1, 2. (a) Satan hte nat ni hpe Hkristan ramma ni hpa majaw gasat awng dang lu na kun? (Ndai sumhpa shawng na sumla hpe yu u.) (b) Hpa lam hpe anhte hkaja mat na kun?

KASA Pawlu gaw Hkristan ni hpe, hpyen la ni hte shingdaw wa ai. Anhte gaw shinggyim masha ni hte gasat ai n re sha, wenyi majan hta Satan hte nat ni hpe gasat nga ai. Shanhte gaw shaning hkying hku majan gasat wa nna, grai ningtawn ma ai. Laksan hku nna, ramma ni rai yang, shanhte hpe awng dang na matu n mai byin ai zawn rai nga na re. Atsam hpring ai hpyen ni hpe, ramma ni gasat awng dang lu na kun? Awng dang lu ai. Hpa majaw kun? Yehowa kaw nna atsam marai lu la ai majaw re. Atsawm shaman da ai hpyen la ni zawn, ramma ni mung “Karai Kasang jaw da ai hpyen hking nlang hte hpe bu hpun dagraw” nna, majan a matu hkyen lajang lu na re.​​—⁠⁠Ehpesu 6:10-12 hpe hti u.

² Pawlu gaw dai ga shadawn hpe tsun ai shaloi, Roma hpyen la ni hpun ai hpyen hking ni hpe myit wa na re. (Kasa 28:16) Ndai sumhpa hta, grai kaja ai dai ga shadawn hpe hkaja mat na re. Wenyi hpyen hking langai hpra hpe bu hpun ai majaw,  yakhkak hkrum ai lam hte lu la wa ai akyu ni a lam ramma ni tsun ai hpe mung hkaja mat na re.

3, 4. Chyum Laika hta lawm ai teng man lam gaw Roma hpyen la ni a shingkyit hte gara hku bung ai kun?

³ Ehpesu 6:14 hpe hti u. Roma hpyen la ni a shingkyit gaw nhprang sut rai hte galaw da nna, hpyen la ni a nshang hpe makawp maga ya ai. Shingkyit nkau gaw, sinda magap hpe mung shi shara hte shi hkrak byin hkra hkang ya ai. Shingkyit hta nhtu hte nhkyi hpe noi na shara mung lawm ai. Hpyen la langai gaw, shingkyit hpe ngang ngang kyit da yang, majan pa de sa ai shaloi, tinang hkum tinang kam ai myit nga na re.

⁴ Shingkyit zawn sha, Karai Kasang a teng man ai tara gaw, shut shai ai sharin achyin ya ai lam ni kaw nna makawp maga ya ai. (Yawhan 8:31, 32; 1 Yawhan 4:1) Karai Kasang a Mungga kaw nna teng man lam hpe tsawra wa hkra grau nna hkaja yang, Karai a tsang madang ni hte maren asak hkrung na matu (sh) “sinda magap” hpe hpun da na matu grau loi wa na re. (Shakawn 111:7, 8; 1 Yawhan 5:3) Teng man ai lam hpe grau nna chye wa yang, anhte a hpyen ni hpe grau nna gasat awng dang lu na re.​​—⁠⁠1 Petru 3:15.

