1. Adam yan Ewa mara galaw wa ai hpang, anhte a hpyen hte seng nna Yehowa hpa tsun wa ai kun?

ADAM gaw lapu ni ga n chye shaga ai hpe chye ai. Dai majaw, Ewa hpe lapu ga sa shaga ai shaloi, dai gaw wenyi hkum langai rai na hpe Adam chye wa na re. (Ningpawt 3:1-6) Dai wenyi gaw kadai re ai hpe chyawm gaw, Adam yan Ewa n chye ai. Raitim, Adam gaw dai tsasam wa a ga madat nna, shi hte arau sumsing lamu na Kawa hpe gumlau wa ai. (1 Timohti 2:14) Yehowa gaw kalang ta, dai nhkru ai hpyen wa a lam tsun nna, hpang jahtum hta jahten kau na lam ga sadi jaw wa ai. Shi hpe tsawra ai ni yawng hpe dai wenyi gaw ninghkap na re ngu nna mung, Karai Kasang tsun wa ai.​​—⁠⁠Ningpawt 3:15.

2, 3. Meshia garai n du shi yang, Satan hte seng nna loi mi sha tsun dan da ai gaw hpa majaw rai na kun?

² Yehowa gaw, shi hpe gumlau wa ai lamu kasa a amying hpe n tsun dan wa ai. * Edin sun hta gumlau ai lam byin ngut ai hpang, shaning 2,500 jan na yang she, gumlau ai wa gaw kadai re ai hpe Yehowa tsun dan wa ai. (Yoba 1:6) Shi hpe “Satan,” lachyum gaw  “ning hkap ai wa” ngu nna chye wa ai. Hebre Chyum Laika masum re ai 1 Hkawhkam Labau, Yoba hte Zehkaria hta, Satan ngu tsun da ai. Meshia n du shi yang, gumlau ai wa hte seng nna hpa majaw loi mi sha tsun da ai kun?

³ Hebre Chyum Laika ni hta Satan hte seng ai ahkri ahkrai lam ni hpe, Yehowa n tsun dan da ai. De a malai, Hebre Chyum Laika ni a yaw shada lam gaw, Meshia hpe masha ni chye lu nna, shi hpang hkan sa lu na matu re. (Luka 24:44; Galati 3:24) Meshia du wa ai shaloi she, Satan hte shi hpang hkan ai lamu kasa ni a lam hpe grau nna chye wa hkra, Meshia hte shi a sape ni hpe Yehowa akyu jashawn wa ai. * Dai lam gaw grai htap htuk nga ai. Hpa majaw nga yang, Satan hte shi hpang hkan ai ni hpe jahten na matu, Yesu hte namman chya hkam ai ni hpe sha, Yehowa akyu jashawn na majaw re.​​—⁠⁠Roma 16:20; Shingran 17:14; 20:10.

4. Nat Satan hpe hpa majaw anhte n hkrit ra ai kun?

⁴ Kasa Petru gaw Nat Satan hpe “shabam ai hkanghkyi,” ngu nna tsun wa ai. Kasa Yawhan gaw “lapu” hte “baren numraw kaba” ngu tsun wa ai. (1 Petru 5:8; Shingran 12:9) Raitim, Nat hpe anhte n hkrit ra ai. Shi a atsam gaw shadawn sharam sha re. (Yaku 4:7 hpe hti u.) Yehowa, Yesu hte sadi dung ai lamu kasa ni gaw anhte hpe makawp maga ya nga ai. Shanhte a karum shingtau lam hte anhte a hpyen hpe gasat lu ai. Raitim, ahkyak ai ndai ga san masum a mahtai hpe gaw chye ra ai: Satan kade daram shingkang ka-up lu ai kun? Masha ni hpe shingkang ka-up na matu Satan gara hku shakut ai kun? Gara lam ni hpe shi n lu galaw ai kun? Dai ga san masum a mahtai hte anhte hpa sharin la lu na lam hpe hkaja yu ga.

5, 6. Shinggyim masha ni a matu ahkyak htum ra kadawn ai lam hpe masha asuya ni gaw hpa majaw n galaw ya lu ai kun?

