Yehowa Hpe Kamhpa Nna Asak Hkrung U
“Na a myit masin mahkra hte Yehowa hpe kam hpa nga u; Na a chye chyang ai nyan hta hkum shamyet shanat nga u.”—GA SHAGAWP 3:5.
1. Anhte yawng shalan shabran lam hpa majaw ra ai kun?
ANHTE yawng gaw shalan shabran ai lam ra nga ga ai. Hpa majaw nga yang, anhte a prat hta, myit ru myit tsang lam ni hte myit daw myit hten lam ni hpring nga ai majaw re. Machyi makaw hkrum ai majaw, asak kaba wa ai majaw (sh) tsawra ai marai langai ngai n nga mat ai majaw, mayak mahkak ni hkrum chye ai. Anhte kaw nna nkau mi gaw, kaga ni a jahte tam ai lam hkrum nga ma ai. Dai hta n-ga, anhte a makau grup-yin hta nga ai masha ni gaw, dawsa ai lam ni grau grau nna galaw nga ai. Dai zawn, “yak la ai aten” gaw, “hpang jahtum na nhtoi” hta asak hkrung nga ai hpe sakse madun nna, lani hte lani mungkan nnan de grau grau nna ni wa ai hpe madun dan nga ai. (2 Timohti 3:1) Yehowa a ga sadi ni hpring tsup wa na matu grai na hkra la nga ra nna, yakhkak ai lam ni mung grau nna hkrum nga ai rai na re. Rai yang, shalan shabran lam gara kaw nna lu la mai na kun?
2, 3. (a) Habaku hte seng nna anhte hpa hpe chye lu ai kun? (b) Habaku laika hpe anhte hpa majaw hkaja ra ai kun?
Habaku 2:2.
2 Dai ga san ni a mahtai lu na matu Habaku Laika hpe hkaja yu ga. Chyum Laika hta, Habaku hte seng ai lam ahkri ahkrai hpe n tsun da tim, shi a Laika gaw anhte hpe teng sha n-gun jaw lu ai. Habaku a amying gaw, “Aja Awa Ahpum Ai” ngu lachyum nga ai. Yehowa gaw anhte hpe shalan shabran ya nna, alum ala ahpum da ai hpe tsun ai re. Shing nrai, anhte gaw shi hpe ngang ngang jum da ai hpe mung tsun ai re. Habaku gaw, Karai Kasang hpe ga shaga nna ga san nkau hpe san wa ai. Yehowa gaw, Habaku hpe shan lahkawng ga shaga hkat ai lam hpe ka da na matu, shung ya wa ai. Hpa majaw nga yang, dai kaw nna anhte akyu lu la na hpe Yehowa chye ai majaw re.—3 Myit daw nga ai myihtoi hte Yehowa ga shaga ai labau gaw, Habaku hte seng nna chye lu ai lam yawng re. Raitim, shi a laika buk gaw, “shawng e ka da ai lam shagu” a adaw achyen rai nna, Karai a Mungga hta lawm ai. Dai majaw, “anhte shakut sharang nga lu nna, Chyum laika ni a shangwi shapyaw ai ga a majaw myit mada shara nga lu” ga ai. (Roma 15:4) Habaku Laika gaw, anhte langai hpra hpe gara hku karum ya lu ai kun? Yehowa hpe kamhpa ai ngu ai lachyum gaw hpa re ai hpe chye na matu anhte hpe karum ya lu ai. Ngut nna, anhte gara manghkang mi hkrum tim, myit simsa lam lu na matu karum ya ai.
Yehowa Kaw Akyu Hpyi U
4. Habaku hpa majaw myit daw wa ai kun?
4 Habaku 1:2, 3 hpe hti u. Habaku gaw grai yakhkak ai aten hta asak hkrung wa ai. Shi a makau grup-yin hta nga ai masha ni gaw nhkru n kaja nna, grai mazut ma ai. Dai gaw shi hpe grai yawn hkyen shangun ai. Shi mu ai shara shagu hta, Israela masha ni gaw, grai mazut ai hku, n tara ai hku shada da kanawn mazum nga ma ai. ‘Dai zawn n kaja ai lam ni galoi aten hta htum mat na kun? Yehowa lama ma galaw ya na matu hpa majaw aten grai na nga ai kun?’ nga nna Habaku myit ai. Karum shingtau n nga ai zawn shi hkamsha ai. Dai majaw, lama ma galaw ya na matu Yehowa kaw karum hpyi ai. Yehowa gaw, shi a masha ni hpe lanu lahku lam n nga sai (sh) lama ma n galaw ya sai ngu nna, Habaku myit yang myit na re. Nang mung dai zawn hkamsha ga ai kun?