5. Galoi mung teng man ai hku hpa majaw tsun ra ai kun?

⁵ Karai Kasang a Mungga kaw nna teng man lam gaw anhte a matu ahkyak ai majaw, dai hpe anhte hkan sa nna teng man ai hku galoi mung tsun ai. Masu ai lam gaw Satan a awng dang dik htum laknak langai re. Masu ai ga gaw, tsun ai wa hte kam ai wa lahkawng yan hpe hkra machyi shangun ai. (Yawhan 8:44) Dai majaw, anhte gaw n hkum tsup ai ni raitim, masu ga n tsun na matu shakut ai. (Ehpesu 4:25) Dai zawn galaw na matu gaw yak na re. Asak 18 ning re ai Abige ndai hku tsun ai: “Teng man ai hku tsun na matu gaw ayan na n loi ai. Laksan hku nna, masu dat yang she, yak ai masa ni kaw nna lawt mat na zawn re ai shaloi ni hta re.” Rai yang, teng man ai hku hpa majaw shi galoi mung tsun ai kun? Shi ndai hku tsun ai: “Teng man ai hku ngai tsun ai majaw, Yehowa a man hta nye a myit nsam gaw san seng nga ai. Anu yan Awa hte manang ni mung ngai hpe kam ma ai.” Asak 23 ning rai sai Bihtoria ndai hku tsun ai: “Na a makam masham hte seng nna teng man ai lam hpe nang tsun ai, makawp maga ai nga yang, dang sha hkrum chye ai. Raitim, grai kaja ai akyu ni hpe nang lu la na re. Tinang hkum tinang kam ai myit lu wa na, Yehowa hte grau hku hkau wa nna nang hpe tsawra ai ni a hkungga ai lam hpe mung lu wa na re.” Teng man lam ngu ai shingkyit hpe galoi mung kyit da na matu grai ahkyak ai hpe chye lu ai.

6, 7. Ding hpring ai lam hpe sinda magap hte hpa majaw shingdaw ai kun?

⁶ Roma hpyen la ni a sinda magap hpe hpri hte galaw da ai. Sinda hpe makawp maga ya na matu, sinda hte hkrak magaw da nna magap da ya ai. Dai sinda magap hpri pa ni langai hte langai matut nga na matu, shan hpyi sumri hte gyit da ya ai. Lahpa hpe makawp  maga ya na matu, hpri pa magaw ni hpe kahtap nna shan hpyi sumri hte gyit da ya ai. Sinda magap a majaw, shamu shamawt na matu loi yak nna, shi shara hte shi nga nga na matu ayan na jep ra ai. Raitim, salum hte hkum daw shan ni hpe, nhtu hte ndan pala ni n hkra na matu, sinda magap gaw makawp maga ya ai.

⁷ Yehowa a ding hpring ai tara ni gaw, anhte a “myit masin” hpe makawp maga ya lu ai majaw, sinda magap hte shingdaw mai ai. (Ga Shagawp 4:23) Hpyen la ni gaw, shanhte a sinda magap hpe, nau n kaja ai hpri hte galaw da ai kaga sinda magap hte galai kau na n re. Dai hte maren anhte mung, Yehowa a jaw ai tsang madang ni hpe, anhte a ningmu hta jaw ai ngu shadu da ai tsang madang ni hte galai kau na n re. Anhte a myit masin hpe makawp maga ya lu ai nyan hpaji anhte hta n nga ai. (Ga Shagawp 3:5, 6) Dai majaw, “sinda magap” gaw anhte a salum hpe matut nna makawp maga ya nga na matu, ayan jep yu ra ai.

8. Yehowa a tsang madang ni hpe hpa majaw anhte hkan sa ra ai kun?

⁸ Yehowa a tsang madang ni gaw, anhte hpe gyit hkang da ai (sh) tinang galaw mayu ai hpe n lu galaw hkra hkum pat da ai ngu, hkamsha ga ai kun? Asak 21 ning rai sai Daniye ndai hku tsun ai: “Ngai gaw Chyum Laika tsang madang ni hte maren nga ai majaw, jawng sara ni hte manang ni gaw ngai hpe jahpoi asawng ai. Dai majaw, tinang hkum tinang kam ai myit mat mat nna myit daw wa ai.” Raitim, ya shi gara hku hkamsha ai kun? Shi ndai hku tsun ai: “Yehowa a tsang madang ni hte maren nga ai majaw lu la ai akyu ni hpe, ngai gau ngwi ngwi mu wa ai. Ngai na ‘manang’ nkau gaw nanghpam lu sha nna, nkau nga yang jawng shapraw kau hkrum ai. Shanhte a prat dai zawn byin mat ai gaw yawn hpa re. Yehowa gaw anhte hpe teng sha makawp maga ya ai.” Asak 15 ning rai sai Madisan ndai hku tsun ai: “Nye manang ni pyaw nga ai zawn n lu pyaw nna, Yehowa a tsang madang ni hte maren nga na matu grai yak ai.” Dai majaw, shi hpa galaw wa ai kun? Shi ndai hku tsun ai: “Yehowa a amying hpe ngai hkam la da ai. Dai zawn gunglau ai lam ni gaw, ngai hpe Satan gasat ai lam re ngu, nye hkum ngai sadi jaw ai. Dai hku nna ngai awng dang ai shaloi, grau nna pyaw wa ai.”