⁵ Karai Kasang hpe Satan gumlau ai shaloi, lamu kasa law law mung lawm mat ai. Hka sha-u garai n ing yang, num ni hte hkum shan kanawn na matu lamu kasa nkau hpe Satan hkalem wa ai. Chyum Laika hta, sumsing lamu kaw na hkrat wa ai baren numraw gaw, shagan htam masum hta na htam mi hpe magawn la mat ai ngu ga shadawn hku tsun da ai. (Ningpawt 6:1-4; Yuda 6; Shingran 12:3, 4) Dai lamu kasa ni gaw, Karai Kasang a dinghku hpe kau da nna, Satan maga de tsap na matu daw dan wa ai. Dai gumlau wa ai lamu kasa ni gaw, dumbru dumbra rai nga na n re. Anhte a myi hte n mu lu ai wenyi mungkan hta, Satan mung, Karai Kasang a Mungdan hpe shingjawng let, shi a mungdan hpe hpawng de da na re. Dai hta hkawhkam hku nna shi uphkang na re. Nat ni hpe ahkang aya jaw nna, mungkan ga hpe uphkang na matu shi hpawng de da na re.​​—⁠⁠Ehpesu 6:12.

⁶ Masha asuya ni hpe uphkang na matu, Satan gaw shi a uhpung hpe akyu jashawn ai. Dai lam hpe anhte gara hku chye lu ai kun? Yesu hpe “mungkan ga na mungdan nlang” hte hpe madun nna, shi ndai hku tsun wa ai hpe yu yang chye lu ai: “Ndai ahkang aya mahkra hpe, dai ni a hpung shingkang hte nawng, ngai nang hpe jaw na de ai; dai gaw ngai hpe ap ya  ni ai rai nna, ngai jaw mayu ai wa kadai hpe mung jaw lu nngai.” (Luka 4:5, 6) Asuya law law gaw, mung masha ni a matu akyu nga ai lam ni hpe galaw ya nga ai. Nkau uphkang du ni nga yang, myit ding man nna masha ni hpe karum ya mayu ma ai. Raitim, shinggyim masha asuya gaw, shinggyim masha ni a matu ahkyak htum ra kadawn nga ai lam hpe n galaw ya lu ai.​​—⁠⁠Shakawn 146:3, 4; Shingran 12:12.

7. Satan gaw asuya ni hpe akyu jashawn ai sha n-ga, shut shai ai nawku htung hte hpaga mungkan hpe mung gara hku asung jashawn ai kun? (Ndai sumhpa shawng na sumla hpe yu u.)

⁷ Satan hte nat ni gaw, shut shai ai nawku htung hte hpaga lam ni hpe akyu jashawn nna, “mungkan ga ting” (sh) shinggyim masha yawng hpe hkalem nga ai. (Shingran 12:9) Yehowa hte seng ai lam hpe masu na matu, shut shai ai nawku htung hpe asung jashawn ai sha n-ga, Karai Kasang a amying hpe shamat kau na matu pyi shi shakut ai. (Yeremia 23:26, 27) Karai Kasang hpe nawku nga ai ngu shadu nga ai myit ding man ai masha nkau gaw, teng sha nga yang nat ni hpe nawku nga ai re. (1 Korinhtu 10:20; 2 Korinhtu 11:13-15) Satan gaw, hpaga mungkan hpe asung jashawn nna mung, masu hkalem ai ga chyam bra hkra galaw nga ai. Ga shadawn, ja gumhpraw hte arung arai gaw, masha hpe ngwi pyaw lam lu shangun ai ngu ai masu ga ni re. (Ga Shagawp 18:11) Dai masu ga hpe kam ai ni gaw, Karai Kasang hta grau nna “sut gan” hpe mayam hkam nga ma ai. (Mahte 6:24) Karai Kasang hpe tsawra ai ni pyi, arung arai hpe grau tsawra wa yang, Karai Kasang hpe tsawra ai myit mat mat chye ai.​​—⁠⁠Mahte 13:22; 1 Yawhan 2:15, 16.

