1. Mahkawn mangoi ai gaw anhte hpa galaw na matu karum ya ai kun?

MYING gum hkawng ai mahkawn ka sara langai ndai hku tsun ai: “Ga si ni gaw nang hpe myit mang shangun ai. Yungwi gaw hkamsha lam byin shangun ai. Raitim, mahkawn gaw myit mang ai lam hpe hkamsha lam byin shangun ai.” Anhte a mahkawn ni gaw, Yehowa hpe tsawra ai lam hte shakawn ai lam hpe madun dan ai. Dai mahkawn ni gaw, shi hte grau ni htep shangun ai. Dai majaw, anhte marai langai sha raitim, hpunau nauna ni hte mahkawn ai raitim, mahkawn mangoi ai gaw chyoi pra ai nawku dawjau lam a ahkyak ai daw langai re ai lam chye na lu ai.

2, 3. (a) Masha nkau mi gaw nawku hpung hta nsen ja ja hte mahkawn mangoi ai hpe gara hku hkamsha ma ai kun? (b) Ndai sumhpa hta gara ga san ni hpe anhte bawng ban na kun?

² Nawku hpung hta nsen ja ja hte mahkawn mangoi ai hte seng nna nang gara hku hkamsha ai kun? Nang kaya ai kun? Htung nkau hta, la ni gaw masha ni a man hta mahkawn mangoi ai gaw nau n manu ai ngu hkamsha chye ai. Ndai myit jasat gaw, nawku hpung ntsa n kaja ai akyu byin shangun ai. Laksan hku nna, myitsu salang ni gaw mahkawn hkawn na matu hting nut ai (sh) mahkawn hkawn nga ai laman, kaga lam ni galaw taw ai nga yang re.​—⁠Shakawn 30:12.

 ³ Mahkawn mangoi ai gaw, Yehowa hpe nawku dawjau ai lam langai re. Dai majaw, anhte gaw mahkawn hkawn nga ai laman kaga de hkawm ai (sh) n lawm ai baw n galaw mayu ga ai. Dai majaw, anhte hkum anhte ndai hku san ra ai: ‘Zuphpawng hta mahkawn hkawn ai hte seng nna ngai gara hku hkamsha ai kun? Masha ni a man hta mahkawn hkawn na matu hting nut ai nga yang, ngai hpa galaw ra na kun? Mahkawn ni hpe hkamsha lam hte ngai gara hku mahkawn na kun?’

4, 5. Moi Israela ni a nawku htingnu hta, mahkawn mangoi na matu hpa hpe hkyen lajang da ai kun?

⁴ Labau ni hta, Yehowa hpe nawku dawjau ai ni gaw, shi hpe shakawn na matu yungwi hpe jailang wa ai. Israela ni Yehowa hpe sadi dung nga ai aten hta, mahkawn mangoi ai gaw shanhte a nawku dawjau ai lam hta ahkyak ai daw byin wa ai. Ga shadawn, Dawi gaw nawku htingnu hta nawku dawjau na matu hkyen lajang ai shaloi, Yehowa hpe yungwi hte mahkawn shakawn na matu Lewi masha 4,000 hpe san tawn da ai. Dai kaw na marai 288 gaw, “Yehowa hpe mahkawn mangoi na hpaji lu” nna shaman shakyang da ai ni re.​—⁠1 Hkawhkam Labau 23:5; 25:7.

⁵ Mahkawn mangoi ai hte yungwi nsen gaw, nawku htingnu ap nawng ai poi hta mung ahkyak ai daw hta lawm ai. Chyum Laika hta ndai hku tsun da ai: “Ya pahtau dum ai ni hte mahkawn mangoi ai ni gaw, rau Yehowa a chyeju dum let shi hpe shakawn kungdawn nna, pahtau, shup sheng, dum ai baw kaga hte nsen langai sha hte Yehowa hpe shakawn kungdawn nna, . . . Yehowa a hpung shingkang gaw, Karai Kasang a nta hta hpring ka-up nga ai.” Ndai mabyin masa gaw, Israela ni a makam masham hpe kade daram shangang shakang ya na hpe shingran yu u.​—⁠2 Hkawhkam Labau 5:13, 14; 7:6.