Ntsen ai myit ni hte myit tsang lam ni Yehowa hpe tsun na matu n hkrit ra
5. Habaku laika kaw nna anhte hpa sharin la lu ai kun? (Sumhpa shawng na sumla hpe yu u.)
5 Dai zawn ga san ni hpe Habaku san ai gaw, Yehowa hte shi a ga sadi ni hpe n kam ai majaw kun? N re. Habaku gaw, shi a ntsen ai myit hte manghkang ni hpe karum ya na matu, Yehowa hpe karum hpyi wa ai. Dai gaw, shi a myit mada lam hpe asum n jaw ai sha, Yehowa hpe naw kamhpa nga ai lam madun ai re. Habaku gaw, myit tsang nna myit shuk nga ai. Yehowa gaw lama ma galaw na matu hpa majaw la nga nna, nhkru ai lam ni hpe hpa majaw byin na ahkang jaw da ai lam shi n chye na ai. Shi a myit tsang ai lam ni hte seng nna ka da na matu, Yehowa shadut ya ai gaw, anhte hpe ahkyak ai lam sharin ya mayu ai majaw re. Anhte a ntsen ai myit ni hte myit tsang ai lam ni Yehowa hpe tsun dan na matu, n hkrit ra ai. Anhte gara hku hkamsha ai lam shi hpe tup hkrak tsun dan na matu hte akyu hpyi na matu anhte hpe Shakawn 50:15; 62:8) Ga Shagawp 3:5 hta anhte hpe ndai hku n-gun jaw da ai: “Na a myit masin mahkra hte Yehowa hpe kam hpa nga u; Na a chye chyang ai nyan hta hkum shamyet shanat nga u.” Habaku gaw shi a prat hta dai ga ni hpe hkan sa wa ai.
saw shaga da ai. (6. Akyu hpyi na matu hpa majaw ahkyak ai kun?
6 Habaku gaw, shi a manang hte kawa re ai Yehowa hpe kamhpa wa nna, shi hte nihtep hkra galaw wa ai. Shi a masa hte seng nna myit tsang tim, shi hkrai hparan na matu n shakut wa ai. Dai sha n-ga, shi a hkamsha lam ni hte myit tsang lam ni hpe akyu hpyi nna tsun dan wa ai. Anhte a matu kaja ai kasi ningli re. Yehowa gaw akyu hpyi ga hpe madat ya ai wa re. Anhte a myit tsang ai lam ni shi hpe tsun dan ai hku nna, akyu hpyi ai hku nna shi hpe kamhpa ai lam madun na matu anhte hpe saw shaga da ai. (Shakawn 65:2) Dai hku galaw ai shaloi, anhte a akyu hpyi ga hpe Yehowa gara hku mahtai jaw ai hpe chye wa na re. Shi anhte hpe shalan shabran ya nna, lam matsun ya ai shaloi, alum ala hte shi ahpum da ai ngu hkamsha na re. (Shakawn 73:23, 24) Anhte gara manghkang mi hkrum tim, anhte a masa hpe shi gara hku mu mada ai lam chye na hkra, anhte hpe shi karum ya na re. Yehowa hpe kamhpa ai lam madun lu ai lam ni kaw nna kaja htum lam langai gaw, shi kaw akyu hpyi ai hku nna re.
Yehowa A Ga Madat U
7. Habaku gaw shi a myit tsang ai lam ni hpe tsun dan ai shaloi, Yehowa gara hku bai htang wa ai kun?
7 Habaku 1:5-7 hpe hti u. Habaku gaw shi a myit tsang ai lam ni hte seng nna Yehowa hpe tsun dan ngut ai hpang, Yehowa galaw ya na lam hpe chye nna mau mat na re. Tsawra myit nga ai kawa langai zawn, Yehowa gaw Habaku gara hku hkamsha nga ai hpe chye na ya ai. Habaku yakhkak hkrum nga nna, shi hpe karum hpyi ai lam shi chye ai. Dai majaw, Yehowa gaw Habaku hpe masin n pawt wa ai sha, kade n na yang sadi n dung ai Yuda masha ni hpe tara jeyang sana lam tsun dan wa ai. Yuda masha ni hpe ari jaw sana lam, Yehowa tsun dan wa ai shawng nnan na masha gaw Habaku rai na re.