8, 9. (a) Adam, Ewa hte gumlau ai lamu kasa ni galaw ai lam kaw nna hpa sharin la lu ai kun? (b) Mungkan hpe Satan uphkang nga ai lam chye da ai gaw anhte a matu hpa majaw kaja ai kun?

⁸ Adam, Ewa hte gumlau ai lamu kasa ni a galaw wa ai lam ni kaw nna, ahkyak ai lam lahkawng hpe anhte sharin la lu ai. Langai, Yehowa maga tsap na kun? Satan maga tsap na kun? Dai lahkawng kaw nna langai hpe anhte lata ra na lam sharin la lu ai. (Mahte 7:13) Lahkawng, Satan maga de lawm mat wa ai ni gaw, shadawn sharam nga ai akyu sha lu la ma ai. Adam yan Ewa gaw, jaw ai shut ai hte seng nna tinang hkrai daw dan na matu, ahkaw ahkang lu mat ai. Nat ni mung, masha asuya ni hpe uphkang na matu atsam nkau lu wa ai. (Ningpawt 3:22) Raitim, Satan a maga de nga na matu lata ai ni gaw, jahtum hta galoi mung n kaja ai akyu sha lu la ma ai.​​—⁠⁠Yoba 21:7-17; Galati 6:7, 8.

⁹ Mungkan hpe Satan uphkang nga ai lam chye da ai gaw anhte a matu hpa majaw kaja ai kun? Dai hku chye da ai gaw, kabu gara shiga hkaw tsun na matu hte asuya ni a ntsa rap ra ai ningmu nga na matu karum ya ai. Asuya ni hpe anhte hkungga na matu Yehowa ra sharawng ai. (1 Petru 2:17) Shi a tsang madang ni hte n htan shai ai lam n nga yang, asuya ni a tara hpe anhte hkan sa na matu shi myit mada ai. (Roma 13:1-4) Raitim, mung masa pati ni (sh) masha uphkang du ni hpe madi shadaw ai lam ni n galaw ai sha, lapran nga ra ai hpe gaw anhte chye ga ai. (Yawhan 17:15, 16; 18:36) Satan gaw, Yehowa a amying hpe mat mat hkra shakut nga nna, Yehowa a arawng sadang hpe jahpoi asawng nga ai lam anhte chye ai majaw, Karai Kasang hte seng  nna teng man lam hpe masha ni chye wa hkra dang lu ai daram sharin ya nga ai. Yehowa a amying hpe hkam la lu nna, shi a amying hpe lang lu ai majaw anhte arawng la ga ai. Karai Kasang hpe tsawra ai lam gaw, gumhpraw (sh) arung arai ni hta grau nna manu dan ai.​​—⁠⁠Esaia 43:10; 1 Timohti 6:6-10.

10-12. (a) Lamu kasa nkau hpe gunglau na matu, mahkam hpe Satan gara hku lang wa ai kun? (b) Dai lamu kasa ni galaw wa ai lam kaw nna anhte hpa sharin la lu ai kun?

¹⁰ Kaga ni hpe shingkang ka-up na matu, tang du ai ladat ni hpe Satan lang ai. Ga shadawn, shi galaw ai lam ni hpe hkan galaw na matu, adip arip re ai lam ni hte mahkam ni hpe akyu jashawn ai.

¹¹ Lamu kasa law law hpe gunglau na matu mung, mahkam hpe shi lang wa ai. Shanhte hpe hpa hte gunglau lu na lam chye na matu, aten grai na hkra shi sagawn wa na re. Lamu kasa nkau gaw, shi a mahkam hta du mat nna, numsha ni hte hkum shan kanawn wa ai. Shanhte lu wa ai ma ni gaw, hkum hkrang grai kaba nna kaga masha ni hpe zingri nna dang sha ma ai. (Ningpawt 6:1-4) Dai lamu kasa ni hpe gunglau na matu, akyang hten za ai mahkam hpe sha n-ga, masha yawng hpe uphkang lu ai atsam jaw na ngu nna mung gunglau wa ai rai na re. Dai lam hku nna Satan gaw, ‘numsha a amyu matu’ hte seng nna Yehowa a myihtoi ga n hpring tsup na matu shakut wa ai. (Ningpawt 3:15) Raitim, shi awng dang na matu Yehowa ahkang n jaw wa ai. Yehowa gaw, hka sha-u ing kau ai hku nna, Satan hte shi hpang hkan ai nat ni a yaw shada lam yawng hpe jahten kau ai.