9-11. (a) Hkristan ni gaw gara kyepdin hpe din ra ai kun? (b) Hkaw tsun ai shaloi, grau nna loi wa hkra hpa lam gaw karum ya lu na kun?

⁹ Ehpesu 6:15 hpe hti u. Roma hpyen la ni gaw kyepdin n din ai sha, majan pa de n sa ai. Shanhte a kyepdin gaw, shanhpyi htap masum hte galaw da ai majaw grai ngang ai. Kyepdin gaw, din manu ai majaw, lam hkawm ai shaloi atsawm sha hkawm lu nna kashawt mung n kashawt ai.

¹⁰ Roma hpyen la ni a kyepdin gaw, majan awng dang na matu karum ya ai zawn, wenyi kyepdin gaw ‘ngwi pyaw ai kabu gara shiga’ hkaw tsun na matu karum ya ai. (Esaia 52:7; Roma 10:15) Raitim, kalang lang rai yang, hkaw tsun na matu marai rawng ra ai. Asak 20 ning rai sai Bo ndai hku tsun ai: “Jawng manang ni hpe hkaw tsun na matu ngai hkrit ai. Ngai kaya ai majaw rai na re. Bai myit yu ga nga yang, hpa majaw dai hku byin ai hpe ngai n chye ai. Ya gaw, manang ni hpe hkaw tsun lu ai majaw pyaw nga sai.”

 ¹¹ Hkristan ramma law law gaw, shawng hkyen lajang da yang, hkaw tsun na matu loi ai hpe chye wa ai. Nang gara hku hkyen lajang mai na kun? Asak 16 ning rai sai Juliya ndai hku tsun ai: “Laili laika ni hpe, ngai na jawng nhpye hta bang da ai. Makam masham hte seng nna jawng manang ni tsun ai hpe ngai madat ai. Dai hpang shanhte hpe gara hku karum ya mai na lam chye wa ai. Ngai atsawm sha hkyen lajang da ai shaloi, shanhte a matu akyu lu hpa lam ni hpe ngai tsun dan lu ai.” Asak 23 ning rai sai Makenzi ndai hku tsun ai: “Nang gaw matsan dum chye nna atsawm madat ya ai nga yang, manang ni hpa lam hkrum nga ai hpe chye lu na re. Ramma ni hte seng nna shapraw da ai laili laika yawng hpe ngai hti da ai. Dai majaw, shanhte hpe karum ya lu na Chyum Laika lam (sh) jw.org kaw lawm ai lam hpe kalang ta tsun dan lu ai.” Hkaw tsun na matu atsawm sha hkyen lajang da ai gaw “kyepdin” din da ai hte bung nna, nang hpe awng dang shangun na re.

12, 13. Satan gap ai “wan pala” nkau gaw hpa rai a ta?

¹² Ehpesu 6:16 hpe hti u. Roma hpyen la  ni gaw, grai kaba ai n-gang hpe lang ai. N-gang gaw lahpa kaw nna lahput du hkra, hpyen la ni hpe makawp maga ya ai. Nhtu, nri hte ndan pala ni n hkra na matu makawp maga ya ai.