8. Yehowa a mahtai gaw Habaku hpe hpa majaw myit shuk shangun ai kun?
8 Yehowa gaw shi bai htang na matu jin jin rai nga ai lam, Habaku hpe sang lang dan wa ai. Nhkru n kaja ai, grai mazut ai Yuda masha ni hpe ari jaw sana re. “Nanhte a prat” hta byin na ngu tsun ai hpe yu yang, Habaku a makau grup-yin hta Israela masha ni naw nga ai aten (sh) Habaku asak naw hkrung nga ai aten laman hta, Yehowa tara jeyang na ngu ai hpe madun taw nga ai re. Yehowa a mahtai gaw, Habaku myit mada da ai hku n re. Babelon masha ni re ai Hkalde masha ni gaw grai mazut ma ai. Shanhte gaw Yehowa a tara hpe chye ai Yuda masha ni hta grau nna pyi nhkru ma ai. Rai yang, Yehowa gaw shi a masha ni hpe ari jaw na matu, grai mazut nna hpara shaje hpe nawku ai amyu hpe hpa majaw akyu jashawn wa ai kun? Dai gaw, Yuda masha ni a matu grau nna yakhkak shangun wa na lam rai nga ai. Nang gaw Habaku rai yang, gara hku hkamsha na kun?
9. Gara ga san ni hpe Habaku naw san wa ai kun?
9 Habaku 1:12-14, 17 hpe hti u. Habaku gaw shi a makau grup-yin hta nga ai nhkru ai masha ni hpe ari jaw na matu, Babelon masha ni hpe Yehowa akyu jashawn sana hpe chye tim, myit shuk nga ding yang re. Raitim, shagrit shanem let Yehowa hpe matut nna kamhpa na matu, myit dawdan da ai. Yehowa gaw shi a matu “Lunghkrung” naw re ai ngu shi tsun wa ai. (Tara Jahprang 32:4; Esaia 26:4) Habaku gaw, Karai Kasang a tsawra myit hte matsan dum myit hpe matut nna kam ai. Dai majaw, Yehowa hpe ndai zawn ga san ni san na matu n hkrit wa ai: Yuda masha ni grau nna jamjau hkrum na matu Yehowa hpa majaw ahkang jaw ai kun? Hpa majaw kalang ta n galaw wa ai kun? Chyahtum Chyalai Madu gaw shara shagu hta nga ai nhkru ai lam ni hpe hpa majaw hkam sharang nna, “atsin sha” yu nga ai kun? Yehowa gaw, “Chyoi pra ai Wa” rai nna, nhkru nhkra ai lam hpe n yu lu ai “san seng ai myi tu ai wa” re.
10. Anhte mung kalang lang Habaku zawn hpa majaw hkamsha chye ai kun?
10 Kalang lang, anhte mung Habaku zawn hkamsha chye ai. Anhte gaw Yehowa a ga madat ai. Anhte a myit mada lam hpe shangang shakang ya na matu, Chyum Laika hti ai, hkaja ai, Yehowa hpe kamhpa ai. Uhpung kaw nna sharin ya ai lam ni hpe anhte madat hkam la ai shaloi, shi a ga sadi ni hte seng nna mung na lu ai. Raitim, ‘yakhkak ai lam ni galoi aten hta htum mat na kun?’ ngu nna gaw anhte naw myit nga ga ai. Habaku matut galaw wa ai lam kaw nna sharin la ga.
Yehowa Galaw Ya Na Hpe La Ra
11. Habaku gaw hpa galaw na matu myit dawdan da ai kun?
11 Habaku 2:1 hpe hti u. Yehowa hte ga shaga ai lam gaw Habaku hpe myit simsa lam jaw ai. Dai gaw, Yehowa galaw ya na lam hpe la nga na matu shi hpe karum ya ai. “Du na ra ai shani du hkra, ngai atsin sha hti nga na” ngu nna shi a dawdan lam hpe Habaku bai tsun wa ai. (Habaku 3:16) Karai Kasang a sadi dung ai kaga mayam ni mung, Yehowa galaw ya na lam hpe myit galu let matut nna la nga ma ai. Anhte mung dai hte maren galaw lu ai hpe shanhte a kasi ningli gaw sakse madun nna, anhte hpe n-gun lu shangun ai.—Mihka 7:7; Yaku 5:7, 8.
