaw, shan nsam a majaw n re ai sha, anhte yawng hta nga ai yubak a majaw re ai hpe chye wa ai. Hpunau langai gaw kaga hpunau langai a shan nsam hpe n yu ai sha, ra ang wa yang si hkam na matu jin jin re ai hpe mung ngai chye wa ai.

An gaw, ninghtawn hpung kawan magam hpe 12 ning, ginwang hpung kawan magam hpe 21 ning gun hpai wa ai. Dai shaning ni gaw grai manu dan nna, n-gun lu hpa mahkrum madup ni hte hpring tup re. Raitim, kaga shaman chyeju langai hpe lu la wa ai. 1997, August shata hta, shaning grai na hkra myit mada wa ai lam, gaja wa byin wa ai. Amerikan Behtela hta magam gun na matu, saw shaga hkrum ai. Behtela tang shawn laika ka nna 38 ning na ai hpang hta re. Behtela magam bungli hpe an galaw hpang ai. Behtela hta na lit nga ai hpunau ni gaw, ngai hpe chyahkring chyahkra sha galaw shangun mayu ai ngu ngai shadu wa ai. Raitim, dai hku n re.

Magam dap hta shawng nnan hku nna lit ang ai. Dai kaw nna grai law hkra ngai sharin la lu wa ai. Magam dap na hpunau ni gaw, mungdan ting na hpung kawan hpunau ni hte myitsu salang ni a grai yak ai ga san ni hpe htai ya ra ai. Ngai hpe shaman shakyang ya nna, karum ya ai hpunau ni hpe grai chyeju dum ai. Magam dap hta bai magam gun lu yang, dai hpunau ni kaw nna grai law hkra naw sharin la lu na re.

Gloria hte ngai gaw Behtela prat hpe ra sharawng ai. Jahpawt jau jau rawt ai hpe an ra sharawng ai majaw, dai gaw Behtela hta nga ai shaloi mung karum ya ai. Laning mi na ai hpang, Uphkang Hpung a Magam Komiti hpe karum ya ai wa hku nna magam gun wa ai. 1999 hta Uphkang Hpung shang masha langai hku nna lit shatsam hkrum ai. Dai magam lit hta grai law hkra sharin la lu ai. Ahkyak htum sharin la lu ai lam gaw, Hkristan nawku hpung a ningbaw gaw masha n re ai sha, Yesu Hkristu re ngu ai hpe chye wa ai.

Ngai na prat hpe bai myit yu yang, myihtoi Amo zawn hkamsha ai. Matsan ai masha ni sha, sha ai lakum si lajang ai wa re ai, shagrit shanem ai sagu rem wa hpe Yehowa sadi hkrup ai. Karai Kasang gaw, Amo hpe myihtoi langai hku aya tang nna, shi a magam lit hta shaman chyeju law law jaw wa ai. (Amo 7:14, 15) Dai zawn sha, Indiana mung daw Liberty hta na, matsan ai sun galaw ai wa a kasha re ai ngai hpe Yehowa sadi hkrup ai. Ngai tsun dan mat wa sai hte maren, Yehowa gaw ngai hpe shaman chyeju grai law hkra jaw wa ai. (Ga Shagawp 10:22) Ngai na prat hpang ai aten hta arung arai matsan wa tim, jahtum hta gaw ngai kalang pyi n myit ga ai lam hku, wenyi lam hta sut su wa ai.