6. Yerusalem hta Nehemia mung agyi galaw ai shaloi, yungwi hte mahkawn mangoi na matu shi gara hku hkyen lajang wa ai kun?

⁶ Yerusalem bunghku ni hpe bai gawgap na matu, Israela ni hpe woi awn wa ai Nehemia mung, madum sumpyi dum na matu hte mahkawn mangoi na matu, Lewi masha ni hpe san tawn da ai. Shanhte a ka manawt ai lam gaw, bunghku ni hpe ap nawng ai poi galaw ai shaloi, grau nna kabu shangun ai. Nehemia gaw, “mahkawn mangoi let nawt hkawm ai hpung kaba lahkawng” hpe san tawn da ai. Dai hpung lahkawng gaw, mare bunghku ntsa n bung ai maga hku lam hkawm nna, nawku htingnu hte ni dik htum bunghku kaw shanhte myi man chyaw hkrum ai du hkra, mahkawn mangoi ma ai. Shanhte a nsen gaw grai ngoi ai majaw, masha ni gaw tsan tsan kaw nna pyi na lu ma ai. (Nehemia 12:27, 28, 31, 38, 40, 43) Yehowa gaw shi hpe myit rawt let mahkawn shakawn nga ai ni a nsen hpe na ai shaloi, shi grai myit pyaw na hpe anhte kam mai ai.

7. Hkristan ni a nawku dawjau lam hta mahkawn mangoi ai gaw ahkyak ai daw hta lawm ai lam Yesu gara hku madun wa ai kun?

⁷ Yesu aten hta mung, yungwi gaw teng man ai nawku dawjau lam a ahkyak ai daw hta lawm nga ding yang re. Masha labau a ahkyak dik ai shana hta hpa byin wa ai hpe myit yu ga. Yesu gaw shi a sape ni hte Madu A Shana Shat Sha Poi galaw ngut ai hpang, shanhte gaw Yehowa hpe mahkawn mangoi let shakawn ma ai.​—⁠Mahte 26:30 hpe hti u. 

8. Tsa ban langai na Hkristan ni gaw Karai Kasang hpe mahkawn ni hte shakawn ai kasi hpe gara hku madun wa ai kun?

⁸ Tsa ban langai na Hkristan ni gaw, Karai Kasang hpe mahkawn mangoi ai lam hta, kasi kaja madun wa ai. Hkristan ni gaw Israela ni hte n bung ai. Israela ni gaw Yehowa hpe nawku dawjau na matu nawku htingnu de sa ai. Hkristan ni gaw nta ni hta sha hkrum zup ma ai. Shanhte a nta ni gaw nawku htingnu zawn tsawm htap nna yu kaba na zawn n raitim, hpunau ni gaw myit rawt let mahkawn  mangoi ma ai. Kasa Pawlu gaw Hkristan Hpunau ni hpe ndai hku tsun wa ai: “Nanhte shada da sharin achyin, matsun madun hkat nga mu. Shakawn kungdawn ga, mahkawn mangoi ai ga ni, Wenyi hte seng ai laka ga ni hte nanhte a kraw lawang hta Karai Kasang hpe chyeju dum ai hte mahkawn mangoi nga mu.” (Kolose 3:16, JCLB) Anhte a mahkawn buk na mahkawn ni gaw, “chyeju dum ai hte mahkawn mangoi” na matu hkrak sha re. Dai mahkawn ni gaw, “sadi ai hte myitsu ai mayam” anhte hpe hkyen lajang ya ai aten dep lusha hta lawm ai.​—⁠Mahte 24:45.