Yehowa galaw ya na lam hpe myit galu let la nga ra nna, hkra machyi ai lam ni hpe aten du yang shamai ya na hpe mung kamhpa ra
12. Habaku kaw nna anhte hpa sharin la lu ai kun?
12 Habaku a dawdan lam kaw nna hpa sharin la lu ai kun? Langai, anhte hta hpa manghkang mi nga tim, Yehowa kaw akyu hpyi ai lam hpe n jahkring kau ra ai. Lahkawng, Yehowa a Mungga hte uhpung kaw nna jaw ai lam matsun ni hpe hkan sa ra ai. Masum, Yehowa galaw ya na lam hpe myit galu let la nga ra ai. Hkra machyi ai lam ni hpe aten du yang shamai ya na hpe mung kamhpa ra ai. Habaku hpe anhte kasi la na nga yang, myit simsa lam lu nna, hkam sharang lu na re. Anhte hpa manghkang mi hkrum tim, myit galu nga na matu hte ngwi pyaw nga na matu anhte a myit mada lam gaw karum ya ai. Anhte a sumsing Kawa gaw teng sha galaw ya na hpe kam ga ai.—Roma 12:12.
13. Habaku hpe Yehowa gara hku shalan shabran ya ai kun?
13 Habaku 2:3 hpe hti u. Yehowa galaw ya na lam hpe la nga na ngu ai Habaku a dawdan lam hpe Yehowa ra sharawng ai. Chyahtum Chyalai Madu gaw, Habaku a yakhkak ai lam ni hpe tup hkrak chye ai. Dai majaw, kade n na yang, shi a ga san ni hpe mahtai jaw ya sana lam tsun dan nna, tsawra myit hte shalan shabran ya wa ai. Kade nna yang, shi myit simsa lam lu sana re. “Myit galu nna, ngai hpe kamhpa u. Aten grai na yang pyi, na a akyu hpyi ga hpe ngai mahtai jaw na” ngu nna Habaku hpe Yehowa tsun wa ai hte bung ai. Yehowa gaw shi a ga sadi ni hpring tsup hkra galaw ya na aten hpe dawdan da ngut chyalu re ai lam Habaku hpe tsun dan wa ai. Dai majaw, matut nna la nga na matu Habaku hpe shi n-gun jaw wa ai. Hpang jahtum hta, myihtoi wa gaw myit daw ai lam ni n nga sai.
Yehowa a matu kaja htum galaw na ngu nna hpa majaw dawdan da ai kun? (Laika pang 14 hpe yu u)
14. Manghkang ni hkrum ai shaloi hpa galaw na matu dawdan da ra ai kun?
14 Yehowa galaw ya na lam hpe anhte la nga ra nna, shi a ga hpe atsawm madat ra ai. Rai yang, anhte hta hpa manghkang mi nga tim, shi hpe kamhpa ai majaw, myit simsa lam lu na re. Karai Kasang anhte hpe n tsun dan ai “aten hte ahkying ladaw” hpe myit maju n jung na matu, Yesu anhte hpe n-gun jaw wa ai. (Kasa 1:7) Kaja htum ahkying hpe Yehowa chye ai lam anhte kam ra ai. Dai majaw, anhte asum n jaw ai sha, shagrit shanem nna, myit galu let Karai Kasang hpe kamhpa ging ai. Ndai laman hta, anhte a aten hpe hpaji rawng ai hku akyu jashawn nna, Yehowa hpe kaja htum nawku dawjau ra ai.—Marku 13:35-37; Galati 6:9.
Yehowa Gaw Shi Hpe Kamhpa Ai Ni Hpe Asak Jaw
15, 16. (a) Habaku laika hta hpa ga sadi ni hpe mu lu ai kun? (b) Dai ga sadi ni gaw anhte hpe hpa sharin ya ai kun?
15 Yehowa ndai hku ga sadi jaw da ai: “Ding hpring ai wa chyawm gaw, shi a kam sham ai hte hkrung nga lu” nna, “Yehowa a hpung shingkang hpe chye chyang ai lam, mungkan ting pri rai na ra ai.” (Habaku 2:4, 14) Yehowa hpe kamhpa nna myit galu ai ni hpe, htani htana asak jaw na nga nna ga sadi jaw da ai.