¹³ Nang hpe Satan gap ai “wan pala” ni gaw hpa ni rai kun? Yehowa hte seng nna n teng n man tsun ai hku nna re. Yehowa gaw nang hpe n tsawra ai, nang hte seng nna kadai mung myit n lawm ai ngu, Satan gaw nang hpe hkamsha shangun mayu ai. Asak 19 ning rai sai nauna Aida ndai hku tsun ai: “Yehowa gaw ngai hte manang n kam byin ai, ngai hte nau n kam hkau ai ngu chyahkring hkring hkamsha ai.” Dai zawn hkamsha ai shaloi, shi hpa galaw ai kun? Shi ndai hku tsun ai: “Zuphpawng ni gaw nye a makam masham hpe grai rawt jat shangun ai. Zuphpawng ni ngai lung wa tim, mahtai galoi mung n jaw ai. Ngai tsun ai ga hpe kadai mung madat mayu na n re ngu ngai myit wa ai. Raitim, ya gaw, zuphpawng ni a matu ngai hkyen lajang nna, mahtai lahkawng masum jaw lu hkra shakut ai. Yak ai raitim, dai hku galaw ai shaloi grau nna pyaw wa ai. Hpunau nauna ni mung grai n-gun lu ma ai. Zuphpawng kaw nna bai wa shagu Yehowa ngai hpe tsawra ai ngu ngai hkamsha ai.”

14. Nauna Aida a mahkrum madup kaw nna anhte hpa sharin la lu ai kun?

¹⁴ Hpyen la yawng a n-gang gaw maren sha re. Raitim, nauna Aida a mahkrum madup kaw nna sharin la lu ai hte maren, anhte a makam masham gaw dai hku n re. Anhte a makam masham gaw rawt jat wa lu ai (sh) yawm mat wa chye ai. Grau ngang kang lu ai (sh) gawng kya mat chye ai. Tinang lata ai lam hta sha madung ai. (Mahte 14:31; 2 Htesaloni 1:3) “Makam masham ngu ai n-gang” anhte hpe makawp maga ya nga na matu, dai hpe grau kaba wa hkra shakut ra ai.

15, 16. Myit mada lam gaw gup chyawp hte gara hku bung ai kun?

¹⁵ Ehpesu 6:17 hpe hti u. Roma hpyen la ni gaw shanhte a baw, du hte myi man hpe makawp maga na matu, gup chyawp chyawp ai. Gup chyawp hta lang na shara nga ai majaw, hpyen la ni gaw dai hpe lang da mai ai.

¹⁶ Gup chyawp gaw hpyen la ni a bawnu hpe makawp maga ya ai zawn, “hkye hkrang la ai de myit mada ai lam” gaw, anhte a myit mang ai lam hpe makawp maga ya ai. (1 Htesaloni 5:8; Ga Shagawp 3:21) Karai Kasang a ga sadi ni hpe myit maju jung lu na matu hte anhte hkrum nga ai manghkang ni a majaw, myit n daw mat na matu, myit mada lam gaw anhte hpe karum ya ai. (Shakawn 27:1, 14; Kasa 24:15) Anhte a myit mada lam ngu ai “gup chyawp” anhte hpe makawp maga ya na matu, dai hpe n lang da ai sha baw kaw chyawp da ra ai.

17, 18. (a) Anhte a gup chyawp hpe Satan gara hku raw kau mai ai kun? (b) Satan hkalem ai hpe n hkam ai lam anhte gara hku sakse madun na kun?

¹⁷ Anhte a gup chyawp hpe Satan gara hku raw kau lu ai kun? Yesu hpe shi galaw wa ai lam hpe myit yu u. Yesu gaw shinggyim masha ni a uphkang madu byin wa na hpe Satan chye ai. Raitim, Yesu gaw nni nkri hkrum nna si ra na re. Hkawhkam byin wa na matu mung, Yehowa masat da ai nhtoi du hkra la ra na re. Dai majaw, Satan gaw Yesu hpe nau n la ra ai sha, uphkang madu byin na ahkang jaw na ngu gunglau wa ai. Shi hpe kalang sha nawku na nga yang, mungkan a uphkang madu kalang ta byin wa na ngu Yesu hpe ga sadi jaw ai. (Luka 4:5-7) Anhte hpe, mungkan nnan hta shaman chyeju law law jaw na ngu ai Yehowa a ga sadi hpe mung Satan chye ai. Dai ga sadi teng sha hpring tsup wa na matu anhte la ra nna, ya aten hta mung manghkang grai law hkra hkrum nga ai. Dai  majaw Satan gaw, ya aten hta pyaw pyaw nga lu na ahkaw ahkang anhte hpe jaw nga ai. Anhte a myit ra ai lam gaw shawng rai nna, Karai Kasang a Mungdan gaw hpang byin mat hkra shi galaw mayu ai.​​—⁠⁠Mahte 6:31-33.