¹² Dai lam kaw nna anhte hpa sharin la lu ai kun? Akyang hten ai lam hte gumrawng ai lam gaw, Satan jailang ai mahkam ni kaw nna kaja htum re. Satan hpang hkan mat ai lamu kasa ni gaw, sumsing lamu hta Karai Kasang hte arau, shaning grai na hkra nga wa ai ni re. Raitim, shanhte kaw nna law malawng gaw, n kaja ai ra marin ai lam nga wa nna, dai hpe grau kaba wa na matu ahkang jaw kau ai. Yehowa hpe nawku ai shaning kade na sai raitim, n kaja ai ra marin lam ni gaw anhte a myit masin hta ru jung wa chye ai hpe galoi mung myit dum ra ai. (1 Korinhtu 10:12) Dai majaw, anhte a myit masin hta hpa nga ai hpe ayan na jep yu ra ai. Akyang lailen hten za shangun ai  myit mang ai lam ni hte tingkyeng myit hpe shaw kau ra ai.​​—⁠⁠Galati 5:26; Kolose 3:5 hpe hti u.

13. Satan lang ai kaga mahkam langai gaw hpa rai nna, dai hpe anhte gara hku koi lu na kun?

¹³ Satan lang ai kaga mahkam langai gaw, shingra tara hta jan ai lam ni hpe chye mayu ai myit nga hkra shadut ya ai lam re. Dai ni na aten hta, shut shai ai nawku htung hte shangwi shapyaw lam ni hpe lang nna, nat hte seng ai lam ni hpe masha ni myit lawm wa hkra, shi shakut nga ai. Sumla hkrung ni, game ni hte shangwi shapyaw ai lam nkau gaw, shingra tara hta jan ai lam ni hpe myit lawm hpa byin hkra galaw lu ai. Dai mahkam hpe anhte gara hku koi lu na kun? Karai Kasang a uhpung gaw, shangwi shapyaw lam hte seng nna ahkri ahkrai lam matsun ni hpe jaw na ngu n mai myit mada ai. Yehowa a tara hta madung tawn nna kaja ai lam ni hpe lata lu hkra, anhte a myit nsam hpe shaman da ra ai. (Hebre 5:14) Karai Kasang hpe tsawra ai myit hta ‘sawt ai lam n lawm’ yang, hpaji rawng ai lam hpe lata lu na re. (Roma 12:9) Sawt ai masha gaw, tinang tsun ai hte maren n galaw ai. Dai majaw, shangwi shapyaw lam hte seng nna anhte lata ai shaloi, tinang hkum tinang ndai hku san ra ai: ‘Kaga masha ni hpe hkan sa ra ai ngu tsun ai tara ni hpe ngai hkan sa ai kun? Nye a Chyum ga sharin ni (sh) kaga masha ni gaw, ngai lata ai shangwi shapyaw lam hte seng nna ngai hpe gara hku tsun na kun?’ Kaga masha ni hpe hkan sa ra ai ngu tsun ai tara ni hte maren anhte hkan sa ai nga yang, Satan a mahkam hpe anhte koi lu na re.​​—⁠⁠1 Yawhan 3:18.