9. (a) Anhte a bat shagu zuphpawng ni hte zuphpawng kaba ni hta kabu gara let mahkawn mangoi na matu nkau mi hpa majaw hting nut chye ai kun? (b) Yehowa hpe anhte gara hku mahkawn shakawn ra ai kun? Kadai woi awn ra ai kun? (Ndai sumhpa shawng na sumla hpe yu u.)

⁹ Mahkawn hkawn na matu hting nut chye ai lam nkau mi gaw hpa ni rai kun? Na a dinghku (sh) htung lai hta mahkawn n hkawn ai baw byin chye ai. Shing n rai, TV, radio kaw na yungwi ninghkrin ni a mahkawn hpe madat ai majaw, nang mahkawn ai hte shanhte mahkawn ai hpe shingdaw dat yang, kaya ai (sh) myit htum ai lam ni hkamsha chye ai. Raitim, Yehowa hpe mahkawn mangoi let nawku dawjau na matu anhte yawng hta lit nga ai. Dai majaw, mahkawn buk hpe shatsaw nna lang u. Baw hpe sharawt da nna myit rawt let mahkawn mangoi u. (Ezra 3:11; Shakawn 147:1 hpe hti u.) Nawku htingnu law law hta, mahkawn ga si ni hpe madun na matu TV ni nga taw sai. Dai gaw nsen pru nna mahkawn na matu anhte hpe karum ya ai. Mungdan mahkawn hkawn ai lam gaw, myitsu salang ni a matu Mungdan Magam Jawng hta daw langai hku nna lawm wa ai lam mung myit lawm hpa re. Dai gaw, zuphpawng ni hta mahkawn hkawn ai shaloi myitsu salang ni woi awn na matu kade daram ahkyak ai hpe madun dan ai.

10. Nsen ja ja hte mahkawn na matu hkrit tsang yang hpa hpe myit dum ra ai kun?

¹⁰ Masha law law gaw nsen ja ja hte mahkawn hkawn na matu hkrit tsang chye ai.  Hpa majaw nga yang, shanhte a nsen grai ja mat na (sh) shanhte a nsen n kaja ai ngu shadu ai majaw re. Raitim, ndai lam hpe myit yu ga. Ga shaga ai shaloi, “anhte nga manga hte hta, malaw maga gaw kataw ai hkrai rai nga ga ai.” Raitim, anhte ga n shaga ai sha n nga ai. (Yaku 3:2) Dai zawn sha, anhte a nsen n hkum tsup ai rai timung, Yehowa hpe shakawn mahkawn n mahkawn ai sha nga na n re.

11, 12. Anhte a mahkawn mangoi ai lam gara hku rawt jat lu na kun?

¹¹ Gara hku mahkawn na hpe n chye ai majaw, anhte hkrit tsang chye ai. Raitim, lawu na lam ni gaw, mahkawn hkawn ai lam hta rawt jat wa na matu anhte hpe karum ya ai lam nkau mi re. *

¹² Nsa hpe gara hku jaw hkra sa na hpe sharin la yang, n-gun dat let nsen ja ja hte nang mahkawn hkawn lu na re. Myihprap wan n-gun gaw, wan pu htoi na matu atsam jaw lu ai zawn, nang nsa sa ai lam gaw mahkawn hkawn ai (sh) ga shaga ai shaloi na a nsen hpe n-gun atsam jaw lu ai. Mahkawn hkawn ai shaloi, nang ga shaga ai hta grau nna nsen ja ging ai. (Grau nna chye mayu yang, Theocratic Jawng Hpaji Kaw Nna Akyu Lu La U (BU) laika buk a laika man 181-184 hta na “Nsa Sa Ai Lam Hpe Atsawm Hkang Ya U” hpe yu u.) Yehowa hpe nawku dawjau ai ni, mahkawn shakawn ai shaloi “kabu gara jahtau” na matu Chyum Laika hta tsun da ai.​—⁠Shakawn 33:1-3.