¹⁸ Hkristan ramma law law gaw Satan a hkalem ai lam hpe ninghkap kau ai. Ga shadawn, asak 20 ning rai sai nauna Kiana ndai hku tsun ai: “Anhte hkrum nga ai manghkang yawng hpe hparan lu na gaw, Karai Kasang a Mungdan sha re ai lam ngai chye ai.” Shi a myit mada lam gaw, shi a myit mang ai lam hte asak hkrung hkawm sa lam hta gara hku akyu shabyin ya ai kun? Ndai mungkan a sut rai ni gaw, chyahkring chyahkra sha re ai hpe myit dum hkra, myit mada lam gaw shi hpe karum ya ai. Dai majaw, ndai mungkan hta bungli kaja langai lu na matu shakut na malai, Kiana gaw shi a ahkying aten hte n-gun atsam ni hpe Yehowa a magam gun na matu akyu jashawn wa ai.

19, 20. Karai a Mungga hpe akyu jashawn ai hta grau nna atsam rawt jat wa hkra gara hku galaw lu ai kun?

¹⁹ Roma hpyen la ni gaw, lekma 20 galu ai nhtu hpe lang ai. Nhtu hpe lang nna shani shagu shaman shakyang da ai majaw, nhtu hpe atsawm sha chye lang ai.

²⁰ Karai Kasang a Mungga gaw nhtu hte bung ai ngu nna kasa Pawlu tsun wa ai. Yehowa gaw anhte hpe dai nhtu jaw da ai. Anhte a makam masham hpe makawp maga na matu, myit mang ai lam hpe galai shai na matu, Chyum Laika hpe atsawm hkaja ra ai. (2 Korinhtu 10:4, 5; 2 Timohti 2:15) Grau nna atsam rawt jat wa hkra gara hku shaman na kun? Asak 21 ning rai sai Sebastiyan ndai hku tsun ai: “Ngai Chyum Laika hti ai shaloi, daw kaba langai hti yang, dai kaw nna daw kaji langai hpe ka matsing ai. Dai hku nna ngai ra sharawng ai Chyum daw ni hpe jahpan galaw da ai.” Yehowa myit ai hpe grau nna chye wa hkra, dai hku galaw ai gaw shi hpe karum ya ai. Daniye ndai hku tsun ai: “Ngai Chyum Laika hti ai shaloi, hkaw tsun bungli hta masha ni hpe karum ya lu ai Chyum daw ni hpe matsing da ai. Chyum Laika hpe grai sharawng nna shanhte hpe karum ya na matu kaja htum galaw ai hpe shanhte mu ai shaloi, atsawm sha bai htang ai hpe ngai mu wa ai.”

21. Satan hte nat ni hpe hpa majaw anhte n hkrit ra ai kun?

²¹ Ndai sumhpa hta ramma ni a kasi ningli ni hpe anhte hkaja wa sai hte maren, Satan hte nat ni hpe anhte n hkrit ra ai. Nat ni hta atsam nga tim, Yehowa gaw shanhte hta grau nna hpung atsam kaba ai. Shanhte gaw htani htana asak hkrung na n re. Yesu Hkristu Uphkang Ai Shaning Hkying Mi laman, shanhte gaw sharawng da hkrum na re ai majaw, kadai hpe mung shoihpa n lu jaw sai. Dai hpang shanhte hpe jahten kau na re. (Shingran 20:1-3, 7-10) Anhte a hpyen, shi a hkalem ai lam ni hte shi a yaw shada lam ni hpe anhte chye ai. Yehowa a karum shingtau ya ai lam hte Satan hpe anhte ninghkap kau lu ai.