14. Satan gaw anhte hpe gara hku adip arip galaw chye nna, anhte gara hku hkam jan lu na kun?

¹⁴ Yehowa hpe sadi n dung mat hkra, Satan gaw anhte hpe jahkrit shama nna dang sha na matu shakut nga ai. Ga shadawn, anhte a hkaw tsun bungli hpe pat shingdang na matu asuya ni hpe shadut ya chye ai. Chyum Laika tsang madang ni hte maren hkan sa nga ai hpe jahpoi asawng na matu, jawng manang ni, bungli manang ni hpe shadut ya chye ai. (1 Petru 4:4) Makam masham n bung ai nta masha ni hpe akyu jashawn nna, anhte zuphpawng n kam lung hkra shadut ya chye ai. (Mahte 10:36) Satan adip arip galaw ai lam hpe anhte ngang ngang kang kang gara hku ninghkap lu na kun? Satan gaw anhte hpe gasat nga ai lam anhte chye da ai majaw, dai zawn hkrum wa ai  shaloi anhte n mau ga ai. (Shingran 2:10; 12:17) Ngut nna, madung manghkang gaw hpa re ai hpe anhte dum ra ai. Yehowa hpe masa lam ni kaja ai shaloi sha anhte nawku nna, masa lam ni yak wa yang, nyet kau na re ngu Satan tsun wa ai. (Yoba 1:9-11; 2:4, 5) Anhte hpe shangang shakang ya na matu Yehowa hpe hpyi shawn ra ai. Shi anhte hpe galoi mung kau da na n re ai hpe mung dum ra ai.​​—⁠⁠Hebre 13:5.

15. Anhte n galaw mayu ai lam ni hpe galaw na matu Satan shadut lu ai kun? Sang lang dan u.

¹⁵ Masha ni n galaw mayu ai lam hpe galaw na matu, Satan n lu shadut ai. (Yaku 1:14) Mungkan na masha law law gaw, Satan a maga de shanhte du nga ai hpe n chye ma ai. Raitim, marai langai gaw teng man lam hpe chye wa ai shaloi, Yehowa maga de tsap na kun? (sh) Satan maga de tsap na kun? ngu ai hpe lata ra na re. (Kasa 3:17; 17:30) Yehowa hpe madat mara na matu anhte lata yang, anhte a sadi dung ai lam hpe Satan jahten kau lu na n re.​​—⁠⁠Yoba 2:3; 27:5.

16, 17. (a) Satan hte nat ni gaw hpa lam hpe n lu galaw ai kun? (b) Yehowa hpang nsen pru nna akyu hpyi na matu hpa majaw n hkrit ra ai kun?

¹⁶ Satan hte nat ni n lu galaw ai kaga lam ni naw nga ai. Ga shadawn, anhte a myit mang ai lam ni hpe shanhte chye ai ngu Chyum Laika hta n tsun da ai. Yehowa hte Yesu sha chye lu ai. (1 Samuela 16:7; Marku 2:8) Dai majaw, nsen pru nna akyu hpyi yang, anhte a akyu hpyi ga ni hpe Satan hte nat ni na mat nna, shoihpa jaw na hpe hkrit ra na kun? N hkrit ra ai. Hpa majaw kun? Ndai lam hpe myit yu u. Kaja ai lam ni galaw nna Yehowa hpe anhte nawku nga ai hpe Satan mu ai raitim, anhte n hkrit ai. Dai zawn sha, nsen pru nna anhte akyu hpyi ai shaloi, Satan na lu na raitim, anhte n hkrit ra ai. Karai Kasang a mayam ni gaw, nsen pru nna akyu hpyi wa ai lam Chyum Laika hta law law lang tsun da ai. Shanhte a nsen Satan na mat na hpe hkrit wa ai lam, kalang pyi anhte n hti ga ai. (1 Hkawhkam 8:22, 23; Yawhan 11:41, 42; Kasa 4:23, 24) Karai Kasang ra sharawng ai hte maren anhte akyu hpyi nna galaw na nga yang, Satan anhte hpe shoihpa jaw na matu galaw ai lam yawng kaw nna, Yehowa anhte hpe makawp maga ya na re.​​—⁠⁠Shakawn 34:7 hpe hti u.

¹⁷ Anhte a hpyen hpe anhte chye ra ai raitim, n hkrit ra ai. Anhte n hkum tsup ai ni raitim, Yehowa a karum shingtau lam hte Satan hpe awng dang lu ai. (1 Yawhan 2:14) Satan hpe anhte ninghkap yang, shi anhte kaw nna hprawng mat na re. (Yaku 4:7; 1 Petru 5:9) Dai ni na aten hta, Satan gaw laksan hku nna ramma ni hpe gasat nga na re. Ramma ni hku nna, Satan a gasat ai lam hpe gara hku ninghkap lu na kun? Dai lam hte seng nna, hpang na sumhpa hta hkaja mat na re.