13. Tinang hkum tinang kam ai myit grau nga ai hte gara hku mahkawn lu na lam hpe sang lang dan u. 

¹³ Dinghku nawku hta (sh) nang hkrai sha raitim ndai lam ni hpe shakut yu u: Anhte a mahkawn buk kaw nna nang ra ai mahkawn langai hpe lata u. Ga yan ni hpe nsen ja ja hte tinang hkum tinang kam ai nsen hte hti u. Dai nsen hte sha, ga yan langai kaw nna ga si yawng hpe nsa kalang sha sa nna tsun u. Ngut yang, dai nsen hte sha dai ga yan hpe mahkawn u. (Esaia 24:14) Na nsen gaw n-gun grau nga wa nna dai gaw kaja ai lam byin shangun ai. Kaya ai (sh) hkrit tsang ai lam ni byin na matu ahkang hkum jaw.

14. (a) N-gup hpe grau dam lada hkra hpaw ai gaw, mahkawn hkawn ai hta gara hku karum ya lu ai kun? (“ Mahkawn Hkawn Ai Hpe Rawt Jat Hkra Galaw Lu Ai Lam” ngu ai ga baw hpe yu u.) (b) Nsen hte seng ai manghkang ni hpe tawt lai lu na matu karum ya lu ai gara hpaji jaw ai lam ni nga ai kun?

¹⁴ N-gun rawng ai mahkawn mangoi ai nsen nga na matu, na a n-gup hta shara dam lada ra ai. Dai majaw, mahkawn hkawn ai shaloi, nang ga shaga yang tsun ai hta na n-gup hpe grau dam lada hkra hpaw da ra ai. Raitim, na a nsen gaw grai tsaw taw ai (sh) nsen kya taw ai  ngu hkamsha yang nang hpa galaw ra ai kun? Nang hpe karum ya lu ai lam nkau mi hpe Theocratic Jawng Hpaji Kaw Nna Akyu Lu La U (BU) laika buk a laika man 184 hta lawm ai “Hkrak Re Ai Manghkang Ni Hpe Tawt Lai Lu Ai Lam” hpe yu u.

15. (a) 2016 ning ladu hkrum poi hta hpa hpe ndau shana wa ai kun? (b) Mahkawn buk hpe bai gram lajang ra ai lam nkau mi gaw hpa ni rai kun?

¹⁵ 2016 ning ladu hkrum poi lung ai ni gaw, Uphkang Hpung kaw nna Hpunau Stephen Lett gaw Yehowa Hpe “Kabu Gara Let Mahkawn Mangoi” ngu ai mahkawn buk nnan hpe ndau shana ai shaloi grai kabu ma ai. Mahkawn buk nnan ra wa ai lam langai gaw, Mungkan Nnan Ga Gale Chyum Laika hpe bai gram lajang da sai majaw re ngu nna Hpunau Lett sanglang dan wa ai. Mungkan Nnan Ga Gale Chyum Laika hta ga si nkau hpe galai shai kau ra ai majaw, mahkawn ga si ni hpe mung galai shai kau ra ai. Hkaw tsun bungli hte gawng malai jahpu hte seng ai mahkawn nnan ni hpe mung bai jat bang da ai. Dai sha n-ga, mahkawn gaw nawku dawjau ai lam hta ahkyak ai majaw, Uphkang Hpung gaw kaja ai mahkawn buk hpe dip shapraw mayu ai re. Dai majaw, mahkawn buk nnan a makawp gaw Mungkan Nnan Ga Gale Chyum Laika hte bung ai.

16, 17. Mahkawn buk nnan hta galai shai ai lam nkau gaw hpa rai a ta?