16 Habaku 2:4 hta mu lu ai ga sadi gaw grai ahkyak ai majaw, Kasa Pawlu gaw shi a laika hta masum lang lakap da ai. (Roma 1:17; Galati 3:11; Hebre 10:38) Anhte hta hpa mayak mahkak mi nga tim, Yehowa hpe kamhpa na nga yang, shi a ga sadi hpring tsup wa na hpe mu lu na re. Htawm hpang hta lu la na myit mada lam hpe Yehowa myit maju jung shangun mayu ai.
17. Yehowa hpe anhte kamhpa na nga yang, hpa galaw ya na ngu ga sadi jaw da ai kun?
17 Hpang jahtum nhtoi hta asak hkrung nga ai anhte yawng a matu, grai kaja ai n-gun jaw ga ni hpe Habaku laika hta mu lu ai. Ding hpring nna, Yehowa hpe kamhpa ai masha yawng hpe n htum n wai asak jaw na, nga nna Yehowa ga sadi jaw da ai. Dai majaw, anhte hta gara manghkang, gara myit tsang ai lam ni nga tim, Karai Kasang hpe matut nna kamhpa nga ga. Anhte hpe madi shadaw ya nna hkye hkrang la na ngu, Habaku laika hku nna Yehowa ga sadi jaw da ai. Mungkan hpe uphkang na matu shi a Mungdan hpe gaw de da ngut chyalu re ai majaw, aten hpe myit galu let la nga nna, shi hpe kamhpa na matu anhte hpe n-gun jaw da ai. Karai a Mungdan npu hta, mungkan ting gaw ngwi pyaw simsa ai masha ni hte hpring wa na re.—Mahte 5:5; Hebre 10:36-39.
Yehowa Hpe Kamhpa Nna Ngwi Pyaw Nga U
18. Yehowa a ga ni gaw Habaku hpe gara hku akyu shabyin ya ai kun?
18 Habaku 3:16-19 hpe hti u. Yehowa a ga ni gaw, Habaku hpe grai akyu shabyin ya ai. Lai wa sai aten hta, sadi dung ai masha ni hpe Yehowa galaw ya ai mauhpa lam ni hpe Habaku myit sumru wa ai. Dai majaw, Yehowa hpe kamhpa ai lam ngang kang wa ai. Kade n na yang, Yehowa galaw ya sana hpe shi kam wa ai. Kalang lang, shi yakhkak hkrum tim, shalan shabran lam lu la ai. Habaku hta ntsen ai myit n nga sai. Yehowa shi hpe hkye la na hpe tsep kawp kam wa ai. Daw kaji 18 hta shi tsun da ai ga gaw, Chyum Laika hta anhte hti lu ai kaw nna, kamhpa ai lam hpe madun dan ai kaja htum ga langai re. Chyum Hpaji Du nkau mi gaw, dai ga hpe ndai hku lachyum hpaw ma ai: “Madu hta kabu gara gumlawt na; Karai Kasang hta sharawng awng let kawan hkawm na nngai.” Anhte a matu grai n-gun lu ai lam rai nga ai. Yehowa gaw htawm hpang a matu, mauhpa ga sadi ni jaw da ai sha n-ga, kade nna yang dai ga sadi ni hpring tsup wa sana lam anhte hpe chye shangun ai.
19. Habaku zawn, Yehowa kaw nna shalan shabran lam gara hku lu la na kun?
19 Habaku laika kaw nna anhte sharin la lu ai manu dan dik htum lam gaw, Yehowa hpe kamhpa na matu re. (Habaku 2:4) Yehowa hpe matut nna kamhpa na matu, shi hte hku hkau lam ngang kang ra ai. Dai majaw, (1) Shi hpe akyu hpyi nna, anhte a myit tsang ai lam ni hpe tsun dan ra ai. (2) Chyum Laika kaw nna Yehowa tsun ai lam ni hpe atsawm madat ra nna, uhpung kaw nna lam matsun hpe mung hkan sa ra ai. (3) Ga sadi hpring tsup wa na matu, Yehowa galaw ya na aten hpe sadi dung nna myit galu let la ra ai. Dai gaw Habaku galaw wa ai lam ni re. Yehowa hte shawng nnan ga shaga ai shaloi, shi grai myit daw nga tim, jahtum hta gaw, n-gun lu la nna ngwi pyaw simsa mat ai. Habaku hpe anhte kasi la na nga yang, sumsing lamu na anhte a Wa Yehowa gaw, alum ala hte anhte hpe ahpum da nna shalan shabran ya na re. Ndai nhkru ai mungkan hta anhte lu la mai ai kaja htum shalan shabran lam rai nga ai.