¹⁶ Mahkawn buk hpe jailang ai shaloi grau loi hkra, mahkawn ni hpe shi ga baw hte shi garan da ya ai. Ga shadawn, shawng na mahkawn 12 gaw Yehowa a lam rai nna, hpang na mahkawn 8 gaw Yesu a lam hte gawng malai  jahpu a lam ni re. Mahkawn buk a shawng nnan hta mung, ga baw yawng hpe jahpan galaw da ya ai. Dai gaw, hpunau langai shawa mungga a matu mahkawn lata ai shaloi karum ya lu ai.

¹⁷ Masha yawng myit masin mahkra hte mahkawn hkawn lu hkra, mahkawn ni hpe grau nna lachyum dan leng hkra ga si nkau mi hpe galai shai da sai. Ga amyu nkau a mahkawn buk nnan ni hta, nau n lang mat sai ga si ni hpe galai shai kau ai. “Na A Salum Hpe Makawp Maga U” ngu ai mahkawn a ga baw hpe “Anhte A Salum Hpe Makawp Maga Ga” ngu nna galai shai kau ai gaw grau htap htuk mat ai. Hpa majaw kun? Lai wa sai aten hta, marai langai ngai gaw dai mahkawn hkawn ai shaloi, shi gaw kaga ni hpe hpa galaw ra ai lam tsun nga ai hte bung taw ai. Dai gaw, bat shagu zuphpawng ni, ninghtawn zuphpawng ni hte ginwang zuphpawng ni sa lung ai masha nnan, myit lawm ai masha, asak kaji ai ni hte nauna ni a matu n htap htuk ai baw byin chye ai. Dai majaw, ga baw hte ga si ni hpe galai shai da sai.

18. Mahkawn buk nnan kaw nna mahkawn ni hpe anhte hpa majaw sharin la ra ai kun? (Lawu matsing hpe yu u.)

¹⁸ Yehowa Hpe “Kabu Gara Let Mahkawn Mangoi” mahkawn buk kaw nna mahkawn law malawng gaw, akyu hpyi ai hte bung ai. Dai mahkawn ni gaw, nang gara hku hkamsha nga ai lam Yehowa hpe tsun dan na matu karum ya ai. Kaga mahkawn ni gaw, “tsawra ai myit rawng wa na hte kaja ai amu bungli” galaw na matu anhte hpe shadut ya ai. (Hebre 10:24) Anhte gaw mahkawn ni a ga si ni, lahkrip nsen ni hte yungwi nsen ni hpe chye mayu ga ai. Anhte galaw lu ai lam langai gaw, nsen rim da ai hpunau nauna ni mahkawn da ai mahkawn ni hpe madat ai hku nna re. Dai nsen rim da ai mahkawn hpe jw.org hta lu mai sai. Mahkawn ni hpe nta kaw nang shaman ai shaloi, dai mahkawn ni hpe hkam sha lam lawm nna tinang hkum tinang kam ai myit hte mahkawn na matu sharin la lu na re. *

19. Nawku htingnu hta nga ai ni yawng Yehowa hpe gara hku nawku dawjau lu ai kun?

¹⁹ Mahkawn hkawn ai gaw nawku dawjau ai lam a ahkyak ai daw re ai hpe dum ra ai. Dai gaw Yehowa hpe anhte tsawra ai lam hte anhte a matu galaw ya ai lam yawng hpe chyeju dum ai lam madun dan ai re. (Esaia 12:5 hpe hti u.) Nang myit rawt let mahkawn hkawn ai gaw, kaga ni hpe mung dai hte maren mahkawn na matu n-gun jaw nga ai re. Asak kaji ai raitim, kaba ai raitim, teng man ai lam hta masha nnan (sh) grai na sai raitim, nawku hpung hta nga ai ni yawng gaw dai lam hku nna, Yehowa hpe nawku dawjau mai ai. Dai majaw, myit masin mahkra hte mahkawn na matu n mai hting nut ai. “Yehowa hpe mahkawn mangoi mu” ngu nna shakawn kungdawn sara tsun wa ai lam matsun hpe hkan sa ga. Kabu gara let mahkawn mangoi ga.​—⁠Shakawn 96:1.